Read Kpelle M̀ɛni-sâa Ƃó-ƃelai 1 Bible Online

M̀ɛni-sâa Ƃó-ƃelai 1 - Kpelle bible

M̀ɛni-sâa Ƃó-ƃelai 1

¹Zasua kɛ́ɛ a sàai, Eezuɛ-ŋai dí Yâwɛɛ marê kɛ̀ dîyɛɛi, “Ǹúu-suui nenɛ̂ ƃé ífâai ma a gɛ́ɛ é tɔ́ɔ kútuɛ é kɔ́ pɛ́lɛ Keena-ƃelai dîa ǹyaa fúlɔi?”

²Yâwɛɛ è díwoo su tòo ǹyɛɛ, “Zuda suui é kɛ́ a maa-ŋuŋ é kɔ́ pɛ́lɛ dîa, kpɛ́ni fêi, ŋa wála-wala-laa tɛ̀ɛ dípɔ a gɛ́ɛ dí ǹɔii kpîŋ siɣe.”

³Nya ƃe Zuda suui su-ƃelai dí mò Simiɔŋ suui su-ƃelai dîa dîyɛɛi, “Ka pá kwaa lí ǹɔii kpîniŋ su nyíi da dɛ̀ɛ kúpɔi ká kpɔ́ŋ kûa kúkelee kú kɔ́ Keena-ŋai pɔ́. Gɛ̀ ní kwa pâi liî kú kpɔ́ŋ kâa káwɔ̂ lɔii kpiniŋ su.” Nya ƃe Simiɔŋ suui

⁴da Zuda suui su-ƃelai dí lì díkelee dí kɔ́ pɛ́lɛ Keena-ƃelai dîa. Yâwɛɛ è gɛ̀ dí Keena da Pɛriza-ŋai yée mɛi ɣále. Dí sinâa wála puu pâa nyii-ŋai kɛ̀ Bezɛi.

⁵Dí Anoni-bezɛ kàa naa da dîa-ni dí kɔ́.

⁶Nya ƃe Adonibezɛ è pù. Kɛ́lɛ dí gbɛ̀ dí zòŋ. Dí ǹyée-gbua zɛkponoi da gɔ́ɔ-gbua kɛ́tɛi tèe ma.

⁷Díkɛɛ da gɛ̀ tí lai, è mò ǹyɛɛi, “Kâloŋ buu lɔ́ɔlu mɛi feerɛi ŋá díkɔɔ-gbua da díyee-gbua zɛkponoi teêi dîai da kâa kɛ̀ ŋámii sãa pɛnɛi ɣɛɛ̂i díkɛ mìi. M̀ɛni ma Ɣâla a m̀ɛni tɔnɔi kpîŋ kɛ́ a ńyãa.” Nya ƃe dí lì la Zerusâlɛŋ é lɛ́ɛ naa é sáa.

⁸Zuda sinaai dí kɔ́ pɛ̀lɛ Zerusâlɛŋ ma dí ǹaa-ƃelai kélee páa dí daai kéreŋ.

⁹Naa kɛ́ɛ tíi, dí lì dí pɛ́lɛ Keena-ƃelai dîa nyii-ŋai kɛ̀ ǹyée ma taa-ŋai sui da diai kɛ̀ diŋ-tiŋ sui é pɛ́lɛ diai dîa kɛ̀ ǹɔii kwára perei.

¹⁰Dí ŋɔ́nɔ lì dí pɛ́lɛ Keena-ƃelai dîa nyii-ŋai kɛ̀ Iburɔŋ. Iburɔŋ taai maa-ŋuŋ ƃé kɛ̀ a Kiria Aba. Zuda-ƃelai dí lì ŋɔ́nɔ dí kɔ́ pɛ́lɛ Sisai, Aimaŋ, da Tamai-ƃelai dîa dí díkelee yée mɛi ɣále.

¹¹Zuda sinaai dí lì dí kɔ́ pɛ́lɛ Dibɛ taa-leei ma. Daai ŋí láa ƃé kɛ̀ a Kiria-sifɛ.

¹²Nya ƃe Kelɛ è mò ǹyɛɛ, “Zurɔ̂ŋ nyíi pâi kɔ́ pɛlɛ̂i Kiria-Sifɛ ma é ǹyée mɛi ɣálei, ŋa pâi ńoŋ-nɛnii Asa tɛɛ̂i bɔ́ a ŋɔnɛnî.”

