Read Kpelle Zasua 3 Bible Online

Zasua 3 - Kpelle bible

Zasua 3

¹Zasua da Eezuɛ-ŋai kélee dí dímù sìɣe a ɣele-ƃɔ̂i dí kúla Akesia ƃɛ́i díƃûui è kɛ̀ naai dí lí Zɔdiŋ Ya-leei lá ƃɛ́i dí díƃûui pù naa díkɛ maa kpɛ̂ŋ kɛ̀ a gɛ́ɛ dí ǹyái tíyeŋ.

²Ɣele kûu saaƃa tɛ̀ɛ pôlu ma, dímɛi-ƃelai dí lì m̀ûu-ŋai su dîyɛɛ dîai,

³“Kà Yâwɛɛ Káɣâlai ŋɔkono-tee gãlai kâa Zâla láa soŋ-ƃelai yêei, ka kákpîŋ kpɛtɛ ká lɛ́ɛ dípôlu.

⁴Nya ƃe pâi gɛ̂i ká berei kɔ́lɔŋ, kpɛ́ni fêi, káfe niî tɛɛ ní la a bɔlɔ. É máŋ kɛ́ tí, fɛ̂ɛ kákɛ a kámaa kúlaa gono-tee gãlai ma a kɔ́ɔ-loai wála saaƃa. Káfe lɛ̀ɣɛ gɔlɛ ma.”

⁵Nya ƃe Zasua è mò ǹûai dîa ǹyɛɛi, “Ka kákpîŋ maa wáa, kpɛ́ni fêi, Yâwɛɛ a pâi tínaa mɛni maa pɔlɔ-pɔlɔɔ kɛ̂i kásama.”

⁶Nya ƃe Zasua é mò Zâla láa soŋ-ƃelai dîa ǹyɛɛi, “Ká gono-tee gãlai síɣe ká tɛ́ɛ ǹûai túɛ pere.” Nya ƃe dí gãlai sîɣe dí tɛ́ɛ ǹûai túɛ pere.

⁷Nya ƃe Yâwɛɛ è mò Zasua ma ǹyɛɛi, “Sâa ŋa pâi ímaa tɛ̂i Eezuɛ-ŋai kélee sáma a gɛ́ɛ dí gɔ́lɔŋ a gɛ́ɛ berei ŋá kɛ̀ la Mose pôlui, bere nɔ́ ƃé ŋa pâi kɛ̂i la í pôlu.

⁸M̀ɛni ma, m̀ó zâla láa soŋ-ƃelai dîa liî a gono-têe gãlai yɛ̂ɛ dîa, ‘Kà lì Zɔdiŋ Ya-leei lá, ka pîlaŋ ǹyái su ká tɔ́ɔ naa.’ ”

⁹È kɛ̀ tí, Zasua è mò Eezuɛ-ŋai dîa ǹyɛɛi, “Ka pá ƃɛ́ ká Káɣâlai Yâwɛɛ wóo mɛ́ni.

¹⁰Ǹyɛɛ dîai, ‘É síɣe sâa ma ka pâi gɔ́lɔniî a gɛ́ɛ gɛ-ɣele-ma Ɣalai káa kásama, ǹyaŋ vé pâi fɛɣɛ̂i Keena-ŋai, Ita-ŋai, Iva-ŋai, Pɛriza-ŋai, Giga-ŋai Amɔra-ŋai da Zɛbusa-ŋai kpɛ̂i kátuɛ.

¹¹Ka gáa, zâla láa soŋ-ƃelai da pâi Kúnuu-namui nyíi gáa a ǹɔii kélee ŋɔkâloŋ ŋɔkono-tee gãlai siɣêi dí tɛ́ɛ la kútuɛ é lɛ́ɛ la zu dí pîlaŋ Zɔdiŋ Ya-leei su.

¹²M̀ɛni ma, ka kpakolo tɛi-tɛ́i kúla Eezuɛ-ŋai dísuu puu káo feerɛi su.

¹³Zâla láa soŋ-ƃelai kɛ̀ liî a Yâwɛɛ nyíi gáa a ǹɔii kélee ŋɔkâloŋ ŋɔkono-têe gãlai, da pîlaŋ Zɔdiŋ Ya-leei su, zu a pâi têei é tɔ́ɔ m̀éla veerɛ ma yɛ̂ɛ pɛ́rɛ-kâŋ.’ ”

¹⁴Tãi ǹûai dí kùla la díƃûu-ŋai su a gɛ́ɛ dí lí Zɔdiŋ Ya-leei pôlui, zâla-laa soŋ-ƃelai dí góno-têe gãlai sîɣe dí tɔ́ɔ la dítuɛ. Ǹyái è kɛ̀ kpɔ́ a vɛ́ɛ maa tãi tí,

¹⁵kpɛ́ni fêi, è kɛ̀ a sí-sãa ƃá kula tãi zâla-láa soŋ-ƃelai pîlaŋɔɔ Zɔdiŋ Ya-leei su kɛ̀ a góno-tee gãlai,

¹⁶ǹyai è kpèra Ɣilînii. Ǹyai nyíi-ŋai kɛ̀ kulai Zɔ̂díŋ Ya-leei ŋûa-perei è tɔɔ yɛ̂ɛ pɛ́rɛ kâŋ ƃé kwaa kôyaa ma kɛ́ɛ yɛ̂ɛ Adaŋ daa-lêei nyíi gáa Zaretaŋ kɔlɛ mai. Ǹyaŋ nyíi kɛ́ yeniî Ǹyúo Saai ma perei, è kpèra Ɣilînii. È kɛ̀ tí, ǹûai dí tɛ̀ɛ Zɛleko kɔlɛ ma.

¹⁷Zâla láa soŋ-ƃelai Yâwɛɛ ŋɔkono-tee gãlai è kɛ̀ díyêei, dí kɛ̀ tɔɔni ǹyái sâmai ǹɔii kpâlai ma Eezuɛ-ŋai díkɛ̀ tɛ̀ɛ. Dí lɛ̀ɛ tɔɔni naa Eezuɛ-ŋai kélee dí ǹyái tíyeŋ.