Read Kpelle M̀ɛni-sâa Ƃó-ƃelai 12 Bible Online

M̀ɛni-sâa Ƃó-ƃelai 12 - Kpelle bible

M̀ɛni-sâa Ƃó-ƃelai 12

¹Ifiraŋ suui su-ƃelai dí díkpîŋ kpɛ̀tɛ kɔ́ mɛni ma. Dí Zɔdiŋ Ya-leei tîyeŋ dí lí Zafɔŋ taai su dí Zafita káa naa da ŋɔnûai dí m̀arê kɛ́ dîyɛɛ m̀ai, “Í gɔyɛŋ-perei tìyeŋ í kɔ́ pɛ́lɛ Amɔŋ-ŋai dîa. Lé ƃé gɛ̀ ífe kútoli ní kwa kâa-ni kú kɔ́ dípɔi? M̀ɛni ma kwa pâi ílɛɛ̂i ípɛrɛi mu kú géreŋ.”

²Nya ƃe Zafita ǹyɛɛ dîai, “Amɔŋ-ŋai dí laa-sâa pɛ̀lɛ kûa. Ŋá kátòli, kɛ́lɛ káfe pá ní a ká kúkula yêei kɛ́.

³Ǹyaŋ tãi ŋá gàa la a gɛ́ɛ káfe kɛ́ ní pâi, ŋá ŋáfulu-laai sèe a sɛ́ɣɛ kwa ŋákɔ-kuluƃa-ŋai kú gɔyɛŋ-perei tíyeŋ kú kɔ́ pɛ́lɛ Amɔŋ-ŋai dîa. Yâwɛɛ è tɔ̀ɔ kúpôlu kú díyee mɛi ɣále. Lé mɛni ƃé ká pà la a gɛ́ɛ ká kɔ́ pɛ́lɛ ḿâi?”

⁴Nya ƃe Zafita è Gilia lɔii kpiniŋ ŋɔkɔ-kûluƃa-ŋai kélee ŋáa tɛ̀ ma da Ifiraŋ suui su-ƃelai dí kɔ́. Zafita da ŋɔkɔ-kuluƃa-ŋai dí Ifiraŋ kɔ-kûluƃa-ŋai yée mɛi ɣâle. (Dí díyee mɛi ɣâle, kpɛ́ni fêi, Ifiraŋ ŋɔkɔ-kûluƃa-ŋai dí díwoo sìɣe dîa dîyɛɛi, “Kákaa a kúyee ŋá-ƃela kɛ́lɛ ka kɛ́ a kula ŋuŋ-ma-ƃela ká kɛ́ kɔ́ tèe kákpɔɔ yee ma.”)

⁵A gɛɛ Gilia kɔ-kuluƃa-ŋai dí Ifiraŋ kɔ-kuluƃa-ŋai kpéra dífe pù, dí Zɔdiŋ Ya-leei-leei tíyeŋ kwaa-ŋai ma sòŋ.

⁶Ibulu wooi da dòli a “Síbolɛ” Ifiraŋ suui su-ƃelai dí fa pɔ̂ri dôlii. Da dòli nɔ́ a “Síbolɛi.” A gɛɛ Gilia-ŋai dí Ifiraŋ-ŋai kɔ́lɔŋ ǹûai sáma kɛ̀ ǹyái tîyenii, da kâa dímarê kɛ̀ a gɛ́ɛ dí “Síbolɛi” wooi ŋí tóli. Ǹúui a dòli a “Zìbolɛi,” gɛ̀ ní gáa a Ifiraŋ nuu. Da maa nûui pâa. Ifiraŋ suui su-ƃelai dí dípàai díkɛ̀ a núu wála buu náaŋ káo feerɛ (42,000).

⁷Zafita è kɛ̀ Eezuɛ-ŋai mɛi a kóraŋ lɔ́ɔlu mɛi da. È sàa dí ǹoo bɔ́-taai Gilia taa-leei su.

⁸Zafita kɛ́ɛ a saai, Izaŋ è lɛ̀ɛ bɔ́ɔ ŋá. Izaŋ è kùla Bɛpeleɣɛ̃ɛ taai su.

⁹Ǹônii díkɛ̀ a sinâa buu saaƃa da nɛyâa buu saaƃa. È ǹônii-nɛyãai tɛ̂ɛ núu-suu da kpɛ́ni-ŋa pɔ́ a dínɛyâa. È núu-suu da kpɛ́ni su-nɛyaa buu saaƃa kùla ǹônii-sinaai mɛ̂ni ma. Izaŋ è kɛ̀ Eezuɛ mɛi a kóraŋ lɔ́ɔlu mɛi feerɛ.

¹⁰È sàa dí noo Bɛpeleɣɛ̃ɛ daai.

¹¹Izaŋ kɛ́ɛ a saai, Ɛlɔŋ ƃé lɛ̀ɛ bɔ́ɔ ŋá. Ɛlɔŋ è kùla Zɛbulɔŋ lɔii kpiniŋ su. È kɛ̀ Eezuɛ lɔii láa túɛ a kóraŋ puu.

¹²È sàa dí ǹoo Aizalɔŋ taai su Zɛbulɔŋ kpiniŋ su.

¹³Ɛlɔŋ kɛ́ɛ a saai, Aƃidɔŋ ƃé lɛ̀ɛ bɔ́ɔ ŋá a Eezuɛ láa túɛ nuu. Aƃidɔŋ è kùla Paratɔŋ taai su. Ǹâŋ láa ƃé kɛ̀ a Ilɛɛ.

¹⁴Ǹônii-sinaai díkɛ̀ buu náaŋ. Ǹóŋ lônii díkɛ̀ a sinâa buu saaƃa. Wɛlɛ sôo buu lɔ́ɔlu mɛi feerɛ è kɛ̀ è kɛ̀ díyêei. Dia kpîŋ ƃé da kâa dí sîa. È kɛ̀ Eezuɛ láa túɛ a kóraŋ lɔ́ɔlu mɛi saaƃa.

¹⁵È sàa dí ǹoo Paratɔŋ taai su, Ifiraŋ lɔii kpiniŋ su, nyíi kɛ̀ ǹyéei su, ƃɛ́i Amɛlɛka-ŋai díseɛɛ è wɔ́lɔ kɛ̀ naai.