Read Kpelle M̀ɛni-lɛɛi 1 Bible Online

M̀ɛni-lɛɛi 1 - Kpelle bible

M̀ɛni-lɛɛi 1

¹Zîsɛ Kôrai ŋɔmɛni-lɛ́ɛi nyíi Ɣâla e dɛ̀ɛ bɔ́ a gɛɛ m̀ɛnii pâi kɛ̂i a maa félaai é lɛ́ ǹyee-mu-ƃelai dîa. Ǹyaŋ è nyíŋi lɛ̀ a ŋɔkélai tɛ́ɛ ǹyée-mu-nuui Zɔ̂ŋ pɔ naa.

²Zɔ̂ŋ è Ɣâla ŋɔwóoi maa-sere-faa kɛ̀ è Zîsɛ Kôrai ŋɔsêre-faai maa-sere-faa kɛ́, da mɛni-ŋai kélee è gàai.

³Lûwa káa ǹúui ma a mɛni-lɛɛi ŋí lònoi. Lûwa kɛ́ ƃo diai dia da mɛnii, da diai da mɛnii mɛi kâa nyíi bɔ̃yɛɛ̂i zui, kpɛ́ni fêi tãi a lɛɣɛ.

⁴Zɔ̂ŋ ŋɔworɛ̂-wooi è dɛ̀ɛ Kôrai-toli-kpɔŋ lɔ́ɔlu mɛi féerɛi pɔ́ naa Eesiai. Ƃɛlɛ-sêe é kɛ́ kâa da lii-sêe é kúla ǹúui yêei gáa naai, nyíi kɛ̀ naai, nyíi pâi kɛ̂i naai. Ƃɛlɛ-sêe é kɛ́ kâa da lii-sêe é kúla m̀ɔlêŋ lɔ́ɔlu mɛi féerɛi yêei nyíi-ŋai díkaa ŋɔkâloŋ-see-sɛŋ ŋ́ɛi-tuɛi.

⁵Ƃɛlɛ-sêe é kɛ́ kâa da lii-sêe é kúla zere-faa kɛ-nuu sã́ai Zîsɛ Kôrai yêei, nyíi kɛ̀ a ǹúui maa-ŋuŋ kùla saa yêei, gɛ̀ ƃò ŋɔ́nɔ a ǹɔii su-kaloŋ-ŋai mɛi-nuui. Ǹúui kúwɛli ni nyíi kúŋuŋ ma ƃò kúsɔnyɔ̂ŋ yêei a ŋɔŋãai,

⁶nyíi kâloŋ-laa kɛ̀ kúmɛni mai, é kúkɛ a Ŋɔɣâlai da Ǹâŋ ŋɔsâla láa soŋ-ƃelai, folo-laa da núu-mɛi-laa é kɛ́ ǹyêei wɔlɔ-wɔlɔ da wɔlɔ-wɔlɔ. É kɛ́ tí.

⁷Gáa, gáa pâi ɣele-kɔlɔŋ kole-ŋa su, ǹyaŋ ŋɛ́i kélee a pâi gâai diai zɔ̀ɔ a kpálai, ǹyaŋ sîi kélee gáa ǹɔii sui, a pâi wɔ̂lɔi m̀aa mɛ̂ni ma. Bere ƃe a pâi kɛ̂i la. É kɛ́ tí.

⁸Kúnuu-namui Ɣâla nyíi gáa naa, nyíi kɛ́ naa, da nyíi pâi pâi, nyíi wala-wala káa ǹyêei a mò, nyɛɛ, “Ńyãa ƃa Afa da Omiga.”

⁹Ńyãa Zɔ̂ŋ, ńyãai ŋ́gaa a káƃarâŋ, ńyãai kwa kâa-ni kwa mɛni-kpɔlu kàa Zîsɛ kponôi, kwa kâa-ni kú Ŋ̀âla-taa kâloŋ laai sɔlɔ ƃo gîe-ma da nii-kpelei gáa kúyêei, dí ńdɛ̀ɛ tîŋ tɔnɔ su da dòli a Pamɔɔi, kpɛ́ni fêi, ŋá Ɣâla wóo ƃò ŋá Zîsɛ maa-sere-faa kɛ́.

