Read Kpelle M̀ɛni-sâa Ƃó-ƃelai 5 Bible Online

M̀ɛni-sâa Ƃó-ƃelai 5 - Kpelle bible

M̀ɛni-sâa Ƃó-ƃelai 5

¹Nya ƃe Dibora da Bara nyíi kɛ̀ a Aƃiaŋ ǹóŋ-surɔŋ dí ŋ̀ule ŋí tòo a m̀aa ɣelei tí:

²Laa maa tɛ̂ é tɛ́ɛ Yâwɛɛ pɔ́! Eezuɛ-ƃelai dí díkpîŋ kpɛ̀tɛ a gɛ́ɛ dí kɔ́. Ǹûai dí kɔ̀ kpɔ́ a kili kûla pere.

³Kâloŋ-ŋa, ka káwoli tɔ́ɔ! Káai a ǹuu láa túɛ-ƃelai, ka káwoli tɔ́ɔ! Ŋa pâi pêle kɛ̂i, ŋá wule tóo Eezuɛ-ŋai Díɣâlai Yâwɛɛ ma.

⁴Yâwɛɛ kuláa Siɛ Yee kpaya-kpayai ma Idɔŋ lɔii kpiniŋ sui, ǹɔii è kpɛ̀liŋ. Tuna è pú kpɔ́ a zu kɛ́tɛ. Yá è kùla ŋ̀ele-kɔlɔŋ su.

⁵Ǹyée kpaya-kpayai dí kpɛ̃liŋ Eezuɛ Ŋɔɣâlai Yâwɛɛ ŋɛ́i túɛ. Sana Yeei máŋ è kpɛ̃liŋ. Dí tàa-taa Yâwɛɛ ŋɛ́i túɛ nyíi gáa a Eezuɛ Ŋɔɣâlai.

⁶Ana ǹóŋ-surɔŋ Saŋka ŋɔtãi ma, Zaɛɛ ŋɔtãi ma, bɔni tɔɔ núu-kpulu kɛ́tɛi su-ƃela dí fa kàa tɛ̀ɛ ǹɔii su. Zia-ƃelai da kâa tɛ̀ɛ a bere m̀aa tíyeŋ pere-ŋai.

⁷Kpâlaŋ ŋá tii kɛ́ mɛni-ŋa dí too pôlu Eezuɛ lɔii su, é lɛ́ɛ la su yá Dibora í pá, í pá yɛ̂ɛ Eezuɛ ǹee.

⁸Eezuɛ-ŋai díkɛ̀ ɣâla da kpɛ́ni fɛlîi. Kɔ́ è tòo dí lɔii su. Kɔ-kuluƃa maa kɔ̃ɔ kɔli-kalaŋ kpaa máŋ kpála-ŋa kàa Eezuɛ sinaa wála buu náaŋ yêei?

⁹Ŋ́gili tɔɔ̂i Eezuɛ kɔ-kuluƃa-ŋai dîa, nyii-ŋai díkili kùla a lii-nɛ̃ɛ pere dínûai sáma. Kwaa Yâwɛɛ láa maa tɛ́!

¹⁰Káai kélee seêni káwɛlɛ-sôo kole-ŋai mɛi, káai kélee seêni ká kâloŋ see-sãai ŋái, káai máŋ liî kwaa-ŋa mai, ka m̀ɛnii ŋí duŋ too.

¹¹Ka káwoli tɔ́ɔ ŋ̀ule-woo-ŋai dîa kulâi ǹya loai lái! Ǹûai díkaa lônoi é pîlaŋ Yâwɛɛ ŋɔwála-wala-laai ma. Nya ƃa gɛ́ Eezuɛ-ŋai da díkpɔara-ƃelai yée mɛi ɣále! À kɛ̀ tí, Yâwɛɛ ŋɔkɔ-kuluƃa-ŋai da pâi siâi díkpulu ma dí lí dítaa-lee-ŋai maa konaŋ-ŋai lá.

¹²Dibora, tɔɔ kútuɛ! Ímu siɣe, ítɔɔ kútuɛ! Ímu siɣe í tɔɔ kútuɛ, í wule too! Aƃiaŋ ǹóŋ Bara ímu siɣe í dí kpɛ́. Diai í dí soŋ gɔ́i sui, lí a dia.

¹³Ǹuu-namui ŋɔnûai kpéli-ŋai dí pà dí kpɛtɛɛ dí kɔ́ mɛni ma.

¹⁴Gɔ kɔ́-ƃelai dí kula Ifiraŋ lɔii kpiniŋ su ƃɛ́i Amaleka-ŋai dí wɔ́lɔ kɛ̀ seêni naai, dí pá diŋ-tiŋ su. Bɛŋsima suui su-ƃelai díkɛ̀ dítuɛ-pere. Dí kɔ kɔ́-ƃelai láa túɛ-ƃelai dí pà dí kúla Makɛ. Dí núu kpaya-kpayai dí kùla Zɛbulɔŋ.

¹⁵Isaka suui su-ƃelai láa túɛ-ƃelai da Dibora ni dí pà. Tɔ̃yâ ma Isaka suui su-ƃelai da Bara ni dí pà máŋ. Ǹyaŋ dí lɛ̀ɛ bôlu dí yéŋ diŋ-diŋ su. Kɛ́lɛ Lubiŋ suui su-ƃelai díwoo fé kɛ́ ní zu tɔnɔ. M̀ɛni ma dífe pɔri ní pâi gɔ́i ma.

