Read Kpelle M̀ɛni-sâa Ƃó-ƃelai 10 Bible Online

M̀ɛni-sâa Ƃó-ƃelai 10 - Kpelle bible

M̀ɛni-sâa Ƃó-ƃelai 10

¹Abimelɛ è nâa sàa. Naa pôlu ma, Tola è Eezuɛ lɔii ŋuŋ ma ƃò. È kùla Isaka suui su. Ǹâŋ láa ƃé kɛ̀ a Pua. Pua ǹyaŋ ǹâŋ láa ƃé kɛ̀ a Dodo. Tola seɛ́ɛ è kɛ̀ Samii taai su. Daai ŋí è kɛ̀ ǹyéei su Ifiraŋ lɔii kpiniŋ su.

²Tola è kɛ̀ Eezuɛ lɔii láa túɛ a kóraŋ buu feerɛ káo saaƃa. È sàa dí ǹoo Samii taai su.

³Tola kɛ́ɛ a saai, Zaii è lɛ̀ɛ bɔ́ ŋá. Zaii è kùla Gilia lɔii kpiniŋ su. È gɛ̀ Eezuɛ lɔii mɛi a kóraŋ buu feerɛ káo feerɛ.

⁴Zaii ǹônii-sinaai díkɛ̀ buu saaƃa. Wɛlɛ-soo buu saaƃa è kɛ̀ díyêei nyii-ŋai da kâa kɛ̀ dísiâi. Díkɛ̀ taa lêe buu saaƃa láa túɛ Gilia lɔii kpiniŋ su. Dí daa lee-ŋai ŋí láa sèe a Zaii ŋɔtaai. Ǹyaŋ dílaa ká tí é tóo sâa ma.

⁵Zaii è sàa dí ǹoo Kamɔŋ taai su.

⁶Naa kɛ́ɛ tíi, Eezuɛ-ŋai dí ŋɔ́nɔ sɔnyɔ̂ŋ kɛ̀ a Yâwɛɛ. Dí pɛ̀lɛ Bêe da Siria ɣala-ŋai fɛlîi. Dí ŋɔ́nɔ kɛ̀ Araŋ, Sidɔŋ, Môa-ŋai, Amɔŋ da Felesia-ŋai díɣâla-ŋai fɛlîi, kpɛ́ni fêi, Eezuɛ-ŋai dí dípôlu tɔ̀ɔ Yâwɛɛ ma. Dífe kɛ́ ní ǹíi láa mɛni kɛ̂i,

⁷Yâwɛɛ è ǹíi ŋwàna dîa. È gɛ̀ Felesia-ŋai da Amɔŋ-ŋai dí díyeei mɛi ɣále.

⁸Ǹûai ŋí dílɔii è kɛ̀ vóloi kulâi-pere Zɔdiŋ Ya-leei pôlu. Gilia lɔii kpiniŋ è kɛ̀ a Amɔŋ-ŋai da Felesia-ŋai pɔ́ɔ Eezuɛ-ŋai dí lɛ́ɛ pâi naa. Eezuɛ-ŋai kɛ̀ Giliai, dí mɔ̃lɛ ǹûai ŋí yée mu a ŋ̀ánaa. Dí tua-pere nyɔ̂ŋ támaa kɛ̀ a dia a kóraŋ puu káo lɔ́ɔlu mɛi saaƃa.

⁹Amɔŋ-ŋai da kâa Zɔdiŋ Ya-leei tîyeŋ dí kɔ́ pɛ́lɛ Zuda, Bɛŋsima da Ifiraŋ-ŋai dísuu su-ƃelai dîa. Eezuɛ lɔii è kɛ̀ mɛni kpɔ̂lu su kɛ́tɛ su a maa koraŋ-ŋai.

¹⁰Eezuɛ-ŋai dí wɔ̀lɔ Yâwɛɛ ma dîyɛɛi, “Yá ƃa Kúnuu-namui. Kɛ́lɛ kwa tɔɔ yâ. Yá ƃa Kúɣâlai, kɛ́lɛ kwa kpera ífɛlîi kúkɛ Bêe ɣalai fɛ̀li.”

¹¹Yâwɛɛ è Eezuɛ-ŋai wóo su tòo ǹyɛɛ dîai, “Kákɛɛ Ize-ŋai, Amora-ŋai, Amɔŋ-ŋai, Felesia-ŋai,

¹²Sidɔŋ-ŋai, Amɛlɛka-ŋai da M̀ao-ŋai díkɛ̀ ká mɔ̃lɛ̂i lai, káfe wɔ́lɔ ní ḿâ ŋá pá ŋá ká kula yêei kɛ́?

¹³Berei máŋ ŋá m̀ɛni-ŋai kélee kɛ̀ la kâai, ká kápôlu tɔ̀ɔ ḿâ ká kɛ́ ɣâla da kpɛ́ni-ŋa fɛ̀li. M̀ɛni ma fé pâi ŋɔ́nɔ ká kula yêei kɛ̂i.

¹⁴Zãâi ka díkɛ̀ a káɣâla-ŋai, ka lí ká wɔ́lɔ dîa. Da pâi ká kùla yêei kɛ̂i kámɛni kpɔ̂lui su.”

¹⁵Kɛ́lɛ Eezuɛ-ŋai dí mò ma dîyɛɛi, “Kwaa sɔnyɔ̂ŋ kɛ́ a yá. Kú kula maa kɛ́ yɛ̂ɛ berei ya ŋ̀wɛ̂lii lai. Kɛ́lɛ kúŋuŋ ma ƃó sâa.”

¹⁶Maa ɣelei tí zãai dí dí kùla díkɔlɛ lɔii ŋuŋ-ŋai su díkɛ dí fɛlii, dí gélee pìli. Dí pɛ̀lɛ ŋɔ́nɔ Yâwɛɛ fɛlîi. Eezuɛ-ŋai dímalôŋ è tòo mà dímɔ̃lɛ laai mɛ̂ni ma.

¹⁷Amɔŋ-ŋai dí ŋɔ́nɔ díkpîŋ kpɛ̀tɛ a gɛ́ɛ dí kɔ́ pɛ́lɛ Eezuɛ-ŋai dîa. Dí díƃûui pù Gilia lɔii kpiniŋ su. Eezuɛ-ŋai dia máŋ dí díŋaa tɛ̀ ma dí díwɔ̂ ƃuui pú Misipa.

¹⁸Gilia láa túɛ-ƃelai dí díkîe ni marê kɛ̀ dîyɛɛi, “Gbɛ̂ɛ ƃé pâi tɔɔ̂i kúkɔ-kuluƃa-ŋai láa túɛ dí kɔ́ pɛ́lɛ Amɔŋ-ŋai dîai? M̀aa núui ƃé pâi kɛ̂i a Gilia-ƃelai kélee láa túɛ-nuu.”