Read Kpelle M̀ɛni-sâa Ƃó-ƃelai 6 Bible Online

M̀ɛni-sâa Ƃó-ƃelai 6 - Kpelle bible

M̀ɛni-sâa Ƃó-ƃelai 6

¹Eezuɛ-ŋai dí ŋɔ́nɔ dípôlu tɔ̀ɔ Yâwɛɛ ma. Nya ƃe è kùla dípôlu Mediɛŋ-ŋai dí díyee mɛi ɣále. Dí m̀ɔ̃lɛ Mediɛŋ-ŋai yée mu a kólaŋ lɔ́ɔlu mɛi feerɛ.

²Mediɛŋ-ŋai dí Eezuɛ-ŋai mɔ̃lɛ kpɔ́ a ŋ̀ánaa. Nya ƃe Eezuɛ-ŋai dí pù dí díloo gɔni wôlo-ŋai su ǹyée kpaya-kpayai su ƃɛ́i-ŋai Mediɛŋ-ŋai dífe kɛ́ ní a naa kɔ́lɔŋɔɔi.

³Eezuɛ-ŋai da kâa sí-sãa sì, Mediɛŋ-ŋai, Amɛlɛki-ŋai da ǹûai kùla vóloi kulâi-pere da pâ dí kɔ́ pɛ́lɛ dîa.

⁴Ǹûai ŋí da kâa díƃûui pù Eezuɛ lɔii ma dí naa si-sãai su kàra-kara é kúla yá ŋûa-pere é tóo síɣai pere Geza kpiniŋ su. Da kâa Eezuɛ-ŋai díƃala-ŋai, díniŋa-ŋai, díwɛlɛ-sôo-ŋai da díkɔ̃liŋ kélee kùla díyêei.

⁵Da kâa kɛ̀ pâi, da pâ a díkpulu kɛ́tɛ yɛ̂ɛ gotó-ŋa. Da kâa pà a dítaa tulɛ-ŋai kélee da díƃûu-ŋai. Núu da fa kâa pɔri dílônii da dísoo-fáleŋ-ŋai lônoi. Dí Eezuɛ lɔii su kàra kpɔ́ a dámaa.

⁶Pɔri fé kɛ́ ní Eezuɛ mì a gɛ́ɛ é kɔ́ ǹûai ŋí pɔ́.

⁷Nya ƃe Eezuɛ-ŋai dí wɔ̀lɔ Yâwɛɛ ma a gɛ́ɛ é díŋuŋ ma ƃó Mediɛŋ-ŋai yêei.

⁸Yâwɛɛ è ŋɔlóno kɛ́-nuui tɛ̀ɛ Eezuɛ-ŋai pɔ́-naa. Ŋ̀orɛ̂-wooi ká ŋí è dɛ̀ɛ lai, “Ńyãa ƃa káai a Eezuɛ Káɣâlai da Kánuu-namui Yâwɛɛ. Ka káwoli tɔ́ɔ ḿâ. Ká kɛ̀ a luɛ-ŋa Ize-ƃelai yêei. Ŋá kákùla ǹuɛ-laai su ŋá kámaa kɔ̃ɔ é lɛ́ɛ la zu ŋá pá a káa ǹɔii ŋí ma. À kɛ̀ lɔii ŋuŋ da su-ƃela da tɔ̀ɔ kâa, ŋa kpɔ̀ŋ kâa ŋá káŋuŋ ma ƃó, ká dílɔii kúla díyêei.

¹⁰Ŋá mò kâa a gɛ́ɛ Ńyãa ƃa Káɣâlai. Amora-ŋai dílɔii ŋí ka seêni mai, ŋ̀âla-ŋai da vɛlîi káfe da fɛli. Kɛ́lɛ ká ŋ́oo pìli.”

¹¹Ɣele tɔ̂nɔ da Yâwɛɛ ŋɔkélai dɔnɔ è pà é sée ôo wurii mu Ofura taai kɔlɛ. Ôo wurii ŋí è kɛ̀ a Zoasi pɔ́ɔ. Zoasi è kɛ̀ a Aƃiyezɛ suui su-nuui da. Zoasi ǹóŋ Gidiɔŋ è ǹoo Mediaŋ-ŋai dîa é lí ƃɛ́i da kâa ŋŋwã̂ai kpɛtɛ naai, gɛ́ wîi tàŋ.