¹⁶Lé ƃé gɛ̀ díkɛ lɛ̀ɛ pôlu m̀ála-ŋai kɔlɛi? Káai a Lubiŋ suui su-ƃelai ká lɛ̀ɛ m̀ála konaŋ kɔlɛ lé mɛni ma? Ká lɛ̀ɛ naa a gɛ́ɛ m̀ála mɛi káa-ƃelai da kɛ̀ m̀ála-ŋai tôlii ká kɛ́ díwoo mɛ̂ni? Tɔ̃yâ ma Lubiŋ suui su-ƃelai díkɛ̀ a díŋaa kɔlɛɛ. M̀ɛni ƃé dí fé pɔri ní pâi la.

¹⁷Gâa suui su-ƃelai dí lɛ̀ɛ Zɔdiŋ Ya-leei pôlu vóloi kulâi-pere. Daŋ suui su-ƃelai dí lɛ̀ɛ tîma-ŋai kɔlɛ. Asɛ suui su-ƃelai dia máŋ dí lɛ̀ɛ Yúo kɔlɛ ma, dí kɛ́ sìa a góo.

¹⁸Kɛ́lɛ Zɛbulɔŋ da Nɛfɛtɛli dísuui su-kɔ kɔ́-ƃelai, dí dífulu-laai see a sɛ́ɣɛ gɔ́ kɔ́ ɣenei ŋá.

¹⁹Kú kɛ́ɛ Taana taa leei su, Mɛgido ya loŋ kɔlɛi, Kaloŋ-ŋa dí kɔ́ pɛ́lɛ kûa. Keena kaloŋ-ŋai dí kɔ̀ kúpɔ, kɛ́lɛ dí fé káne tɔnɔ kpîŋ kula ní kúyêei.

²⁰Bɛ̂mɛlɛŋ káo-ŋai dí gɔ́i da kɔ̀. Díkɛ sia-sîai ŋ̀ele-kɔlɔŋ m̀éla kélee ma, dí kɛ̀ kɔ̀ Sisela pɔ́.

²¹Kisɔŋ Yai è fɛɛ é lí a Sisela ŋɔkɔ-kuluƃa-ŋai. Kisɔŋ ya ŋíliŋ su kpanaŋɔ̂ɔi a ɣele kéleei. Ŋa pâi liî kɔ́ ma. Ŋa pâi liî kɔ́ ma a lii kpele-pere a ɣele kélee!

²²Sisela ŋɔkɔ kɔ́-soo-ŋai díkɛ pûi, dísolo tíŋ kuláa yɛ̂ɛ ŋ̀ele gbâna.

²³Yâwɛɛ ŋɔkélai è mò ǹyɛɛ, “Ye Mɛrɔ taa leei fóo. Ye vóo. Ye vóo da ǹaa ƃelai kélee. Dífe pá ní a gɛ́ɛ dí kpɔ́ŋ Yâwɛɛ ma. Dífe pá ní yɛ̂ɛ kɔ-kuluƃa a gɛ́ɛ dí kɔ́ mì.”

²⁴Ka ƃaa kɛ́-maa támaa tɛ́ɛ Zaɛɛ pɔ́. Nya ƃa Keena nuui Ɛƃa ŋɔnɛnîi. Ka ƃaa kɛ́-maa támaa tɛ́ɛ bɔ́ m̀ûu su nɛyãai sáma.

²⁵Sisela è yá fɛ̀li ma, kɛ́lɛ è niŋa ŋini-ya tɛ̀ɛ bɔ́. È niŋa ŋini-ya kìi-kpɛɛ tɛ̀ɛ bɔ́ káne sɛŋ-folo su.

²⁶È ƃûu koôŋ soŋ wuru tɔnɔ sìɣe, é kpɔ́-kpɔ síɣe a ǹaa mii yêe. È ŋ̀úruii kpàmo Sisela ŋuŋ ma, é ŋ̀uŋ wólo la.

²⁷Sisela fé pɔri ní tɔɔ̂i ŋ̀ɛ́i. È tòo gɔ́ɔ mu é láa tɔ̀ŋ. Sisela è pìlaŋ gbelêŋ ŋá é tóo gɔ́ɔ mu. È tòo ǹɔii ma a boma.

²⁸Sisela ǹee è ŋuŋ ma laa ŋɔwônai lá. È mò ǹyɛɛ, “Lé ƃé kɛ̀ ŋɔkɔ́ kɔ́-keleŋ fé niî pá nii? Lé ƃé kɛ̀ ŋɔkɔ́ kɔ́-soo-ŋai dífe pâi a maa félaai?”

²⁹Dáre nɛyãai dí ŋ̀óo su tòo, kɛ́lɛ è kɛ̀ nɔ́ lônoi, gɛ́ mò ǹyɛɛ,

³⁰“Díkaa nɔ́ sãâ kɔ̂rii a gɛ́ɛ dí gula yêei kɛ́ dí ŋ̀áa kɔ́lɛ, díkɛ nɛnî tɔnɔ-tɔnɔ kpaa feerɛ tɛ̀ɛ kɔ-kuluƃa tɔnɔ pɔ́, díkɛ tɔɔ-nuu maa seɣe tɛ̀ɛ Sisela pɔ́, díkɛ pà a yɔlɛ sɔ̃ɔ kpanaŋɔɔ a gɛ́ɛ gâloŋ nɛnii é doo gɔŋ ma.”

³¹Óo Yâwɛɛ, tɔɔ íkpɔara-ƃelai kélee dí sáa a berei sîi tɔnɔi tí. Kɛ́lɛ tɔɔ íwɛli kɛ́-maa-ƃelai dífolo yɛ̂ɛ fólo nɛ̂nɛŋ! Nyíŋi pôlu ma lii sêe è kɛ̀ Eezuɛ lɔii su a kóraŋ buu náaŋ.