Read Kpelle Ibulu 11 Bible Online

Ibulu 11 - Kpelle bible

Ibulu 11

¹Laa-laa káa a zãâi nyii-ŋai dímaa-kili-kɛ-zu káa kúyêei dímaa-tɔ̃yâ. Ku gɔ́lɔŋ a gɛɛ zãâi kúfa díkàai dímaa-mɛni káa a tɔ̃yâ.

²Kpɛ́ni fêi, laa-la sârai ƃe Ɣâla è ǹyée sèe la ŋwɔlɔ-wɔlɔ-ƃelai mu.

³Laa-la sârai ƃe kwa târe la zu a gɛɛ Ɣâla è ŋ̀éniɛi kpɛ̀tɛ a ŋ̀óo, ǹyaŋ zãâi kwa díkâai é díkpɛ̀tɛ a zãâi kúfa díkàai.

⁴Laa-la sârai ƃe Ebɛɛ è sâla kùla la Ɣâla ma, nyíi kɛ̀ a ǹɛ́lɛɛ é tɛ́ɛ Kîŋ ŋɔi mai. Zâlai ŋí sârai Ɣâla e Ebɛɛ lɛ̀ a tɔ̃yâ-nuu. Ɣâla è nyíŋi maa-sere-faa kɛ̀ a ǹyée seɛɛ Ebɛɛ ŋɔsama-sɛŋ mu. Ebɛɛ è sàa, kɛ́lɛ, ŋɔlaa-lai sârai gáa niî lônoi.

⁵Laa-la sârai Ɣâla è Inɔsi sìɣe é tɛ́ la Ɣâla-taa a gɛɛ vé saa, ǹyaŋ dífe gáa ni, kpɛ́ni fêi, Ɣâla è zìɣe. Ǹyaŋ Ɣâla é lɛ́ɛ pâi ziɣêi maa-mɛni è kɛ̀ a bɔ̃yɛɛ a gɛɛ è Ɣâla líi laa.

⁶Núu fa pɔ̂ri Ɣâla líi lâai laa-la ŋ́ɛi pôlu. Kpɛ́ni fêi, ǹúui ŋ̀wɛ̂lii é lɛ́ɣɛ Ɣâla kɔlɛi, fɛ̂ɛ é láa la a gɛɛ Ɣâla káa ɣele ma a gɛɛ é diai líi laa da gɔ̀rii.

⁷Laa-la sârai Nôa, nyíi mɛni-ŋai kɛ̀ pâi kɛ̂i Ɣâla è maa-mɛni tòo gíli ŋái, è ŋ̀óli tɔ̀ɔ mà é yá-ŋa-keleŋ kpɛtɛ a gɛɛ é ŋɔpɛ́rɛ-mu-ƃelai ƃálo. Ǹaa-la kɛ́ɛ ŋí sârai Nôa è tɔ̂ŋ pù ŋ̀éniɛi ma, é kɛ́ a dɔ̃yâ-laai sɔlɔ-ƃo-nuu nyíi a pâ laa-la sârai.

⁸Laa-la sârai Eberaɣɛ̃ɛ è Ɣâla wóo mɛni tãi Ɣâla è dòli la a gɛɛ é lí kwaa da ma ƃɛi è kɛ̀ pâi nàa sɔlɔ ƃôi ǹyêei, ǹyaŋ è kùla bɔ̀ taai é lí. Kɛ́lɛ, vé kɛ́ ní a ƃɛ́i kɔ́lɔŋɔɔ è kɛ̀ liî naai.

⁹Laa-la sârai Eberaɣɛ̃ɛ è kɛ̀ gono-tee-lɔii ma yɛ̂ɛ núu a li ŋɔ̃yâ-lɔii ma. È kɛ̀ sua-kɔlɔ-pɛrɛ mu yɛ̂ɛ berei Aise da Zeeka máŋ dí gɛ̀ lai, da dîa-ni dí gono-tee tɔnɔi sɔlɔ ƃô.

¹⁰Kpɛ́ni fêi, è kɛ̀ daa-leei perêi kâai nyíi gɔ́ɔ-pîlanii è kɛ̀ mai, nyíi dɔɔ-nuu da gbɛtɛ-nuu káa a Ɣâlai.

¹¹Laa-la sârai Seera ǹyaa kpîŋ è wala-wala sɔlɔ ƃô a gɛɛ é koo siɣe, berei máŋ è kɛ̀ la a núu pɔlɔi, kpɛ́ni fêi, è Ɣâla kàa a núu sã́a nyíi góno tèe ǹyêei.