¹⁰Ŋá kɛ̀ Mɔ̂leŋ su a Kúnuu-namui ŋɔɣelei, ǹyaŋ ŋá wóo su kɛ́tɛ mɛ̀ni ḿbôlu-pere yɛ̂ɛ túru-woo,

¹¹gɛ̀ mò, nyɛɛi, “Mɛnii ya gaâi, bɔ̃̀yɛ kɔlɔ ma í dɛ̀ɛ Kôrai-toli-kpɔŋ lɔ́ɔlu mɛi féerɛi dîɛ. Dɛ̀ɛ Ɛfesɛ, Simɛna, Pɛgamɔŋ, Tayatira, Saadi, Feledɛfia, da Leodisiɛ.”

¹²Nya ƃe ŋá tìnaŋ a gɛɛ ŋa ŋ̀óoi naa-pere kaa nyíi kɛ̀ lônoi ḿbɔi, ńdinaŋɔɔ̂i, ŋá laŋpo-see-sɛŋ lɔ́ɔlu mɛi feerɛ kàa, nyíi-ŋai kɛ̀ a gbɛ́tɛɛ a gôoi.

¹³Laŋpo-see-sɛŋ-ŋai sama núu tɔnɔ è kɛ̀ naa gɛ́ɛ yɛ̂ɛ núu-kpune Ǹóŋ. È kɛ̀ a maa ɣiriɛ a yokpo kôya, gôo-bɛti ɣiriɛ geŋe lá.

¹⁴Ŋuŋ da ŋuŋ leɣa dí kɛ̀ kolêi kpɔ́ yɛ̂ɛ ƃála-leɣa. Díkɛ kole kpɔ́ yɛ̂ɛ kɔ́lɛ. Ŋ̀ɛi è kɛ̀ yɛ̂ɛ ŋɔŋ-soŋ,

¹⁵gɔ́ɔ kɛ̀ fólôi mu yɛ̂ɛ ƃara séɣeŋɔɔ fulɛ-kêre mu. Ŋ̀óo kɛ́ɛ yɛ̂ɛ yá támaa ɣilîŋ wôo.

¹⁶Pɛmɛlɛŋ-kao lɔ́ɔlu mɛi feerɛ è kɛ̀ ǹáa-mii-yee ŋá. Ƃóa-sɔkpɔ ŋá kɛ́ɛ gwaa feerɛ ma kɛ́ ƃo ǹá. Ŋ̀ɛi kɛ́ fòlo yɛ̂ɛ vóloi à kɛ̀ toôi kpɔ́ a gbanaŋɔɔ.

¹⁷Tãi ŋá gàa lai, ŋá tòo gɔ́ɔ mu yɛ̂ɛ núu à sàa. Kɛ́lɛ, è ǹáa-mii-yee pɛ̀lɛ mâ, nyɛɛi, “Ífe yao, ŋ́gaa a maa-ŋuŋ da gbɛɛ ŋái,

¹⁸da gɛ-ɣele-ma-nuui. Ŋá sàa, ǹyaŋ gáa, ŋ́gaa a ḿvulu wɔlɔ-wɔlɔ da wɔlɔ-wɔlɔ. Saa da Saa-taa díkîi káa ńyêei.

¹⁹Mɛni ma mɛni-ŋai pɔ̃yɛ ya díkâai, nyíŋi-ŋai díkaa kɛ̂i da nyíi-ŋai pâi kɛ̂i nàa pôlu mai.

²⁰À kɛ̀ a noo-mɛnii gáa bɛmɛlɛŋ-kao lɔ́ɔlu mɛi féerɛi su nyíi-ŋai í díkàa náa-mii-yee ŋá da gôo-laŋpo see-sɛŋ lɔ́ɔlu mɛi féerɛi, bɛmɛlɛŋ-kao lɔ́ɔlu mɛi féerɛi ƃa Kôrai-toli-kpɔŋ lɔ́ɔlu mɛi féerɛi díkela-ŋai, ǹyaŋ laŋpo-see-sɛŋ lɔ́ɔlu mɛi féerɛi ƃa Kôrai-toli-kpɔŋ lɔ́ɔlu mɛi féerɛi.