Read Kpelle Ibulu 10 Bible Online

Ibulu 10 - Kpelle bible

Ibulu 10

¹Tãi nɔ́ dɔ̂ŋ káa la a mɛni lɛ́lɛɛ-ŋai pâi pâi díninîŋ, kɛ́lɛ, vé a mɛni-ŋai kpîŋ a tɔ̃yâi, diai da lɛ̀ɣɛ Ɣâla kɔlɛi, vé pâi wɔ́lɔ dímaa waai a zâla tɔnɔi nyíi da gula a kóraŋ kéleei.

²Eêi kɛ̀ zâlai é ǹûai maa waa, dífêi kpera sâla kúlaa ma? Eêi kɛ̀ ŋ̀âla-fɛli-ƃelai maa a wɔ́lɔ waa tɔnɔɔ, dífêi díkili ŋá siai sɔnyɔ̂ŋ mɛni ma.

³Zâla kúlaa-ŋai ŋí su, dísɔnyɔ̂ŋ maa-mɛni è tòo díkili ŋá a kóraŋ kélee.

⁴Kpɛ́ni fêi, niŋa-ŋãa da ƃoli-ŋãa dífa pɔ̂ri wɔlɔ-wɔlɔ-sɔnyɔ̂ŋ kulâi núu ma.

⁵Nyíŋi mɛni ma, tãi Kôrai è pà la ŋ̀éniɛi sui, è mo, nyɛɛi, “Ífe sâla-kúlaa da sama-sɛŋ wɛ̂li ní, kɛ́lɛ, í kpono kpɛtɛ ḿɛni ma.

⁶Kéreŋ-sama-sɛŋ da sɔnyɔŋ-sama sɛŋ-mɛni fé ílii laa ni.

⁷Nya ƃe ŋa mò, nyɛɛi, ‘Gáa, ŋa pá a gɛɛ ŋa ínîa-mɛnii kɛ́, Óo Ɣâla,’ yɛ̂ɛ berei bɔ̃yɛɛ̂i la gɔlɔi su é pîlaŋ ḿâi.”

⁸Tãi Kôrai è mò la ǹaa mɛi-pere, nyɛɛi, “Ífe zãa-ŋai ŋí wɛ̂li ní, kpaa máŋ dí kɛ́ a ínîa-mɛnii, sâla-kúlaa, sama-sɛŋ-tɛɛ, kéreŋ-sama sɛŋ-tɛɛ, da sɔnyɔ̂ŋ-sama sɛŋ-tɛɛ” da nyíi-ŋai kùla yɛ̂ɛ berei dɔ̂ŋ káa lai,

⁹nya ƃe è mò ŋɔ́nɔ, nyɛɛi, “Gáa, ŋa pá a gɛɛ ŋa ínîa-mɛnii kɛ́.” È duɛ-tûɛi kpera a gɛɛ é nɛ̃ɛ-pôlui kɔ́ɔ pîlaŋ.

¹⁰Ǹyaŋ kúmaa a waa nɔ́ zu tɔnɔ a Ɣâla nîa-mɛnii tí Zîsɛ Kôrai kponoi tɛɛ̂i sârai.

¹¹Sâla láa soŋ-nuu kélee a tɔ̂ɔ a ɣele kélee ŋɔtii-kɛɛi su, gɛ zâla tɔnɔi kúla a tãi kélee, nyíi va wɔ́lɔ sɔnyɔ̂ŋ waa núu mai.

¹²Kɛ́lɛ, tãi Kôrai è zâla tɔnɔi kùla la zu tɔnɔ sɔnyɔ̂ŋ kélee mɛni mai, è sèe Ɣâla láa-mii-yee mɛi

¹³a gɛɛ é maa-kpɛŋ kɛ́ é lɛ́ɛ la zu ŋɔkpɔara-ƃelai dí pú gɔ́ɔ mu.

¹⁴Kpɛ́ni fêi, ŋɔsâla tɔnɔi è kùlai, diai dímaa waai è dímaa waa nɔ́ zu tɔnɔ.

¹⁵Ǹyaŋ M̀ɔlêŋ Maa Waai máŋ a m̀aa-sere-faa kɛ̀ kúŋɛi. Kpɛ́ni fêi, ŋ̀óo-ŋai ŋí ƃoɔɔ mìi,

¹⁶“Gbanaŋ-wooi ká ŋí ŋa pâi gɛ̂i Eezuɛ-ŋai yêei ŋele-ŋai tí pôlu mai, Nuu-namui ƃa mò tí, ŋa pâi ŋátɔ̂ŋ-ŋai pûi dílii su, ŋá dípɔ̃yɛ̂ díkili-ŋa.”

¹⁷A mò ŋɔ́nɔ, ǹyɛɛi, “Ŋa pâi niâi dísɔnyɔ̂ŋ ma da díŋwana-lɔ̂ɔi.”

¹⁸Bɛ́i su-mɛni-lɛɛ káa naa mɛni-ŋai ŋí mɛni mai, sama-sɛŋ tɛɛ-mɛni fé ŋɔ́nɔ naa sɔnyɔ̂ŋ mɛni mà.

