Read Kpelle M̀ɛni-sâa Ƃó-ƃelai 7 Bible Online

M̀ɛni-sâa Ƃó-ƃelai 7 - Kpelle bible

M̀ɛni-sâa Ƃó-ƃelai 7

¹Ɣele tɔ̂nɔ da Gidiɔŋ da ŋɔkɔ-kuluƃa-ŋai kɛ̀ gɔlɛ mai dí dímu sìɣe a ɣele-wala pɛ-pɛ dí lí dí díƃûui pú Arɔ Ya ɣiliŋ-loŋ kɔlɛ. Mediɛŋ-ŋai dia máŋ dí díƃûui pù diŋ-tiŋ su nyíi kɛ̀ yá-ŋûa pere Morɛ Yeei kɔlɛ.

²Gɛ́ɛ tíi, Yâwɛɛ è mò Gidiɔŋ ma ǹyɛɛi, “Íkɔ-kuluƃa-ŋai tâmaai. Ŋà gɛ̀ da Mediɛŋ-ŋai yée mɛi ɣâle, Eezuɛ-ƃelai da pâi m̀ôi a gɛ́ɛ fé tɔɔ ní dípôlu. Dí Mediɛŋ-ŋai yée mɛi ɣâle a díkpɔɔi wala-wala laa, dífe pâi laa-ma tɛ̂ tɛɛ̂i ḿbɔ.

³M̀ɛni ma, m̀ó íkɔ-kuluƃa-ŋai dîa yɛ̂i, ‘Ǹúui yaôi, é lene pôlu. Kɛ́lɛ diai dílii kpeleɛi kwa dîa ni kwa pâi lɛɛ̂i Gilia Yeei ma ƃɛ́.’ ” M̀ɛnii ŋí mɛníɛɛ dîɛi, díwala buu feerɛ káo feerɛ ƃé lène pôlu, dí wála puu é lɛ́ɛ naa.

⁴Yâwɛɛ è ŋɔ́nɔ mò Gidiɔŋ ma ǹyɛɛ, “Ǹûai ŋí tâmaai niî gɔ́i ŋí kɔ́ mɛ̂ni ma. Ye lí a dia ǹyái lá. Ŋa pâi dísu ɣɛɛ̂i yɛ̂ naa a su-kɔɔŋ. À kɛ̀ tí ŋa pâi diai lɛ̂i yâ ǹɛ̂lɛɛi ka dîa ni ká lí gɔ́i mai, da diai ǹɛ̂lɛɛi dí lène pôlu dípɔ-taai.”

⁵Gidiɔŋ kɛ́ɛ a lí a ŋɔkɔ́ kɔ́-kuluƃa-ŋai ǹyái lái, Yâwɛɛ è mò ǹyɛɛ, “Da kɛ̀ díkpelêi kɛ́ dímaa kpɛɛ̂i. Diai pâi kɛ̂i díkpelêi a dínɛŋ yɛ̂ɛ ɣîlai, dí tɔ́ɔ kwaa tɔ̂nɔ ma. Nyíi-ŋai pâi pîlanii díkpêleŋ ŋá dí kɛ́ dí kpêlei, dí tɔ́ɔ kwaa da kpɛ́ni ma-pere.”

⁶Gidiɔŋ è gàa a gɛ́ɛ núu ŋuŋ saaƃa ƃé maa pɛ̂lɛ dí ǹyái kpâloŋ a díyee dí díkpele la. Kɛ́lɛ gɔ-kuluƃai kpéli-ŋai dí pìlaŋ díkpêleŋ ŋá dí díla pɛ́lɛ ǹyái su dí díkpele.

⁷Yâwɛɛ è mò Gidiɔŋ ma ǹyɛɛ, “Ŋa pâi gɛ̂i ka gɔ-kuluƃa ŋuŋ saaƃai nyii-ŋai ǹyái kpàloŋ a díyee dí díkpelei ká Mediɛŋ-ŋai yée mɛi ɣále. Kɛ́lɛ íkɔ kuluƃa-ŋai kpéli-ŋai tɛ́ɛ pôlu dítaa-ŋai su a tɛ̀ɛ ŋa.”

⁸Nya ƃe Gidiɔŋ è Eezuɛ-ƃelai kpéli-ŋai tɛ̀ɛ pôlu dípɔ-taai. Zãâi díkɛ̀ liî lai, dí gélee lɛ̀ɛ díƃarâai yêei da díturu-ŋai. Kɛ́lɛ gɔ-kuluƃa ŋuŋ saaƃai nɔ́ ƃé lɛ̀ɛ Gidiɔŋ kɔlɛ. Mediɛŋ-ŋai díƃûui è kɛ̀ diŋ-tiŋ su Eezuɛ-ŋai díwɔ̂i kwára-pere.