¹²Nya ƃe Yâwɛɛ ŋɔkélai è kùla Gidiɔŋ ŋɛ́i ǹyɛɛ m̀ai, “Yâwɛɛ káa ípôlu. Íkaa a kɔ-kuluƃa wála-walaa líi kpeleɛɛ.”

¹³Gidiɔŋ è ŋ̀óo su tòo ǹyɛɛ m̀ai, “Ńâŋ, m̀ɛnii ŋa pâi m̀ôi yái kpera yɛ̂ ífe zìɣe a wóo nyɔ́mɔɔ. À kɛ̀ Yâwɛɛ káa kúpôlu, gɛ̀ ní lé ƃé kɛ̀ m̀ɛni sâŋ-ŋai ŋí da kɛ̂i la a kúai? Kwa mɛni a gɛ́ɛ Yâwɛɛ è wɔ́lɔ kúnuu pɔ̂lɔ-ŋai ŋuŋ ma ƃò Ize lɔii su. Mí ƃé m̀ɛni-ŋai kúnûa-pɔlɔ-ŋai dí mò kûa da sâa naai? Dífe m̀ó ní kûa a gɛ́ɛ Yâwɛɛ è díŋuŋ ma ƃò é díkula Ize lɔii su? M̀ɛni-ŋai ŋí kɛ́ɛ su a kôya. Kɛ́lɛ sâa Yâwɛɛ a bôlu tɔɔ kûa a kútɛɛ Mediɛŋ-ŋai pɔ́ díkɛ kúmɔ̃lɛ.”

¹⁴Nya ƃe Yâwɛɛ ǹyaa kpîŋ è mò Gidiɔŋ mà ǹyɛɛ, “Ńyãa ƃé ítɛɛ̂i. Ŋa wála-wala pûi íkponôi a gɛ́ɛ í lí í Eezuɛ-ŋai kula yêei kɛ́ Mediɛŋ-ŋai yêei.”

¹⁵Gidiɔŋ è ŋ̀óo su tòo ǹyɛɛ, “Ǹuu-namui, ŋa pɔ̂ri Eezuɛ ŋuŋ ma ƃó pere kɛ̂i léŋ? Ŋ́gaa a Manasɛ suui su nuu. Ǹúu suui ŋí su-ƃela fíi kpɛɛ̂i a ŋ̀ánaa. Ńyãa ƃa ǹúu doo-mui ŋɔkáayɔɔ-ŋai sáma.”

¹⁶Yâwɛɛ è ŋ̀óo su tòo ǹyɛɛ, “Ya pâi pɔrîi Eezuɛ-ŋai ŋuŋ ma ƃôi, kpɛ́ni fêi, ŋa pâi kɛ̂i ípôlu. Ya pâi Mediɛŋ-ŋai yée mɛi ɣâlei a fii kpɛɛ-pere yɛ̂ɛ surɔŋ tɔnɔ kpéŋ ƃé íkaa ǹókwai.”

¹⁷Gidiɔŋ è Yâwɛɛ wóo su tòo ǹyɛɛ m̀ai, “Naa kpanaŋɔɔ̂i a gɛ́ɛ ŋá láa la a gɛ́ɛ ŋa lônoi yá Yâwɛɛ pɔ́ a tɔ̃yâ. À kɛ̀ gáa tí, mɛni da kɛ́ nyíi pâi ǹɛ̂i a gɛ́ɛ yá ƃa Yâwɛɛ.

¹⁸Ye lɛɛ ƃɛ́ ŋá lí ŋá pá a mii-sɛŋ sama-sãa ŋá dɛɛ ípɔ.” Yâwɛɛ ǹyɛɛ m̀ai, “Óowei, ŋa pâi lɛɛ̂i ƃɛ́ é lɛ́ɛ la zu í pá pôlu.”

¹⁹Nya ƃe Gidiɔŋ è lì ŋɔpɛ́rɛi lá é ƃoli-loŋ tɔnɔ paa é ŋ̀íli a láo, é félaƃa kɔpu buu feerɛ káo feerɛ kpɛ̀tɛ a kpólo. Kɛ́lɛ vé tɛ́-sɛŋ da pú ní gbóloi ŋí su. È zuai da gbóloi pù kpɔ̂lɔ su é ǹáoi lɛ́ɛ ǹeɣii su é pá a dia ôo wurii mu é dɛɛ Yâwɛɛ ŋɔkélai pɔ́.

