Read Kpelle Pitɛ Maa-ŋuŋ 2 Bible Online

Pitɛ Maa-ŋuŋ 2 - Kpelle bible

Pitɛ Maa-ŋuŋ 2

¹Mɛni ma ka tée lii-ŋwana kélee ma da wôya-mɛni kélee. Ka kɛ́ a tɔ̃yâ-ƃela. Ka tée tólo ma da laa-kara-mɛni kélee.

²Ka Ɣâla-niŋa ŋíni-ya maa waa wɛli kpɔ́ a ŋánaa yɛ̂ɛ nîa-pɛlɛɛi nyíi-ŋai dí dímaa sɔlɔ ƃô a ninai, a gɛɛ é káƃɔlɔ é séri a káa ƃálo-laa ma.

³Kpɛ́ni fêi, ká Kúnuu-namui ŋɔsɔŋ-lɛlɛ-laai kɔɔ̂ŋ.

⁴Ka pá ǹúui pɔ gáa a vúlu-laa-kɔnii nyíi núu-kpune è ǹyée kùla mu, kɛ́lɛ, ǹɛ́lɛɛi Ɣâla ŋɛ́i, maa-mɛni kpanaŋɔɔi.

⁵Ka kákpîŋ tɔ̀ɔ a Mɔ̂leŋ ŋɔpɛ́rɛ yɛ̂ɛ fúlu-laa-kɔni-ŋa. Ka kɛ́ a sâla láa soŋ-ƃela. Ka Mɔ̂leŋ ŋɔsâlai kúla Zîsɛ Kôrai sârai nyíi a Ɣâla líi làai.

⁶Kpɛ́ni fêi, gáa Ŋ̀âla-kɔlɔi su, “Ka gáa, ŋ́gaa kɔni lâai Zãiyɔŋ su, nyíi gáa a zonoŋ su-kɔni nyíi ŋá nɛ̀ maa-mɛni kpanaŋɔɔ mai. Ǹúui a lâa lai vé pâi ŋumɛ̂i.”

⁷Mɛni ma káai ka lâa lai, maa-mɛni kpanaŋɔɔ̂i káŋɛi. Kɛ́lɛ, diai dífe laa ni lai, “Gɔnii nyíi bɛ́rɛ tɔɔ-ƃelai dí díŋɛi nàɣiŋ mɛi, a nâa kɛ́ a bɛ́rɛi sonôŋ su-kɔnii gbîŋ-kpiŋ da.”

⁸Ǹyaŋ, “Gɔnii nyíi pâi nûa kɛ̂i dí karêŋ, gɔnii nyíi pâi díkɛ̂i dí tooi.” Ǹyaŋ dí kàreŋ, kpɛ́ni fêi, dífe díwoli tɔɔ ni ŋ̀óoi ma nyíi dí dílɛ̀ a gɛɛ dí gɛ́i.

⁹Kɛ́lɛ, kákaa a lɛ́-nuu-suu, ka ƃo a sâla láa soŋ-nuu-suu kɛ́tɛ, ka ƃo a lɔii-ŋuŋ maa waa, ka ƃo a Ɣâla kpîŋ-nua, a gɛɛ ǹúui kákùla kpíni sú é pá a káa ŋɔkwaa-ponoɔ kɛ́tɛ lɛ́lɛɛi sui, ka ŋɔtûa-pere kɛ́tɛ lɛ́lɛɛ-ŋai maa-mɛni ƃó.

¹⁰Tãi da káfe kɛ́ ní a nûa, kɛ́lɛ, ká nâa kɛ́ a Ɣâla ŋɔnûa. Tãi da káfe niî kɛ̀ maloŋ-kaa sɔlɔ ƃo ni. Kɛ́lɛ, ká nâa maloŋ-kaa sɔlɔ ƃó.

¹¹Ŋáwɛli-kɛ-maa-ƃelai, káai a ŋɔ̃yâ-ŋai da ǹɔii da kpɛni su-ƃelai, ŋa kákpera fêi a gɛɛ ká síɣe núu-kpune ŋɔkɛ-pere-nyɔŋ maa-sɛŋ-wɛliɛi kɔlɛ nyíi gáa kɔ̂i kámɔ̂leŋ pɔi.

¹²Ka kátûa-pere lɛ́lɛ Zɛ̃tai-ŋai sáma a gɛɛ tãi da da lòno é pîlaŋ kâa a gɛɛ kákaa a sɔnyɔ̂ŋ-kɛ-ƃela, dí kátii lɛ́lɛɛi káa dí Ɣâla ŋɔfólo-laai maa-tɛ́ a tãi Ɣâla a pâi pâi lai.