¹²Mɛni ma surɔ̂ŋ tɔnɔ è nyíi kɛ̀ a bɔlɔɔ kpɔ́ a kɛ́ pâi saâi, núu-suu é kùla gbonôi nyíi zu-ƃelai dí kɛ̀ a dítamaa kpɔ́ yɛ̂ɛ bɛmɛlɛŋ-kao-ŋai díkaa ŋ̀elei sui da ŋɛyãai gáa yúo ma nyíi núu fa pɔ̂ri ǹónôi.

¹³Nyii-ŋai kélee dí sàa laa-la su, dífe gono-tee-sɛŋ sɔlɔ ƃo ní, kɛ́lɛ, dí kɛ̀ gono-tee sɛŋ perêi kâai a lii-nɛ̃ɛ kwaa kôya ma, dí fáa ní ma a gɛɛ dí kɛ́ a ŋɔ̃yâ-ŋa ǹɔii ŋí ma nyíi-ŋai dí kùla dípɔ-taai.

¹⁴Kpɛ́ni fêi, diai da ǹóno-sii tí kɛ̂i da gɛ̀ a zu ponoɔ a gɛɛ díkaa lɔii kɔ́rîi a gɛɛ é kɛ́ a dípɔ-taai.

¹⁵Eêi kɛ̀ dîi kɛ̀ díkili ŋá siâi gɛ pîlaŋ ǹɔii tí ma nyíi dí kùla zu dí lii, dîi pɔ̂ri tãi kâai dí lene pôlu.

¹⁶Kɛ́lɛ, yɛ̂ɛ berei gáa lai, da ŋ̀wɛ̂lii dí lɔii lɛ́lɛɛ sɔlɔ ƃó, ǹyaa ƃa Ɣâla-taa ŋɔ̂i. Mɛni ma ŋumɛ fé Ɣâla ŋ́ɛi a gɛɛ dí dóli a Díɣâla, kpɛ́ni fêi, a taa-lee su kpɛtɛ dímɛni ma.

¹⁷Laa-la sârai, tãi Ɣâla è Eberaɣɛ̃ɛ su kɔ̀ɔŋ, a gɛ́ɛ é Aise kùla a sâla. Ǹúui nyíi gono-teei sɔlɔ ƃôi, è gbîŋ kpɛ̀tɛ a gɛ́ɛ é gbîŋ lóŋ kúla a sâla,

¹⁸nyíi dímaa-mɛni ƃò, díyɛɛi, “Da pâi ísuu láa seêi Aise sârai.”

¹⁹È làa la a gɛɛ pɔ̂ri káa Ɣâla mì é núu mu siɣe máŋ saa yêei. M̀ɛni mà, kwa pɔ̂ri m̀ôi kûɛ è zɔlɔ ƃô ŋɔ́nɔ pôlu.

²⁰Laa-la sârai Aise è lûwa làa Zeeka ma da Isɔɔ tínaa tuɛ-pere mɛni ma.

²¹Laa-la sârai tãi Zeeka è kɛ̀ pâi saâi lai, è lûwa làa Zosɛ ǹônii kélee dîa tɛi-tɛi ǹɛ̂ɣɛɛŋ pîlaŋɔɔ ŋɔsia-wurii ŋûa gɛ Ɣâla fɛ̀lii.

²²Laa-la sârai, tãi Zosɛ ŋɔfúlu-laai kpɛɛ-ŋá-tãi è sèri lai, è mɛni da ƃò é pîlaŋ tãi ma Eezuɛ-ŋai dí kɛ̀ kulâi la Ize-lɔii sui, é téla gbîŋ-saa loo-pere lɛ́.

²³Laa-la sârai, tãi dí Mose maa sɔlɔ ƃô lai, ŋɔnûa dí ǹoo a ɣáloŋ saaƃa, kpɛ́ni fêi, dí gàa a gɛɛ è kɛ̀ a kɔatara lɛ́lɛɛ. Dífe kɛ́ ní yaôi gâloŋ ŋɔtɔ̂ŋ ma.

²⁴Laa-la sârai, tãi Mose è ƃɔ̀lɔ lai, vé faa ní m̀a a gɛɛ dí dóli a Ize kaloŋ ǹóŋ-nɛnii ǹóŋ.

²⁵È fàa mu a gɛɛ da Ɣâla ŋɔnûai dí mɛni-soli káa é tɛ́ɛ la ǹîa kɛ́ɛ ma a sɔnyɔ̂ŋ-lii-nɛ̃ɛ nyíi pâi tɛɛ̂i.

²⁶È làa la a gɛɛ mɛni-solii è gàa Kôrai mɛni mai, é kɛ̀ a tɔɔ-sɛŋ kɛ́tɛ é tɛ́ɛ la Ize-tɔɔ-sãai dîa, kpɛ́ni fêi, ŋ̀ɛi è kɛ̀ vela-féi perêi.