⁹Maa kpînii tí, Yâwɛɛ è mò Gidiɔŋ ma ǹyɛɛ, “Ímu siɣe í lí í kɔ́ pɛ́lɛ Mediɛŋ-ŋai dîa díƃûui su. Ŋa wála-wala tɛɛ ípɔ a gɛ́ɛ í díyee mɛi ɣále.

¹⁰Kɛ́lɛ à kɛ̀ ya yaôi, gɛ̀ ní, íyee mu-nuui Pura siɣe kà ǹyaa ká lí ká ǹaa maa kpɛ́ɛ fúlɔi.

¹¹M̀ɛnii ya pâi mɛnîi dílai, ǹyaa ƃé pâi gɛ̂i ílii é kpéle í kɔ́ pɛ́lɛ dîa.” Nya ƃe Gidiɔŋ da ŋɔyée mu-nuui Pura dí yèŋ díkpɔara-ƃelai díƃûui kɔlɛ. Mediɛŋ-ŋai díkɔ kɔ́-ƃelai díkɛ̀ díƃûui maa kpɛ̂i.

¹²Mediɛŋ-ŋai, Amɛlɛka-ŋai da vɛ̃ɛ-kpâlaŋ su nuu suui su-ƃelai díkɛ̀ a dítaa-taa diŋ-tiŋ su yɛ̂ɛ gotó-ŋa. Dísoo-fáleŋ-ŋai díkɛ̀ kpɔ́ dítamaa yɛ̂ɛ yúo ma ŋãya.

¹³Gidiɔŋ ni lɛɣɛ́ɛ m̀ûui kɔlɛ mai, dí Mediɛŋ kɔ-kuluƃai dɔnɔ wóo m̀ɛni gɛ́ see wôo ƃò m̀arâŋ ma ǹyɛɛ, “Ŋá see ƃô. Zeei su, ŋá kpólo kàa nyíi dí gbɛ̀tɛ a bâle gɛ́ kìliŋ kúƃûui su. È sɔ̀ɔŋ m̀ûui dɔnɔ ma é ŋ̀ólo kpɔ́ pɛ̀-pɛ.”

¹⁴M̀arâŋ-nuui è ŋ̀óo su tòo ǹyɛɛ, “Zee-wooi ŋí pîlaŋɔɔi Eezuɛ-nuui Gidiɔŋ, Zoasi ǹóŋ ma. Ɣâla aâ Mediɛŋ-ŋai da kúkɔ-kuluƃa-ŋai kélee tɛ́ɛ bɔ́ a gɛ́ɛ é kúyee mɛi ɣále.”

¹⁵Gɛ́ɛ Gidiɔŋ a zee-wooi mɛ́nii da zu-kulai, è pìlaŋ gbêleŋ ŋá é Ɣâla fɛli. Nya ƃe dí lì pôlu Eezuɛ-ŋai díƃûui su é m̀ó dîa ǹyɛɛ, “Ka ká mu siɣe! Yâwɛɛ aâ Mediɛŋ kɔ kɔ́-ƃelai tɛ́ɛ kúpɔ a gɛ́ɛ kú díyee mɛi ɣále!”

¹⁶Nya ƃe Gidiɔŋ è ŋɔkɔ́ kɔ́-ƃela ŋuŋ saaƃai ŋáa kɔ̀lɛ a núu-kpûlu saaƃa. È túru tɔ̂nɔ da pɔ̂rɔ-leɣi tɔnɔ tɛ̀ɛ dípɔ tɛi-tɛi. È sɛŋ da tɛ̀ɛ dípɔ gɛ́ɛ yɛ̂ɛ kpáleŋ-leŋ. Dí zãai ŋí mɛi pɛ̂lɛ a bɔ̂rɔ leɣi-ŋai kɛ̀ díyêei díkɛ lì la a tɛ̀ɛ-ŋa.

¹⁷È mò dîa ǹyɛɛ, “Ŋà sèri Mediɛŋ-ŋai díƃûui kɔlɛ ma, m̀ɛnii ŋa pâi gɛ̂i ka da kɛ́.

