Read Kpelle Pitɛ Veerɛi 2 Bible Online

Pitɛ Veerɛi 2 - Kpelle bible

Pitɛ Veerɛi 2

¹Ɣâla maa-wôya lono-kɛ́-ƃela dí dímu siɣe máŋ ǹûai sama, yɛ̂ɛ berei nɔ woya-sɛŋ lɛ-ƃela da pâi kɛ̂i la kásama, nyíi-ŋai pâi lɛ́ɛ-sɛŋ lɛ̂i a loo-pere, nyíi a pâ a su-karai. Da Mɛi-nuui maa-sia tòo máŋ nyíi díyài, díkɛ pâ a su-kara a maa félaa dia kpîŋ dîa.

²Núu támaa da pâi pîlanii díwolii-kpɔlɔi pôlu, ǹyaŋ dia ƃe pâi kɛ̂i a ǹûai nyíi-ŋai pâi lóno nyɔ́mɔɔ kɛ̂i é pîlaŋ dɔ̃yâi maa-perei mai.

³Dísɛŋ-wɛlii sú, da pâi káwôyai a lɛ́ɛ-woo-ŋa. Dímɛni-ŋa tée-nuui a gbîŋ kpɛ́tɛ a tãi su kôyaa. Dísu-karai nuui káa niî a ŋ̀ɛi gɛ́ dímaa kpɛ́ŋ.

⁴Ɣâla fé ŋ̀âla-taa-kela-ŋai su mɛni lɛɛ ní a tãi dí sɔnyɔ̂ŋ kɛ̀ la lâi, kɛ́lɛ, è dípili Dɛ̂ƃele-taa-kpinii su a gɛɛ dí lɛ́ɛ naa m̀ɛni-ŋa-tee-tãi é seri.

⁵Vé ŋ̀énia pɔlɔi su mɛ̂ni lɛ̀ɛ ni, kɛ́lɛ, è Nôa lɛ̀ɛ naa nyíi kɛ̀ a tɔ̃yâ-laa maa-worɛ woo-ƃo-nuui, da núu lɔ́ɔlu mɛi feerɛ, a tãi è ǹya-fɛɛi tɛ̀ɛ la é diai dífe Ɣâla mɛni wɛ̂linii díkelee mɛi ǹɔii sui.

⁶È Sodɔŋ-taai da Gomora-taai pène a luu é dímɛnii ŋá tée a gɛɛ dísu é kara a gɛɛ é kɛ́ a mɛni-kɔɔŋ-maa diai mɛni ma kɛ̀ pâi kɛ̂i a diai dífe Ɣâla-mɛni wɛ̂linii.

⁷È dɔ̃yâ-nuui La kula-yeei kɛ̀ nyíi ǹíi a kɛ̀ sɛ̂lɛnii kpɔ́ a ŋánaa a ŋwana-lɔ̂ɔ-ƃelai díwolii-kpɔlɔ-mɛnii.

⁸Kpɛ́ni fêi, mɛnii dɔ̃yâ-nuui ŋí è gàa, é mɛni tãi è kɛ̀ la dísamai, ǹíi è ŋwàna ŋɔtɔ̃yâ-mɔleŋ su a ɣele kélee díŋwana-lɔ̂ɔ-tuai maa-mɛni ma.

⁹Ǹyaŋ à kɛ̀ Kúnuu-namui è nyíŋi kélee kɛ̀, gɛ̀ ní è gɔ́lɔŋ berei a pɔ̂ri Ŋ̀âla-ƃelai kula-yeei kɛ̂i la su-kɔɔŋ su é diai kɛ́ tɔŋ-kpɛ́-maa mu nyíi-ŋai dífe a tɔ̃yâ-ƃelai, é lɛ̀ɛ la zu mɛni-ŋa tée-tãi é seri,

¹⁰é téla kɛ́ kpɔ́ a diai da díwoli tɔ̀ɔ tua-pere-nyɔŋ maa-sɛŋ-wɛliɛ ma nyíi a núu kàrai, da diai da díŋɛi nàɣîŋ ǹúu-tuɛ-ƃelai mɛi. Dílii-kpeleɛɛ, díŋuŋ su kpanaŋɔɔ, dífa yao a lóno nyɔ́mɔɔ-kɛɛ é pîlaŋ la Ɣâla ŋɔfólo-laai ma,

¹¹Berei máŋ ŋ̀âla-taa-kela-ŋai kɛ́tɛi la, díwala-walai kɛ́tɛ̂i, dífa lóno nyɔ́mɔɔ kɛ̀ mɛni-ŋa tée-pere su é pîlaŋ dîa Kúnuu-namui ŋɛ́i-tuɛi dîa.