²⁷Laa-la sârai è kùla Ize, vé yao ní gâloŋ ŋɔlii-ŋwanai mâ. Kpɛ́ni fêi, è kɛ̀ yɛ̂ɛ ǹyaa ƃe è ǹúui kàa nyíi núu fa gàai.

²⁸Laa-la sârai è dɛɛ-mɛi-kuui lâai kɛ̀ é m̀ála-ŋãai kpɛ̀mɛŋ a gɛɛ nîa-pɛlɛɛ maa-ŋuŋ Su-kara-nuui fé lɛ̀ɣɛ dîa.

²⁹Laa-la sârai ǹûai dí Ǹyúo Kpɔ̂lui tiyeŋ yɛ̂ɛ nàa à kɛ̀ lɔii kpala mà. Kɛ́lɛ, Ize-ƃelai, nyíi-ŋai kɔ̀ a gɛɛ dí m̀ɛni tɔnɔi tí kɛ́i, dí lɛ̀ɛ ǹyái su.

³⁰Laa-la sârai ziɣãŋ kɛ̀ a dínaŋɔɔ Zɛleko mai, maa tinaŋɔɔ ǹûai diɛ a fólo lɔ́ɔlu mɛi féerɛi, è wòlo.

³¹Laa-la sârai Leea nyíi gbîŋ tɛ̀ɛ sinâa pɔ sɛŋ-kao mɛni mai, da diai dífe Ɣâla wóo mɛni ni dífe saa ni gîe ma, kpɛ́ni fêi, diai dí dítɛ̀ɛ a gɛɛ dí li Zɛleko kâai, è ǹyée sèe dímu a wɛli-kɛ-maa-pere.

³²Le ƃe ŋɔ́nɔ ŋa pɔ̂ri m̀ôi naa pôlu ma? Kpɛ́ni fêi, tãi fé pâi kɛ̂i naa a gɛɛ ŋa lono é pîlaŋ Gidiɔŋ ma, Bara, Saŋsiŋ, Zɛfita, Deeƃé da Samia é pɛ́lɛ Ɣâla ŋɔlóno-kɛ-ƃelai dîa.

³³Laa-la sârai ǹûai ŋí dí lɔii-ŋuŋ-ŋa yée kùla, dí pá a tenîŋ-ƃo-mɛni, dí kono-tee támaa sɔlɔ ƃo, dí yala-sulu-ŋa lá tɛ́.

³⁴Dí ŋɔŋ-soŋ kɛ́tɛ liɣiiŋ, dí kúla ƃóa-sɔkpɔ ŋá, vii-kpɛɛ-ƃelai su é kpanaŋ, dí kɛ́ a kɔ́-kɔ-ƃela lɛ́lɛɛ-ŋa, dí lɔii da kpɛni su kɔ-kɔ-ƃela kɛ́ dí pú.

³⁵Nɛyâai dí dísaa-ƃelai sɔlɔ ƃô mu-siɣe saa-yêei sârai. Dí ǹúui da-ni lòkwa dípaa mɛni ma, nyíi-ŋai dífe díyee see ni mu a gɛɛ dí ŋuŋ-maa-ƃo sɔlɔ ƃo a gɛɛ dí dímu siɣe ŋɔ́nɔ fúlu-laa lɛ́lɛɛ sui.

³⁶Dí ɣɛ́lɛ-maa kùla núu da-ni kponôi dí dílokwa dí yɔlɔ pú dîa máŋ dí dípili kpini-pɛrɛ mu.

³⁷Dí dísɔ̂ɔ a kɔni dí díƃela-ƃela gîei feerɛ dí dísu kɔɔŋ dí dípaa a ƃóa-sɔkpɔ. Da-ni dí kɛ̀ sia-siai ƃála-kɔlɔ su da ƃoli-kɔlɔ, da-ni dí díkɔ̃liŋ kélee láŋ. Da-ni dí mɛni-kpɔ̂lu kàa, dí ŋwana-lɔ̂ɔ-tua kɛ́ a da-ni.

³⁸Ŋ̀eniɛi maa fé kɛ́ ni a nɛ̃ɛ ǹûai ŋí mɛni ma. Dí kɛ̀ nɔ́ díkɔɔ ŋá fɛ̂ɛ-kpalaŋ-ŋa su gɔni-wolo-ŋai sú da ǹóa-ŋa sú ǹɔii ḿu.

³⁹Ǹûai ŋí kélee, berei máŋ Ɣâla è ǹyée sèe la dímu dílaa-lai sârai, dífe gono-tee-sɛŋ sɔlɔ ƃo ni.

⁴⁰Kpɛ́ni fêi, Ɣâla è mɛni lɛ́lɛɛ kàa nàa tuɛ kúmɛni ma a gɛɛ kwa dîa-ni kú kɛ́ a maa-waa-ƃela gîe ma.