¹⁹Mɛni ma, ŋánûa, tãi nɔ́ laa-la káa la kúyêei a gɛɛ kú lí gwaa maa waai ma Zîsɛ ŋãai sârai,

²⁰da bere ninai da vúlu-laa ninai nyíi è ǹáa ƃo kúmɛni ma zeɣei sârai, zu-kulai ƃa ŋɔkponoi sârai,

²¹tãi nɔ́ ŋɔ́nɔ sâla láa soŋ-nuu kɛ́tɛ káa la kúyêei Ɣâla ŋɔpɛ́rɛi mɛi,

²²kwaa lɛ́ɣɛ mà a tɔ̃yâ-lii laa-la láa fɛ́ɛ su da kúlii nyíi m̀aa waâi kúlaa kili-ŋa-sia nyɔ́mɔɔ su, é pɛ́lɛ kúkpono ma nyíi ŋ̀waâi a yá maa waai.

²³Kwaa kúkili-kɛ-zui sóŋ a gbanaŋɔɔ nyíi kwa mòi, kúfe siɣe kútɔɔ̂i, kpɛ́ni fêi, ǹúui gono-teei kɛ̀i, zã́âi.

²⁴É lɛ́ɛ kúkili ŋá berei kwa pɔ̂ri wɛli-kɛ-maa pui la kúkîe-ni kponôi da tíi lɛ́lɛɛ kɛɛi.

²⁵Kúfe tãi siɣe kúkîe-ni kɔɣɛŋ mɛni ma, yɛ̂ɛ berei núu da-ni da tãi siɣe lai, kɛ́lɛ, kwaa kúkîe-ni fɔlɔ, kpɛ́ni fêi, ka Ŋelei tí kâai gɛ̀ lɛɣɛ.

²⁶Kpɛ́ni fêi, à kɛ̀ kwa gìri kwa sɔnyɔ̂ŋ kɛ̀ dɔ̃yâi maa-tarei sɔlɔ ƃoɔɔ kûɛ pôlu ma, gɛ̀ ní sâla kúlaa fé ŋɔ́nɔ naa kúsɔnyɔ̂ŋ mɛni mà.

²⁷Kɛ́lɛ, fɛ̂ɛ mɛni ŋá-teɛɛ maa pɔlɔ-pɔlɔɔ da ŋɔŋ-soŋ kɛ́tɛ nyíi pâi Ɣâla ŋɔkpɔara-ƃelai kérenîi.

²⁸Ǹúui a Mose ŋɔtɔ̂ŋ karâi, maa-nuui a sâa, dífa malôŋ kàa à kɛ̀ sere feerɛ kpaa saaƃa à fàa ma.

²⁹Káfe gɔ́lɔŋ a gɛɛ ǹúui a Ɣâla Ǹóŋ kpɔ̀ara é gbanaŋ-woo-kɛɛi maa-ŋãai kara, nyíi maa waai, é tela Mɔ̂leŋ ŋumɛ nyíi a ƃɛlɛ-sêe tɛ̂ɛi, ŋɔtɔŋ-kpɛ́-maai kɛ́tɛ̂i é tɛ́ɛ nyíŋi ma?

³⁰Kpɛ́ni fêi, ku ǹúui kɔ́lɔŋ m̀o, nyɛɛi, “Ńyãa ƃa tɔ̂ŋ kpɛ̀ núu ma. Ŋa pâi bɔɔ-teei kulâi.” È ŋɔ́nɔ mò, nyɛɛ, “Nuu-namui a pâi ŋɔnûai dímɛnii ŋá têei.”

³¹Gáa a mɛni maa pɔlɔ-pɔlɔɔ a gɛɛ Vulu-laa-Ɣalai é tɔ̂ŋ kpɛ̀ núu ma.

³²Kɛ́lɛ, ŋele pɔlɔ-ŋai dí lɛ́ɛ kákili ŋá gwaa-ponoɔi-kaa káa pôlu ma, tãi ká kɔ̀ la kpɔ́ a gbanaŋɔɔ mɛni-soli-kaa sui.

³³Tãi da, da ká tɔɔi bànaŋ ma dí ŋumɛ-tua kɛ́ a káa dí mɛni-kpɔlu láa kâa. Tãi da diai da dua-tarei tí kɛ̀ a diai, ka kpɔ̂ŋ dîa ká dímɛni-kpɔ̂lui da siɣe.

³⁴Kpɛ́ni fêi, maloŋ-kaa è kɛ̀ káyêei ǹuɛ-ŋai mɛni ma, ǹyaŋ ká káyee sèe mu a lii-nɛ̃ɛ a gɛɛ dí kákɔ̂liŋ kúla káyêei, kpɛ́ni fêi, ká kɛ̀ a gɔ́lɔŋɔɔ a gɛɛ kɔ̃liŋ lɛ́lɛɛ káa káyêei nyíi gáa nɔ́ naa wɔlɔ-wɔlɔ da wɔlɔ-wɔlɔi.

³⁵Mɛni ma káfe kálaa-lai pîli, nyíi fela-féi kɛ́tɛ káa mai.

³⁶Kpɛ́ni fêi, fɛ̂ɛ lii-kpele é kɛ́ káyêei a gɛɛ ka Ɣâla nia-mɛni kɛ́ ka ŋɔkono-teei sɔlɔ ƃo.

³⁷“Nàa guro à gɛ̀ tí, ǹúui nyíi gáa pâi, a pâi pâi a maa félaa, vé pâi tãi siɣêi.

³⁸Kɛ́lɛ, ŋátɔ̃yâ-nuui a pâi ŋɔfúlu-laai kɛ̂i laa-la sârai. À kɛ̀ à pène pôlu, gɛ̀ ní ńii fé pâi lâai.”

³⁹Kɛ́lɛ, kúfe diai sama da pène pôlu a gɛɛ dísu é karai, kɛ́lɛ, kúkaa diai sama laa-la káa díyêei a gɛɛ dí dímɔ̂leŋ ƃáloi.