Read Kpelle Tɛsɛlôniɛŋ Veerɛi 2 Bible Online

Tɛsɛlôniɛŋ Veerɛi 2 - Kpelle bible

Tɛsɛlôniɛŋ Veerɛi 2

¹Ŋánûa, é pîlaŋ Kúnuu-namui Zîsɛ Kôrai pá-mɛni ma da kúŋa tɛɛ gîe ma a gɛ́ɛ kúkɛ gɔlɛ ḿâ, ŋa kákpera fei

²a gɛ́ɛ kálii fé kpɛ̃liŋ, kpaa máŋ káfe yao à kɛ̀ kà mɛ̀ni a gɛ́ɛ Kúnuu-namui pá tãi aâ seri, a tãi kúkɛ lonoi lai, kpaa máŋ ku kúwoo tɛ̀ɛ, kpaa máŋ kú kɔlɔ tɛ̂ɛ a gɛ́ɛ é ŋ̀elei lɛ́ Kúnuu-namui è pà lai.

³Káfe nɛ̀ɛ naa núu da é kápɛlɛ pere-sii kélee da su. Kpɛ́ni fêi, maa-ɣelei tí fé pâi pâi fɛ̂ɛ núu da-ni dí tɔ́ɔ Ɣâla ma fulɔi. Ɣâla é ŋ̀wana-lɔ̂ɔ-nuui lɛ́ nyíi fɛ̂ɛ nɔ́ zu é karai.

⁴Maa-nuui a gbîŋ kɛ̀tɛ gɛ tɔɔ zãâi kélee dîa da dísiɣe a ɣâlai, a gɛ́ɛ e see Ŋ̀âla-pɛrɛ kɛ́tɛi ŋɔsee-sɛŋ ŋá e gbîŋ lɛ a Ɣâla.

⁵Ve lɛɛ ni kákili ŋá a gɛ́ɛ tãi ŋá kɛ̀ la kákɔlɛi, ŋá nyíŋi ƃò kâa?

⁶Kɛ́lɛ, ka gɔ́lɔŋ zɛŋ gáa zonîi pôlu nâai, a gɛ́ɛ ŋɔtãi à sèri é lɛ́.

⁷Kpɛ́ni fêi, ŋwana-lɔ̂ɔ ŋɔloo-mɛnii káa nâa tíi kɛ̂i; ǹúui nɔ́ a ŋ̀wana-lɔɔ̂i soŋ pôlui a pâi gɛ̂i ti é lɛ́ɛ la zu maa-nuui su é kara.

⁸Ɣâla a pâi ŋ̀wana-lɔ̂ɔ-nuui lɛ̂i, Kúnuu-namui Zîsɛ é bàa a Ǹɛ̃wo, é zu kara a ŋɔpâi.

⁹Ŋ̀wana-lɔ̂ɔ-nuui pá-mɛni, nyíi gáa Sêtɔŋ ŋɔtûa-perei sui, a pâi kɛ̂i a wála-wala kélee da wôya-ŋɛi-kɛ-maa-ŋa é pɛ́lɛ wôya-mɛni kpaya-kpaya dîa.

¹⁰Ŋwana-lɔ̂ɔ-sii kélee a pâi kɛ̂i ǹyêei nuu-pɛlɛɛ su diai mɛni ma pâi saâi. Kpɛ́ni fêi, dífe faa ni a gɛ́ɛ dí dɔ̃yâi wɛli dí ƃalo.

¹¹Mɛni ma Ɣâla a nuu-pɛlɛ-mɛni kpanaŋɔɔ tɛ́ɛ dímɛi a gɛ́ɛ dí laa a mɛni-ŋai dífe a dɔ̃yâi,

¹²a gɛ́ɛ dí tɔ̂ŋ pu diai dîa dífe laa ni a dɔ̃yâi, kɛ́lɛ, díkɛ lii-nɛ̃ɛ kula sɔnyɔ̂ŋ sui.

¹³Kɛ́lɛ, ŋánûa, gáa a sɛŋ a gɛ́ɛ fɛ̂ɛ ku sɛɣɛi-fei tɛɛ Ɣâla pɔ a ɣele kélee kámɛni ma, káai kákaa a Kúnuu-namui ŋɔwɛli-kɛ-maa-ƃelai. Kpɛ́ni fêi, Ɣâla a kálɛ gɔ́ɔ pîlanii a gɛ́ɛ ká ƃálo M̀ɔlêŋ ŋɔmaa-waa-laai sârai da ǹaa-lai gáa káyêei dɔ̃yâi sui.

¹⁴Nyíŋi mɛni ma e kátòli kútuŋ lɛ́lɛɛi sârai a gɛ́ɛ ka Kúnuu-namui Zîsɛ Kôrai ŋɔfólo-laai sɔlɔ ƃó.

¹⁵Mɛni ma, ŋánûa, ka tɔɔ a gbanaŋɔɔ ká zɛŋ-lɛɛi sóŋ a gbanaŋɔɔ nyíi ku dɛ̀ɛ kápɔ kúlono-wooi su kpaa máŋ kɔlɔ-pɔ̃yɛɛ sui.

¹⁶Tɔɔ Kúnuu-namui Zîsɛ Kôrai ǹyaa kpîŋ da Kúɣâla-taa-naŋ, nyíi kúwɛ̀lii, é wɔlɔ-wɔlɔ ŋa-nɛnɛ tɛ̀ɛ kúpɔ da kili-kɛ-zu lɛ́lɛɛ ƃɛlɛ-sêe sârai.

¹⁷É kálii ŋá nɛnɛ é dísu kpanaŋ tíi lɛ́lɛɛ kélee da wóo lɛ́lɛɛ kélee su.