Read Kpelle Ibulu 2 Bible Online

Ibulu 2 - Kpelle bible

Ibulu 2

¹Mɛni ma fɛ̂ɛ m̀ɛnii kú mɛ̀nii, kú kúwoli tɔ́ɔ ma kpɔ́ a gbanaŋɔɔ, à wàla kɛ́ tí kwa pâi folônii mà.

²Kpɛ́ni fêi, à kɛ̀ ŋ̀orɛ̂-wooi ŋ̀âla-taa-kela-ŋai dí mòi é tɔ́ɔ a gbanaŋɔɔ, ǹyaŋ tɔ̂ŋ-kara-ƃela kélee da berei woo-mɛni fé la núu-kpune yêei dí tɔ̀ŋ-kpɛ́-maa láa fɛ̂ɛ sɔlɔ ƃó.

³Gɛ̀ ní kwa pâi kula-pere kɛ̂i leŋ tɔŋ-kpɛ́-maa yêei, à kɛ̀ kwa kúŋɛi nàɣîŋ ƃalo-laa kɛ́tɛ kɛ́ɛ tí mɛi? Kúnuu-namui ƃe mò a maa-ŋuŋ, diai ŋ̀óo mɛ̀nii dí m̀ó kûa, dí ǹɛ a gɛɛ gáa a tɔ̃yâ.

⁴Ɣâla è maa-sere-faa kɛ̀ máŋ a ŋɛ́i-kɛ-maa-ŋa, da mɛni kpaya-kpaya, da wála-wala-sii tamaa-ŋa, é pɛ́lɛ M̀ɔlêŋ Maa Waai ŋɔsama-sãai dîa nyíi-ŋai Ɣâla è díŋaa kɔ̀lɛ yɛ̂ɛ berei gbîŋ nia-mɛnii káa lai.

⁵Kpɛ́ni fêi, ŋ̀éniɛi kúkaa lônoi gɛ́ pìlaŋ mai nyíi pâi pâi, Ɣâla fé gɛ̀ ní ɣâla-taa-kela-ŋa yée mu.

⁶Da maa-sere-faa kɛ́ tɔ̃yâ-pere su kwaa da ma, díyɛɛi, “Le ƃa núu m̀aa-mɛni a pɔ̂ri kɛ̂i íkili ŋái, kpaa máŋ le ƃa núu-kpune ǹóŋ a gɛɛ ya pɔ̂ri kpáanîi mɛ̀ni mai?

⁷Í gɛ̀ ŋ̀âla-taa-kela-ŋai mu-pere a da-loŋ. Í fólo-laa da ƃaa-kɛ-maa-ƃɔrɔ sèe ŋ̀ûa, í zee íkpɛtɛ-sãai kélee mɛi,

⁸í sɛŋ kélee pu gɔ́ɔ mu.” Ǹyaŋ Ɣâla kɛ́ɛ sɛŋ kélee pûi núu-kpune kɔ́ɔ mui, vé sɛŋ da kélee lɛ̀ɛ ní nyíi núu-kpune fé kɛ́ ní mɛ̀i. Yɛ̂ɛ berei gáa lai, kúfe niî sɛŋ kélee káa ní núu-kpune kɔ́ɔ mu.

⁹Kɛ́lɛ, kwa Zîsɛ kàa nyíi Ɣâla è gɛ̀ ŋ̀âla-taa-kela-ŋai mu-pere a da-loŋ. È fólo-laa da ƃaa-kɛ-maa-ƃɔrɔ sèe ŋ̀ûa, kpɛ́ni fêi, è mɛni-soli kàa saa yêei a gɛɛ Ɣâla ŋɔƃɛlɛ-sêei sârai é sáa kɔɔ̂ŋ núu kélee mɛni ma.

¹⁰Kpɛ́ni fêi, è kɛ̀ a mɛni lɛ́lɛɛ Ɣâla mɛni ma nyíi sɛŋ kélee káa ɣele ma maa-mɛni ma da nyíi gɛ̀ a gɛɛ sɛŋ kélee é kɛ́ ɣele ma a báa a ǹônii támaa fólo-laa sui, fɛ̂ɛ é díƃalo-laa kpɛtɛ-nuui kɛ́ a maa waa mɛni-soli káa sârai.

¹¹Ǹúui a núu maa waai da diai a dímaa waai díkelee dí kùla kwaa tɔnɔ ma. Mɛni ƃe va ŋumɛ la a dítoliɛ a m̀arâai.

¹²A mò ǹyɛɛi, “Ŋa pâi ílaa ƃôi ḿarâai dîa, ŋa pâi ílaa maa tɛ̂i Gbɔŋ-su-ƃelai sáma.”

¹³È ŋɔ́nɔ mò ǹyɛɛi, “Ŋa pâi lâai la.” È ŋɔ́nɔ m̀o ǹyɛɛi, “Ńyãa ká ŋí kwa ǹîa-pɛlɛɛi Ɣâla è dítɛ̀ɛ ḿbɔi.”

¹⁴Mɛni ma berei nɔ́ ǹîa-pɛlɛɛi díkaa la a núu-kpunei, bere nɔ́ ƃe Zîsɛ máŋ gáa la a núu-kpune a gɛɛ saa sârai é ǹúui su kara nyíi ŋwála-walai káa ǹyêei saa mɛi. Maa-nuui ƃa Dɛ̂ƃele.

¹⁵È diai kélee ŋuŋ ma ƃò dí kɛ̀ a fúlu-laa su kôya ŋɔluɛ-ŋa saa ŋɔyao-maai sârai.

¹⁶Tɔ̃yâ ma vé pá ní a gɛɛ é kpɔ́ŋ ŋ̀âla-taa-kela-ŋai dîa, kɛ́lɛ, è pà a gɛɛ é kpɔ́ŋ Eberaɣɛ̃ɛ ŋɔsuui-su-ƃelai dîa.

¹⁷Mɛni ma fɛ̂ɛ é kɛ́ yɛ̂ɛ m̀arâai pere-sii kélee su, a gɛɛ é kɛ́ a sâla láa soŋ-nuu kɛ́tɛ nyíi maloŋ-kâa káa ǹyêei zã́a Ɣâla ŋɔtíi su, a gɛɛ é ǹûai dísɔnyɔ̂ŋ maa-sala kula.

¹⁸Pɔ̂ri káa mì a gɛɛ é kpɔ́ŋ diai dîa su-kɔɔŋ a pâ dípɔ̂i, kpɛ́ni fêi, ǹyaa kpîŋ a mɛni-soli támaa káa, su-kɔɔŋ a pá bɔ.