Read Kpelle M̀ɛni-sâa Ƃó-ƃelai 14 Bible Online

M̀ɛni-sâa Ƃó-ƃelai 14 - Kpelle bible

M̀ɛni-sâa Ƃó-ƃelai 14

¹Ɣele tɔ̂nɔ da, Saŋsiŋ è lì Tiŋna taai su. È Felesia-ŋai dí sîi nɛni tɔnɔ kàa naa.

²È lène pôlu bɔ́-taai, é m̀ó ǹâŋ da ǹee-ni dîa ǹyɛɛ, “Ŋá Felesia nɛni tɔnɔ kàa Tiŋna taai su. Ka ŋ̀wɛ́li kɛ́ ḿî. Ŋa wɛ̂lii ŋá gùla a nɛnî.”

³Dí ŋ̀óo su tòo dîyɛɛ m̀ai, “Nɛyâa támaa káa kúsuui su, dámaa kɛ́ ƃò Eezuɛ lɔii su. Felesia-ŋai dífa Kúɣalai fɛ̂li. Ƃa wɛ̂lii í dílônii-nɛyãai da kùla lé mɛni ma?” Kɛ́lɛ Saŋsiŋ è ǹâŋ wóo su tòo ǹyɛɛ m̀ai, “Ǹyaa ƃé ǹɛ̂lɛɛi a ńîa. Lí í gɔ́ri ḿî.”

⁴Eezuɛ-ŋai díkɛ̀ mɔ̃lɛi Felesia-ŋai yée mu. Yâwɛɛ è kɛ̀ pere kɔ̂rii a gɛ́ɛ laa-sâa é tée díloai. Kɛ́lɛ Saŋsiŋ ǹâŋ da ǹee dífe kɛ́ ní m̀ɛnii ŋí ŋá kâai.

⁵Gɛ́ɛ tíi, Saŋsiŋ, ǹâŋ da ǹee dí lì Tiŋna taai su. Dí kɛ́ɛ tɛɛ̂i gbɔmɔ-kpalaŋ su Tiŋna kɔlɛ mai, yala-sulu tɔnɔ è kɛ̀ kpêɣei gɛ́ pà dîa.

⁶A ǹaa maa félaa, Yâwɛɛ ŋɔmɔ̂leŋ è pà bɔ́ é wála-wala tɛɛ bɔ́. Saŋsiŋ è ǹyala-sului sòŋ a ǹyée, yɛ̂ɛ núu a ƃoli-loŋ sòŋ é vála fâla. Kɛ́lɛ vé m̀ɛnii ŋí ƃó ní ǹâŋ da ǹee-ni dîa.

⁷Dí seriɛ́ɛ Tiŋna taai sui, Saŋsiŋ è lì é ǹáa tí nɛniî ma. Ǹɛnîi maa mɛ̂ni è ǹíi sòŋ. Dí lène pôlu dípɔ-taai.

⁸Ɣele kûu kpɛ́-kpɛɛ tɛɛ́ pôlu ma, Saŋsiŋ è kɛ̀ liî pôlu a gɛ́ɛ é ǹɛnîi mɛi wôo ƃó. Gɛ́ɛ liî, è sèri ƃɛ́i è ǹyala sului pàa naai. È lɔ̀ berei kɔlɛ é lí ǹaa kâai. È gàa kɔ̃́iŋ a lɔ́ gbonôi a ŋ̀úlɔ pú naa. È kɛ̀ a guláa la.

⁹È gɔ̃iŋ kùla gɛ́ mii, gɛ́ lì é lɛ́ɛ la zu é seri ǹâŋ da ǹee-ni dîa. È da tɛ̀ɛ dípɔ. Kɛ́lɛ vé m̀ó ní dîa a gɛ́ɛ è gùla ǹyala-sulu poma kponôi.

¹⁰Saŋsiŋ ǹâŋ ni kɛ́ɛ ǹɛnîi maa mɛ̂ni ƃôi, Saŋsiŋ è kúu kɛ́tɛ kɛ̀ ǹûai dîa yɛ̂ɛ berei ǹaa ǹyaŋkpa-ŋai da kâa gɛ̀ la nɛnî kula pere sui.

¹¹Berei Felesia-ŋai dí Saŋsiŋ kàa lai, dí nyáŋkpa buu saaƃa tɛ̀ɛ a gɛ́ɛ díkɛ ƃò gɔlɛ gúui su.

