Read Kpelle M̀ɛni-lɛɛi 14 Bible Online

M̀ɛni-lɛɛi 14 - Kpelle bible

M̀ɛni-lɛɛi 14

¹Ŋá Zãiyɔŋ Yeei ma kàa, M̀ála-loŋ è kɛ̀ tɔɔ ni naa, da núu wála ŋuŋ tɔnɔ pôlu buu náaŋ kao náaŋ (144,000), nyíi-ŋai M̀ála-loŋ da Ǹâŋ dílaa è kɛ̀ a bɔ̃yɛɛ dítôŋ lai.

²Nya ƃe ŋá wóo mɛ̀ni é kúla Ɣâla-taa gɛ ƃo yɛ̂ɛ yá támaa ɣilîŋ tìŋ, gɛ ƃo yɛ̂ɛ ŋele-gbana tíŋ kɛ́tɛ. Ŋ̀óoi ŋá mɛ̀nii, è kɛ̀ yɛ̂ɛ kɔnîŋ-ɣale-ƃela ƃe díkɔnîŋ-ŋai ɣálêi.

³Dí kɛ̀ wule nina toôi gâloŋ-see-sɛŋ ŋ́ɛi-tuɛ da vúlu-sãa náaŋ, é pɛ́lɛ ǹúu-pɔlɔ-ŋai dîa. Núu da fa pɔ̂ri ŋulei tí maa kɔ̂rii fɛ̂ɛ nɔ́ núu wála ŋuŋ tɔnɔ pôlu buu náaŋ kao náaŋ (144,000), nyíi-ŋai dí dímaa têe dí díkula ǹɔii sui.

⁴Ǹûai ŋí ƃe dífe niî díkpîŋ kàra ni a lɔ̀-pɔrɔŋ kɛɛ, kpɛ́ni fêi, dí maa waai. Dia ƃe da lɛ̀ɛ M̀ála-loŋ pôlu dí li ƃɛi kélee a lî naai. Dí dímaa têe núu-kpune yêei yɛ̂ɛ sí-sɛŋ ƃá maa-ŋuŋ Ɣâla mɛni ma da M̀ála-loŋ.

⁵Dífe niî lɛ́ɛ kélee da kɛ́ ní. Dífe niî mɛni nyɔ́mɔɔ da kɛ́ ní.

⁶Ǹaa pôlu mâ, ŋá Ɣâla-taa-kela da kpɛni kàa gɛ koôŋ Ɣâla-taa samai, gɛ ŋwɔlɔ-wɔlɔ-tuŋ lɛ́lɛɛi ƃo diai dîa díkaa ǹɔii mai, gɛ̀ mò lɔii-ŋuŋ kélee ma, nuu-suu kélee, sii-woo kélee, da sii kélee dîa.

⁷È mò a ŋ̀óo su kɛ́tɛ, nyɛɛi, “Ka yao Ɣâla ma ka fólo-laa tɛɛ bɔ̀, kpɛ́ni fêi, ŋɔmɛni-ŋa-tée-tãi a pá. Ka ǹúui fɛ́li nyíi Ɣâla-taa kpɛ̂tɛ da ǹɔii, da ǹyúoi, é pɛ́lɛ ǹyá-pɛlɛ-ŋai diai.”

⁸Ɣâla-taa-kela da kpɛni, nyíi kɛ̀ a veerɛ-ɣelei, è lɛ̀ɛ pôlu, nyɛɛi, “Babelɔŋ kɛ́tɛi a wólo! Babelɔŋ kɛ́tɛi a wólo, nyíi ǹɔii-ŋuŋ kélee kɛ̀ díkɛ a ŋɔkɛ-pere-nyɔŋ maa-sɛŋ-wɛliɛi maa-ŋwã̂aii da kpele-ƃelai.”

⁹Ɣâla-taa-kela da kpɛni, nyíi kɛ̀ a zaaƃa-ɣelei, è lɛ̀ɛ pôlu é ḿo a ŋ̀óo su kɛ́tɛ, nyɛɛi, “À kɛ̀ núu à zuai fɛ́li da zuai ŋɔpɔɔkɔ̂ŋ, dí pɔ́ɔ kɛ́ dôŋ lá, kpaa máŋ ǹyée mai,

¹⁰maa-nuui a pâi Ɣâla ŋɔlii-ŋwânai-ŋwã̂aii da kpelêi, ŋwã̂ai kpanaŋ nyii zu fé pu ni a yái, nyíi bûɔi Ɣâla ŋɔlii-ŋwana-kɔpui sui. Maa-nuui a pâi ŋɛi-maa-penêi sɔlɔ ƃói a ŋɔŋ da sɔɔfɔ Ŋ̀âla-taa-kela maa waai ŋ́ɛi-tuɛ da M̀ála-loŋ.

