Read Kpelle M̀ɛni-sâa Ƃó-ƃelai 19 Bible Online

M̀ɛni-sâa Ƃó-ƃelai 19 - Kpelle bible

M̀ɛni-sâa Ƃó-ƃelai 19

¹Kâloŋ é lɛ́ɛ pâi kɛ̂i Eezuɛ lɔii mɛi, Liiva naloŋ tɔnɔ è kɛ̀ naa. Ǹalôŋ ŋí seɛ́ɛ è kɛ̀ Ifiraŋ lɔii kpiniŋ su kwaa kôyaa ma. Liiva naloŋ ŋí ŋɔnɛnî-loŋ è kùla Bɛpeleɣɛ̃ɛ taai su, Zuda lɔii kpiniŋ su.

²Kɛ́lɛ ǹɛnîi ŋí fé kɛ́ ní a deniŋ ƃóɔɔ dítûa-laai su. È ǹíi ŋ̀wana é kùla ŋɔsurɔ̂ŋ pɔ́-naa é lí ǹâŋ ŋɔpɛ́rɛi lá Bɛpeleɣɛ̃ɛ. È gɛ̀ naa a ɣáloŋ náaŋ.

³Nya ƃe ŋɔsurɔ̂ŋ è ǹyée mu nuui dɔnɔ sìɣe da wɛlɛ soo feerɛ dí láaŋ ma. È làaŋ ma a gɛ́ɛ da ǹyaa dí díloai kpɛtɛ dí lí pôlu. Ǹɛnîi kɛ́ɛ a gáai, è lì la ǹâŋ ŋɔpɛ́rɛi lá. Ǹâŋ líi è nɛ̃ɛ é ǹyée sée mu.

⁴Ǹɛnîi ǹâŋ è mò ma a gɛ́ɛ dí nyíi naa. Dí gɛ̀ naa a fólo saaƃa díkɛ dílaa mìi díkɛ lii-nɛ̃ɛ kùla gîe ma.

⁵Ŋ̀ele kûui ǹáaŋ ɣele wâla pɛpɛi, Liiva naloŋ è ŋɔsãâi sîɣe a gɛ́ɛ é lí. Kɛ́lɛ m̀ɔ̂lɔ è mò ma ǹyɛɛ, “Ye maa kpɛ̂ŋ kɛ́ dí mii-sɛŋ kpɛtɛ í mii, íkponôi é kpanaŋ ílɛɛ pâi liî.”

⁶Ǹalôŋ da m̀ɔ̂lɔ dí dílaa mìi gîe ma. Nyíŋi pôlu ma, m̀ɔ̂lɔ è ŋɔ́nɔ mò ma ǹyɛɛ, “Kpera yɛ̂ gbíni tɔnɔi ŋí kɛ́ ƃɛ́ sâa í ínîa kɛ́.”

⁷Ǹalôŋ è mù sìɣe a gɛ́ɛ é lí. Kɛ́lɛ m̀ɔ̂lɔ fé faa ní. È ŋɔ́nɔ kpíni tɔnɔ kɛ̀ naa.

⁸Ŋ̀ele kûui ǹɔ́ɔlu ɣele wâla pɛpɛi, è mu sìɣe a gɛ́ɛ lí bɔ́-taai. Kɛ́lɛ m̀ɔ̂lɔ è ŋɔ́nɔ mò ma a gɛ́ɛ é lɛ́ɛ naa da ǹyaa dí mii-sɛŋ mii gîe ma, vóloi a pène é lɛ́ɛ pâi liî. Dí ŋɔ́nɔ dílaa mìi gîe ma.

⁹Vóloi kɛ́ɛ a penei, Liiva naloŋ, ŋɔnɛnîi-loŋ da ǹyée mu nuui dí nâa dímu sìɣe a gɛ́ɛ dí lí. Nya ƃe m̀ɔ̂lɔ è mò dîa ǹyɛɛ, “Vóloi aâ gbâa lí. M̀ɛni ma kwaa nyíi ƃɛ́ ká kánîa kɛ́. Ka pâi tínaa liî a ɣele wâla pɛpɛ.”

