Read Kpelle Ibulu 7 Bible Online

Ibulu 7 - Kpelle bible

Ibulu 7

¹Mɛkisɛdɛi ŋí è kɛ̀ a Salɛŋ-kaloŋ, gɛ ƃo ŋɔ́nɔ a Ŋ̀âlai Gɛ́tɛi ŋɔsâla láa soŋ-nuu, è Eberaɣɛ̃ɛ káa kulâi kɔ́ kɔ̂i nyíi è kâloŋ-ŋa da-ni paa zui, é lûwa láa ma.

²Nya ƃe Eberaɣɛ̃ɛ è gɔ̃liŋ kélee buu-ɣelei tɛ̀ɛ bɔ. Maa-ŋuŋ, yɛ̂ɛ berei láai su-kulai káa lai, gáa a tɔ̃yâ-laa-kaloŋ, gɛ ƃò ŋɔ́nɔ a Salɛŋ-kaloŋ, nyíi su-kulai ƃa lii-sêe-kaloŋ.

³Ǹâŋ fé ma, kpaa máŋ ǹee, kpaa máŋ zûu-pîlanii. Ŋɔɣele-ŋai kɔ́ɔ pîlanii fé ma, kpaa máŋ ŋɔɣeniɛi kpɛɛ ŋá, kɛ́lɛ, berei moloŋɔɔ̂i la Ɣâla Ǹóŋ mai, gáa nɔ́ a sâla láa soŋ-nuu wɔlɔ-wɔlɔ da wɔlɔ-wɔlɔ.

⁴Ka gáa berei gɛ́tɛ̂i lai! Zãâi kúnâŋ Eberaɣɛ̃ɛ è gùla gɔ́i sui, è buu-ɣelei tɛ̀ɛ bɔ.

⁵Liiva dísuui-su-ƃelai nyíi-ŋai sâla láa soŋ-mɛni káa dípɛrɛ lái, gáa dɔ̂ŋ su a gɛɛ dí ǹûai kɔ̃liŋ buu-ɣelei sɔlɔ ƃo. Zu-kulai ƃa díƃarâai, berei máŋ ǹûai ŋí máŋ dí kùla la Eberaɣɛ̃ɛ ŋɔsuui sui.

⁶Kɛ́lɛ, nalôŋ ŋí nyíi vé kúla ní dísuui sui, è Eberaɣɛ̃ɛ kɔ̃liŋ buu-ɣelei sɔlɔ ƃô é lûwa láa Eberaɣɛ̃ɛ ma nyíi gono-tee-ŋai díkaa ǹyêei.

⁷Sîa kélee fé zu a gɛɛ núu pɔlɔ a lûwa làa lôloŋ ma.

⁸Gáa a sɛŋ a gɛɛ diai da sâai dí nûa-kɔ̃liŋ buu-ɣelei sɔlɔ ƃó, gɛ ƃô ŋɔnɔ a sɛŋ a gɛɛ ǹúui dí maa-sere-faa kɛ̀ a gɛɛ é kɛ́ ɣele mai é nûa-kɔ̃liŋ buu-ɣelei sɔlɔ ƃo máŋ.

⁹Núu a pɔ̂ri máŋ môi a gɛɛ Liivai ǹyaa kpîŋ nyíi a nûa-kɔ̃liŋ buu-ɣelei sɔlɔ ƃô é gɔ̃liŋ buu-ɣelei tɛ́ɛ Eberaɣɛ̃ɛ sârai,

¹⁰kpɛ́ni fêi, è kɛ̀ niî Eberaɣɛ̃ɛ kponôi tãi Mɛkisɛdɛi è gàa lai.

¹¹Eêi kɛ̀ núu eêi pɔ̂ri maa-waa-laa sɔlɔ ƃôi Liiva-ŋai kɛ́ɛ a sâla láa soŋ-nuu sârai kpɛ́ni fêi, ŋɔsâla láa soŋ-mɛnii yée mu ƃe ǹûai dí dɔ̂ŋ sɔlɔ ƃô naai, gɛ̀ ní le-mɛni ƃe fɛ̂ɛ dí sâla láa soŋ-nuu da kpɛni lɛ́ la yɛ̂ɛ Mɛkisɛdɛi, é tɛ́ɛ ǹúui ma nyíi gáa yɛ̂ɛ Eelɔŋ?

¹²Kpɛ́ni fêi, à kɛ̀ maa-faleŋ káa zâla láa soŋ-mɛnii su, gɛ̀ ní maa-faleŋ káa máŋ dɔ̂ŋ su.

¹³Ǹúui dí mɛni-ŋai ŋí ƃò é pîlaŋ mai, a kulâi núu-suu da kpɛni su, nuu-suui nyíi núu da fé niî wɔ́lɔ tíi kɛ́ ni mì Ŋ̀âla-teƃelei mai.

¹⁴Gáa a tɔ̃yâ a gɛɛ Kúnuu-namui è kùla Zudasi ŋɔsuui su, ǹyaŋ Mose fé sâla láa soŋ-nuu-mɛni ƃo ni é pîlaŋ nuu-suui ti ma.

