Read Kpelle Pitɛ Maa-ŋuŋ 1 Bible Online

Pitɛ Maa-ŋuŋ 1 - Kpelle bible

Pitɛ Maa-ŋuŋ 1

¹Ńyãa Pitɛ, ŋ́gaa a Zîsɛ Kôrai ŋɔsia-nûu, Diai dítaa-taai Pɔŋtɔ, Galesia, Kapadôsia, Eesia, da Bɛtinia, yɛ̂ɛ ŋɔ̃yâ-ŋai,

²nyíi-ŋai Ɣâla Nàŋ-nuui è dílɛ̀ é díkɔlɔŋ a nàa túɛ é dímaa wáa a Mɔ̂leŋ a gɛɛ dí Zîsɛ Kôrai wóo mɛ́ni ŋɔŋãai é kpɛ́mɛŋ dîa. Ƃɛlɛ-sêe da lii-sêe dí támaa káyêei.

³Lûwa é kɛ́ Zîsɛ Kôrai Ŋɔɣâlai da Ǹâŋ ma! Ŋɔmaloŋ-kaa kɛ́tɛi su, da ŋɔ́nɔ kúmaa sɔlɔ ƃó a nina kwa kɛ́ fulu-laa kili-kɛ-zu su, Zîsɛ Kôrai ŋɔmu-siɣe saa-yeei sârai,

⁴kwa kɛ́ a pɔɔ-sɛŋ sɔlɔ ƃo-ƃela nyíi va wɔ́lɔ tɛ̀ɛ, m̀aa fé kara ni, vé tela pâi karâi, ǹáâi kɛɛ̂i Ɣâla-taa kámɛni ma,

⁵káai Ɣâla a kámɛi kâai a ŋɔwala-walai laa-la sârai ƃalo-laa mɛni ma, nyíi gbɛtɛ̂i a gɛɛ é lɛ́ a tãi gbɛɛ ŋái.

⁶Ka lii-nɛ̃ɛ kula nyíŋi sú. Berei máŋ nàa kuro à kɛ̀ tí la, ka pâi mɛni-soli kâai su-kɔɔŋ-sii támaa sui,

⁷a gɛɛ kálaa-lai ŋɔsu-kɔɔŋ é kɛ́ laa-maa-tɛ su, da ƃaa-kɛ-ma, é pɛ́lɛ folo-laa ma a Zîsɛ Kôrai pá tãi. Ǹaa-lai nyíi mɛni kpanaŋɔɔ̂i é tɛ́ɛ gôo ma nyíi a karai, berei máŋ da gɔ̀ɔŋ la a ŋɔŋ.

⁸Ǹúui káfe niî gáa níi, ka ŋ̀wɛ̂lii. Berei máŋ káfe gaâi la tãi ŋí su, kɛ́lɛ, kalaâi lai. Ka lii-nɛ̃ɛ su kɛ́tɛ kúla nyíi ǹáa fɛɛ̂i kpɔ́ a folo-laa a ŋánaai.

⁹M̀ɛni lɛ́lɛɛi gáa kálaa-lai sui, ǹyaa ƃa ká ƃálo-laa sɔlɔ ƃó kámɔ̂leŋ su.

¹⁰Ɣâla ŋɔlóno-kɛ-ƃelai nyíi-ŋai mɛlɛ-seei maa-mɛni ƃò nàa tuɛi, mɛlɛ-seei nyíi kɛ̀ pâi kɛ̂i a kápɔɔi, dí m̀álo-laai ŋí kɔ̀ri dí m̀aa-mare-kɛɛ kɛ́.

¹¹Dí mare-kɛɛ kɛ̀, a gɛɛ dí gɔlɔŋ le-nuu ƃe, kpaa máŋ mi-tãi ƃe Kôrai Ŋɔmɔ̂leŋ è ǹɛ díkponôi tãi dí kɛ̀ Kôrai ŋɔmɛni-soli-kaai maa-mɛni ƃôi la nàa tuɛ da volo-laai pâi lɛ̂i naa pôlui.

¹²Ɣâla è ǹɛ dîa a gɛɛ dífe tíi kɛ́ ni díkpîŋ mì, kɛ́lɛ, dí tíi kɛ̀ kâa, mɛni-ŋai sârai nyíi-ŋai diai Duŋ Lɛ́lɛɛi ƃo kâa M̀ɔlêŋ Maa Waai nyíi kula Ɣâla-taai zarâi. Dí mɛni-ŋai ƃò kâa, ŋ̀âla-taa-kela-ŋai díkaa ŋ̀wɛ̂lii kpɔ́ a gbanaŋɔɔ a gɛɛ dí ŋ̀á káa.

