Read Kpelle M̀ɛni-lɛɛi 12 Bible Online

M̀ɛni-lɛɛi 12 - Kpelle bible

M̀ɛni-lɛɛi 12

¹Ŋɛi-kɛ-maa kɛ́tɛ è kɛ̀ Ɣâla-taa. Nɛnî tɔnɔ è kɛ̀ naa maa ɣiriɛ a voloi, ŋ̀áloŋ kɛ́ ƃo gɔ́ɔ mu, pɛmɛlɛŋ-kao puu kao feerɛ seɛɛ ŋ̀ûa a ƃɔrɔ.

²Gôo è kɛ̀ mà. È wɔ̀lɔ kpɔ́ a zu kɛ́tɛ ŋɔmɛni-soli-kaai su tãi koi-tee è pɛ̀lɛ la mài.

³Ŋ́ɛi-kɛ-maa da kpɛ́ni è kɛ̀ Ɣâla-taa. Yao-maa-sua kpɔ̂lu kɛ́tɛ tɔnɔ è kɛ̀ naa, ŋuŋ kɛ́ ƃo ŋ̀ûa lɔ́ɔlu mɛi feerɛ, míla kɛ́ ƃo ŋ̀ûa puu, kâloŋ-ƃɔrɔ lɔ́ɔlu mɛi feerɛ seɛɛ ŋuŋ-ŋai dîa.

⁴Ŋwoŋ è bɛmɛlɛŋ-kao-ŋai díkpulu-loŋ kɔ̀ɔ Ɣâla-taa é dípu ǹɔii ma. Nya ƃe ǹyao-maa-suai è tɔ̀ɔ nɛnîi ŋɛi nyíi kɛ̀ pâi ŋɔlôloŋ maa sɔlɔ ƃôi, a gɛɛ à ŋɔlôloŋ maa sɔlɔ ƃô, é mìi.

⁵Nya ƃe ǹɛnii è lóŋ-surɔŋ maa sɔlɔ ƃô, nyíi kɛ̀ pâi kɛ̂i diai dífe Ɣâla mɛni wɛ̂linii mɛi a kɔli-tuaŋ, kɛ́lɛ, dí ziɣe a maa félaa dí tɛ́ la Ɣâla pɔ da ǹôloŋ kpîŋ-kaloŋ-see-sɛŋ.

⁶Nya ƃe nɛnîi è pù é lí vɛ̃ɛ-kpalaŋ su ƃɛi Ɣâla è nàa kpɛ̀tɛi mɛni ma a gɛɛ é ǹáa mii naa ɣele-kuu wála tɔnɔ pôlu ŋuŋ feerɛ pôlu buu lɔ́ɔlu mɛi da (1,260) yée mu.

⁷Ǹyaŋ kɔ́ è nàa tèe Ɣâla-taa, Makɔɔ da ŋɔkéla-ŋai díkɛ kɔ́ nyao-maa-suai pɔ. Ǹyao-maa-suai da ŋɔkéla-ŋai dia máŋ dí kɔ̀.

⁸Kɛ́lɛ, dí ǹyao-maa-suai yée mɛi ɣâle. Kwaa maa fé ŋɔ́nɔ kɛ́ ni díyêei Ɣâla-taa.

⁹Dí ǹyao-maa-sua kɛ́tɛi tòo ǹɔii ma, nyíi gáa a gali pɔlɔi nyíi da dòli a Dɛ̂ƃele da Sêtɔŋ. Gáa a ǹɔii kélee pɛlɛ-nuu. Dí dòo ǹɔii mâ da ŋɔkéla-ŋai kélee.

¹⁰Nya ƃe ŋá wóo su kɛ́tɛ mɛ̀ni Ɣâla-taa, nyɛɛi, “Kúɣâlai ŋɔƃálo-laai, ŋɔwala-wala-laai, ŋɔkâloŋ-laai, da Kôrai ŋɔwala-wala-laai da nâa pá. Kpɛ́ni fêi, ǹúui a mɛni pɛ̂lɛ kú-ƃarâa diai, da dòo ǹɔii mâ, nyíi a mɛni pɛ̂lɛ dîa a fólo da kpíni Kúɣâlai ŋ́ɛi-tuɛi.

¹¹Dí ǹyée mɛi ɣâle M̀ála-loŋ ŋɔŋãai sârai da dísêre-faa-wooi. Kpɛ́ni fêi, dífe kɛ́ ní a díkpaaŋɔɔ dílɛ̂wo mɛni ma. Eêi kɛ́ máŋ saa eêi pɔ̂ri pâi dípɔ.

¹²Mɛni ma lii-nɛ̃ɛ kùla, Óo Ɣâla-taa ka diai díkaa dísui! Kɛ́lɛ, kpalo ƃélaâi kâa, Óo lɔii da yúo, kpɛ́ni fêi, Dɛ̂ƃele a yeŋ kápɔ naa lii-ŋwana kɛ́tɛ su. Kpɛ́ni fêi, è gɔlɔŋ a gɛɛ ŋɔtãi sú kpuâi!”

¹³Ǹyaŋ tãi ǹyao-maa-suai è gàa la a gɛɛ da dòo ǹɔii mai, è ǹɛnîi kpɛ̀ nyíi ǹóŋ-surɔŋ sɔlɔ ƃôi.

¹⁴Kɛ́lɛ, dí guɛ kɛ́tɛi koôŋ veerɛ tɛ̀ɛ ǹɛnîi pɔ́ a gɛɛ é koôŋ é kúla galii yêei é lí vɛ̃ɛ-kpâlaŋ su ƃɛ́i dí kɛ̀ pâi ŋ̀á kɔnîi naa a kóraŋ saaƃa da gbûrai.

¹⁵Nya ƃe galii è yà-lee kɛ́tɛ kùla ǹá gɛ bili ǹɛnîi ma a gɛɛ ǹya-leei é ziɣe.

¹⁶Kɛ́lɛ, ǹɔii è pà a gɛɛ é kpɔ́ŋ ǹɛnîi ma. Nya ƃe ǹɔii lá è ƃò é ǹya-leei kpele nyíi ǹyao-maa-suai è kùla ǹái.

¹⁷Nya ƃe ǹyao-maa-suai líi è ŋwàna ǹɛnîi ma, é lí a gɛɛ é kɔ́ pɛ́lɛ ǹônii kpéli-ŋai dîa nyíi-ŋai Ɣâla ŋɔtɔ̂ŋ-ŋai mɛi kâa dí Zîsɛ maa-sêre-faa kɛi.

¹⁸Ǹyaŋ è tɔ̀ɔ yúo ŋ̀ãya ma.