Read Kpelle Zĩi 1 Bible Online

Zĩi 1 - Kpelle bible

Zĩi 1

¹Ńyãa Zĩi ŋ́gaa a Ɣâla da Kúnuu-namui Zîsɛ Kôrai dítii-kɛ-nuu, Nuu-suu puu kao féerɛi díkaa Zɛ̃tai-ŋai samai: Ŋá fáa kâa.

²Ŋánûa, kà su-kɔɔŋ-sii támaa sɔlɔ ƃô, ka lii-nɛ̃ɛ kula,

³kpɛ́ni fêi, ka gɔlɔŋ a gɛɛ kálaa-lai su kɔɔ̂ŋɔɔ a ká kɛ̀ ka fɔlɔ-fɔlɔ.

⁴Ka tɔɔ fɔlɔ-fɔlɔ é dɔɔ̂i káa kákponôi kpɔ́ a gbanaŋɔɔ a gɛɛ ká kɛ́ a maa-waa-ƃela ka láa é fɛ́ɛ, sɛŋ da kélee ƃalâŋ fé kɛ̀ kâa.

⁵À kɛ̀ táre à wàla kɛ́ káyêei, ka Ɣâla marê kɛ́, nyíi a sɛŋ tɛ̂ɛ núu kélee pɔ́ kpɛ́ni-kpɛni va maa-lôno kɛ̀ mài, gɛ̀ ní a pâi dɛɛ̂i kápɔ.

⁶Kɛ́lɛ, maa-nuui é Ɣâla marê kɛ́ laa-la su, vé kɛ̀ a ǹúui laa-la fé ǹyêei, kpɛ́ni fêi, ǹúui laa-la fé ǹyêei, maa-nuui káa nɔ yɛ̂ɛ yá ŋɔzigɛ-zigɛi nyíi fãa a ǹokwa é dɛ́ ɣelêi.

⁷Kpɛ́ni fêi, vé kɛ̀ maa-nuui tí kíli ŋá a gɛɛ ǹúui gíli káa feerɛ va kânaŋ mɛni tɔnɔ mai, a pâi sɛŋ da kélee sɔlɔ ƃôi Kúnuu-namui yêei.

⁹Lii-nɛ̃ɛ é kɛ́ kúƃarâŋ-nuui ma nyíi Ɣâla a maa tɛ́ ŋɔkôlo-laai sui.

¹⁰Lii-nɛ̃ɛ é kɛ́ kúƃarâŋ-nuui ma nyíi Ɣâla a m̀aa yéŋ ŋɔtɔɔ-laai sui, kpɛ́ni fêi, maa-nuui tí a pâi tɛɛ̂i nɔ́ yɛ̂ɛ wúru-pôa.

¹¹Kpɛ́ni fêi, vóloi a kûla ŋɔzi-zí kpanaŋɔɔi é galai kpála, boa é pú ǹɛ́lɛ-ŋɛi é kpɛ́ɛ ma. Ǹyaŋ bere nɔ́ ƃe dɔɔ-nûui tí a pâi tɛɛ̂i la ŋɔtûa-perei su.

¹²Lûwa káa ǹúui ma a ǹíi kpèle su-kɔɔŋ yêei, kpɛ́ni fêi, à tɔ̀ɔ zu-kɔɔŋ tí su, gɛ̀ ní a pâi fulu-laa ŋɔkâloŋ-ƃɔrɔi sɔlɔ ƃôi, nyíi Ɣâla a góno tée la diai yêei dí ŋ̀wɛli ni.

¹³Su-kɔɔŋ à pà núu da kélee pɔ, vé mò, nyɛɛ, “Ɣâla ƃe ńzu kɔ̀ɔŋ.” Kpɛ́ni fêi, núu fa Ɣâla su kɔ̀ɔŋ a mɛni nyɔ́mɔɔ, ǹyaŋ Ɣâla ǹyaa kpîŋ fa núu su kɔ̀ɔŋ.

¹⁴Kɛ́lɛ, su-kɔɔŋ a pâ núu kélee pɔ tãi gbîŋ tua-pere nyɔŋ-wɛliɛi a ziɣe la bere sã́ai mai.

