Read Kpelle M̀ɛni-sâa Ƃó-ƃelai 11 Bible Online

M̀ɛni-sâa Ƃó-ƃelai 11 - Kpelle bible

M̀ɛni-sâa Ƃó-ƃelai 11

¹Zafita è kɛ̀ a kɔ-kuluƃa kɛ́tɛ. È kɛ̀ a Gilia kpiniŋ su nuu. Ǹâŋ láa ƃé kɛ́ a Gilia. Ǹee è kɛ̀ a wulu-wulu kɛ́-nɛni. È kɛ̀ a Gilia ŋɔwɛ́li.

²Gilia ŋɔnɛnîi è lóŋ sinaa támaa maa sɔlɔ ƃô mì. Tãi dí kɛ̀tɛ lai, dí Zafita kpɛ̀ dínâŋ ŋɔpɛ́rɛi mu. Dí mò ma dîyɛɛi, “Ífe pâi kúnâŋ kɔ̃lîŋ da sɔlɔ ƃôi, kpɛ́ni fêi, íkaa a wɛ́li loŋ.”

³Gɛ́ɛ tíi, Zafita è pù é lí é sée Too lɔii kpiniŋ su. Naa ƃé da ŋ̀aa kpɛɛ ma-sinaai da-ŋa dí pili naa lawoi-laai díkɛ lì a too-ma kɛ́ɛ.

⁴Naa kɛ́ɛ tíi, Amɔŋ-ŋai dí kɔ́ pɛ̀lɛ Eezuɛ-ŋai dîa Gilia kpiniŋ su.

⁵M̀ɛnii ŋí kɛ́ɛi, Gilia lɔii láa túɛ-ƃelai dí lì Too lɔii su dí Zafita kula naa.

⁶Dí mò ma dîyɛɛi, “Pá íkɛ a kúlaa túɛ-nuu kwa kâa ni kú kɔ́ Amɔŋ-ŋai pɔ́.”

⁷Zafita ǹyɛɛ dîai, “Kɛrɛ̂ɛ ká tɔɔ ḿâ ká ŋ́gbɛ ńâŋ ŋɔpɛ́rɛi mu? Ká pâi ḿbɔ naa, kpɛ́ni fêi, kákaa mɛni kpɔ̂lu su, ǹyaŋ káa wɛ̂lii a ŋákpɔŋ maai?”

⁸Dîyɛɛ m̀ai, “Berei máŋ kú tùa la a yá a gɛ́ɛ tíi, kwa pá ŋɔ́nɔ ípɔ-naa a gɛ́ɛ í pá í tɔ́ɔ kúkɔ-kuluƃa-ŋai láa túɛ a gɛ́ɛ kú kɔ́ Amɔŋ-ŋai pɔ́. À kɛ̀ tí, ya pâi kɛ̂i a Gilia lɔii kpiniŋ láa túɛ nuu.”

⁹Zafita è dímarê kɛ́ ǹyɛɛ, “À kɛ̀ ka lì a ńyãa ḿbɔ-taai pôlu, Yâwɛɛ sarâi ŋá Amɔŋ-ŋai yée mɛi ɣâle, ka pâi fâai ma ŋá kɛ́ a kálaa túɛ-nuu a tɔ̃yâ?”

¹⁰Dîyɛɛ m̀ai, “Kwaâ fáa. Yâwɛɛ ƃa kúwooi ŋí maa sêre.”

¹¹Zafita da Gilia láa túɛ-ƃelai dí lì. Dí liɛ́ɛi, ǹûai dí gɛ̀ a gɔ-kuluƃa-ŋai láa túɛ-nuu. Gilia-ƃelai kélee dí lì Misipa a gɛ́ɛ dí Ɣâla fɛli naa. Naa ƃé Zafita è m̀ɛni-ŋai kélee ƃò naa Yâwɛɛ ŋɛ́i túɛ nyíi da Gilia-ƃelai dí gbɛ̀tɛi.