¹⁰Kɛ́lɛ Liiva naloŋ fé fáa ní. È ŋɔwɛlɛ soo feerɛi pôlu sãai pɛ̀lɛ dípôlu, dí sée dímɛi dí lí a Zerusâlɛŋ perei. Dí seriɛɛ́ Zɛbu taa leei (bere ƃé da kâa Zerusâlɛŋ taa leei tôli la) kɔlɛ ma, Liiva naloŋ yée mu nuui è mò ma ǹyɛɛ, “Kwaa nyíi sâa Zɛbu taa leei ŋí su, kpɛ́ni fêi, vóloi aâ lí.”

¹²Kɛ́lɛ ǹalôŋ è mò ǹyée mu nuui ma ǹyɛɛ, “Kpa. Ǹûai ŋí dífe a kúai a Eezuɛ nuu suui kúta. M̀ɛni ma, fé nyiî dítaai da su. Vóloi kɛ̂tɛi niî. Kwa pɔ̂ri liî Giƃia kpaa máŋ Lama kú nyíi naa.”

¹⁴Nya ƃe dí tɛ̀ɛ naa. Dí seriɛ́ɛ Giƃiai, vólo káoi è nâa yèŋ lɔɔ pôlu. Giƃia taai è kɛ̀ Bɛŋsima lɔii kpiniŋ su.

¹⁵Dí kùla bere lêei ma dí lí Giƃia taai su. Dí lì dí sée daa kêre kɛ́tɛi mu. Kɛ́lɛ núu da fé dílâai kula ní.

¹⁶Díkɛɛ naai, siɛ-pɔ́lɔ tɔnɔ è kùla ŋɔtíi kɛ́ɛi su a ŋ̀ele wûlii é pá é díkaa. Ziɛ-pɔlɔi ŋí è kɛ̀ a ǹyée lɔii su, Ifiraŋ lɔii kpiniŋ su-nuu. Kɛ́lɛ zeɛ́ɛ è kɛ̀ Giƃia taai su. (Diai kɛ̀ Giƃia díkɛ̀ a Bɛŋsima suui su-ƃela.)

¹⁷Ziɛ-pɔlɔi ŋí è Liiva naloŋ ni kàa daa kêrei mu. È lì naa é dímarê kɛ́ ǹyɛɛ, “Ká kùla mí? Ka liî mí?”

¹⁸Ǹalôŋ ǹyɛɛ m̀ai, “Kwa kulâi naa kàa kɛ̂i Bɛpeleɣɛ̃ɛ, Zuda lɔii kpiniŋ su. Kwa kɛ́ lenêi pôlu kúpɔ-taai ǹyée lɔii su, Ifiraŋ lɔii kpiniŋ su. Kɛ́lɛ núu da fé niî kútoli ní a gɛ́ɛ é Kúlâai kula.

¹⁹Kú pà a mii-sãa kútaa tulɛ-ŋai mɛ̂ni ma. Kú pà a kpólo da ŋwã̂ai kúa kpîŋ kúmɛni ma. Kɛ́lɛ berei máŋ zãâi ŋí káa la kúyêei, núu da fé niî kúlâai kùla ní.”

²⁰Nya ƃe ziɛ-pɔlɔi è mò dîa ǹyɛɛ, “Kwaa lí ŋápɛrɛi lá ká nyíi naa. Ŋa pâi zɛŋ kélee tɛɛ̂i kápɔ ka ŋ̀wɛ̂lii. Kɛ́lɛ káfe nyìi daa kêrei ŋí mu.”

²¹Nya ƃe è lí a dia ŋɔpɛ́rɛi lá. È yá tɛ̀ɛ dípɔ dí díkɔɔ ma wáa, é mii-sɛŋ tɛɛ dípɔ. È mii-sãa tɛ̀ɛ díwɛlɛ-sôo-ŋai pɔ́ máŋ.

