Read Kpelle M̀ɛni-sâa Ƃó-ƃelai 15 Bible Online

M̀ɛni-sâa Ƃó-ƃelai 15 - Kpelle bible

M̀ɛni-sâa Ƃó-ƃelai 15

¹Ɣele kpɛ́-kpɛɛ tɛɛ́ pôlu ma, wîi tée tãi seriɛɛi, Saŋsiŋ è lì ŋɔnɛnîi nàa kâai. È lì a ƃoli-lôŋ tɔnɔ bɔ́ a sama-sɛŋ. È mò nɛniî ǹâŋ ma ǹyɛɛ, “Ŋa ŋ̀wɛ̂lii ŋá lí ŋánɛnîi ŋɔlôŋpoi su.” Kɛ́lɛ ǹɛnîi ǹâŋ fé fáa ní ma.

²Ǹyɛɛ Saŋsiŋ mai, “Tɔ̃yâ ma ŋá kɛ̀ nɔ́ gâai ŋ̀wɛ́li fé yâ. M̀ɛni ma, ŋá dɛ̀ɛ ǹyaŋkpâi dɔnɔ pɔ́ kɛ̀ íkɔlɛ ma gúui í gɛ̂i zu. Kɛ́lɛ ƃa pɔ̂ri ǹêɣe-nɛnii kulâi a nɛnî bɔ́ɔ ŋá. Ǹɛ̂lɛɛi é tɛ́ɛ ma.”

³Saŋsiŋ ǹyɛɛ m̀ai, “Lônii ma sâpo káa ńyêei ŋá mɛni nyɔ́mɔɔ kɛ́ a Felesia-ŋai.”

⁴Nya ƃe Saŋsiŋ è lì é kɛlɛ̂ŋ ŋuŋ saaƃa sóŋ. È dí kpùlɔŋ díkîe ma feerɛ-feerɛ a díwoŋ a seɣe kpua-ŋa. È wîi kpaŋ ɣìri zeɣe kpua-ŋai ŋí dîa.

⁵È ŋɔŋ tôo wîi kpaŋ-ŋai dîa, é tée gɛlɛ̂ŋ-ŋai dîa ŋɔŋ kɛ́ ƃò dîa, dí lí Felesia-ŋai díwîi kpalaŋ ŋá. Wîi ǹûai dí dèei, ŋɔŋ è gélee kèreŋ da nyii-ŋai kɛ̀ gbaŋ ŋái, é pɛ́lɛ díɔle dóu-kpɔ̂lui ma.

⁶Felesia-ŋai da-ŋa dí marê kɛ̂ɛ kɛ̀ dîyɛɛi, “Gbɛ̂ɛ ƃé a m̀ɛni saŋ ŋí kɛ̂i?” Núu da è mò dîa ǹyɛɛ, “Saŋsiŋ ƃé gɛ̀ tí. È Tiŋna ǹalôŋ tɔnɔ ǹóŋ kùla a nɛnî. Kɛ́lɛ ǹaloŋ ŋí è Saŋsiŋ ŋɔnɛnîi sìɣe é dɛɛ surɔ̂ŋ da kpɛ́ni pɔ́.” Nya ƃe Felesia-ŋai dí lì dí nɛniî ŋí kéreŋ da ǹâŋ ŋɔpɛ́rɛi.

⁷Saŋsiŋ è m̀ɛnii ŋí m̀ɛni. È lì é m̀ó dîa ǹyɛɛ, “Dûai ŋí ká gɛ̀ a ńyãai, ŋa ḿvoo ŋa pâi gba tí-ti kulâi kâa. Ḿvii fé pâi kpɛɛ̂i.”

⁸Nya ƃe è kɔ́ pɛ̀lɛ dîa a ŋɔwála-walai kélee é dámaa páa. Nyíŋi pôlu ma, è kùla Felesia-ŋai dílɔii su, é lí Itaŋ Kɔni woloi su gɛ̀ ƃò naa.

⁹Naa kɛ́ɛ tíi, Felesia kɔ-kuluƃa-ŋai dí lì dí díƃûui pú Zuda kpiniŋ su. Dí kɔ́ pɛ̀lɛ Lɛi taai ma.