²⁰Ŋ̀âla taa-kelai è mò mà ǹyɛɛ, “Zuai da gbóloi láa gɔnii ŋí ŋá, í ǹáo-yai pú dîa.” Gidiɔŋ è gɛ̀ yɛ̂ɛ berei nɔ́ ŋ̀âla-taa kelai è mò la mai.

²¹Ŋ̀âla-taa kelai è ŋɔtũaŋ pìlaŋ zuai da gbóloi dîa gɔnii ŋá. Ŋɔŋ è tèe gɔnii ma é zuai da gbóloi kélee kéreŋ. Naa kɛ́ɛ tíi, è làŋ Gidiɔŋ ŋɛ́i.

²²M̀ɛnii ŋí naa káa Gidiɔŋ mii, è gɔ̀lɔŋ a gɛ́ɛ Yâwɛɛ ŋɔkélai ƃé da ǹyaa díkɛ̀ lônoi. Nya ƃe è yào kpɔ́ a ŋ̀ánaa ńyɛ̂ɛi, “Óo ŋaâ sáa o! Ŋ̀wála-wâla kélee Yâwɛɛ, ŋá íkelai kàa kpɔ́ a ŋ́gbɔɔ-kpɔɔi ŋɛi gào!”

²³Kɛ́lɛ Yâwɛɛ è mò mà ǹyɛɛ, “Ífe yào! Lii-see é kɛ́ íyêei. Ífe pâi saâi.”

²⁴Gidiɔŋ è Ɣâla-teƃele tɔnɔ tɔ̀ɔ gwaai ŋí ma é ǹáa sée a, “Yâwɛɛ káa a Lii-see.” Gwaai ŋí ma káa a Abiezɛ nuu-suui pɔ́ɔ. È dɔɔ Ofura taa leei su. Gáa tɔ́ɔ ni naa sâa ƃa sâa.

²⁵Yâwɛɛ è mò Gidiɔŋ ma seêi-pere a maa kpînii tí ǹyɛɛ m̀ai, “Ínâŋ ŋɔniŋa sirɛi ǹɛ́lɛɛi nyíi gáa a kóraŋ lɔ́ɔlu mɛi-feerɛi síɣe. Ŋ̀âla teƃelei ínâŋ è dɔ̀ɔ Bêe Ɣala fɛli mɛni mai, ŋ̀ólo. Asira pɔkɔɔŋ da vɛ̀li gwaai ŋí mai, dée-tee í gùla naa.

²⁶Ɣâla-teƃele lɛ́lɛɛ tɔ́ɔ naa Yâwɛɛ mɛni ma. Ye niŋa-sirɛi kúla a kéreŋ sala. Asira pɔkɔɔŋ gbua-gbuai kɛ́ a kɔi zâla sɛŋ ŋí kéreŋ mɛni ma.”

²⁷Nya ƃe Gidiɔŋ è ǹyée mu-ƃelai buu sîɣe a gɛ́ɛ dí m̀ɛnii kélee kɛ́ Yâwɛɛ è ƃò mai. Kɛ́lɛ è kɛ̀ yaôi ŋɔkáayɔɔ-ŋai dîa da Ofura taai su-ƃelai. M̀ɛni ma, dí m̀ɛni-ŋai ŋí kɛ̀ a kpíni.

²⁸Daa-ƃelai kɛ́ɛ da dí dímu sìɣe a ɣele ƃɔ́ɔi, dí gàa a gɛ́ɛ núu da a Bêe Ɣalai ŋɔtêƃelei da Asɛtɔra Ɣalai ŋɔŋɛi kɛ́-maai su-kara. Dí gàa a gɛ́ɛ ɣâla-teƃele da kpɛ́ni è kɛ̀ tɔɔ̂ni dípɔɔ ŋá, ǹiŋa-sirɛi dí zâlai kùla lai, gbéli kɛ́ ƃò têƃelei ŋá.

²⁹Nya ƃe dí díkîe-ni marê kɛ̀ dîyɛɛi, “Gbɛ̂ɛ ƃé dûa sãŋ ŋí kɛ̀i?” Dí gàa a gɛ́ɛ Zoasi ǹóŋ Gidiɔŋ ƃé m̀ɛnii ŋí kɛ̀.

³⁰Zinâai kélee kɛ̀ daai sui, dí lì dí mò Zoasi ma dîyɛɛi, “Íloŋ-surɔŋ Gidiɔŋ ƃé Bêe Ɣalai ŋɔtêƃelei wôlo, é Asɛtɔra ŋɔwúru maa wáai su tée. Kwaa baâi dûa-perei ŋí mɛni ma.”

