Read Kpelle Zɔ̂ŋ Zaaƃai 1 Bible Online

Zɔ̂ŋ Zaaƃai 1 - Kpelle bible

Zɔ̂ŋ Zaaƃai 1

¹Ńyãai ŋ́gaa a ǹúu-pɔlɔi, ŋa kɔlɔ pɔ̃yɛɛ̂i ŋáwɛli-kɛ-maa-nuui Geeyɔ pɔ naa nyíi ŋá ŋ̀wɛ̂li ni dɔ̃yâi sui.

²Ŋáwɛli-kɛ-maa-nuui, ŋa Ɣâla fɛlîi a gɛɛ sɛŋ kélee é kɛ́ a ǹɛ́lɛɛ ímɛni ma, a gɛɛ íkɔlɔ̂i é pono. Ŋá gɔ́lɔŋ a gɛɛ ímɔ̂leŋ kɔlɔ̂i ponoɔ̂i.

³Kpɛ́ni fêi, ńii è kɛ̀ a nɛ̃ɛ a ŋánaa tãi kúƃarâai da-ni dí pà la dí sere-faa kɛ́ é pîlaŋ ítɔ̃yâi mai. Ǹyaŋ gáa a tɔ̃yâ a gɛɛ íkaa dɔ̃yâi pôlu.

⁴Lii-nɛ̃ɛ kɛ́tɛ da fé ńyêei é tɛ́ɛ nyíi ma a gɛɛ ŋá mɛni a gɛɛ ńônii díkaa dɔ̃yâi pôlu.

⁵Ŋáwɛli-kɛ-maa-nuui, mɛnii ƃa gɛ̀i, gáa a mɛni lɛ́lɛɛ, berei ƃa kpɔ̂ŋ la kúƃarâai dîai, ŋuŋ ƃa ŋɔ̃yâ-ŋai,

⁶nyíi-ŋai íwɛli-kɛ-maai maa-sere-faa kɛ̀ Kôrai-toli-kpɔŋ ŋ́ɛi-tuɛi. Ya pâi gɛ̂i a ǹɛ́lɛɛ à kɛ̀ ya pâi dítɛɛ̂i dísiai ma a berei Ɣâla líi a pɔ̂ri lâai lai.

⁷Kpɛ́ni fêi, da liî Ɣâla láai sú, ǹyaŋ dífe sɛŋ da soŋ ni Zɛ̃tai-ŋai yêei.

⁸Mɛni ma fɛ̂ɛ kwa kpɔŋ ǹúu-sii-ŋai ŋí dîa a gɛɛ kú kɛ́ a tii-kɛ-ƃela gîe ma dɔ̃yâi su.

⁹Ŋa mɛni da pɔ̃yɛ Kôrai-toli-kpɔŋ pɔ naa, kɛ́lɛ, Diotufii nyíi a ŋ̀wɛ̂li é gbîŋ siɣe a maa-ŋuŋ, vé faâi kúwoo ma.

¹⁰Mɛni ma ŋà pà, mɛnii gáa gɛ̂i ŋa pâi maa-mɛni toôi ǹûai kíli ŋá. Gáa tɔɔ̂i kûa a wóo nyɔ́mɔɔ-ŋa. Nyíti fa ǹíi làa, va fâa ma ǹyaa kpîŋ a gɛɛ é ǹyée sée kúƃarâai mu. Diai da ŋ̀wɛ̂li dí díyee sée dímui, a díkpèra é díkula Kôrai-toli-kpɔŋ su.

¹¹Ŋáwɛli-kɛ-maa-nuui, ífe mɛni nyɔ́mɔɔ pɔ́ɔ kɔ̀ɔŋ, kɛ́lɛ, mɛni lɛ́lɛɛ pɔ́ɔ kɔɔ̂ŋ. Ǹúui a mɛni lɛ́lɛɛ kɛ̀i, gáa a Ɣâla pɔ́ɔ. Ǹúui a mɛni nyɔ́mɔɔ kɛ̀i, vé niî Ɣâla káa ní.

¹²Núu kélee è Demetiɔ maa-sere-faa lɛ́lɛɛ kɛ̀, dɔ̃yâi máŋ é m̀aa-sere-faa lɛ́lɛɛ kɛ́. Kú m̀aa-sere-faa lɛ́lɛɛ kɛ̀ máŋ, ǹyaŋ í gɔ́lɔŋ kúsêre-wooi káa a tɔ̃yâ.

¹³Mɛni támaa káa naa a gɛɛ ŋá bɔ̃̀yɛ ípɔ naa, kɛ́lɛ, fé ŋ̀wɛ̂lii ŋá bɔ̃̀yɛ kɔlɔ ma.

¹⁴Gáa ŋ́gili ŋá a gɛɛ ŋá íkaa a maa félaa, ǹyaŋ kwa pâi lônoi kúkîe pɔ.

¹⁵Lii-see é kɛ́ íyeêi. Kúƃarâai dí fàa yâ. Ŋá fáa kúƃarâai kélee dîa tɛi-tɛi.