Read Kpelle M̀ɛni-sâa Ƃó-ƃelai 17 Bible Online

M̀ɛni-sâa Ƃó-ƃelai 17 - Kpelle bible

M̀ɛni-sâa Ƃó-ƃelai 17

¹Nalôŋ tɔnɔ è kɛ̀ ǹyée lɔii su Ifiraŋ lɔii kpiniŋ su. Ǹáa ƃé kɛ̀ a Maka.

²Ɣele tɔ̂nɔ da Maka è mò ǹee ma ǹyɛɛ, “Káne kpua-kpua wála tɔnɔ pôlu ŋuŋ tɔnɔ è làŋ íyêei. Ǹúui ziɣei, í naɣaŋ ŋá íwoo mɛ́ni. Ƃɛ́ káa, ńyãa ƃé zìɣe. Gáa ńyêei.” Ǹee è mò ma ǹyɛɛ, “Ńoŋ, Yâwɛɛ é lûwa láa yâ!”

³Ǹóŋ kɛ́ɛ a ŋɔkánei tɛ́ɛ bɔ́ pôlui, è mò ǹyɛɛ, “Ŋa gánei ŋí tɛɛ̂i Yâwɛɛ pɔ́ a gɛ́ɛ voo-wooi ŋí fé ńoŋ sòŋ. Ziɣe í sɛŋ da pɔɔkɔ̂ŋ gbɛ̀tɛ la í bɔ̃yɛ a gáne kpua-kpuai ŋí íkɛ vɛ̀li.”

⁴Maka è gáne kpua-kpuai tɛ̀ɛ pôlu ǹee pɔ́. Ǹee è gánei ŋí gbua-kpua ŋuŋ feerɛ kùla ma é dɛɛ káne kpɛtɛ-nuu tɔnɔ pɔ́. È sɛŋ da pɔɔkɔ̂ŋ kpɛ̀tɛ a wúru, é bɔ̃yɛ a gáne kpua-kpuai ŋí. Dí kwaa da-ŋa kpɛ̀tɛ Maka ŋɔpɛ́rɛi mu dí bɔkɔɔ̂ŋ ŋí tɔ́ɔ naa.

⁵Maka è gbɔ́ɔi kwaa ma kpɛ̀tɛ é zãâ pɔkɔɔŋ-ŋai pú naa gɛ́ dífɛli. È sâla láa soŋ nuu maa seɣe kpɛ̂tɛ é bú naa. È ǹônii sinaai dɔnɔ kɛ̀ a sâla láa soŋ-nuu naa mɛni ma.

⁶M̀ɛni-ŋai ŋí kélee kɛ́ɛ kɛ̂i kâloŋ fé kɛ́ ní kɛ̀ Eezuɛ lɔii mɛi. M̀ɛni ma núu kélee ŋɔtɔ̂ŋ è kɛ̀ gbîŋ yêei.

⁷Ɣele tɔ̂nɔ da, Liiva nyáŋkpa tɔnɔ da è pà Maka pɔ́-naa ǹyéei su Ifiraŋ lɔii kpiniŋ su a gɛ́ɛ da ǹyaa díkɛ ƃò naa. Ǹalôŋ ŋí da Zuda suui su-ƃelai díkɛ Bɛpeleɣɛ̃ɛ taai su, Zuda lɔii kpiniŋ su.

⁸È kùla Bɛpeleɣɛ̃ɛ taai su gɛ́ lì a gɛ́ɛ é kwaa da ma kɔ́ri é sée naa. È lɛ̀ɛ siâi é seri Maka ŋɔpɛ́rɛi lá ǹyéei su, Ifiraŋ lɔii kpiniŋ su.

⁹Maka è marê kɛ̀ ǹyɛɛ m̀ai, “Mí ƃé ya kulâi naai?” Liiva naloŋ ǹyɛɛ m̀ai, “Ŋ́gaa a Liiva suui su-nuui da. Ŋa kulâi Bɛpeleɣɛ̃ɛ taai su, Zuda lɔii kpiniŋ su. Ŋa kwaa ma nina kɔ̂rii a gɛ́ɛ ŋá sée naa.”

¹⁰Maka è mò ma ǹyɛɛ, “Ye pá kú sée ƃɛ́. Kɛ́ a ńia woo ƃó nuu da ŋásâla láa soŋ-nuu. Ŋa pâi kɛ̂i ífela fêi a káne puu, seɣe-ŋa da mii-sɛŋ a kóraŋ kélee.”

¹¹Liiva nyaŋkpai è fàa ma a gɛ́ɛ da Maka díkɛ naa. Maka è mɛi kàa yɛ̂ɛ gbîŋ loŋ.

¹²Nya ƃe Maka è zèe a ŋɔsâla láa soŋ nûu, gɛ́ ƃò ŋɔpɛ́rɛi mu.

¹³Maka è mò ǹyɛɛ, “Ŋa gɔ́lɔŋ a gɛ́ɛ Yâwɛɛ a pâi mɛni lɛ́lɛɛ kɛ̂i ḿî, kpɛ́ni fêi, Liiva suui su-nuui da a kɛ́ a ŋásâla láa soŋ nûu.”