Read Kpelle Ibulu 12 Bible Online

Ibulu 12 - Kpelle bible

Ibulu 12

¹Mɛni ma tãi nɔ́ sére támaa tínaŋɔɔ̂i la kûa yɛ̂ɛ ɣele-kɔlɔŋ kolei, fɛ̂ɛ nɔ́ kúa máŋ kú gbîri-wiyɛɛ-ŋai láa da zɔnyɔ̂ŋ ŋai nyíi-ŋai da kúkpàaŋ kú gba-kpa fúlɔi maa kîrɛ siɣe kpɔ́ a gbanaŋɔɔ nyíi gáa kútuɛi.

²Kwaa kúŋɛi kɛ́ Zîsɛ ma nyíi kúlaa-laai kɔ́ɔ pìlaŋ é maa waai, nyíi zaa-wurii siɣe a ǹii-nɛɛi kɛ̀ duɛi é ŋ̀ɛi nàɣîŋ ŋumɛ mɛ́i é see Ɣâla ŋɔsee-sɛŋ láa-mii-yee mɛi.

³Ka kákili ŋá sia é pìlaŋ ǹúui ma mɛni-soli kàa sɔnyɔ̂ŋ-ƃela yêei a gɛɛ káfii fé kpɛ̀ɛ, kpaa máŋ kálii su fé kara.

⁴Namui ka sɔnyɔ̂ŋ-ni kákaa gɔ̂i, ŋãa fé niî kula ní kâa.

⁵Ka nia nii-kpele-wooi ma nyíi a kátòli a Ɣâla-lonii? “Ǹóŋ, ífe íŋɛi nàɣîŋ Kúnuu-namui ŋɔtɔŋ-kpɛ́-maai mɛi, kpaa máŋ ífii fé kpɛɛ à kɛ̀ à tɔ̂ŋ kpɛ̀ yâ.

⁶Kpɛ́ni fêi, ǹúui Kúnuu-namui è ŋ̀wɛ́li ni ǹyaa ƃe a tɔ̂ŋ kpɛ̀ ma. Diai a ǹyée sèe dímu a ǹônii, a díkula maa kɛ̀.”

⁷Maa nɛɛ̂i ká tɔŋ-kpɛ́-maa sɔlɔ ƃó. Ɣâla a tuâi a káa yɛ̂ɛ ǹônii. Kpɛ́ni fêi, le-loŋ ƃe naa, ǹâŋ fa tɔ̂ŋ kpɛ̀ mai?

⁸A kɛ̀ kà wàla tɔ̀ŋ kpɛ́-maa sɔlɔ ƃo nyíi ǹîa-pɛlɛɛ kpeli-ŋai da zɔlɔ ƃô dínâŋ yêei, gɛ̀ ní káfe a tɔ̃yâ-lonii, kákaa nɔ́ a wɛ́li-lonii.

⁹Nyíŋi pôlu ma kúnâŋ-ni díkaa ma ŋ̀eniɛi ŋí su nyíi-ŋai da tɔ̂ŋ kpɛ̀ kûai, kwa ƃaa-kɛ-maa tɛ́ɛ dípɔ, gɛ ní kúfe pâi kɛ̂i mɔ̂leŋ-ŋai Dínâŋ mu kpɔ́ a gbanaŋɔɔ é tɛ́ɛ nyíti ma a gɛɛ kú fúlu-laa sɔlɔ ƃó?

¹⁰Kpɛ́ni fêi, ŋ̀eniɛi ŋí su-naŋ-ŋai da tɔ̂ŋ kpɛ̀ kûa a tãi kpua a berei da ŋ̀wɛli lai, kɛ́lɛ, Ɣâla a tɔ̂ŋ kpɛ̀ kûa m̀ɛnii ǹɛ́lɛɛ̂i kúmɛni mai m̀ɛni ma a gɛɛ kú ŋɔmaa-waa-laai da sɔlɔ ƃo.

¹¹Tɔ̀ŋ-kpɛ́-maa kélee fé lɛ́lɛ ní a zɔlɔ ƃo-tãi. Gáa a mɛni-soli. Ǹaa à kɛ̀ tí, a pâ a tɔ̃yâ-laa maa-lii-sêe diai pɔ da zɔlɔ ƃôi.

¹²Mɛni ma ka káyee nyii-ŋai zɛlɛŋɔɔ̂i kâai tɛ́ ɣelêi ká kákpêleŋ nyii-ŋai dífii-kpɛɛ su kpanaŋ.

¹³Ka berei su sã́a kákɔɔ mɛni ma a gɛɛ kákpono m̀ɛi nàa saâi mai, vé kùla gbulɔ̂ŋ ŋá, kɛ́lɛ, é ƃálo.

¹⁴Ka kɔ́ a gbanaŋɔɔ a gɛɛ lii-sêe é kɛ́ káloai ká núu kélee da maa-waa-laa nyíi à wàla kɛ́ núu yêei va Kúnuu-namui kâai.

¹⁵Ka gáa a gɛɛ núu da kélee fé fɛ̀ɣɛ a Ɣâla ŋɔƃɛlɛ-sêei sɔlɔ ƃóɔɔ. Ka gáa a gɛɛ “wúru ŋwánaa” kélee da fé pɔmuŋ kásama nyíi a mɛni nyɔ́mɔɔ kùlai, ǹyaŋ maa-wurii tí a núu támaa kàra.