¹²Nyíŋi pôlu ma, Zafita è kéla tɛ̀ɛ Amɔŋ-ŋai díkâloŋ pɔ́-naa ǹyɛɛ m̀ai, “Lé laa-saa ƃé kúloai kwa káa ni ya kɔ́ pɛ́lɛ kûai?”

¹³Amɔŋ-ŋai díkâloŋ ǹyɛɛ m̀ai, “Eezuɛ-ŋai kúlaa Izei, dí ŋálɔii sîɣe. Ǹɔii ŋí a kulâi Ano Ya-leei ma gɛ́ tòo Zabɔ Ya leei ma é lɛ́ɛ la zu é seri Zɔdiŋ Ya-leei ma. M̀ɛni ma, à kɛ̀ ífe wɛ̂lii a kɔ́, ŋálɔii tɛ́ɛ ḿbɔ.”

¹⁴Zafita è ŋɔ́nɔ kéla-ŋa tɛ̀ɛ pôlu Amɔŋ-ŋai díkâloŋ pɔ́-naa

¹⁵ǹyɛɛ m̀ai, “Eezuɛ fé Môa-ŋai da Amɔŋ-ŋai dílɔii siɣe ní.

¹⁶Kɛ́lɛ Eezuɛ-ŋai kuláa Izei, dí tɛ̀ɛ vɛ̃ɛ-kpâlaŋ su dí seri Ǹyúo Kpɔ̂lui ma dí tɛ́ɛ naa dí lí Kedɛɛ.

¹⁷Gɛ́ɛ tíi, Eezuɛ-ŋai dí kéla-ŋa tɛ̀ɛ Idɔŋ kaloŋ pɔ́-naa dîyɛɛ m̀ai, ‘Ǹɛɛ naa kú tɛ́ɛ ílɔii su kú lí kúpɔ-naa.’ Kɛ́lɛ Idɔŋ-ŋai díkâloŋ fé ŋ̀óli tɔɔ ní dîa. Eezuɛ-ŋai dí ŋɔ́nɔ kéla-ŋa tɛ̀ɛ Môa Kaloŋ pɔ́-naa. Ǹyaa máŋ vé fáa ní. M̀ɛni ma Eezuɛ-ŋai dí nâa sèe Kedɛɛ.

¹⁸Naa pôlu ma, dí sìa vɛ̃ɛ-kpâlaŋ su dí tínaŋ Idɔŋ da Môa-ŋai lɔii ma. Dí tɛ̀ɛ Môa-ŋai lɔii vóloi kulâi-pere. Dí lì dí díƃûui pú Ano Ya-leei m̀élai nyíti ma. Dífe tɛɛ ní Môa-ŋai lɔii su, kpɛ́ni fêi, Ano Ya-leei ƃé kɛ̀ a Môa-ŋai ŋɔgoyɛŋ-perei.

¹⁹Dí lɛ̀ɛ naa dí kéla tɛ́ɛ Amɔŋ-ŋai díkâloŋ Siɔŋ pɔ́-naa nyíi kɛ̀ seeni Ɛsibɔŋ taa leei sui. Dí mò ma dîyɛɛi, ‘Ǹɛɛ naa kú tɛ́ɛ ílɔii su kú lí kú pɔ́-naa.’

²⁰Kɛ́lɛ Siɔŋ fé kɛ́ ní a ǹáa a Eezuɛ-ŋai a gɛ́ɛ dí tɛ́ɛ ŋɔlɔii su. Nya ƃe è ŋɔkɔ-kuluƃa-ŋai ŋáa tɛ̀ ma, dí díƃûui pú Zâa dí kɔ́ pɛ́lɛ Eezuɛ-ŋai dîa.

²¹Yâwɛɛ nyíi gáa a Eezuɛ Ŋɔɣâlai è gɛ̀ Eezuɛ-ŋai dí Siɔŋ da ŋɔkɔ-kuluƃa-ŋai kélee yée mɛi ɣále. Eezuɛ-ŋai dí Amɔŋ-ŋai dí lɔii sîɣe dí sée naa.