¹³Mɛni ma ka kákili-ŋa-siai kpɛtɛ ká kɛ́ a káŋuŋ sú séɣeŋɔɔ, ká kákili-kɛ-zui kélee pú m̀ɛlɛ-seei ma nyíi pâi kápɔ a Zîsɛ Kôrai lɛ́-ɣelei.

¹⁴Kákaa a woo-mɛni-ƃela. Káfe kɛ̀ a tua-pere-nyɔŋ maa-sɛŋ wɛli-ƃela yɛ̂ɛ berei ká wɔ́lɔ kɛ̀ la tãi káfe kɛ́ ni a bere sã́ai kɔlɔŋɔɔ lai.

¹⁵Kɛ́lɛ, yɛ̂ɛ berei ǹúui kátòlii maa waâi lai, ka kɛ́ a kámaa waa tûa-pere kélee su.

¹⁶Kpɛ́ni fêi, bɔ̃yɛɛ̂i, “Fɛ̂ɛ ka kɛ́ a maa-waa-ƃela, kpɛ́ni fêi, ḿaa waâi.”

¹⁷À kɛ̀ ǹúui à núu kélee ŋɔmɛnii ŋá tèe yɛ̂ɛ berei dítûa-perei káa la, kɛ́lɛ, va núu su ɣɛɛ ŋɔmɛni-ŋa-teɛɛi sui, ka zìɣe a Kánâŋ, gɛ̀ ní ka kákpîŋ mɛi káa ká ƃaa-kɛ-maa tɛ́ɛ bɔ̀ a tãi kákaa la ŋɔ̃yâ-lɔii-ŋa sui.

¹⁸Ka gɔlɔŋ a gɛɛ dí kámaa tèe mɛni kpɛ́ni-kpɛni-ŋai sú nyii-ŋai ká gùla kánâŋ-ni yêei. Dífe kámaa tée ní a zãâi nyíi-ŋai da tɛ̂ɛi, yɛ̂ɛ káne da gôo.

¹⁹Kɛ́lɛ, Kôrai è kámaa tèe a ŋɔŋãa-mɛni kpanaŋɔɔi yɛ̂ɛ ƃála-loŋ nyíi pɔ́ɔ kélee da fé kɛ́ ní mài.

²⁰Ɣâla è kɛ̀ a gɔ́lɔŋɔɔ nàa túɛ ŋ̀éniɛi kɔ́ɔ pîlaŋ tãi é lɛ́ɛ serii. Kɛ́lɛ, è ǹɛ a tãi gbɛɛ ŋá kámɛni ma.

²¹Ŋ̀âlai nyíi m̀u siɣe saa yêei é fólo-laa tɛ̀ɛ bɔi, ká láa la Zîsɛ sârai a gɛɛ kálaa-lai da kákili-kɛ-zui káa Ɣâla kponôi.

²²Kámɔ̂leŋ maa waâi a dɔ̃yâi maa-woo-mɛniɛi gáa káyêei a gɛɛ tɔ̃yâ-wɛli-kɛ-maa é kɛ́ káyêei kákîe-ni mɛni mai. M̀ɛni ma ka kákîe-ni wɛ́li tɔ̃yâ-pere su é kúla kálii su.

²³Da kámaa sɔlɔ ƃô a nina Ɣâla ŋɔwɔlɔ-wɔlɔ fúlu-laa-wooi sârai. Dífe kámaa sɔlɔ ƃô ní ká kúla zí-sɛŋ-kaoi nyíi su a sâai. Kɛ́lɛ, ká kùla nyíi su va sâai.

²⁴Kpɛ́ni fêi, “Núu-kpune kélee káa nɔ́ yɛ̂ɛ kala, núu-kpune kélee ŋɔfólo-laai kɛ́ ƃò yɛ̂ɛ wúru-pôa. Galai a kpâla, boa kɛ́ pù.

²⁵Kɛ́lɛ, Kúnuu-namui wóo káa nɔ́ naa wɔ́lɔ-wɔlɔ.” Ǹyaŋ maa-wooi ƃa Duŋ Lɛ́lɛɛi nyíi dí mò kâai.