¹⁶Ka gáa a gɛɛ núu da kélee fé kɛ̀ a goyaŋ-wulu-wulu kɛ-nuu, kpaa máŋ núu da kélee fé kɛ̀ a ǹúui Ɣâla-mɛni fé ǹíi sú yɛ̂ɛ Isɔɔ, nyíi ŋɔpɔɔ-sɛŋ kɔlɛ mii-sɛŋ miî tɔnɔ kpéŋ pôlui.

¹⁷Kpɛ́ni fêi, ká gɔ́lɔŋ nyíti pôlu ma, tãi è kɛ̀ ŋ̀wɛ̂lii la a gɛɛ é ǹûwai sɔlɔ ƃói, ǹâŋ fé ǹyée see ní mù. Tãi fé kɛ́ ní naa a gɛɛ é ǹûwai sɔlɔ ƃo lii-pene sârai, berei máŋ è maa-wɔlɔ ƃò lai.

¹⁸Kpɛ́ni fêi, káfe pa ní zɛŋ mâ ǹúu a lɛ̂ɣɛ mai. Káfe pa ní ŋɔŋ-sôŋ ma é pɛ́lɛ kpini, ɣele-kúmɔŋ, da fãa dîa.

¹⁹Káfe pa ní túru-woo ma da ŋ̀óoi nyíi a m̀ɛni-ƃela kɛ̀ dífa ŋ̀wɛli ŋɔ́nɔ a gɛɛ dí worɛ̂-woo da kpɛni ƃó ŋɔ́nɔ diai.

²⁰Kpɛ́ni fêi, dífe pɔ̂ri ní m̀ɛnii mu dí mò dîai, “À kɛ̀ máŋ sua à lɛ̀ɣɛ ǹyéei ma, da pâi zɔɔ̂i a kɔni.”

²¹Tɔ̃yâ ma nàa è kɛ̀ kpɔ́ a maa yikiɛɛ. M̀ɛni ƃe Mose è mò la, nyɛɛi, “Ŋa kpɛ̃linii a yao.”

²²Kɛ́lɛ, ka pá Zãiyɔŋ Yeei ma da Vulu-laa-Ɣalai ŋɔtaa-lee kɛ́tɛi, ǹyaa ƃa Zerusâlɛŋ nyíi gáa a Ɣâla-taai. Ka seri ŋ̀âla-taa-kela-kpɔŋ kɛ́tɛ ma nyíi-ŋai dí ŋá tɛ̀ díkîe ma kúu kɛ́-mɛni ma.

²³Ka seri bɔɔ-sɛŋ sɔlɔ ƃó-ƃelai maa-kpɔŋ ma, nyíi-ŋai dílaa káa Ɣâla-taai, da mɛni-ŋa-tee-nuui nyíi gáa a núu kélee Ŋɔɣâlai, da maa-waa-ƃelai dímɔ̂leŋ nyíi-ŋai dí maa-waa-laai láa fɛ́ɛi Ɣâla-taai.

²⁴Ka pá Zîsɛ pɔ nyíi gáa a kúloa-nuu kwa Ɣâla-ni gbanaŋ-woo-kɛɛ ninai mɛni ma da ŋãa kpɛmɛŋɔɔi nyíi a lôno a ǹɛ́lɛɛ é tɛ́ɛ Ebɛɛ ŋãa mai.

²⁵Ka gáa a gɛɛ ǹúui gáa lônoi, káfe káyee kùla mu. Kpɛ́ni fêi, à kɛ̀ diai díyee kùla ǹúui mu nyíi dília-woo ƃò ǹɔii ma ƃɛi, dífe kula ni tɔŋ-kpɛ́-maa su, gɛ̀ ní kûa máŋ kwa pɔ̂ri kɛ̂i leŋ tɔŋ kpɛ-maa su, à kɛ̀ kwa kúyee kùla ǹúui mu nyíi gáa Ɣâla-taa gɛ́ kúlia-woo ƃòi.

²⁶Maa-tãi tí ŋ̀óo è ǹɔii kpɛ̀liŋ. Kɛ́lɛ, a nâa góno tée, nyɛɛi, “Ǹɔii tɔnɔ nɔ́ fé a lɛɛ pôlu tɔnɔ a gɛɛ ŋa gbɛ̃liŋ, kɛ́lɛ, ŋa pâi ŋ̀elêi su kpɛ̃linii máŋ.”

²⁷Ŋ̀óoi ŋí “a lɛɛ pôlu tɔnɔɔi” a ǹɛ a gɛɛ zɛŋ kpɛtɛɛ-ŋai nyíi-ŋai da túmôi dímaa a pâi fálenîi, nyíi-ŋai dífa túmôi dí lɛ́ɛ naa.

²⁸Mɛni ma sɛɣɛi-féi é kɛ́ kúyêei Ɣâla ŋɔkâloŋ-laai sɔlɔ ƃó-mɛni ma nyíi va tûmoi, gɛ̀ ní kwa Ɣâla fɛ̀li a lii-laa-pere a ƃaa-kɛ-maa da yao-maa.

²⁹Kpɛ́ni fêi, Kúɣâlai káa a sɛŋ-kéreŋ-ŋɔŋ.