Read Kpelle Temete Maa-ŋuŋ 5 Bible Online

Temete Maa-ŋuŋ 5 - Kpelle bible

Temete Maa-ŋuŋ 5

¹Surɔ̂ŋ nyíi ŋɔpɔlɔ-pɔlɔ-laa tɛɛ̂i yâi, ífe lòno ma, kɛ́lɛ, ǹia-woo ƃó yɛ̂ɛ ínâŋ; zinâai nyíi-ŋai ípɔlɔ-pɔlɔ-laa tɛɛ̂i dîai, tûa a dia yɛ̂ɛ ílêɣe-ni,

²ǹɛyâai nyíi-ŋai dípɔlɔ-pɔlɔ-laa tɛɛ̂i yâi, tûa a dia yɛ̂ɛ ílee-ni, ǹɛyâai nyíi-ŋai ípɔlɔ-pɔlɔ-laa tɛɛ̂i dîai, í tûa a dia yɛ̂ɛ ísaaƃɔlɔ-ni maa-waa-laa kélee su.

³Ƃâa kɛ́ pɔɔ-nɛyaa dîa nyíi-ŋai díkaa a pɔɔ-nɛyaa kpîŋ-ŋa.

⁴À kɛ̀ pɔɔ-nɛni lônii da kɛ̀ ma, kpaa máŋ ǹônii-lonii, tɔɔ fulɔi dí m̀aa kɔ́ri berei da pɔri ƃaa kɛ́-maa tɛɛ̂i la dínûai pɔ dí díkpai da kula; kpɛ́ni fêi, nyíŋi káa a Ɣâla lii-laa mɛni.

⁵Ǹɛnîi nyíi gáa a pɔɔ-nɛni kpîŋ, nyíi a lɛɛ ǹyaa tɔnɔi, a ŋɔkili-kɛ-zui kélee pu Ɣâla ma mare-kɛɛ su da Ɣala-fɛliɛ a kpini da folo;

⁶kɛ́lɛ, pɔɔ-nɛnii nyíi bîlaŋɔɔi nɔ́ gbîŋ líi láa mɛni pôlui, zaâi berei máŋ gáa la ɣele mai.

⁷Nyíŋi ƃó, a gɛ́ɛ dílaa lɛ́lɛɛ é kɛ́ díƃarâai lá.

⁸Ǹúui va kpɔŋ-ma tɛ̀ɛ ŋɔnûai pɔi, é tela kɛ́ a ŋɔnuu-suui suu-ƃelai, gɛ̀ ní maa-nuui ti a ǹaa-lai maa-sia too, ǹyaŋ maa-nuui káa a ǹúui ǹyɔ́mɔɔ é tɛ́ɛ máŋ ǹúui ma laa-la fé ǹyêei.

⁹Bɔɔ-nɛnii nyíi ŋɔkóraŋ fé sere ni kóraŋ buu-lɔ́ɔlu-mɛi-da sui, dífe ǹáa siɣe kɔlɔ ma a pɔɔ-nɛni, kpaa máŋ nyíi a surɔ̂ŋ kula a tɛɛ tɔnɔɔ mai.

¹⁰Bɔɔ-nɛnii nyíi da ǹáa pɔ̃yɛ kɔlɔ ma a pɔɔ-nɛnii, fɛ̂ɛ nûa dí ŋɔtíi lɛ́lɛɛi m̀aa sêre-faa kɛ́, fɛ̂ɛ é kɛ́ a ǹúui a nîa-pɛlɛɛ kula sui, gɛ nûa soŋ a ǹɛ́lɛɛ, gɛ Ŋâla-ƃelai kɔ́ɔ maa waa, gɛ mɛni-kpɔlu kaa-ƃelai kûla mɛni-kpɔlu su, gɛ gbîŋ pu tíi lɛ́lɛɛ kɛ́ɛ su pere-sii kélee sui.

¹¹Kɛ́lɛ, bɔɔ-nɛnii nyíi gáa niî a nɛni-kpelai, ífe ǹáa pu kɔlɔ ma a pɔɔ-nɛni; kpɛ́ni fêi, tãi ǹíi a kɛ̂tɛ la Kôrai mai, surɔ̂ŋ-kula-wɛli a zòŋ,

¹²ǹyaŋ gɛ̀ ní a tɔŋ-pu-maa pu ŋ̀ûa, kpɛ́ni fêi, a ŋɔlaa-lai maa-ŋuŋ kara.