¹⁵Mɛnii ŋí a kɛ̂ kpɔ́ a tɔ̃yâ a zu ponoɔ à kɛ̀ sâla láa soŋ-nuu da kpɛni à kɛ̀ naa yɛ̂ɛ Mɛkisɛdɛi,

¹⁶nyíi kɛ̀ a sâla láa soŋ nuui, ve kɛ́ ní nɔ́ a sâla láa soŋ-nuu, kpɛ́ni fêi, dí mò a gɛɛ fɛ̂ɛ sâla láa soŋ-nuu é kúla núu-sii da-ni su, kɛ́lɛ, è kɛ̀ a sâla láa soŋ-nuu a ŋwɔlɔ-wɔlɔ fulu-laai nyíi gɔ̃yɛŋ fé mai ŋɔwala-walai.

¹⁷Kpɛ́ni fêi, dí m̀aa-sere-faa kɛ̀, dîyɛɛi, “Íkaa a sâla láa soŋ-nuu wɔlɔ-wɔlɔ da wɔlɔ-wɔlɔ yɛ̂ɛ berei Mɛkisɛdɛi è kɛ̀ la a sâla láa soŋ-nuui.”

¹⁸Ǹyée dɔnɔ mɛi-pere, dɔ̂ŋ pɔlɔi kɛ̀ díyêei, ǹáâi a dee, kpɛ́ni fêi, vii-kpɛɛi gɛ ƃo nɔ kpɛni-kpɛni.

¹⁹Kpɛ́ni fêi, dɔ̂ŋ fé sɛŋ da kélee kɛ́ ni a maa waa. Ǹyée kpéli mɛi-pere, kili-kɛ-zu lɛ́lɛɛ kɔ́ɔ è kɛ̀ a bîlaŋɔɔ, nyíi kwa lɛ̂ɣɛ Ɣâla kɔlɛ zarâi.

²⁰Ǹyaŋ gili-kɛ-zu lɛ́lɛɛi ŋí kɔ́ɔ fé pîlaŋ ní fóo-woo ŋɛ́i pôlu.

²¹Diai wɔ́lɔ kɛ̀ a sâla láa soŋ-ƃela a maa-ŋuŋ, dí dítii-ŋai sɔlɔ ƃô fóo-woo ŋɛ́i pôlu, kɛ́lɛ, dí ǹúui ŋí lɛ̀ a sâla láa soŋ-nuu a fóo-woo. “Kúnuu-namui a vóo, ǹyaŋ vé pâi ŋɔkili-ŋa-siai maa fálenîi. ‘Íkaa a sâla láa soŋ-nuu wɔlɔ-wɔlɔ da wɔlɔ-wɔlɔ.’ ”

²²Nyíŋi a Zîsɛ kɛ̀ a ǹúui a kpanaŋ-woo lɛ́lɛɛ kɛ̀ a tɔ̃yâi.

²³Zâla láa soŋ-ƃelai maa-ŋuŋ-ŋai dí kɛ̀ a dítamaa, kpɛ́ni fêi, saa è kɛ̀ dísiɣêi dítii-ŋai mɛi tɛi-tɛi.

²⁴Kɛ́lɛ, zâla láa soŋ-nuui ŋí káa nɔ́ a sâla láa soŋ-nuu a tãi kélee. Kpɛ́ni fêi, gáa nɔ́ ɣele mâ wɔlɔ-wɔlɔ da wɔlɔ-wɔlɔ.

²⁵Mɛni ma, pɔ̂ri káa mì a gɛɛ é diai ƃálo wɔlɔ-wɔlɔ da wɔlɔ-wɔlɔ da lɛ̂ɣɛ Ɣâla kɔlɛ zarâi. Kpɛ́ni fêi, gáa ɣele ma a tãi kélee a gɛɛ é tɔ́ɔ dímɛni mà.

²⁶È kɛ̀ a mɛni lɛ́lɛɛ a gɛɛ fɛ̂ɛ sâla láa soŋ-nuu kɛ́ɛ ŋí é kɛ́ kúyêei, maa waa, zɔŋ fé mà, pɔ́ɔ fé mà, da sɔnyɔ̂ŋ-ƃela díŋa kɔlɛɛ, maa tɛɛ a gɛ́tɛ ŋelei mɛi.

²⁷Vé kɛ́ ní a sɛŋ a gɛɛ fɛ̂ɛ é sâla kúla a fólo kélee, maa-ŋuŋ gbîŋ-sɔnyɔŋ mɛni ma, naa pôlu ma ǹûai dísɔnyɔ̂ŋ mɛ̂ni mà, yɛ̂ɛ berei zâla láa soŋ-ƃela gbeli-ŋai dí gɛ̀ lai. È zâlai kélee kùla nɔ́ tɔnɔɔ a tãi è gbîŋ tɛ̀ɛ lai.

²⁸Tɔ̃yâ ma, dɔ̂ŋ a núu lɛ̀ ŋɔfii-kpɛɛi su a gɛɛ a kɛ̀ a sâla láa soŋ-nuu, kɛ́lɛ, Ɣâla ŋɔfóo-wooi nyíi pà dɔ̂ŋ pôlu mai, a Ɣâla Ǹóŋ lɛ̀ nyíi maa waai wɔlɔ-wɔlɔ da wɔlɔ-wɔlɔi.