³¹Zinâai kɛ́ɛ lɛɣɛ̂i Zoasi mai, è dímarê kɛ̀ ǹyɛɛ, “Káa ƃa Bêe Ɣalai lá-gbɔ? Káa ƃa maa kɔ̃ɔ-ƃela? Ŋɔteƃele ƃé dí ŋ̀olo. À kɛ̀ gáa a ɣâla tɔɔ é gbîŋ maa kɔ̃ɔ. À kɛ̀ núu da a kɔ̀ a gɛ́ɛ é maa kɔ̃ɔ, kwa pâi maa-nuui paâi ɣele é lɛ́ɛ pâi ƃɔ̂i.”

³²Maa ɣelei tí, Zoasi è Gidiɔŋ láa maa fâleŋ a Zerubee. Iƃulu wooi su, ǹáai ŋí su kulâi ƃa, “Tɔɔ é gbîŋ maa kɔ̃ɔ, kpɛ́ni fêi, ŋɔtêƃelei ƃé dí ŋ̀olo.”

³³Naa kɛ́ɛ tíi, Mediɛŋ-ŋai, Amɛlɛka-ŋai da vɛ̃ɛ-kpâlaŋ su nuu suui kɛ̀ vóloi kulâi-pere dí díkɔ kɔ́-ƃelai ŋáa tɛ̀ ma. Dí Zɔdiŋ Ya-leei tîyeŋ dí díƃûui pú Zariɛɛ tiŋ-tiŋ su.

³⁴Yâwɛɛ ŋɔmɔ̂leŋ è kɛ̀ Gidiɔŋ pôlu. Gidiɔŋ è Aƃiezɛ suui su-sinaai tôli a túru-woo. Dí pà dí lɛ́ɛ bôlu.

³⁵Naa pôlu ma, Gidiɔŋ è kéla-ŋa tɛ̀ɛ Manasɛ, Asɛ, Zɛbulɔŋ, da Nɛfɛtɛli ni dísuui su-ƃelai pɔ́-naa a gɛ́ɛ ǹaa sinaai kélee dí pá. Dí pà dí lɛ́ɛ bôlu.

³⁶Gidiɔŋ è Ɣâla fɛ̀li ǹyɛɛ, “Í mò ḿâ a gɛ́ɛ ya pâi wála-wala laa pûi ŋ́gbônoi ŋá Eezuɛ lɔii ŋuŋ ma ƃó.

³⁷M̀ɛni ma ŋa pâi m̀álai kɔlɔ pɛlɛ̂i wîi kpála kwaai ma. À kɛ̀ ɣele a ƃɔ̀, ŋá m̀ála kɔlɔi káa ǹúuwii a ǹyɔ́ɔ kɛ́lɛ ǹɔii ma kpálaa, gɛ́ ní ŋa pâi gɔ́lɔniî a gɛ́ɛ ífâai a gɛ́ɛ ŋá Eezuɛ ŋuŋ ma ƃó.”

³⁸Ɣâla è gɛ̀ yɛ̂ɛ berei Gidiɔŋ è mò la m̀ai. Gidiɔŋ kɛ́ɛ a mù sìɣe a ŋ̀ele-walai, è m̀ála kɔlɔi lùaŋ yá é kúla zu gɛ́ ƃò a kawúlu tɔnɔ láa fɛ́ɛ.

³⁹Gidiɔŋ è ŋɔ́nɔ Ɣâla fɛli ǹyɛɛ m̀ai, “Ɣâla, ífe ílii ŋwàna ḿâ. Tɔɔ ŋá m̀ɛnii ŋí kɛ́ pôlu ŋɔ́nɔ a gɛ́ɛ ŋá gɔ́lɔŋ íkaa ḿbôlu a tɔ̃yâ. Tãi ŋí su, gɛ́ ǹúuwii é wîi kpála kwaai ma ǹyɔɔ, m̀ála kɔlɔi é lɛ́ɛ a gbálaa.”

⁴⁰M̀aa kpînii tí, Ɣâla è gɛ̀ nɔ́ yɛ̂ɛ berei Gidiɔŋ è mò la m̀ai. Ɣele ƃɔ́ɔi, m̀ála kɔlɔi è kɛ̀ a gbálaa, kɛ́lɛ ǹɔii ma gwaa kélee è kɛ̀ a ǹyɔɔ́.