²²Ŋ̀ele wûlii tí, ziɛ-pɔlɔi da Liiva naloŋ ni dí kɛ̀ seeni bɛ́rɛi mu díkɛ lii-nɛ̃ɛ kùla gîe ma. Ŋwana lɔɔ-sinaa díkɛ̀ daai ŋí su. A naa maa félaa zinâai ŋí dí pà dí tínaŋ bɛ́rɛi ma. Dí pɛ̀lɛ gbôŋ tuáa ma díkɛ làɣi dîyɛɛ ziɛ-pɔlɔi mai, “Ǹalôŋ tí pà ípɛrɛi mui, kula la ŋ̀énei ŋá í dɛɛ kúpɔ, kú nyíi la.”

²³Nya ƃe ziɛ-pɔlɔi è kùla ǹyɛɛ dîai, “Ée ńâwoi ni, káfe m̀ɛni sîi nyɔ́mɔɔi ŋí kɛ̀. Ǹalôŋ ŋí káa a ŋáŋɔ̃ya. Káfe m̀ƃaa kula maa sîi ŋí kɛ̀ la.

²⁴Ńoŋ nɛnii káa a nɛnî-kpela. Ka lí la da ǹalôŋ kpîŋ ŋɔnɛnî-loŋ ká nyíi a dia. M̀ɛnii kélee ka ŋ̀wɛ̂lii ká gɛ́ a dîai kà gɛ́. Kɛ́lɛ káfe m̀ƃaa kula maa tuai ŋí kɛ̀ a ǹalôŋ ŋí.”

²⁵Kɛ́lɛ zinâai ŋí dífe díwoli tɔɔ ní ziɛ-pɔlɔi ŋí ma. Nya ƃe Liiva nalôŋ è ŋɔnɛnî-loŋ tùaŋ dîa. Dí nyìi la a ƃaa kûla-maa pere. Dí lɛ̀ɛ ma é lɛ́ɛ la zu ɣele kɛ́ pà ƃɔ̂i. Ɣele kɛ́ɛ pâi ƃɔ̂i, dí ǹɛɛ naa é lí.

²⁶Ǹɛnîi è nâa lène pôlu a bôlu ma ɣele ƃɔi, é lí bɛ́rɛi lá bɔ̂ŋ è nyìi mui. Kɛ́lɛ pɔri mâa fé kɛ́ ní mì a gɛ́ɛ é lɔ́ bɛ́rɛi mu. È tòo gbôŋ lá é lɛ́ɛ naa kwaa é pono.

²⁷Ɣele ƃɔ́ɔi, bɔ̂ŋ è bɛ́rɛi lá ƃò nɔ́ a gɛ́ɛ é lí, é gáa lâani bɛ́rɛi lá. Ǹɛnîi è ǹyée zãa gbôŋ ma pere a gɛ́ɛ é zóŋ.

²⁸Ŋɔsurɔ̂ŋ è mò ma ǹyɛɛ, “Ímu siɣe kú lí.” Kɛ́lɛ vé ŋ̀óo su too ni, kpɛ́ni fêi, è nâa sàa. Ǹalôŋ è boma sîɣe é gbɛyâŋ ŋ̀wɛlɛ-sôoi mɛi é lí la bɔ́-taai.

²⁹Zeriɛ́ɛ la bɔ́-taai, è ƃóa sìɣe é ŋɔnɛnîi su tée a gbua-kpua puu káo feerɛ. È gbua tɔnɔ-tɔnɔ tɛ̀ɛ Eezuɛ-nuu suu puu káo feerɛi pɔ́ a tɛɛ-ŋa.

³⁰Diai kélee gàai, dí mò dîyɛɛi, “É síɣe tãi ma Eezuɛ-ŋai dí kùla la Ize lɔii sui, m̀ɛni sîi ŋí da fé tá kɛ́ ní. M̀ɛni ma fɛ̂ɛ kú mɛni da kɛ́ é pîlaŋ ma! Ka zìɣe a gbanaŋɔɔ! Ka m̀ɛnii ƃó kûa nyíi kwa pɔ̂ri gɛ̂i!”