Read Kpelle Temete Veerɛi 2 Bible Online

Temete Veerɛi 2 - Kpelle bible

Temete Veerɛi 2

¹Gɛ̀ ní ńoŋ, ísu é kpanaŋ m̀ɛlɛ-sêei su gáa Zîsɛ Kôrai kponôi,

²da nyíi í mɛ̀ni é kúla ńa sere támaa ŋɛ́i, ǹɛɛ ǹúu sã́a-ŋai yêei nyíi-ŋai da pɔ̂ri máŋ ǹɛ̂i nûa dîai.

³Mɛni-solîi íwɔ̂i káa yɛ̂ɛ Zîsɛ Kôrai kɔkuluƃai lɛ́lɛɛi.

⁴Kɔkuluƃai gáa ŋɔtíi mai, va ǹyée píli mɛni da kpɛni su, kpɛ́ni fêi, gáa a sɛŋ fɛ̂ɛ a ǹúui líi láa nyíi ǹáa siɣei.

⁵Nûa da kɛ̀ pêle kɛ̂i a sɛŋ fɛ̂ɛ ǹúui dɔnɔ yée é tɛ́ɛ m̀arâai dîa, ǹúui ŋ̀wɛ̂lii ǹyée é tɛ́ɛ m̀arâai dîai ǹyée fa tɛ́ɛ dîa fɛ̂ɛ é pêle kɛ́ yɛ̂ɛ berei bêlei ŋɔtɔ̂ŋ káa lai.

⁶Ǹyaŋ kpâlaŋ ŋá-tii kpanaŋɔɔ-kɛ-nuu ƃe maa-nɛɛi fɛ̂ɛ e zí-sɛŋ m̀á maa-ŋuŋ sɔlɔ ƃo.

⁷Íkili ŋá sia mɛni-ŋai ŋí dîa ŋa m̀ôi, kpɛ́ni fêi, Kúnuu-namui a pâi kili-ŋa-pono tɛɛ̂i ípɔ mɛni kélee su.

⁸Zîsɛ Kôrai maa-mɛni é lɛ́ɛ íkili ŋá nyíi kùla Deeƃé ŋɔsuui su e mu siɣe saa yêei, yɛ̂ɛ berei ŋá mò la ŋátuŋ lɛ́lɛɛ ƃoɔi sui,

⁹Duŋ Lɛ́lɛɛi nyíi ŋ́gaa maa-mɛni-soli káâi kpini-pɛrɛ mu yɛ̂ɛ mɛni kɛ́tɛ kɛ-nuui. Kɛ́lɛ, Ɣâla ŋɔwóoi fé kpini-pɛrɛ mu.

¹⁰Mɛni ma ŋa mɛni-soli káâi diai mɛni ma Ɣâla e dílɛ̀i, a gɛ́ɛ dîa máŋ dí malo-laai sɔlɔ ƃo da ŋwɔlɔ-wɔlɔ folo-laai, nyíi-ŋai da pâ Zîsɛ Kôrai sârai.

¹¹Ŋ̀óo-ŋai ŋí díkaa a tɔ̃yâ: À kɛ̀ kwa dîa-ni ku sàa, gɛ̀ ní kwa dîa-ni kwa pâi máŋ kɛ̂i ɣele ma;

¹²À kɛ̀ kwà mɛni-soli kàa, kwa dîa-ni kwa pâi máŋ kɛ̂i a núu-mɛi-ƃela; à kɛ̀ kwa m̀aa-sia tòo, gɛ̀ ní ǹyaa máŋ a pâi kúmaa-sia toôi;

¹³À kɛ̀ kwà wàla kɛ́ a kusã́a m̀ɛni ma, gáa a núu sã́a, kpɛ́ni fêi, va pɔri ǹyaa kpíŋ maa-sia toôi.

¹⁴Mɛni-ŋai ŋí tóo ǹûai kíli ŋá. Mó dîa Kúnuu-namui ŋɛi a gɛ́ɛ dífe díyee pu wóo da-ni maa-sia-toɔɔ su, nyíi va pâ núu pɔ a mɛnii ǹɛ́lɛɛ̂i. Diai da díwoli tɔ̀ɔ mɛni-ŋai ŋí dîai dílaa-lai su a kara.