¹³Nya ƃe Onɛɛ nyíi kɛ̀ a Kelɛ ǹeɣê surɔŋ Kena ǹóŋ è daai yée mɛi ɣâle, Kelɛ é ǹóŋ-nɛnii Asa tɛɛ bɔ́ a ŋɔnɛnî.

¹⁴Onɛɛ kɛ́ɛ Asa kulâi a nɛnîi, è mò Asa ma a gɛ́ɛ é ǹâŋ Kelɛ marê kɛ́ lɔii kpûa mɛni ma. Nya ƃe è sèe ŋɔwɛlɛ-sôoi mɛi é lí ǹâŋ pɔ́-naa. Ǹâŋ ǹyɛɛ m̀ai, “Lé ƃé ya ŋ̀wɛ̂lii?”

¹⁵Asa ǹyɛɛ m̀ai, “Ŋa lɔii wɛ̂lii nyíi yá káa mai, kpɛ́ni fêi, ǹɔii kpûai í dɛ̀ɛ ḿbɔi, yá fé zu.” Nya ƃe Kelɛ è lɔii tɛ̂ɛ bɔ́ nyíi yá è kɛ̀ ŋ̀ûa-pere da gwára-perei.

¹⁶Mose m̀ɔ̂lɔ ŋɔkáayɔɔ-ŋai nyíi da dítôli a Keena-ŋai da Zuda ŋɔkɔ-kuluƃa-ŋai dí kùla Zɛleko dí lí daa-leei su nyíi kɛ̀ dóu-kpɔ̂lɔi sui. Dí tɛ̀ɛ naa dí lí vɛ̃ɛ-kpâlaŋ su Zuda lɔii su nyíi kɛ̀ séɣai pere Alaa-taa-leei kɔlɛ dí sée naa Amɛlɛka-ŋai sáma.

¹⁷Naa kɛ́ɛ tíi, Zuda da Simiɔŋ suui su-ƃelai dí pù díkîe ma dí lí dí kɔ́ pɛ́lɛ Keena-ŋai dîa nyii-ŋai kɛ̀ Zɛfa taa-leei sui. Dí daai ŋí náaŋ làa, dí ŋ̀ólo, dí ǹaa láa sée a Oma.

¹⁸Zuda-ƃelai dí máŋ Geza, Asikɛlɔŋ da Ɛkulɔŋ lɔii-ŋai soŋ da naa kɔlɛ ma kpiniŋ-ŋai.

¹⁹Yâwɛɛ è tɔ̀ɔ ǹûai ŋí pôlu dí ǹyéei lɔii kélee sóŋ. Kɛ́lɛ dífe pɔri ní kɛ̀ diŋ-tiŋ su lɔii ma-ƃelai kpɛ̂i ǹɔii ma, kpɛ́ni fêi, kɔ́ kɔ́-keleŋ-ŋa díkɛ̀ díyêei nyii-ŋai kɛ̀ a gbɛtɛ́ɛ a kɔlii.

²⁰Dí Iburɔŋ tɛ̀ɛ Kelɛ pɔ́ yɛ̂ɛ berei Mose è mò lai. Nya ƃe Kelɛ è Ana ǹuu-suu saaƃai kpɛ̀ é dí kúla dítaa-leei su.

²¹Kɛ́lɛ Bɛŋsima ŋɔkɔ-kuluƃa-ŋai dífe pɔri ní Zɛbuza-ŋai kpɛ̂i nyii-ŋai kɛ̀ Zerusâlɛŋ. M̀ɛni ma, Zɛbuza-ŋai da Bɛŋsima ŋɔkɔ-kuluƃa-ŋai dí nâa kɛ̀ nɔ́ gwaa tɔ̂nɔi ma.

²²Ifiraŋ da Manasɛ dísuu su-ƃelai dí lì dí kɔ́ pɛ́lɛ Bɛtɛ taa-leei ma. Maa tãi tí ma, da kâa daai ŋí tòli a Luzi. Yâwɛɛ è tɔ̀ɔ ǹûai ŋí pôlu.

²³Dí mɛni maa kpɛɛ-ƃela tɛ̀ɛ daai su.

²⁴Dí kɛ́ɛ liî, dí nalôŋ tɔnɔ kàa gɛ́ kùla naa pere. Dí mò ma dîyɛɛi, “Bere lɛ́ kûa nyíi a lî daai sui, gɛ̀ ní kúfe pâi mɛni ŋánaa kɛ̂i a yá.”

²⁵Nya ƃe è berei lɛ̀ dîa. Ifiraŋ da Manasɛ dísuui su-ƃelai dí tɛ̀ daai su dí naa-ƃelai kélee kpɔ́ páa é tée nɔ́ ǹalôŋ ŋí pôlu da suui.

