Read Kpelle Zasua 6 Bible Online

Zasua 6 - Kpelle bible

Zasua 6

¹Zɛleko-ƃelai dí Zɛleko galai lá tɛ̀, kpɛ́ni fêi, Eezuɛ-ŋai díkɛ̀ pâi. Ǹûai kélee dí lɛ̀ɛ Zɛleko daai dí galai lá tɛ́. Núu da fa lɔ́ ní kpaa é kúla naa.

²Ǹyaŋ Yâwɛɛ è mò Zasua ma ǹyɛɛi, “Gáa, ŋa Zɛleko tɛɛ ípɔ, ŋɔkâloŋ da ŋɔkɔ́-kulaƃa-ŋai.

³Ka gɔkûluƃa-ŋai kélee ka pâi tinaniî Zɛleko taai ma tɔnɔ. Ka pâi gɛ̂i tí a fólo kûu lɔ́ɔlu mɛi da.

⁴Ka kɛ̀ tînanii daai ma, ka Gono-têe gãlai síɣe, sâla láa soŋ-ƃela lɔ́ɔlu mɛi feerɛ dí kɛ́ ƃò gãlai túɛ, ƃála-mĩla turu kɛ́ ƃò díyêei tɛi-tɛ́i. Ŋ̀ele kûui mɛi feerɛ ɣelei, ka tínaŋ daa-lêei ma gîei lɔ́ɔlu mɛi feerɛ, zâla láa soŋ-ƃelai díkɛ dúrii fɛ̀ɛ.

⁵Zâla láa soŋ-ƃelai da pâi dúrii fɛ̂ɛi a ŋ̀óo su kɛ́tɛ. À kɛ̀ tí, kákelee ka láɣi a gîe. À kɛ̀ tí, galai Zɛleko mai, a pâi wôloi, gɛ̀ ní gɔ́-kûluƃa-ŋai kélee da pâi tɛ̂i daai su a kîrɛ.”

⁶Nya ƃe Zasua é zâla láa soŋ-ƃelai tòli ǹyɛɛ dîai, “Ka gono-tee gãlai síɣe, zâla láa soŋ-ƃela lɔ́ɔlu mɛi feerɛi tí dúrii káa díyêei dí tɔ́ɔ gãlai ŋɛ́i túɛ.”

⁷Nya ƃe è mò ǹûai dîa a gɛ́ɛ da kɛ̀ tînanii daa-lêei ma, gɔkûluƃa-ŋai gbulu tɔ̂nɔ é kɛ́ dúru fɛ́ɛ-ƃelai ŋɛ́i túɛ.

⁸Yɛ̂ɛ berei Zasua è mò la ǹûai dîai, zâla láa soŋ-ƃelai m̀ála-mĩla turii è kɛ̀ díyêei, dí tɔ̀ɔ gãlai ŋɛ́i túɛ díkɛ dúrii fɛ̀ɛ, dîai gono-têe gãlai è kɛ̀ díyêei, díkɛ ƃò dípôlu.

⁹Gɔ́ kɔ́-ƃelai gbulu tɔ̂nɔ è kɛ̀ dúru fɛ́ɛ-ƃelai ŋɛ́i túɛ, gbulu tɔ̂nɔ kɛ́ ƃò gãlai pôlu-pere. Zâla láa soŋ-ƃelai dí kɛ̀ nɔ́ dúrii fɛ̂ɛi dí kɛ́ tìnaŋ daa-lêei ma.

¹⁰Kɛ́lɛ é lɛ́ɛ pâi kɛ̂i tí, Zasua è mò ǹûai dîa ǹyɛɛi, “Káfe lâɣi, káwoo é tɛ́ é lɛ́ɛ la zu ŋ̀elei ŋa mò la kâa kálaɣii, ká láɣi.”

¹¹È kɛ̀ tí, Zasua è gɛ̀ dí tínaŋ a Yâwɛɛ ŋɔkono-tee gãlai daai ma tɔnɔ. Nya ƃe dí lène pôlu, dí nyíi m̀ûui su.

¹²Nya ƃe Zasua è mù sìɣe a ŋ̀ele-wâla pɛpɛi é m̀ó zâla láa soŋ-ƃelai dîa a gɛ́ɛ dí Yâwɛɛ Ŋɔkono-têe gãlai síɣe.

¹³È kɛ̀ tí, zâla láa soŋ-ƃelai lɔ́ɔlu mɛi feerɛi díturu-ŋai è kɛ̀ díyêei díkɛ ƃò Yâwɛɛ ŋɔkono-tee gãlai túɛ díkɛ̀ vɛ̀ɛ. Gɔ-kulu ƃa-ŋai díkɛ̀ dítuɛ, ǹyaŋ gɔ-kuluƃa-ŋai kɛ̀ pôlu perei, díkɛ̀ Yâwɛɛ ŋɔkono-tee gãlai pôlu, zâla láa soŋ-ƃelai díkɛ̀ nɔ́ dúruii fɛ̂ɛi.

¹⁴Maa ɣele ƃɔ́ɔi dí tìnaŋ daai ma tɔnɔ dí lí pôlu m̀ûui su. Dí gɛ̀ tí a fólo lɔ́ɔlu mɛi da.