¹⁵Kɔ́ a gbanaŋɔɔ í íkpîŋ tɛɛ Ɣâla pɔ yɛ̂ɛ ǹúui ǹyaa Ɣâla e fàa maa-mɛni mai, yɛ̂ɛ tii-kɛ-nuu nyíi ŋumɛ fé ŋ̀ɛi, kɛ́lɛ, e dɔ̃yâ-wooi soŋ-pere kɔ́lɔŋ a ǹɛ́lɛɛi.

¹⁶Ífe íyee píli moo-lono kɛɛ-ŋai ti su nyíi-ŋai dímaa fé waa ni, kpɛ́ni fêi, a pâi nûa kɛ̂i dí dípôlu tɔɔ Ɣâla-mɛni-kɛɛ ma a gbanaŋɔɔ.

¹⁷Dí lóno-woo a duɛ-pere mii yɛ̂ɛ ƃɛrɛ-pala kɛ́tɛ. Maa-ƃelai ŋí da ƃa Ɛmɛneiyɔ da Failiitɔ,

¹⁸nyíi-ŋai da pɔara dɔ̃yâi ma, da m̀ó a gɛ́ɛ mu-siɣe saa-yeei maa-mɛni a wɔ́lɔ tɛɛ̂i. Díkaa núu da-ni dílaa-lai karâi.

¹⁹Kɛ́lɛ, Ɣâla ŋɔmɛni kɔ́ɔ pîlaŋɔɔi káa tɔ̂ɔni a gbanaŋɔɔ ŋ̀óo-ŋai ŋí pɔ̃yɛɛ ma: “Kúnuu-namui e dîai kɔ́lɔŋ díkaa a bɔ́ɔi.” “Tɔɔ dîai kélee da Kúnuu-namui láa tòlii dí disu kula ŋwana-lɔɔ ma.”

²⁰Zɛŋ-folo-ŋai díkaa pɛ́rɛ kɛ́tɛ mui, gélee nɔ́ fé gbɛtɛ̂i a gôo da káne. Da-ni kpɛtɛ̂i máŋ a wuru da pɔrɔ. Da-ni díkaa mɛni kpanaŋ mɛni ma, da-ni dí ƃo mɛni fii-kpɛɛ mɛni ma.

²¹À kɛ̀ núu a gbîŋ maa waa e gbîŋ kula mɛni fii-kpɛɛ-ŋai ŋí dîa, gɛ̀ ní maa-nuui a pâi kɛ̂i yɛ̂ɛ zɛŋ-foloi gáa mɛni kpanaŋ mɛni mai. Maa-nuui a pâi kɛ̂i a maa waa, gɛ ƃo a tii-kɛ-nuu lɛ́lɛɛ bɛ́rɛ-mɛi-nuui mɛni ma, gbîŋ kpɛtɛɛ tíi lɛ́lɛɛ kélee kɛ-mɛni ma.

²²Mɛni ma dîai da Kúnuu-namui láa tòli é kúla líi maa waa sui, ka dîa-ni ka kasu kula tua-pere-nyɔŋ maa-sɛŋ wɛliɛ ma nyíi gáa ǹúu-tɔɔ-ŋai yêei, ká tɔ̃yâ laa-la kɔ́ri, laa-la, wɛli-kɛ-maa, da lii-sêe.

²³Ífe íyee pìli ƃoo-mɛni-ŋa su da mɛni-folo-ŋa maa-sia toɔɔ; í gɔ́lɔŋ a gɛ́ɛ da pâ a laa-saa.

²⁴M̀aa fé nɛ̃ɛ ní a gɛ́ɛ Kúnuu-namui yée-mu-nuui é kɛ́ a laa-sâa-nuu, kɛ́lɛ, fɛ̂ɛ é kɛ́ a sɔŋ-lɛ̂lɛ-nuu núu kélee mɛni ma, gɛ́ ƃò a sɛŋ-lɛ́-nuu lɛ́lɛɛ, lii-kpêle kɛ́ ƃò ǹyêei.

²⁵Diai da tɔ̂ɔ Kúnuu-namui ŋɔtíi-kɛ-nuui ŋɔsɛŋ-lɛ́ɛi mai, fɛ̂ɛ é díteniŋ tɔ́ɔ woo-lɛlɛɛ ǹá su. Tãi da Ɣâla a pâi dílɛɛ̂i naa dí dílii pene dí dɔ̃yâi kɔ́lɔŋ,

²⁶a gɛ́ɛ dí kula Dɛ̂ƃele ŋɔƃárei ŋá tãi Ɣâla a dítoli la a gɛ́ɛ dí ǹîa mɛnii kɛi.