¹⁰Zuda sinaai dí Felesia-ŋai marê kɛ̀ dîyɛɛi, “Ka kɔ́ pɛlɛ̂i kûa lé mɛni ma?” Felesia-ŋai dí Zuda-ƃelai wóo su tòo dîyɛɛi, “Saŋsiŋ a mɛni nyɔ́mɔɔ kɛ́ a kûa. M̀ɛni ƃé kú pà la a gɛ́ɛ kú zoŋ, kú tûa la yɛ̂ɛ berei è tùa la a kûai.”

¹¹Nya ƃe sinâa wála saaƃa dí kùla Zuda kpiniŋ su dí lí Itaŋ Kɔni woloi su dí m̀ó Saŋsiŋ ma dîyɛɛi, “Ífe gɔ́lɔŋ a gɛ́ɛ kúkaa Felesia-ŋai yée mu? Ya ŋ̀wɛ̂lii í kúmɔ̃lɛ laai da pú ŋɔ́nɔ ma?” Saŋsiŋ ǹyɛɛ dîai, “M̀ɛni tɔ̂nɔi dí gɛ̀ a ńyãai, ǹyaa nɔ́ ƃé ŋá gɛ̀ a dia.”

¹²Dí mò ma dîyɛɛi, “Kú pà a gɛ́ɛ kú ísoŋ kú íɣiri kú lí a yá dípɔ.” Saŋsiŋ è mò dîa ǹyɛɛ, “Ka káfoo ńyêei a gɛ́ɛ káa kpîŋ káfe pâi ḿbaâi.”

¹³Dí mò ma dîyɛɛi, “Tɔ̃yâ ma kúfe pâi ípaâi. Kwa pâi nɔ́ íɣirîi kú lí a yá dípɔ.” Nya ƃe dí ŋ̀iri a ɣɛli nina feerɛ dí gula gɔni wôloi su dí lí la.

¹⁴Dí tɛɛ́ Lɛi taai sui, Felesia-ŋai dí pà bɔ́-naa pêre a kîri díkɛ làɣi. Yâwɛɛ ŋɔmɔ̂leŋ è pà bɔ́ é wála-wala laa tɛɛ bɔ́. Ŋ̀ɛlii kɛ̀ ǹyée mai zu è tèe nɔ́ yɛ̂ɛ ŋɔŋ a yee su tèe.

¹⁵Gɛ́ɛ tíi, è wɛlɛ-sôo nɛɣɛŋ-káo nina tɔnɔ kàa lâa-ni gɔlɛ ma. È zìɣe é pɛ́lɛ ǹûai lôkwai la. È sinâa wála tɔ̂nɔ pàa la.

¹⁶Saŋsiŋ è m̀ɛnii ŋí tòo a wule ǹyɛɛ, “Ŋá sinâa wála tɔnɔ pàa a wɛlɛ-sôo ǹɛɣɛŋ kao tɔnɔ. Wɛlɛ soo nɛ̂ɣɛŋ káo tɔnɔ ƃé ŋa dípàa la, ŋá dípoma ŋáa tɛ̀ gîe ma túŋ-kpaŋ.”

¹⁷Gbɛ́ɛ ŋ̀ulei toôi, è zua káoi tòo. Dí gwaai ŋí ma láa sèe a Lama Lɛi.[1]

¹⁸Gɛ́ɛ tíi, kpele wɛ̂li ŋánaa è zòŋ. È Yâwɛɛ fɛ̀li ǹyɛɛ m̀ai, “Ya wála-wala laa tɛɛ ḿbɔ ŋa ǹûai ŋí yée mɛi ɣále. Ya pâi ǹɛɛ̂i naa kpele wɛ̂li é ḿbaa, Felesia-ŋai ŋí dífe Ɣâla kɔ́lɔŋ dí ńzoŋ?”

¹⁹Lóa da è kɛ̀ Lɛi taai su ǹɔii mu. Ɣâla è ǹóai ŋí lá ƃò yá é kúla naa. Saŋsiŋ è da kpèle é tóo gbonôi. È ǹyái ŋí láa sèe a Akori.[2] Ǹyaŋ ǹáa ká tí é tóo sâa ma.

²⁰Saŋsiŋ è kɛ̀ Eezuɛ lɔii láa túɛ a kóraŋ buu feerɛ. Felesia-ŋai díkɛ̀ Eezuɛ lɔii mɛi tãi ŋí yée mu.