Read Kpelle Tɛsɛlôniɛŋ Veerɛi 1 Bible Online

Tɛsɛlôniɛŋ Veerɛi 1 - Kpelle bible

Tɛsɛlôniɛŋ Veerɛi 1

¹Laa-ti-maa káa kulâi Pɔ̂ɔ da Seveenɔ é pɛ́lɛ Temete ni yêei gɛ̀ lí Tɛsɛlonaika-ŋai Díkôrai-toli-kpɔŋ pɔ́. Ǹûai ŋí díkaa a Ɣâla Nàŋ-nuui da Kúnuu-namui Zîsɛ Kôrai dínûa.

²Ƃɛlɛ-sêe da lii-sêe dí kɛ́ káyêei é kúla Kúnâŋ Ɣâla yêei da Kúnuu-namui Zîsɛ Kôrai.

³Ŋánûa, fɛ̂ɛ nɔ́ ku sɛɣɛi-fei tɛɛ Ɣâla pɔ a ɣele kélee ka mɛni ma, yɛ̂ɛ berei maa nɛɛ̂i ku gɛ lai, kpɛ́ni fêi, kálaa-lai a ƃɔlɔ̂i a zu kɛ́tɛ. Ŋ̀wɛli-kɛ-maai gáa káyêei kákîe-ni mɛni mai, gɛ ƃɔlɔ.

⁴Mɛni ma kúa kpîŋ kwa yoŋka tèe ka mɛni ma Ŋ̀âla-toli-kpɔŋ-ŋai su káfɔrɔ-fɔrɔi mɛni ma. Kwa yoŋka tèe ǹaa-lai gáa káyêei kákpɔara-ƃelai samai mɛ̂ni ma é pɛlɛ mɛni-kpɔ̂lu-ŋai ka tɛɛ̂i zui dîa.

⁵Nyíŋí káa a sêre-woo Ɣâla ŋɔtɔ̃yâ mɛni ŋa-téɛɛi mɛni ma a gɛ́ɛ ká kɛ́ a ǹûai dímaa nɛ̃ɛ̂i Ɣâla ŋɔkâloŋ-laai mɛni ma, nyíi kákaa mɛni-sôli kâai m̀ɛni mai.

⁶Ɣâla a nɛ̀ kpɔ́ a tɔ̃yâ a gɛ́ɛ fɛ̂ɛ nɔ́ diai da mɛni-kpɔ̂lu làa kâai, e dímɛni-kpɔ̂lui bɔɔ-tee kula a mɛni-kpɔ̂lu.

⁷A pâi fii-tɔɔ tɛɛ̂i kwa ka-ni kúpɔ kúai mɛni-kpɔ̂lu e lâa kûai. A pâi nyíŋi kɛ̂i a tãi Kúnuu-namui Zîsɛ da ŋɔkéla kpaya-kpayai da pâi kulâi la Ɣâla-taa a ŋɔŋ-soŋ,

⁸a gɛ́ɛ dí tɔ̂ŋ-kpɛ́ diai dîa dífe Ɣâla kɔ́lɔŋ da diai dífa díyee see Kúnuu-namui Zîsɛ ŋɔtuŋ lɛ́lɛɛi mui.

⁹Da pâi wɔlɔ-wɔlɔ su-kara sɔlɔ ƃôi a tɔŋ-kpɛ́-maa, dí dísu kula Kúnuu-namui ma, dí kúla ŋɔfólo-laa kɛ́tɛi ŋɔwála-wâla laai su.

¹⁰Tãi a pâ la a maa-ɣelei ti a gɛ́ɛ ŋɔnûai dí ŋɔfólo-laai maa tɛ díƃâa kɛ́ m̀ai, kákelee ka pâi kɛ̂i dí sama, kpɛ́ni fêi, ka láa a kúsêre-faai.

¹¹Nyíŋi mɛni ma kwa Ɣâla fɛlîi a ɣele kélee kámɛni ma. Kwa Kúɣâlai fɛlîi a gɛ́ɛ kákɛ a ǹûai dímaa nɛɛ̂i dòli è m̀o a kaai m̀aa mɛni ma. Tɔɔ é kákili-ŋa sia mɛni lɛ́lɛɛ-ŋai kélee da ǹaa-lai ŋɔtíi ŋ̀aa-see kɛ́ a ŋɔwála-walai.

¹²Ǹyaŋ bere sîi ŋí ƃé Kúnuu-namui Zîsɛ láai ŋɔfólo-laai m̀aa a pâi tɛ́i la kásârai, káaŋ káfolo-laai maa é tɛ́ zarâi, yɛ̂ɛ berei Kúɣâlai da Kúnuu-namui Zîsɛ Kôrai díƃɛlɛ-sêei káa lai.