Read Kpelle M̀ɛni-lɛɛi 13 Bible Online

M̀ɛni-lɛɛi 13 - Kpelle bible

M̀ɛni-lɛɛi 13

¹Nya ƃe ŋá sua kâa gɛ kula ǹyúoi su míla kɛ́ ƃo puu, ŋuŋ kɛ́ ƃo lɔ́ɔlu mɛi feerɛ. Kâloŋ-ƃɔrɔ puu è kɛ̀ míla-ŋai dîa, tɛ̀-ŋɛi-laa ŋa pɔ̃yɛɛ ŋuŋ-ŋai dîa.

²Zuai ŋá gàai, è kɛ̀ yɛ̂ɛ kɔ́li, gɔ́ɔ kɛ́ ƃo yɛ̂ɛ dítela, ǹá kɛ́ ƃo yɛ̂ɛ yala-sulu. Ǹyao-maa-suai è ŋɔsu-kpanaŋ tɛ̀ɛ bɔ, da ŋɔkâloŋ-see-sɛŋ, é pɛ́lɛ ŋɔwala-wala-laa kɛ́tɛi ma.

³È kɛ̀ yɛ̂ɛ ǹyaa ƃe saa pala è kɛ̀ ŋ̀uŋ dɔnɔ ma, kɛ́lɛ, zaa-palai è ƃàlo. Ǹya ƃe díkelee dílɛ̀ɛ zuai ŋí pôlu kili-ŋa-tɛi su.

⁴Núu-kpune è ǹyao-maa-suai fɛ̀li, kpɛ́ni fêi, è ŋɔwala-wala-laai tɛ̀ɛ zuai pɔ. Dí zuai fɛ̀li, díyɛɛi, “Gbɛ̂ɛ ƃe gáa yɛ̂ɛ zuai? Gbɛ̂ɛ ƃa pɔ̂ri kɔ̂i bɔ́?”

⁵Nya ƃe díwala-wala-laa tɛ̀ɛ zuai pɔ a gɛɛ é lii-kɛtɛ-woo da tɛ-ŋɛi-woo-ŋa ƃo, ǹyaŋ dí nɛ̀ɛ naa a gɛɛ é tíi kɛ́ a ŋɔwala-wala-laai ɣáloŋ buu náaŋ kao feerɛ yée mu.

⁶È ǹá ƃò a gɛɛ é tɛ̀-ŋɛi-woo-ŋa ƃo Ɣâla ma. È tɛ̀-ŋɛi-woo-ŋa ƃò a ǹáa da bɔ-taai. Zu-kulai ƃa, diai díkaa Ɣâla-taai.

⁷Dí nɛ̀ɛ maa máŋ é kɔ́ pɛ́lɛ Ŋ̀âla-ƃelai dîa é díyee mɛi ɣale. Dí wala-wala tɛ̀ɛ bɔ nuu-suu kélee mɛi, da sii kélee, sii-woo kélee, da lɔii-ŋuŋ kélee.

⁸Diai kélee díkaa ǹɔii sui, da pâi vɛlîi. Diai kélee dílaa fé niî pɔ̃yɛ ni M̀ála-loŋ ŋɔfúlu-laa kɔlɔi su, nyíi dí bàa ǹɔii kɔ́ɔ-pìlaŋ-tãi é lɛ́ɛ serii.

⁹À kɛ̀ wóli káa núu ma a gɛɛ é mɛni mɛ́ni, tɔɔ é mɛ̀ni.

¹⁰À kɛ̀ núu a ŋ̀wɛ̂lii é kɛ́ a luɛ, a pâi kɛ̂i a luɛ. A kɛ̀ núu à núu pàa a ƃóa-sɔkpɔ, ƃóa-sɔkpɔ nɔ́ ƃe pâi baâi. Dólii ká ŋí Ŋ̀âla-ƃelai dílii-kpelei da dílaa-lai mɛni ma.

¹¹Nya ƃe ŋá sua da kpɛni kàa é kúla ǹɔii mu. Míla è kɛ̀ ŋûa feerɛ yɛ̂ɛ ƃála-loŋ, gɛ lono yɛ̂ɛ yao-maa-sua.

¹²Gáa tíi kɛ̂i a zuai maa-ŋuŋ ŋɔwala-wala-laai kélee ŋ́ɛi-tuɛ. A ǹɔii kɛ̂ da su-ƃelai kélee dí zuai-maa-ŋuŋ fɛ̀li nyíi ŋɔsaa-palai è ƃàloi.

¹³A ŋɛi-kɛ-maa kɛ́tɛ kɛ̀. Gɛ́ ŋɔŋ kɛ̂ máŋ a gɛɛ é kúla Ɣâla-taa é pá ǹɔii ma núu-kpune ŋɛi-tuɛ.

¹⁴A diai pɛ̂lɛ díkaa ǹɔii sui a ŋɛi-kɛ-maa-ŋai nyíi-ŋai dí nɛ̀ɛ naa a gɛɛ é tíi kɛ́ a dia zuai ŋ́ɛi-tuɛi, a dímarê kɛ̀ a gɛɛ dí pɔɔkɔ̂ŋ saa zuai mɛni ma nyíi dí ŋwàna a m̀óa-sɔ̂kpɔi, kɛ́lɛ, gáa niî ɣele mai.

¹⁵Dí nɛ̀ɛ naa a gɛɛ é lɛ̂wo pú zua-pɔɔkɔ̂ŋ ŋí su a gɛɛ é lono máŋ. Dí nɛ̀ɛ naa a gɛɛ diai dífe pâi zua-pɔɔkɔ̂ŋ fɛlîi é díkɛ dí dípaa.

¹⁶A núu kélee kɛ̀ máŋ, lôloŋ kpaa máŋ núu kɛ́tɛ, kpaa máŋ tɔɔ-nuu, kpaa máŋ kôlo-nuu, kpaa máŋ ŋuŋ-mâ ƃô ƃela, kpaa máŋ luɛ, a gɛɛ pɔ́ɔ é kɛ́ dílaa-mii-yee ma, kpaa máŋ dítôŋ lá,

¹⁷a gɛɛ núu da kélee fé sɛŋ da yâ, kpaa máŋ vé sɛŋ da kɔ̂lɛ, fɛ̂ɛ bɔ́ɔi tí é kɛ́ mà, zu-kulai ƃa zuai láa, kpaa máŋ láai ŋɔnɔŋpâi.

¹⁸Táre ƃa nyíŋi ŋa kàa. Ǹúui a ŋ̀á kàai, tɔɔ é ŋɔ̂ŋpai ŋá káa nyíi gáa zuai mai, kpɛ́ni fêi, gáa a núu-kpune ŋɔnɔ̂ŋpa. Ŋɔnɔŋpâi káa a ŋuŋ lɔ́ɔlu mɛi da pôlu buu lɔ́ɔlu mɛi da kao lɔ́ɔlu mɛi da (666).