¹⁵Ŋ̀elei ǹɔ́ɔlu mɛi feerɛ ɣelei, dí dímu sìɣe a ɣele wâla pɛ̀pɛi dí tínaŋ daai ma lɔ́ɔlu mɛi feerɛ. Tãi màa-ŋuŋ ká ŋí dí tinaŋ la daai ma lɔ́ɔlu mɛi feerɛi.

¹⁶Ǹûai tinaŋɔɔ daai ma ǹɔ́ɔlu mɛi feerɛ ɣelei, zâla-laa soŋ-ƃelai dí dúru-ŋai fɛ̂ɛ Zasua ǹyɛɛ ǹûai dîai, “Ka láɣi, kpɛ́ni fei, Yâwɛɛ aâ daai ŋí tɛ́ɛ kúpɔ,

¹⁷Ǹyaŋ Yâwɛɛ a daai ŋí tɛ́ɛ kúpɔ a gɛ́ɛ kú ǹûai kélee páa, kú zu sãa kélee su kara a gɛ́ɛ díkɛ a sama-sã̂a Yâwɛɛ mɛni ma. Diai nɔ́ pâi lɛɛ̂i dîa ƃa ŋ̀úlu-wulu kɛ́-nɛnii Leea da ŋɔpɛ́rɛi mu-ƃelai, kpɛ́ni fêi, ǹyaa ƃé kúmɛni maa kpɛɛ-ƃelai lôo.

¹⁸Ká fé zãai ŋí da siɣe nyíi-ŋai kwa dísu karâai. Kà gɛ̀ tí, a pâi pâi a mɛni kpɔ̂lu da su kâra kúpɔ.

¹⁹Kɛ́lɛ sɛŋ kɛ́ɛ yɛ̂ɛ káne, gôo, ƃara sɛŋ-folo-ŋa, da kɔli díkaa a Yâwɛɛ pɔ́ɔ. Ka pâi liî a dîa Yâwɛɛ ŋɔsɛŋ-laai kɛ́-kwaai ma.”

²⁰Zasua è mò zâla-laa soŋ-ƃelai dîa a gɛ́ɛ dí dúruii fɛ́ɛ. Ǹûai kɛ́ɛ da dúruii wóo mɛnii, dí làɣi a zu kɛ́tɛ, galai kɛ̀ daai mai è wólo, gɔkûluƃa-ŋai dí tɛ́ daai su a kîrɛ dí naa síɣe.

²¹Daai siɣeɛ́ɛ dîyɛɛi, dí zu sãai kélee kara. Dí gbakolo-ŋai, ǹɛyâai ǹyaŋkpa-ŋai, ǹúu-pɔlɔ-ŋai, ǹiŋa-ŋai, m̀ála-ŋai da ŋ̀wɛlɛ-sôo lonii kélee pàa.

²²Nya ƃe Zasua è mò mɛni maa-kpɛɛ kpakolo feerɛi dîa ǹyɛɛi, “Ka lí ŋ̀ulu-wulu kɛ́-nɛnii Leea ŋɔpɛ́rɛi mu ká pá la da ŋɔpɛ́rɛi mu-ƃelai kélee yɛ̂ɛ berei ká kákono-tee la ǹyêei,”

²³Nya ƃe gbakolo feerɛi dí lì Leea ŋɔpɛ́rɛi mu dí pá la, ǹâŋ, ǹee, zaaƃɔlɔ da ǹûai kélee kɛ̀ ŋɔpɛ́rɛi mui. Dí lì a Leea da ŋɔpɛ́rɛi mu-ƃelai kélee Eezuɛ-ŋai dí ƃûui kɔlɛ ma.

²⁴Gɔ-kuluƃa-ŋai dí daai kêreŋ da zu sãa kélee. Zãai nɔ́ dífe dí kêreníi ƃa gánei, gôoi, m̀ara-sɛŋ folo-ŋai da gɔli-ŋai. Dí lì a dîa Yâwɛɛ ŋɔsɛŋ láai kɛ́-pɛrɛi mu.

²⁵Kɛ́lɛ Zasua fé ŋ̀ulu-wulu kɛ́-nɛnii Leea pàa ní da diai kélee kɛ̀ ŋɔpɛ́rɛi mui, kpɛ́ni fêi, ǹyaa ƃé mɛni maa kpɛ́ɛ-ƃelai lòo ǹyaa Zasua è dí tɛɛi. Leea da ŋɔnûai dí lɛ̀ɛ Eezuɛ é lɛ́ɛ la zu dí gɔlɔi ŋí pɔ̃yɛ.

²⁶Gɛ́ɛ Zasua-ni da Zɛleko wóloi, Zasua è daa pîleŋ ŋá nàɣaŋ ǹyɛɛ, “Ǹúui kélee pâi Zɛleko-taai tɔɔ́ pôlu kɔ́ɔ pîlanii, ǹóŋ-surɔŋ maa-ŋuŋ a pâi saâi, ǹyaŋ ǹúui pâi kɔ̂i a gɛ́ɛ é ziɣãŋ lá kpoŋ kpɛtɛi, ǹóŋ-surɔŋ gbɛɛ-ŋai a pâi saâi.”

²⁷Ǹyaŋ Yâwɛɛ è kɛ̀ Zasua kɔlɛ. Zasua maa tûŋ è tàa-taa ǹɔii tí gwaa kélee.