¹⁸Kwa ŋánûai kwa kúwɔ̂ turuii fɛ̂ɛ, káa máŋ ka káwɔ̂i fɛ́ɛ díƃûui kwaa kélee. Ka láɣi kâai, ‘Ka kɔ́ Yâwɛɛ mɛni ma! Ka kɔ́ Gidiɔŋ mɛni ma!’ ”

¹⁹Gbínii kɛ́ɛ liî naa sâmai da ŋɔnúu ŋuŋ tɔ̂nɔi dí sèri m̀ûui kɔlɛ ma. Maa tãi tí, Mediɛŋ kɔ-kuluƃa-ŋai kɛ̀ m̀ûui mɛi kâai da díkîe ni maa fáleŋ nɔ́ a nina. Gidiɔŋ ni dí díturuii fɛ̀ɛ, dí bɔ̂rɔ leɣi-ŋai kélee wólo kɛ̀ díyêei.

²⁰Ǹúu-kpulu feerɛi kɛ̀ m̀ûui m̀éla nyíti mai, dí díwɔ̂ turuii fɛ̀ɛ, dí díwolo máŋ. Díkelee dí gbáleŋ sòŋ díkɔɔ yêe ŋá dí dúrii sóŋ dí láa-mii yêe ŋá, dí láɣi dîyɛɛi, “Ka kɔ́ a káƃoa sɔkpɔ-ŋai Yâwɛɛ mɛni ma da Gidiɔŋ!”

²¹Gidiɔŋ ŋɔkɔ-kuluƃa-ŋai kélee dí kɛ̀ nɔ́ tɔɔ̂ni dítɔɔ̂i a tɛ̀ɛ-ŋa dítinaŋɔɔ m̀ûui ma. Mediɛŋ-ŋai díkɔ kuluƃa-ŋai kɛ́ɛ da díkaai, díkelee díkɛ wúlee díkɛ làɣii a zu kɛ́tɛ, díkɛ kɔ̀ a gɛ́ɛ dí pú.

²²Gidiɔŋ ŋɔkɔ-kuluƃa-ŋai kɛ́ɛ da díturuii fɛ́ɛi, Yâwɛɛ è gɛ̀ Mediɛŋ kɔ kɔ́-ƃelai dí pɛ́lɛ kɔ̂i díkîe ni pɔ́ a ƃóa-sɔkpɔ-ŋa. Diai lɛ̂ɛ a dífului, dí pù dí lí Zarɛtaŋ pere dí tɛ́ɛ naa dí lí kpɔ́ Bɛɛ-sita é lɛ́ɛ la zu dí seri Ebɛɛ Meola, Taba lɔii kpiniŋ kɔlɛ.

²³Gidiɔŋ è Eezuɛ nuu suui ŋí su-sinaai kûla a gɛ́ɛ dí Mediɛŋ kɔ kɔ́-ƃelai kpɛ́. Ǹúu suui ŋí ƃa, Nɛfɛtɛli, Asɛ da Manasɛ m̀éla feerɛ dí pá a gɛ́ɛ dí Mediɛŋ-ŋai kpɛ́ a kîrɛ.

²⁴Gidiɔŋ è kéla-ŋa tɛ̀ɛ ǹyéei ma Ifiraŋ lɔii su ǹyɛɛ dîai, “Ka yeŋ ǹyéei kwára a gɛ́ɛ kwáa kɔ́ Mediɛŋ-ŋai pɔ́. Ka tɔɔ Zɔdiŋ Ya-leei ma da ǹyá pɛlɛɛi é lɛ́ɛ la zu ká seri Bɛbara. Káfe ǹɛɛ naa Mediɛŋ-ŋai dí ǹyái tíyeŋ.” Ifiraŋ kɔ kɔ́-ƃelai dí gɛ̀ nɔ́ yɛ̂ɛ berei Gidiɔŋ è mò la dîai.

²⁵Dí Mediɛŋ-ŋai díkâloŋ feerɛi sòŋ. Dia ƃa, Orɛɛ da Zɛɛi. Dí Orɛɛ pàa kɔni kɛ́tɛ tɔnɔ kɔlɛ ma, dí ǹáa sée gɔnii kpîŋ ma. Dí Zɛɛi pàa ŋŋwã̂ai kpɛtɛ kwaai ma, dí ǹáa sée gwaai kpîŋ ma. Maa tãi tí yée mu, Gidiɔŋ è kɛ̀ Zɔdiŋ Ya-leei ma vóloi kulâi-pere. Ifiraŋ kɔ kɔ́-ƃelai dí lɛ̀ɛ Mediɛŋ-ŋai kpɛ̂i é lɛ́ɛ la zu dí seri Gidiɔŋ ma a Orɛɛ da Zɛɛi díŋuŋ.