²²M̀ɛnii ŋí ƃé gɛ̀ Eezuɛ-ŋai díkɛ ǹɔii kélee sìɣe é síɣe Ano Ya-leei ma é tóo Zabɔ Ya leei ma é lɛ́ɛ la zu é seri vɛ̃ɛ-kpâlaŋ su é tóo ŋɔ́nɔ Zɔdiŋ Ya leei ma.

²³M̀ɛni ma, Yâwɛɛ, Eezuɛ-ŋai Díɣâlai ƃé Amɔŋ-ŋai kpɛ̀ Eezuɛ-ŋai perêi. Wála-wala káa ǹyêei a gɛ́ɛ é ǹaa kula díyêei?

²⁴À kɛ̀ íɣâlai Kemo a lɔii kula yêei kɛ̀ à dɛ̀ɛ ípɔ, vé a íkɔ̃liŋ? Ǹyaŋ a kɛ̀ Yâwɛɛ a lɔii da kula yêei kɛ̀ à dɛ̀ɛ kúpɔ, maa lɔii kpîŋ fé a kúpɔɔ?

²⁵Ƃa gâai ímaa mɛ̂ni kpanŋɔ̂ɔi é tɛ́ɛ Môa-ŋai díkaloŋ, Bara ǹóŋ Zipɔ ma? Í gàa é Eezuɛ-ŋai maa fóo kpaa máŋ é kɔ́ pɛ́lɛ dîa?

²⁶Eezuɛ-ŋai kɛ́ɛ da Ɛsibɔŋ, Arorɛ, ǹaa kɔlɛ ma taa-ŋai da Ano Ya-leei kɔlɛ ma taa lee-ŋai síɣei, dí see naa díkɛ ƃò naa a kɛ́ a kóraŋ ŋuŋ saaƃa. À kɛ̀ ǹɔii ŋí káa a ípɔɔ, lé ƃé kɛ̀ ífe niî ǹaa kula ní díyêei góraŋ su kôyaai tí yée mui?

²⁷Ḿve niî mɛni nyɔ́mɔɔ da kɛ́ ní a yá, kɛ́lɛ íkaa mɛni nyɔ́mɔɔ kɛ̂i a ńyãa, kpɛ́ni fêi, íkaa kɔ́ pɛlɛ̂i ḿâ. Ǹɔii laa saai gáa Eezuɛ-ŋai da Amɔŋ-ŋai loai, Yâwɛɛ nɔ́ ƃa ŋ̀á tée-nuu. A pâi sâa m̀ɛnii ŋí su kâai, é ŋ̀á tée díloai.”

²⁸Kɛ́lɛ Amɔŋ Kaloŋ fé ŋ̀óli tɔ̀ɔ ní Zafita ŋɔworɛ̂ wooi ŋí ma.

²⁹Nya ƃe Yâwɛɛ ŋɔmɔ̂leŋ è kɛ̀ Zafita pôlu. Zafita è mu sìɣe é tɛ́ɛ Gilia da Manasɛ, é lène pôlu Misipa taai su nyíi kɛ̀ Gilia kpiniŋ su, é seri Amɔŋ-ŋai dîa.

³⁰Nya ƃe Zafita è góno tèe Yâwɛɛ yêei ǹyɛɛ m̀ai, “Yà tɔ̀ɔ ḿbôlu ŋá Amɔŋ-ŋai yée mɛi ɣâle,

³¹ŋà lène pôlu, ǹúui maa ŋuŋ pâi kulâi ŋápɛrɛi mu é pá ńa koyɛnii, ŋa pâi maa nûui kɛ̂i a kéreŋ sala sɛŋ ímɛni ma.”

³²Zafita è ǹya leei tîyeŋ é kɔ́ pɛ́lɛ Amɔŋ-ŋai dîa. Yâwɛɛ è gɛ̀ Zafita é díyee mɛi ɣále.