¹²Kɛ́lɛ, ǹûai ŋí nyíi-ŋai díkaa nɔ́ yɛ̂ɛ sua-ŋa nyíi-ŋai dífa díkili-ŋa-siai, da tûa nɔ́ yɛ̂ɛ sua-ŋa nyíi-ŋai da díkaa nɔ́ a gɛɛ dí dísoŋ dí dípaai. Da lóno nyɔ́mɔɔ kɛ̀ mɛni-ŋa sú nyíi-ŋai dífe gɔlɔŋ. Díkpîŋ su-karaai a pâi dísu karâi.

¹³Da pâi mɛni-soli kâai dímɛni nyɔ́mɔɔ-kɛɛi mɛni ma. Da gàa a lii-nɛ̃ɛ-mɛni a gɛɛ díkaa ƃoo-pele kɛ̂i máŋ a fólo ŋá. Díkaa yɛ̂ɛ pɔɔ liƃiɛ-ŋa da pala, dílii kɛ́ nɛ̃ɛ a kápɛlɛɛ tãi ka dîa-ni ka kɛ̂ kúu kɛ̂i lai.

¹⁴Wulu-wulu kɛ́-nɛyaa maa-mɛni káa díkili ŋá a ŋánaa, sɔnyɔ̂ŋ-kɛɛ fa dílii làa. Diai dílii-pene la nɛɛ̂i, da dílii pène. Sɛŋ-maa-lii-teɛɛ maa-tare káa dîɛ a ǹɛ́lɛɛ. Náɣâŋ káa dîa!

¹⁵Da díyee kúla dɔ̃yâ-perei mu da láŋ. Da pîlaŋ Biɔ ǹóŋ Balaaŋ ŋɔperei pôlu, nyíi a ŋ̀wɛ̂lii é mɛni nyɔ́mɔɔ-kɛɛ zɔ̃ɔ sɔlɔ ƃói.

¹⁶Kɛ́lɛ, dí lòno ma gbîŋ-tɔŋ karaâi mɛni ma. Ŋ̀wɛlɛ-sôoi è lòno a núu-wôo é Ɣâla ŋɔlóno-kɛ-nuui ŋɔƃoo-mɛnii kpera.

¹⁷Ǹûai ŋí díkaa nɔ́ yɛ̂ɛ yá-ɣɛli loŋ nyíi gbálaâi. Dí ƃò yɛ̂ɛ lúu nyíi fãa kɛ́tɛ a tɛ́ɛ lai. Dɛ̂ƃele-taa-kpinii káa naa dímɛni ma.

¹⁸Kpɛ́ni fêi, díkɛ ƃoo-yoŋka têei nɔ́ a díwoo su kɛ́tɛi. Da nûa líi pene a núu ŋɔkɛ-pere-nyɔŋ maa-sɛŋ-wɛliɛi woli-kpɔlɔ-pere su. Diai da dílii pènei dia ƃa ǹûai da pú díkɛ kùla diai yêei da díɣeniɛi kɛ̀ pere-sii nyɔ́mɔɔ sui.

¹⁹Da ŋuŋ-ma-ƃo maa-kono-tee kɛ̀, kɛ́lɛ, dia kpîŋ díkaa a su-kara ŋɔluɛ-ŋa. Kpɛ́ni fêi, sɛŋ kélee a núu yée mɛi ɣálêi, maa-nuui káa a maa-sɛŋ tí ŋɔluɛ.

²⁰Kpɛ́ni fêi, à kɛ̀ dípuɔ dí kúlaa ŋ̀éniɛi ŋɔsu-kara-laai yêei pôlu ma Kúnuu-namui da Kúƃalo-nuui Zîsɛ Kôrai maa-tarei sârai, da ŋɔ́nɔ kɛ́ zu a díyee mɛi ɣále, gɛ̀ ní nɛ̃ɛ-pôlui nyɔ́mɔɔi dímɛni ma é tɛ́ɛ maa-ŋuŋ ma.

²¹Kpɛ́ni fêi, eêi pɔ̂ri kɛ̂i a ǹɛ́lɛɛ dímɛni ma a gɛɛ dífe wɔlɔ-wɔlɔ ma dɔ̃yâ-laai maa-perei kɔlɔŋ é tɛ́ɛ la gɔ́lɔŋɔɔ ma dîɛ dí dípôlu tɔ̀ɔ dɔ̂ŋ maa waai ma nyíi dí dɛ̀ɛ dípɔi.

²²Ǹyaŋ è kɛ̀ nɔ́ a dia yɛ̂ɛ berei dɔ̃yâ-saŋ-wooi a mò la, ǹyɛɛi, “Ŋ̀îlai a tìnaŋ ŋɔ́nɔ ŋɔkɔŋ pîlii pɔ́-pere. M̀oi dí ŋ̀waâi, a lene pôlu gɛ́ lí a gɛ́ɛ é tóo bârai su.”