Read Kpelle Ibulu 6 Bible Online

Ibulu 6 - Kpelle bible

Ibulu 6

¹Mɛni ma kwaa kpéra Kôrai maa-mɛni-lɛɛ ma nyíi vii kpɛɛi, kú lí zɛŋ-lɛɛi nyíi gbanaŋɔɔ̂i. Maa fé nɛ̃ɛ ní ŋɔ́nɔ a gɛɛ kú zɛŋ fii-kpɛɛ-ŋai ŋí lɛ́ɛ kɔ́ɔ pîlaŋ ŋɔ́nɔ a nina nyíi-ŋai díkaa a kú kɛ́ɛ kú kúpôlu tɔɔ tua-pere-nyɔŋ ma. Laa-la é kɛ́ kúyêei nyíi gáa Ɣâla mɛni ma,

²batâi maa-mɛni-lɛɛ, núu yée pɛlɛɛ núu ma, mu-siɣe saa-yêei maa-mɛni, da wɔlɔ-wɔlɔ mɛni-ŋa-teɛɛ.

³Ǹyaŋ kwa pâi nyíŋi kɛ̂i, à kɛ̀ Ɣâla à fàa ma.

⁴Diai kwaa-ponoɔ a pá dípɔ a tãi dai, nyíi-ŋai da Ŋ̀âla-taa sama-sɛŋ kɔɔ̂ŋ da kɛ́ a M̀ɔlêŋ Maa Waai sɔlɔ ƃo-ƃelai dai,

⁵da Ɣâla ŋɔwoo lɛ́lɛɛi kɔɔ̂ŋ da ŋ̀éniɛi pâi pâi ŋɔwala-walai.

⁶À kɛ̀ da tòo pôlu dílaa-lai su, núu fa pɔ̂ri pâi ŋɔnɔ pôlu a dia lii-pene su, kpɛ́ni fêi, da Ɣâla Ǹóŋ kpamo saa-wuru ma díkpîŋ mɛni ma da ŋ̀umɛ kpɔŋ su.

⁷Ǹɔii nyíi tuna a pû ma é lɔ́ mu-pere é sí-sɛŋ kpɛtɛ nyíi ǹɛ́lɛɛ̂i diai mɛni ma da zí-sɛŋ síi dímɛni mai, Ɣâla a lûwa làa maa-lɔii tí ma.

⁸Kɛ́lɛ, à kɛ̀ ɣalêŋ-kpɔlɔ à kùla maa-lɔii ma, gɛ̀ ní vé a lɔii lɛ́lɛɛ. Gáa yɛ̂ɛ lɔii nyíi kɛ̀ pâi vóôi, ǹyaŋ gbɛɛ ŋá ƃa dí géreŋ.

⁹Berei máŋ kwa lônoi la a bere-sii ŋí, ŋáwɛli-kɛ-maa-ƃelai, à kɛ̀ a kápɔ-pere, kúlaâi la kpɔ́ a gbanaŋɔɔ a gɛɛ mɛni lɛ́lɛɛ-ŋa da pâi kulâi kákponôi, nyíi-ŋai díkaa a ƃalo-laa pɔ́ɔi.

¹⁰Ɣâla fé fíli ní a gɛ́ɛ a pɔ̂ri ŋ̀ɛ́i naŋînii kátii mɛi da káwɛli-kɛ-maai ká ǹɛ zarâi a tíi-kɛɛ Ŋ̀âla-ƃelai diɛ yɛ̂ɛ berei ka niî gɛ̂i lai.

¹¹Kwa ŋ̀wɛ̂lii a gɛɛ vɔrɔ-fɔlɔ-tii tɔnɔi tí é kɛ́ káyêei tɛi-tɛi a gili-kɛ-zui maa-laa-la kpanaŋ gáa káyêei é lɛ́ɛ la zu gbɛɛ ŋá-tãi é seri.

¹²Káfe kɛ̀ a nyɛ̃ŋ-nyɛ̃ŋ ƃela, kɛ́lɛ, ká kɛ́ a diai pɔɔkɔ̂ŋ-ƃela díkaa a gono-tee-ŋai sɔlɔ ƃo-ƃela laa-la da lii-kpele sârai.

¹³Ɣâla kɛ́ɛ a góno tée Eberaɣɛ̃ɛ yêei, núu da fé kɛ́ ní naa a gɛ́tɛ é tɛ́ɛ Ɣâla ma a gɛɛ Ɣâla é voo ma, ǹyaŋ è vòo ǹyaa kpîŋ ma,

¹⁴nyɛɛi, “Tɔ̃yâ má ŋa pâi lûwa lâai yâ í ƃûu ƃó.”

¹⁵Ǹyaŋ Eberaɣɛ̃ɛ nyíi maa-kpɛŋ kɛ̀ a lii-kpelei, é góno-teei sɔlɔ ƃô.

¹⁶Núu a vòo dɛɛ-maa ma, ǹyaŋ dí laa-saai kélee su foo-woo ƃa tɔ̃yâ ƃò.

¹⁷Mɛni ma tãi Ɣâla è kɛ̀ ŋ̀wɛ̂lii a gɛɛ é ǹɛ́ bɔɔ-sɛŋ sɔlɔ ƃo-ƃela dîa a gɛɛ ŋɔsapoi maa fa fâleŋ. È ǹɛ dîa a zu ponoɔ foo-woo su,

¹⁸a gɛɛ kwa kɛ̀ ƃalo-laa sɔlɔ ƃoi, lii-kpele kpanaŋɔɔ é kɛ́ kúyêei, kú kúkili-kɛ-zui sóŋ a gbanaŋɔɔ nyíi gáa kúŋɛi-tuɛi mɛni feerɛ nyíi-ŋai dímaa fa fâleŋ dísârai nyíi-ŋai dífa pɔ̂ri Ɣâla kɛ̂i é ŋɔkono-teei maa fáleŋ.

¹⁹Gili-kɛ-zui ŋí káa yɛ̂ɛ kúmɔ̂leŋ soŋ-kɔli kpanaŋɔɔ a tɔ̃yâ. Gáa a gili-kɛ-zui nyíi a lɔ̂ pɔ̂rɔŋ é tɛ́ɛ seɣe sɛ̂lɛŋɔɔ pôlu,

²⁰ƃɛ́i Zîsɛ a lí naa yɛ̂ɛ kútuɛ-kpɛtɛ-nuui, a kɛ́ a sâla láa soŋ nuu kɛ́tɛ wɔlɔ-wɔlɔ da wɔlɔ-wɔlɔ yɛ̂ɛ berei Mɛkisɛdɛi è kɛ̀ la a sâla láa soŋ-nuu kɛ́tɛi.