¹³Nyíti pôlu ma da nyɛ̃ŋ-nyɛ̃ŋ maa kɔ́ri, díkɛ sìa-sia pɛ́rɛ kélee lá, dífa nyɛ̃ŋ-nyɛ̃ŋ maa kɔ̂ri nɔ́, kɛ́lɛ, da laa ƃô kɛ̀ díla fa sêe, mɛnii vé a díƃo-mɛnii, nya ƃe da mò.

¹⁴Mɛni ma ŋa ŋ̀wɛ̂lii a gɛ́ɛ pɔɔ-nɛyaa nyíi-ŋai díkaa a nɛnî-kpela-ŋai dí surɔ̂ŋ kula, dí nîa-pɛlɛɛ sɔlɔ ƃo, dí díkpîŋ-pɛrɛ-ŋai mɛi káa, dífe tãi tɛɛ kúkpɔara-nuui pɔ a gɛ́ɛ é lóno nyɔ́mɔɔ kɛ́ é pîlaŋ kûa.

¹⁵Kpɛ́ni fêi, nûa da-ni da nâa pîlaŋ Sêtɔŋ pôlu.

¹⁶À kɛ̀ nɛnîi nyíi laa-la káa ǹyêei ŋɔnûai samai, nyíi-ŋai díkaa a pɔɔ-nɛyaai, tɔɔ e kpɔŋ-ma tɛɛ dípɔ; a gɛ́ɛ vè kɛ̀ a Kôrai-toli-kpɔŋ ŋɔtíi, kɛ́lɛ, gáa a sɛŋ a gɛ́ɛ e kpɔŋ diai dîa díkaa a pɔɔ-nɛyaa kpîŋ-ŋai.

¹⁷Ǹúu-pɔlɔ-ŋai nyíi-ŋai díkaa a nuu-tuɛ-ƃela lɛ́lɛɛ-ŋai, maa nɛɛ̂i a gɛ́ɛ ƃaa kɛ́-maa támaa e li dípɔ, e tela kɛ́ kpɔ́ a diai dítii ƃa Ɣâla-woo-ƃoɔ da sɛŋ-lɛɛi;

¹⁸kpɛ́ni fêi, Ŋâla-kɔlɔi a mò, nyɛɛi, “Ífe niŋa-sirɛi lá ɣiri tãi gáa mɔlɔŋ táŋ-nîi lai,” ǹyaŋ, “Maa nɛɛ̂i dii-kɛ-nuui e ŋɔfela-féi sɔlɔ ƃo.”

¹⁹À kɛ̀ núu da a mɛni ƃo a núu pɔlɔ láa ífe fàa ma, fɛ̂ɛ sere feerɛ kpaa saaƃa é fáa ma.

²⁰À kɛ̀ a diai díkaa ŋ̀wɛ̂lii dí kɛ́ nɔ́ sɔnyɔ̂ŋ sui, lóno dîa ǹúui kélee ŋɛi a gɛ́ɛ ǹúu kpeli-ŋai dí yao.

²¹Ŋa môi yâ Ɣâla ŋɛi da Zîsɛ Kôrai e pɛ́lɛ Ŋâla-taa-kela-ŋai dîa Ɣâla e dílɛ̀ a gɛ́ɛ í dɔ̂ŋ-ŋai mɛi káa ífe niî mɛni ŋá tèe fɛ̂ɛ í maa-mɛnii su káa, ífe núu su ɣɛ̀ɛ.

²²Ífe íyee pɛ̀lɛ núu ma a maa félaa, kpaa máŋ ífe íkpîŋ pu núu da kpɛni ŋɔsɔnyɔ̂ŋ su; ítûa-perei é kɛ́ nɔ́ a maa waa.

²³Ífe ŋɔ́nɔ yá kpɛni kpele nɔ́, kɛ́lɛ ŋwã̂ai-loŋ kpele íkôi mɛni ma da ísɛŋ-solii-maa kpîŋ-ŋai nyíi-ŋai da íkɛ̀ a tãi kéleei.

²⁴Núu da-ni dísɔnyɔ̂ŋ su ponoɔ̂i nûa ŋɛi, nyíi a lî a dîa mɛni-ŋa-teɛɛi sui, kɛ́lɛ, núu da-ni díwɔ-sɔnyɔŋ ŋɔsu-ponoi a pâ tãi ma.

²⁵Mɛni ma mɛni lɛ́lɛɛ-kɛɛ su ponoɔ̂i máŋ nûa ŋɛi; à kɛ̀ à wàla kɛ́ máŋ a zu ponoɔ ve pâi lɛɛ̂i loo-pere su.