¹¹Díŋɛi-maa-penêi maa-lurii a tɛ̂ ɣelêi wɔlɔ-wɔlɔ da wɔlɔ-wɔlɔ. Fii-tɔɔ fé pâi kɛ̂i dîa a fólo da kpini. Maa-ƃelai ƃa diai da zuai da zua-pɔɔkɔ̂ŋ fɛ̂li, da nyíi-ŋai zuai láai maa-pɔɔ káa diai.”

¹²Ŋ̀âla-ƃelai dílii-kpelei maa-toli ká ŋí, nyíi-ŋai Ɣâla ŋɔtɔ̂ŋ-ŋai mɛi káa da Zîsɛ ŋɔlaa-lai.

¹³Nya ƃe ŋá wóo mɛni é kúla Ɣâla-taa, nyɛɛi, “Nyíŋi pɔ̃yɛ. Lûwa káa zaa-ƃelai dîa nyíi-ŋai da saa Kúnuu-namui kponôi é síɣe sâa ma é lí tuɛ-perei.” M̀ɔlêŋ a mò, nyɛɛ, “Lûwa káa dîa a tɔ̃yâ a gɛɛ dí dífii tɔɔ dímɔ̃lɛi yêei, kpɛ́ni fêi dí dítûa-perei lɛ̀ɛ dípôlu!”

¹⁴Gɛ́ɛ tíi, ŋá naa kàa, ŋá ɣele-kɔlɔŋ kole káa gɛ̀ ƃò see ni ŋele-kɔlɔŋ kolei mɛi yɛ̂ɛ núu-kpune, gôo-kaloŋ-ƃɔrɔ kɛ́ ƃo ŋ̀ûa, gbeɣa-ŋa-liɛɛ kɛ́ ƃo ńyêei.

¹⁵Nya ƃe Ɣâla-taa-kela da kpɛni è Ŋ̀âla-pɛrɛ Kɛ́tɛi mù gɛ ǹúui toli a ŋ̀óo su kɛ́tɛ nyíi kɛ̀ see ni ŋele-kɔlɔŋ kolei mɛi, nyɛɛi, “Ígbêɣai síɣe í sí-sɛŋ tée, kpɛ́ni fêi, zí-sɛŋ-tee-tãi a pá. Ǹɔii ŋɔsí-sɛŋ a nâa pɔlɔ a ǹɛ́lɛɛ.”

¹⁶Mɛni ma ǹúui kɛ̀ see ni ŋele-kɔlɔŋ kolei mɛi è ŋɔgbêɣai tɛɛ-tɛɛ ǹɔii ma é zí-sɛŋ tée.

¹⁷Ɣâla-taa-kela da kpɛni è kùla Ŋ̀âla-pɛrɛ Kɛ́tɛi mu Ɣâla-taa, ǹyaa máŋ gbeɣa-ŋa-liɛɛ kɛ́ ƃo ǹyêei.

¹⁸È kɛ̀ tí Ɣâla-taa-kela da kpɛ́ni è kùla Ŋ̀âla-teƃelei ma, nyíi wala-wala-laa è kɛ̀ ǹyêei ŋɔŋ mɛi, gɛ Ŋ̀âla-taa-kelai toli a ŋ̀óo su kɛ́tɛ, nyíi gbêɣa-ŋa-liɛɛi è kɛ̀ ǹyêei, nyɛɛi, “Ígbêɣai síɣe í gbɔmɔ-ƃa-ŋai tée ǹɔii su-kpɔmɔ-ŋai dîa, kpɛ́ni fêi, gbɔmɔ-ƃa-ŋai da kpɔlu.”

¹⁹Nya ƃe Ŋ̀âla-taa-kelai è ŋɔgbêɣai tɛɛ-tɛɛ ǹɔii mɛi é ǹɔii ŋɔkpɔmɔ-ƃa-ŋai tée é dípili Ɣâla ŋɔlii-ŋwâna kpɔmɔ-ƃa táŋ-loai su.

²⁰Dí gbɔmɔ-ƃai táŋ gbɔmɔ-ƃa táŋ-loai su daa-leei kɔlɛ. Ŋãa è kùla gbɔmɔ-ƃa táŋ-loai su ŋɔsiŋɔɔ kɛ́ ƃo yɛ̂ɛ é síɣe soo kɔ́ɔ-kwana é tɛ́ ǹá-kɔli ma é ɣilîŋ yɛ̂ɛ máâi ŋuŋ feerɛ (200).