Read Kpelle M̀ɛni-sâa Ƃó-ƃelai 13 Bible Online

M̀ɛni-sâa Ƃó-ƃelai 13 - Kpelle bible

M̀ɛni-sâa Ƃó-ƃelai 13

¹Eezuɛ-ŋai dí ŋɔ́nɔ pɛ̀lɛ sɔnyɔ̂ŋ kɛ̂i dípôlu tɔ̀ɔ Yâwɛɛ ma. Nya ƃe è gɛ̀ Felesia-ŋai dí díyee mɛi ɣále. Díkɛ̀ díyee mu a kóraŋ buu náaŋ.

²Ŋ̀ele-ŋai tí ma, nalôŋ tɔnɔ è kɛ̀ naa, ǹáa ƃé kɛ̀ a Manoa. Manoa è kɛ̀ a Daŋ suui su-nuu. Zeɛ́ɛ è kɛ̀ Zola taai su. Manoa ŋɔnɛnîi è kɛ̀ a kpóma nɛni.

³Ɣele tɔ̂nɔ da, Yâwɛɛ ŋɔkélai dɔnɔ è kùla ŋ̀ɛ́i ǹyɛɛ m̀ai, “Ífe niî núu-kpune maa sɔlɔ ƃó ní. Kɛ́lɛ ya pâi koo siɣêi kúui ŋí su, í lóŋ surɔŋ maa sɔlɔ ƃó.

⁴M̀ɛni ma ímɛi káa kpɔ́ a ǹɛ́lɛɛ. Ífe lɔɔ sîi da kélee kpèle. Ífe mii-sɛŋ da mii nyíi maa fé wàa nii.

⁵Ǹôloŋ ya pâi maa sɔlɔ ƃôi, a pâi kɛ̂i a Nazarɛ-nuu, zu kulâi ƃa Ɣâla yée mu nuu. Núu da fé kɔli lɔ̀ ŋ̀ûa. Ǹyaa ƃe pâi Eezuɛ ŋuŋ ma ƃôi Felesia-ŋai yêei.”

⁶Nya ƃe ǹɛnîi è lì é m̀ó ŋɔsurɔ̂ŋ ma ǹyɛɛ, “Ɣâla ŋɔlóno kɛ́-nuu tɔnɔ è kùla ŋ́ɛi. Gɛ́-pere káa yɛ̂ɛ Ɣâla-taa kela. Ŋá gàa ŋá yao. Ḿve marê kɛ́ ní mí ƃé è kùla naai, vé tela ǹáa lɛ́ ní ḿâ.

⁷È mò ḿâ a gɛ́ɛ ŋa pâi koo siɣêi ŋá lóŋ-surɔŋ maa sɔlɔ ƃó. È mò ḿâ máŋ a gɛ́ɛ ḿve lɔɔ sîi da kélee kpèle, ḿve tela mii-sɛŋ da mìi nyíi maa fé waa ní, kpɛ́ni fêi, ǹôloŋ a pâi kɛ̂i a Nazarɛ-nuu é síɣe maa sɔlɔ ƃó ɣele ma é tóo zaa tãi ma.”

⁸Manoa è Yâwɛɛ fɛli ǹyɛɛ m̀ai, “Ye kpera yɛ̂ íkelai tɛ́ɛ kúpɔ-naa pôlu é berei lɛ́ kûa kwa ǹôloŋ maa sɔlɔ ƃò kwa pɔ̂ri mɛi kâai lai.”

⁹Ɣâla è m̀ɛnii kɛ̀ Manoa è vɛ̀li mɛni mai. È ŋɔkélai tɛ̀ɛ pôlu ǹɛnîi pɔ́-naa. Ǹɛnîi è kɛ̀ tíi kɛ̂i gbâlaŋ ŋá. Kɛ́lɛ ŋɔsurɔ̂ŋ Manoa fé kɛ́ ní gɔlɛ.

¹⁰È lì a maa félaa é m̀ó ŋɔsurɔ̂ŋ Manoa ma ǹyɛɛ, “Ǹalôŋ tí ɣele pâi, aâ ŋɔ́nɔ pá.”

¹¹Manoa è mù sìɣe é lɛ́ɛ ŋɔnɛnîi pôlu da ǹyaa dí lí. Nya ƃe è ǹalôŋ marê kɛ̀ ǹyɛɛ m̀ai, “Yá ƃé ɣele lôno ŋánɛnîi pɔ́ naai?” Ǹalôŋ ǹyɛɛ m̀ai, “Óowei.”

¹²Manoa è mò ma ǹyɛɛ, “À kɛ̀ íwooi ŋ̀aa sèe à kɛ̀, gɛ̀ ní lé ƃé fɛ̂ɛ ǹôloŋ é gɛ́i? É ŋɔkɛ-ɣéniɛi kɛ́-pere kɛ́ léŋ?”

