Read Kpelle Tɛsɛlôniɛŋ Veerɛi 3 Bible Online

Tɛsɛlôniɛŋ Veerɛi 3 - Kpelle bible

Tɛsɛlôniɛŋ Veerɛi 3

¹Gbɛɛ ŋái, ŋánûa, ka Ɣâla fɛli kúmɛni ma a gɛ́ɛ Kúnuu-namui ŋɔwooi é táa-taa a maa félaa ŋɔfólo-laai maa é tɛ́, yɛ̂ɛ berei è kɛ̀ la kásamâi.

²A gɛɛ ŋɔ́nɔ ku kúla ŋ̀wana-lɔ̂ɔ-ƃelai da sɔnyɔ̂ŋ-ƃelai yêei. Kpɛ́ni fêi, laa-la fe núu kélee yêei.

³Kɛ́lɛ, Kúnuu-namui sã́âi; a pâi kákponôi kpananîi é kámɛi káa zɔnyɔ̂ŋ-nuui yêei.

⁴Laa-la káa kúyêei Kúnuu-namui kponôi kámaa-mɛni ma a gɛ́ɛ mɛnii ku nɛ̀ káa a gɛ́ɛ ka gɛ́i, kákaa gɛ̂i, ǹyaŋ ka pâi kɛ̂i nɔ́ gɛ̂i.

⁵Kúnuu-namui é kálii-ŋai tenîŋ tɔ́ɔ Ɣâla ŋɔwɛli kɛ́-maai ma da Kôrai ŋɔlii-kpelei.

⁶Mɛni ma, ŋánûa, kwa m̀ôi káa Kúnuu-namui Zîsɛ Kôrai láai su a gɛ́ɛ ká kasu kula káƃarâŋ-nuu kélee ma nyíi va tíi kɛ̀, va tela pìlaŋ mɛni-ŋai pôlu ku nɛ̀ kâai.

⁷Kpɛ́ni fêi, kákelee ká gɔ́lɔŋ berei fɛ̂ɛ ka kúpɔkɔŋ lai; kúfe kɛ́ ni a nyɛ̃-nyɛ̃ŋ-ƃela tãi ku kɛ̀ la kásamâi.

⁸Kúfe núu da kélee ŋɔmii-sɛŋ mii ni nyíi kúfe vela-fei kɛ́ ni, kɛ́lɛ, ku tíi kɛ̀ a kpini da fólo a gbanaŋɔɔ a gɛ́ɛ kúfe kátɔnɔ kpîŋ kpàaŋ.

⁹È kɛ̀ a sɛŋ a gɛ́ɛ ku mii-sɛŋ mii káyêei kúfe vela-fei kɛ̀, kɛ́lɛ, ku mii-sãai fela-fei kɛ̀ a gɛ́ɛ kúmɛni-kɔɔŋ-maa tɛ́ɛ kápɔ kútûa-perei su ka kúpɔkɔŋ.

¹⁰Kpɛ́ni fêi, tãi ku kɛ̀ la máŋ kásamâi, ku mɛnii ŋí ƃò kâa: À kɛ̀ núu da a wàla tíi kɛ́ ve ǹáa mii.

¹¹Kpɛ́ni fêi, kwa mɛnîi a gɛ́ɛ nyɛ̃-nyɛ̃ŋ-ƃela da-ni díkaa kásama dí ƃo nɔ́ a mɛni-kɔri-ƃela, dífa ŋ̀wɛli dí tíi kɛ́.

¹²Núu-sii-ŋai ti kwa mò dîa ku dília-woo ƃo Kúnuu-namui Zîsɛ Kôrai kponôi a gɛ́ɛ dí dímɛi saa dí díkpîŋ-tíi kɛ́ dífulu-laai mɛni ma.

¹³Ŋánûa, káfii fe kpɛ̀ɛ mɛni lɛ́lɛɛ kɛ́ɛ ma.

¹⁴À kɛ̀ núu da kélee fe faa ni a gɛ́ɛ é ǹyée see mɛni-ŋai mu ku mò gɔlɔi ŋí sui, maa-nuui é lɛ́ɛ kákili ŋá, ka dîa-ni káfe nɛ̃ɛ. Ka gɛ́ ti a gɛ́ɛ maa-nuui e ŋumɛ.

¹⁵Káfe gáa a kákpɔara-nuu, kɛ́lɛ, ka nia-woo ƃó yɛ̂ɛ káƃarâŋ-nuu.

¹⁶Kúnuu-namui nyíi lii-sêe káa ǹyêei ǹyaa kpîŋ é lii-sêe tɛɛ kápɔ a tãi kélee pere-sii kélee su. Kúnuu-namui é kɛ́ kákelee kákɔlɛ.

¹⁷Ńyãa Pɔ̂ɔ, ńyãa ƃe ǹaa-ti-maai ŋí pɔ̃yɛ a ŋ́gbîŋ-yee. Nyíŋi ƃa ŋákɔlɔ-ŋai kélee lɛ̀; ŋákɔlɔ-pɔ̃yɛ-perei ká ŋí.

¹⁸Kúnuu-namui Zîsɛ Kôrai ŋɔƃɛlɛ-sêei é kɛ́ kákelee káyêei.