Read Kpelle Zasua 5 Bible Online

Zasua 5 - Kpelle bible

Zasua 5

¹Amɔra kaloŋ-ŋai kɛ̀ Zɔdiŋ Ya-leei pôlu vóloi liî-pere da Keena kaloŋ-ŋai kɛ̀ Mɛditɛrenia Yuoi kpono ma pere kɛ́ɛ da mɛni a gɛ́ɛ Yâwɛɛ a Zɔdiŋ Ya-leei kpála Eezuɛ-ŋai pere da tɛɛ naai, dí yao kpɔ́ a ŋ̀ánaa. Dílii fé ŋɔ́nɔ wɔ́lɔ kpele ní Eezuɛ-ŋai dîa.

²Maa tãi tí su Yâwɛɛ è mò Zasua ma ǹyɛɛi, “Kɔni ƃela-ŋa siɣe díkpɛtɛ a ƃóa-ŋa í Eezuɛ-ŋai sinaai sée la kpono mɛi.”

³Nya ƃe Zasua è kɔni ƃela-ŋa sìɣe é díkpɛtɛ ƃóa-ŋa é Eezuɛ-ŋai sée la kpono mɛi Geƃia Aralo.

⁴Ǹûai kɛ́ɛ da kula Ize lɔii sui, zinâai kélee dí kɛ̀ a díseɛɛ kpono mɛi. Kɛ́lɛ zinâa-nɛyãai dí dímaa sɔlɔ ƃô vɛ̃ɛ-kpâlaŋ su góraŋ buu náaŋ yée mui, dífe kɛ́ ní a díseɛɛ kpono mɛi. Ǹyaŋ maa tãi tí gbakolo-ŋai kɛ̀ a gɔ́ kɔ́-ƃelai nyíi kùla Ize lɔii sui dí sàa vɛ̃ɛ-kpâlaŋ su, kpɛ́ni fei, dífe díyee see ní Yâwɛɛ wóo mu, yɛ̂ɛ berei è mò lai a gɛ́ɛ dífe pâi serîi zí-sãa kpɛ́tɛ lɔii lɛ́lɛɛ tí ma, nyíi è góno tèe la dínûa pɔlɔ-ŋai yêei.

⁷Zinâa-nɛyãai dí dímaa sɔlɔ ƃô vɛ̃ɛ-kpâlaŋ sui, dia-ni ƃé dínâŋ-ni pɔ́ɔ ŋá sìɣe. Zinâa-nɛyãai ŋí ƃé Zasua è dísèe kpono mɛi, kpɛ́ni fêi, dífe kɛ́ ní a díseɛɛ kpono mɛi.

⁸Zinâai seéɛ kpono mɛi, dí lɛ̀ɛ m̀ûui su é lɛ́ɛ la zu dí ƃálo.

⁹Nya ƃe Yâwɛɛ è mò Zasua ma ǹyɛɛ, “Ŋ̀umɛ tûai ǹûai díkɛ̀ gɛ̂i káai Ize lɔii sui, ŋa sâa gélee kulâi káŋɛi.” Mɛni ma dí gwaai tí ma láa sèe a Geega.

¹⁰Tãi Eezuɛ-ŋai dí lì la díƃûui su Geegai, dí dɛɛ-mɛi kûui mɛi kâa a ŋ̀áloŋ ŋɔfólo puu káo náaŋ ɣele a ɣele wûlii tãi Zɛleko tiŋ-tiŋ.

¹¹Maa ɣele ƃɔ́ɔi ǹûai dí ǹɔii ninai ma mii-sɛŋ da mii. Dí dɛ́-sɛŋ féu kpoloi mii, é pɛ́lɛ mii-sɛŋ kpua-kpua da-ni-ŋa dîa.

¹²Ǹyaŋ ǹûai dí ǹɔii ninai maa mii-sɛŋ da mii lai, manâi è kpèra toɔ̂ɔ ma. Kɛ́lɛ dí nâa kɛ̀ Keena lɔii su mii-saai miî.

¹³Zasua kɛ́ɛ kɛ̀ Zɛleko kɔlɛ mai è ŋ̀uŋ mu sìɣe é kpakolo tɔnɔ káa gɛ́ ƃò tɔɔni ƃóa-sɔ̂kpɔ kɛ́ ƃó ǹyêei. Nya ƃe Zasua è m̀arê kɛ̀ ǹyɛɛ m̀ai, “Íkaa a kúƃelai ma-pere, kpaa kúkpɔara-ƃelai da?”

¹⁴Nya ƃe ǹalôŋ è mò ǹyɛɛ mai, “Ŋ́gaa a Yâwɛɛ ŋɔkɔ́ kɔ́-ƃelai mɛi nuu, ŋa nâa pá.” È kɛ̀ tí, Zasua é tóo gɔ́ɔ mu é m̀ó ma ǹyɛɛi, “Lé ƃé ŋánuu-namui a ŋ̀wɛ̂lii ŋɔtíi kɛ́-nuui é gɛ̂i?”

¹⁵È kɛ̀ tí, Yâwɛɛ ŋɔkɔ-kuluƃa-ŋai mɛi-nuui è mò Zasua ma ǹyɛɛi, “Íkɔlɔi kúla íkɔɔ ŋá, kpɛ́ni fêi, ƃɛ́i ƃa tɔɔni naai, naa maa waâi.” Ǹyaŋ Zasua è gɛ́ tí.