¹²Saŋsiŋ è mò dîa ǹyɛɛ, “Gúui ŋí káa fólo lɔ́ɔlu mɛi feerɛ mɛni ma. Ŋa pâi koleŋ-kêe pilîi kâa. Kà zu kulâi lɛ̀ ḿâ vólo lɔ́ɔlu mɛi feerɛi yée mu, gɛ̀ ní ŋa pâi seɣe kôle nɛnɛ-fɛfɛ lɛ́lɛɛ-ŋa buu saaƃa da yokpo lɛ́lɛɛ-ŋa buu saaƃa tɛɛ̂i kápɔ́. Kɛ́lɛ ka wàla pɔri zu kûlai, gɛ́ ní ka pâi seɣe kole nɛnɛ-fɛfɛ lɛ́lɛɛ buu saaƃa da yokpo lɛ́lɛɛ buu saaƃa tɛɛ̂i ḿbɔ.” Dí mò ma dîyɛɛi, “Ye í koleŋ-kêei píli kú mɛni.”

¹⁴È mò dîa ǹyɛɛ, “Dí mii-sɛŋ kùla sɛŋ mii-sɛŋ kponôi, sɛŋ nɛ̃ɛ é kúla sɛŋ wála-wala kponôi.” Dí fólo kûu saaƃa sìɣe dífe pɔri ní goleŋ-keei ŋí su kulâi.

¹⁵Vólo kûui ǹáaŋ ɣele kɛ́ɛ a serii, ǹyáŋkpa-ŋai dí mò Saŋsiŋ ŋɔnɛnîi ma dîyɛɛi, “Gɛ́ ísurɔ̂ŋ é goleŋ-kêei ŋí su kula kûɛ. À wàla kɛ́ tí, kwa pâi íkêrenii ka ínâŋ ŋɔpɛ́rɛi. Í pà a kûa ƃɛ́ a gɛ́ɛ í ŋúma kɛ́ kûa?”

¹⁶Nya ƃe Saŋsiŋ ŋɔnɛnîi è tòo gɔ́ɔ mu gɛ́ wɔ̀lɔ ǹyɛɛ m̀ai, “Ḿbɛlɛ fé íkoi! Tɔ̃yâ kpîŋ ma ífe ŋ́wɛli ní. Í koleŋ-kêe pìli ŋánûai dîa nyíi ífe zu kulâi lɛ́ ní ḿâ!” Saŋsiŋ ǹyɛɛ m̀ai, “Ḿve niî zu-kulâi lɛ́ ní ńâŋ da ńee-ni dîa. A pâi kɛ̂i léŋ ŋ́gɛ zu-kulâi lɛ̀ yâ?”

¹⁷Gɛ́ɛ tíi, ǹɛnîi è wɔ̀lɔ kpɔ́ a vólo kûu lɔ́ɔlu mɛi feerɛi díkɛɛ gúui kɛ̂i. Vólo kûui mɛi feerɛ ɣelei, Saŋsiŋ è nâa goleŋ-keei su kulâi lɛ̀ ma, kpɛ́ni fêi, è kɛ̀ nɔ́ wɔ̂lɔi ma. Gɛ́ɛ tíi, ǹɛnîi è goleŋ-keei su kulâi lɛ̀ Felesia ǹyaŋka-ŋai dîa.

¹⁸Vóloi mɛi feerɛ ɣelei vólo káoi é lɛ́ɛ toôi, ǹyáŋkpa-ŋai dí mò Saŋsiŋ ma dîyɛɛi, “Lé ƃé ǹɛ̃ɛ̂i é tɛ́ɛ kɔ̃́iŋ-wulɔ mai? Lé ƃé ŋ̀wála-walai é tɛ́ɛ yala-sulu mai?” Saŋsiŋ è díwoo su tòo ǹyɛɛ, “Eêi kɛ̀ káfe ká kwaai sí ní a ŋákâlii, Kái fêi pɔ̀ri ŋá koleŋ-kêei su kulâi.”

¹⁹Nya ƃe Yâwɛɛ ŋɔmɔ̂leŋ è pà Saŋsiŋ pɔ́ é wála-wala-laa tɛ̀ɛ bɔ́. È kɛ̀ nɔ́ tí, Sansiŋ é yéŋ é lí Asikɛlɔŋ é kpakolo buu saaƃa páa naa é díseɣei kélee kúla díyêei. È pà a dia Tiŋna taai su, é dítɛɛ diai pɔ́ goleŋ-keei su kulai. È lɛ̀ɛ a ǹíi ŋwánaa é lí pôlu bɔ́-taai.

²⁰Saŋsiŋ ŋɔnɛnîi ǹâŋ è Saŋsiŋ ŋɔnɛnîi tɛ̀ɛ ǹyáŋkpa puu saaƃai ŋí dɔnɔ pɔ́ kɛ̀ gɔlɛ ma gúui suui.