²⁶Naa kɛ́ɛ tíi, ǹalôŋ kpîŋ è lì Ita-ŋai dílɔii su é taa tɔ́ɔ naa é ǹáa sée a Luzi. Ǹyaŋ daai ŋí láa ká tí é tóo sâa ma.

²⁷Manasɛ ŋɔkɔ-kuluƃa-ŋai dífe pɔri ní Keena-ŋai nyii-ŋai kɛ̀ daa-lee-ŋai ŋí sui kpɛ̂i. Daa-ŋai kpîŋ ƃa: Bɛɛ-saŋ, Taana, Dɔɔ, Ibiaŋ da Mɛgido, é pɛ́lɛ naa kɔlɛ ma taa-ŋai dîa. Mɛni ma Manasɛ ŋɔkɔ-kuluƃa-ŋai da Keena-ŋai ŋí díkɛ̀ nɔ́ lɔii tɔ̂nɔ su.

²⁸Eezuɛ-ŋai tɔɔ̂i kɛ́ɛ kpanânii, dí Keena-ŋai ŋí kɛ̀ a dítii kɛ́-ƃela. Kɛ́lɛ dífe wɔ́lɔ díkpɛ ní ǹɔii su.

²⁹Ifiraŋ ŋɔnûai dífe pɔri ní Keena-ŋai kpɛ̂i kɛ̀ Gezɛ taa-leei sui. Mɛni ma Ifiraŋ ŋɔkɔ-kuluƃa-ŋai da Keena-ŋai díkɛ̀ nɔ́ lɔii tɔ̂nɔ su.

³⁰Zɛbulɔŋ ŋɔkɔ-kuluƃa-ŋai dífe pɔri ní Keena-ŋai kɛ̀ Kitulɔŋ da Nalala taa-lee-ŋai sui kpɛ̂i. Mɛni ma Keena-ŋai da Zɛbulɔŋ ŋɔkɔ-kuluƃa-ŋai díkɛ̀ nɔ́ lɔii tɔ̂nɔ su. Kɛ́lɛ dí Keena-ŋai kɛ̀ a dítii kɛ́-ƃela.

³¹Asɛ ŋɔkɔ-kuluƃa-ŋai dífe pɔri ní ǹûai kpɛ̂i nyii-ŋai kɛ̀ daa-lee-ŋai ŋí sui. Daa-ŋai kpîŋ ƃa: Ako, Sidɔŋ, Alaa, Aizi, Ɛlaa, da Afɛ é pɛ́lɛ Lebɔ ma.

³²Asɛ ŋɔkɔ-kuluƃa-ŋai da Keena-ŋai díkɛ̀ nɔ́ lɔii tɔ̂nɔ su, kpɛ́ni fêi, dífe pɔri ní díkpɛ̂i.

³³Nɛfɛtɛli ŋɔkɔ-kuluƃa-ŋai dífe pɔri ní Keena-ŋai kpɛ̂i nyii-ŋai kɛ̀ daa-lee-ŋai ŋí sui. Daa-lee-ŋai kpîŋ ƃa: Bɛɛ-Simɛɛ da Bɛtana. Nɛfɛtɛli ŋɔkɔ-kuluƃa-ŋai da Keena-ŋai díkɛ̀ nɔ́ lɔii tɔ̂nɔ su. Kɛ́lɛ dí Keena-ŋai kɛ̀ a dítii kɛ́-ƃela.

³⁴Nya ƃe Amola-ŋai dí Daŋ ŋɔkɔ-kuluƃa-ŋai kɛ̀ dí tɛ́ ǹyée lɔii su. Dífe nɛ̀ɛ ní naa a gɛ́ɛ Daŋ ŋɔkɔ-kuluƃa-ŋai dɔnɔ kpîŋ é yéŋ diŋ-tiŋ su é sée naa.

³⁵Amolai-ŋai díkɛ̀ daa-lee-ŋai ŋí su. Daa-lee-ŋai kpîŋ ƃa: Aza-loŋ da Saaƃiŋ é pɛ́lɛ Ɛlɛ yeei ma mà. Kɛ́lɛ, é máŋ kɛ́ tí, Ifiraŋ da Manasɛ dínûai dí Keena-ŋai kɛ̀ a dítii kɛ́-ƃela.

³⁶Idɔŋ-ŋai dígɔyɛŋ perei è sìɣe Sela é tɛ́ɛ Akabiŋ perei ma é tɛ́ nàa ŋûa-pere.