¹³Yâwɛɛ ŋɔkélai è Manoa ǹyɛɛ m̀ai, “M̀ɛni-ŋai tí ŋá mò ínɛnîi mai, é gélee mɛi káa a ǹɛ́lɛɛ.

¹⁴Vé lɛ̀ɣɛ kpɔmɔ-ƃa ya sii kélee da ma, kpaa máŋ é kpele sɛ̂ŋ sii da kélee kpéle. Vé mii-sɛŋ sii da kélee mìi nyíi m̀aa fé waa nii. Mɛni-ŋai ŋí nɔ́ ƃé é sía la.”

¹⁵Gɛ́ɛ tíi, è mò Yâwɛɛ ŋɔkélai ma ǹyɛɛ, “Kpera yɛ̂ kúmaa kpɛ́ŋ a guro. Kwa ŋ̀wɛ̂lii kú ƃoli sôlaŋ tɔnɔ paa yɛ̂.”

¹⁶Ǹyɛɛ m̀ai, “A ǹɛɛ ma kpîŋ ŋá kámaa kpɛ́ŋ ḿve pâi káyêei mii-sɛŋ da miî. A làa kálii ma, ka gbɛtɛ, ká gula a kéreŋ sala Yâwɛɛ ma. Manoa fé kɛ́ ní a gɔ́lɔŋɔɔ a gɛ́ɛ ǹalôŋ è kɛ̀ lônoi bɔ́i gáa a Yâwɛɛ ŋɔkéla”

¹⁷Manoa è Yâwɛɛ ŋɔkélai marê kɛ̀ ǹyɛɛ m̀ai, “Ílaa lɛ́ kûa íwooi ŋ̀aa see a kɛ̀, a gɛ́ɛ kú ƃaa kɛ́-maa tɛ́ɛ ípɔ.”

¹⁸Yâwɛɛ ŋɔkélai è Manoa marê kɛ̀ ǹyɛɛ m̀ai, “Ya ŋ̀wɛ̂lii í ńaa kɔ́lɔŋ lé mɛni ma? Ńaa mili-miliɛɛi.”

¹⁹Nya ƃe Manoa è ƃoli sôlaŋ tɔnɔ sòŋ é wîi siɣe é kéreŋ sala kula a dia gɔnii ŋá Yâwɛɛ ma. Naa kɛ́ɛ tíi, zu-gbɛlɛ-kpɛlɛ mɛni-ŋa díkɛ̀ Manoa da ŋɔnɛnîi ŋɛ́i túɛ.

²⁰Ŋ̀ɔŋ kɛ́ɛ a sóŋ zâla sãai dîa ŋ̀âla-teƃelei ŋá ǹuri kɛ́ tɛ̀ ŋ̀ele-kɔlɔŋ sui, Yâwɛɛ ŋɔkélai è kɛ̀ ŋɔŋ lêŋ su gɛ́ tɛ̀ ŋ̀elei su Manoa da bɔ̂ŋ díkɛ naa kàa. Dí tòo dí díŋuŋ pîlaŋ ǹɔii ma.

²¹Dí fé ŋɔ́nɔ ŋ̀âla-taa kêlai káa ní. Gɛ́ɛ tíi dí gɔ̀lɔŋ a gɛ́ɛ Yâwɛɛ ŋɔkéla káa kɛ̀ tí.

²²Manoa ǹyɛɛ ŋɔnɛnîi mai, “Tɔ̃yâ ma, kwa pâi saa tí-ti ƃôi, kpɛ́ni fêi, kwaâ Ɣâla káa!”

²³Kɛ́lɛ ŋɔnɛnîi è ŋ̀óo su tòo ǹyɛɛ m̀ai, “Eêi kɛ̀ Yâwɛɛ eêi kɛ̀ ŋ̀wɛ̂lii é kúpaa, vêi pâi ǹyée seêi kúkereŋ salai mu, kpaa máŋ é m̀ɛni-ŋai ŋí ƃó kûa.”

²⁴Nyíŋi pôlu ma, ǹɛnîi è lóŋ-surɔŋ maa sɔlɔ ƃô é ǹáa sée a Saŋsiŋ. Ǹôloŋ è ƃɔ̀lɔ Yâwɛɛ é lûwa láa mà.

²⁵Saŋsiŋ è kɛ̀ Daŋ suui su-ƃelai díƃûui su. M̀ûui ŋí è kɛ̀ Zoara da Ɛtaɔ taa-ŋai loai. Naa ƃé Yâwɛɛ è ŋɔmɔ̂leŋ è kɛ̀ naa Saŋsiŋ pôlu.