¹⁵Tãi núu kpîŋ tua-pere nyɔŋ-wɛliɛ à koo sìɣe lai, sɔnyɔ̂ŋ ƃe a zɔlɔ ƃo. Ǹyaŋ tãi sɔnyɔ̂ŋ a ƃɔ̂lɔ lai a pâ a saa.

¹⁶Ŋáwɛli-kɛ-maa-ƃelai, káfe ǹɛɛ naa núu da é kápɛlɛ.

¹⁷Sama-sɛŋ lɛ́lɛɛ kélee da sama-sɛŋ maa waa kélee da kûla kúmɛi-pere, nyíi-ŋai da pâ kúpɔ dí kúla Ɣâla yêei, nyíi gáa a gwaa-ponoɔ-ŋai kélee Dínâŋ. Maa fa fâleŋ. Ŋɔkwaa-ponoɔi ninîŋ fé ma.

¹⁸È kúmaa sɔlɔ ƃô é kúla ŋɔlii-laai su a dɔ̃yâ-wooi a gɛɛ kú kɛ́ a núu maa-ŋuŋ ŋɔkpɛtɛ-sãai sama yɛ̂ɛ sí-sɛŋ-ƃa maa-ŋuŋ.

¹⁹Nyíŋi é lɛ́ɛ kákili ŋá, ŋáwɛli-kɛ-maa-ƃelai. Tɔɔ núu kélee é mɛni mɛ́ni a maa félaa, é ǹóno-woo maa kpɛ́ɛ, ǹíi fé ŋwãna a maa félaa.

²⁰Kpɛ́ni fêi, núu-kpune ŋɔlii-ŋwâna fa Ɣâla ŋɔtɔ̃yâ-laai dûa kɛ́.

²¹Mɛni ma ka káyee kúla tua-pere-nyɔŋ-sii kélee su da ŋwana-lɔ̂ɔ-sii kélee, ka ŋ̀óoi sɔlɔ ƃó a maa-yeŋ-pere nyíi ziɛi kálii sui. Pɔ̂ri káa mì a gɛɛ é kámɔ̂leŋ ƃáloi.

²²Kɛ́lɛ, ka kɛ́ a ŋ̀óoi ŋɔtíi-kɛ-ƃela. Káfe kɛ̀ nɔ́ a mɛ̀ni-ƃêla, kákɛ kákpîŋ pɛ̀lɛ.

²³Kpɛ́ni fêi, à kɛ̀ núu da káa nɔ́ a ŋ̀óoi-mɛni-nuu vé a maa-tii kɛ́-nuu, gɛ̀ ní, gáa nɔ́ yɛ̂ɛ ǹúui a gbɔɔ̂i-ŋɛi káa mɛ̃lɛ-mɛ̃lɛ sui.

²⁴Kpɛ́ni fêi, a gbîŋ kàa nɔ́, é síɣe naa, é nia a maa félaa berei ma è kɛ̀ lai.

²⁵Kɛ́lɛ, ǹúui a dɔ̃yâ-tɔŋ su kàa va kpera mai, nyíi gáa a ŋuŋ-maa-ƃo-tɔŋ, berei vé la a mɛni-nuui nyíi a niai, kɛ́lɛ, gɛ ƃo a maa-tii kɛ́-nuui, da pâi lûwa lâai ma ŋɔtûa-perei su.

²⁶À kɛ̀ núu da káa kásama a gbîŋ kàa a Ɣâla-nuu, va ǹɛ́ŋ tɔɔ ǹóno-woo-perêi, kɛ́lɛ, gɛ gbɔɔ̂i pɛ̀lɛ, maa-nuui Ŋɔɣâla-mɛnii káa nɔ́ kpɛ́ni-kpɛni.

²⁷Ɣâla-mɛni kɛ́ɛ nyíi maa waai, maa fé kara ni Ɣâla Nàŋ-nuui ŋɛ́i-tuɛi, ǹyaa ká ŋí, a gɛɛ núu é tee-lonii naa káa da pɔ́ɔ-nɛyaa a tãi da kɛ̂ la mɛni-kpɔlu sui, a gɛɛ ŋɔ́nɔ é gbîŋ kɛ́ a ǹúui nyíi zɔŋ fé kɛ̀ m̀a ŋ̀éniɛi su.