¹³Ka gɔmɛnɛ-ƃelai kélee wóo mɛni da núu kpeli-ŋai díkaa kámɛi. Ka gâloŋ kɛ́tɛi woo mɛni. Kpɛ́ni fêi, ǹyaa ƃe ǹɔii mɛi,

¹⁴da gɔmɛnɛ-ƃelai gâloŋ a dítɛ̂ɛ a gɛɛ dí tɔ̂ŋ kpɛ́ sɔnyɔŋ-ƃela dîa dí mɛni lɛ́lɛɛ-kɛ-ƃela láa maa tɛ́i.

¹⁵Ɣâla nîa-mɛni ƃá, a gɛɛ núu é mɛni lɛ́lɛɛ kɛ́, ŋɔmɛni lɛ́lɛɛ kɛɛ̂i é moo-ƃelai díƃoo-lono-ŋai kélee kpera.

¹⁶Ka káfulu-laai kɛ́ yɛ̂ɛ ŋuŋ ma-ƃo-ƃela. Kɛ́lɛ, káfe káŋuŋ-ma-ƃoi kɛ̀ a káfâlo mɛni nyɔ́mɔɔ kɛ́ mɛni ma. Kɛ́lɛ, ka káfulu-laai kɛ̂ yɛ̂ɛ Ɣâla yée-mu-ƃela.

¹⁷Ka ƃâa kɛ́ núu kélee ma. Ka diai wɛ́li ka dîa-ni kákaa zu tɔnɔɔi. Ka yao Ɣâla ma. Ka ƃâa kɛ́ gâloŋ kɛ́tɛi ma.

¹⁸Yée-mu-ƃela, ka kámɛi-ƃelai wóo mɛni yao-maa-sii kélee su. Káfe díwoo mɛni nɔ́, à kɛ̀ da kásòŋ a ǹɛ́lɛɛ. Kɛ́lɛ, ka díwoo mɛni à kɛ̀ da kásòŋ a nyɔ́mɔɔ.

¹⁹Kpɛ́ni fêi, nyíŋi káa a Ɣâla nîa-mɛni a gɛɛ ǹúui gíli káa Ɣâla mai, é mɛni-soli káa, à nɛ̀ɛ ma kpîŋ é gáa wôya-pere su.

²⁰Le-mɛni lɛ́lɛɛ ƃe naa, à kɛ̀ kà mɛni nyɔ́mɔɔ kɛ́, ka mɛni-soli káa mɛni ma a lii-kpele? Kɛ́lɛ, à kɛ̀ kà mɛni lɛ́lɛɛ kɛ̀, ka mɛni-soli káa mɛni ma a lii-kpele, gáa a Ɣâla nîa-mɛni.

²¹Da kátoli nyíŋi ma, kpɛ́ni fêi, Kôrai ǹyaa máŋ è mɛni-soli kàa kámɛni mà, é ŋɔmɛni-kɔɔŋ-maai lɛ́ɛ káyêei, a gɛɛ ká lɛ́ɛ ŋɔtûa-perei su.

²²Vé sɔnyɔ̂ŋ kɛ́ ní. Núu-pɛlɛ-woo da kélee máŋ fé kúla ní ǹá.

²³Tãi dí ǹaraŋ lai, vé larâŋ pìli ní pôlu. Tãi è mɛni-soli kàa lai, vé dímaa yao ní. Kɛ́lɛ, è ŋ̀ɔi tɛ̀ɛ nɔ́ mɛni-saa ŋa-tee-nuu sãa tɔnɔi pɔ.

²⁴Ǹyaa kpîŋ è kúsɔnyɔ̂ŋ-ŋai síɣe gbonôi zaa-wurii ma, a gɛɛ kú kpera kúɣeniɛi kɛ́ɛ ma sɔnyɔ̂ŋ mɛni ma, kú kúɣeniɛi kɛ́ tɔ̃yâ-laa mɛni ma. Ǹókwa-pala-ŋai dí káƃàlo.

²⁵Kpɛ́ni fêi, ká kɛ̀ yɛ̂ɛ ƃála-ŋa nyíi-ŋai kɛ̀ pâi lánîi, kɛ́lɛ, ka nâa pá pôlu M̀ála mɛi-kaa-nuui pɔ, ǹúui a kámɔ̂leŋ mɛi kâai.