³³Zafita da ŋɔkɔ-kuluƃa-ŋai dí kɔ̀ pɛ̀lɛ Amɔŋ-ŋai dîa. Dí gɔ́i ŋí kɔ́ɔ pìlaŋ Arorɛ taai su, Miniŋ kpiniŋ su, dí ǹaa su ƃɔ̀ dí seri Ebɛ Kɛramii lɔii ma. Taa buu feerɛ ƃé dí zu kàra. Eezuɛ-ŋai láa è tɛ̀ɛ Amɔŋ-ŋai dîa dí dámaa páa.

³⁴Zafita è gɔ́i yée mɛi ɣâle é lène pôlu Misipa. Gɛ́ɛ liî ŋɔpɛ́rɛi lái, ǹóŋ-nɛni tɔnɔi è kùla bɛ́rɛi mu é pá berei tɔɔ̂i. È kɛ̀ nyɛ̃yɛŋ ɣalêi gɛ́ mãla. Ǹóŋ nɔ́ ká kɛ̀ ŋí.

³⁵Zafita kɛ́ɛ a gáai, malôŋ è tòo ma. È ŋɔseɣei fàla é wɔ́lɔ ǹyɛɛ, “Óo ńoŋ. Yaâ ńii tóo pôlu kpɔ́ a ŋ̀ánaa. Íkɛ̀ a ǹúui maa ŋuŋ í pá ńa koyanii lé mɛni ma? Ŋá kono tee kpanaŋ kɛ̀ Yâwɛɛ yêei. Ḿva pɔ̂ri maa fâlenii.”

³⁶Ǹóŋ-nɛnii ǹyɛɛ m̀ai, “Ńâŋ, Yâwɛɛ aâ gɛ́ ya kúkpɔara-ƃelai Amɔŋ-ŋai yée mɛi ɣále. À kɛ̀ í íkono têe kɛ̀ ǹyêei, maa mɛ̂nii ŋàa sèe kɛ́.”

³⁷Ǹyɛɛ m̀a máŋ, “Ye m̀ɛni tɔ̂nɔi ŋí kɛ́ ḿî. Ɣáloŋ feerɛ tɛɛ ḿbɔ a gɛ́ɛ kwa ḿarâai kú lí ǹyeei su, kú malôŋ see kɛ́ naa ḿaa mɛ̂ni ma, kpɛ́ni fêi, fé pâi surɔŋ kulâi ŋ́gɛ saa.”

³⁸Zafita è fàa. È dɛ̀ɛ ɣáloŋ feerɛ mɛni ma. Da m̀arâai dí lì ǹyee-ŋai su díkɛ ƃò naa a malôŋ-pere, kpɛ́ni fêi, vé pâi surɔŋ kulâi gɛ́ sàa.

³⁹Ŋ̀áloŋ feerɛi kɛ́ɛ a kpɛɛi, è lène pôlu ǹâŋ pɔ́-naa. Dípaa pôlui, ǹâŋ è gono teei ŋàa-see kɛ̀ yɛ̂ɛ berei è mò la Ǹuu-namui yêei. È kɛ̀ a nɛnî-kpela, kɛ́lɛ vé kɛ́ ní a surɔ̂ŋ mɛni kɔ́lɔŋɔɔ. È lɛ̀ɛ a nɛnî-kpela dí baa. Ŋ̀elei dí nɛnî-kpelai ŋí pàa lai, maa ɣêlei a sèri,

⁴⁰Eezuɛ nɛni-kpela-ŋai da lî a gɛ́ɛ dí ƃaa kɛ́-maa tɛ́ɛ Gilia-nuui Zafita ǹóŋ-nɛnii pɔ́ a fólo náaŋ kóraŋ kélee su. Gúu sîi ŋí kɔ́ɔ pîlaŋ ɣele ká tí kɛ̀ Eezuɛ nɛni-kpela-ŋai mɛ̂ni ma.