Read Kpelle Temete Maa-ŋuŋ 3 Bible Online

Temete Maa-ŋuŋ 3 - Kpelle bible

Temete Maa-ŋuŋ 3

¹Ŋ̀óo-ŋai ŋí díkaa a tɔ̃yâ: À kɛ̀ núu da a ŋ̀wɛ̂lii é kɛ́ a Kôrai-toli-kpɔŋ ŋɔtii-mɛi-nuu, gɛ̀ ní gáa tíi lɛ́lɛɛ wɛ̂lii.

²Fɛ̂ɛ Kôrai-toli-kpɔŋ ŋɔtii-mɛi-nuu é kɛ́ a ǹúui ǹáa lɛ́lɛɛ káa m̀arâa lá, nɛnî tɔnɔ nɔ́ kɛ́ ƃo ǹyêei, gɛ́ gbîŋ mɛi kâa, gíli ŋá ponoɔ, dûa-pere lɛ́lɛɛ, gɛ núu soŋ a ǹɛ́lɛɛ, sɛŋ-lɛ-tare kɛ́ ƃo ǹyêei.

³Vè kɛ̀ a lɔɔ-kpele-nuu, kpaa máŋ a ŋɛi-tɛ-nuu, kɛ́lɛ, é kɛ́ a maa yeŋɔɔ. Vè kɛ̀ a laa-saa-nuu, kpaa máŋ é kɛ́ a sɛŋ-kao wɛli-nuu.

⁴Fɛ̂ɛ maa-nuui é gbîŋ pɛrɛi mu-ƃelai mɛi káa a ǹɛ́lɛɛ é ŋɔnîa-pɛlɛɛi tɔ́ɔ a woo-mɛni da ƃaa kɛ́-maa pere-sii kélee su;

⁵kpɛ́ni fêi, à kɛ̀ núu a wala pɔ̂ri gbîŋ-pɛrɛi mu-ƃelai mɛi káâi a ǹɛ́lɛɛ, a pɔri Ɣâla ŋɔtóli-kpɔŋ mɛi-kaa-pere kɛ̂i leŋ?

⁶Maa-nuui fé kɛ̀ a ǹúui nyíi ǹíi maa-faleŋɔɔ nàa fé niî tûa ni, à wàla kɛ́ ti, gɛ̀ ní maa-nuui a pâi gbîŋ kɛ́tɛ̂i a yoŋka, ǹyaŋ gɛ̀ ní Dɛ̂ƃele a pâi ǹyée mɛi ɣálêi;

⁷fɛ̂ɛ kili-ŋa-sia lɛ́lɛɛ é kɛ́ maa-nuui ti ŋɔkɔlɛ-ma-ƃelai dîa m̀ɛni ma, à wàla kɛ́ ti ǹáa nyɔ́mɔɔ a pâi siâi e píli Dɛ̂ƃele ŋa.

⁸Ǹyaŋ bere nɔ́ ƃe máŋ gáa la, fɛ̂ɛ díkɛŋ-ŋai dí dímɛi kaa, dífe kɛ̀ a ǹûai dínɛŋ káa díla feerɛ, dífe kɛ̀ a lɔɔ-kpele-ƃela, dífe kɛ̀ a sɛŋ-kao-wɛli-ƃela;

⁹fɛ̂ɛ dí naa-lai ŋɔloo-mɛnii kélee soŋ a díkili-ŋa-siai kélee.

¹⁰Tɔɔ dí disu kɔɔ̂ŋ máŋ dia fúlɔi; à kɛ̀ da díkpîŋ lɛ̀ a gɛ́ɛ sɔnyɔ̂ŋ fé dîa, gɛ̀ ní da pɔri kɛ̂i a díkɛŋ-ŋa.

¹¹Nɛyâai máŋ fɛ̂ɛ dí díkpîŋ mɛi kaa, dífe kɛ̀ a laa-karaa-ƃela, kɛ́lɛ, dí kɛ́ a nuu sãa-ŋa mɛni kélee su.

¹²Díkɛŋ-ŋai fɛ̂ɛ dí nɛnî tɔnɔ́-tɔnɔ́ kúla nɔ́, dí dínîa-pɛlɛɛi mɛi káa da dípɛrɛi mu-ƃelai a ǹɛ́lɛɛ;

¹³kpɛ́ni fêi, diai da tíi kɛ̀ a ǹɛ́lɛɛ yɛ̂ɛ díkɛŋ-ŋai da díkpîŋ tɔɔ̂i lɛ̀lɛ díƃarâai sama, dí laa-la kɛ́tɛ sɔlɔ ƃô máŋ naa-lai su nyíi gáa Zîsɛ Kôrai kponôi.

¹⁴Kili-kɛ-zu káa ńyêei a gɛ́ɛ ŋá pá kápɔ a maa-félaa, kɛ́lɛ, ŋ́gaa deniŋ-tɔɔ mɛni-ŋai ŋí pɔ̃yɛɛ̂i kápɔ naa a gɛ́ɛ

¹⁵à kɛ̀ ḿba-mɛnii à tòo pôlu, ká gɔ́lɔŋ berei ka pɔri tuâi la Ŋâla-pɛrɛ mu-ƃelai sama nyíi gáa a vulu-laa-Ɣalai ŋɔtóli-kpɔŋ, nyíi gáa a dɔ̃yâi soŋ-wuru da gɔ́ɔ pîlanii.

¹⁶Kwa mò a gɛ́ɛ Kúɣâla-mɛnii ŋɔloo-mɛnii kɛ́tɛ̂i a tɔ̃yâ: E gbîŋ lɛ̀ núu-kpune kɛ-pere su, Ɣâla e fâa Ŋɔmɔ̂leŋ ma, Ɣâla-taa kela-ŋa dí gáa, nûa dí maa-mɛni ƃò ǹɔii-ŋai su, ǹɔii-su-ƃelai dí láa la, Ɣâla é dɛ́ la folo-laa su.