Read Kpelle M̀ɛni-lɛɛi 15 Bible Online

M̀ɛni-lɛɛi 15 - Kpelle bible

M̀ɛni-lɛɛi 15

¹Ǹaa pôlu mà, ŋá ŋɛi-kɛ-maa da kpɛ́ni kàa Ɣâla-taa, nyíi kɛ̀ a gɛ́tɛ maa pɔlɔ-pɔlɔi. Dí kɛ̀ a Ɣâla-taa-kela lɔ́ɔlu mɛi feerɛ mɛni-kpɔ̂lu-sii lɔ́ɔlu mɛi feerɛ kɛ́ ƃò díyêei, nyíi-ŋai kɛ̀ a m̀ɛni-kpɔ̂lu-ŋai gbɛɛ-ŋɛ́i. Kpɛ́ni-fêi dia ƃe kɛ̀ Ɣâla ŋɔlii-ŋwânai è kpɛ̀ɛ a dia.

²Ŋá sɛŋ da kàa gɛɛ yɛ̂ɛ mɛ̃lɛ-mɛ̃lɛ-yúo, beneɛ a ŋɔŋ da diai zuai yée mɛi ɣálêi da zua-pɔɔkɔ̂ŋ, é pɛ́lɛ ǹáa ŋɔnɔŋpâi ma díkɛ ƃò tɔɔ ni mɛ̃lɛ-mɛ̃lɛ-yúo kɔlɛ Ɣâla ŋɔkɔnîŋ kɛ́ ƃo díyêei.

³Dí kɛ̀ Mose ŋɔwulei toôi, nyíi kɛ̀ a Ɣâla yée-mu-nuui, díkɛ M̀ála-loŋ ŋɔwulei tôo, díyɛɛi, “Ítûa-perei kɛ́tɛ̂i maa pɔlɔ-pɔlɔɔ, Óo Kúnuu-namui Ŋ̀wála-wâla kelee-Ɣalai! Ítûa-perei sã́âi, gɛ ƃo a tɔ̃yâ, Óo ǹɔii-ŋuŋ kélee mɛi-Kaloŋ!

⁴Gbɛ̂ɛ ƃé vé pâi yaôi yâ é ílaâi ŋɔfólo-laai maa tɛ́, Óo Kúnuu-namui? Kpɛ́ni fêi, ƃia tɔnɔ nɔ́ ƃe ímaa waâi. Lɔii-ŋuŋ kélee a pâi pâi é ífɛli, kpɛ́ni fêi, ímɛni-ŋa-teɛɛ sã́ai a lɛ́.”

⁵Nyíŋi pôlu ma ŋá Ŋ̀âla-pɛrɛ Kɛ́tɛi kàa Ɣâla-taa ǹaa ƃoɔɔ é pɛ́lɛ Zua-kɔlɔ-seɣe pɛrɛ maa-waai kɛ̂ ƃò mù.

⁶Ɣâla-taa-kela lɔ́ɔlu mɛi féerɛi dí kùla gwaa maa waai mâ mɛni-kpɔ̂lu lɔ́ɔlu mɛi féerɛi kɛ́ ƃo díyêei. Dímaa ɣiriɛ a seɣe kole pe-peɛɛ, díkeŋe lá pɛlɛɛ a gôo-bɛti.

⁷Nya ƃe vúlu-sãa náaŋ dɔnɔ è gôo-sɛŋ-folo lɔ́ɔlu mɛi feerɛ tɛ̀ɛ Ŋ̀âla-taa-kela lɔ́ɔlu mɛi feerɛi pɔ́, ǹá fɛ́ɛ a Ɣâla ŋɔlii-ŋwânai, nyíi gáa ɣele ma wɔ́lɔ-wɔlɔ da wɔlɔ-wɔlɔi.

⁸Ŋ̀âla-pɛrɛi è kɛ̀ kpɔ́ a ǹaa fɛ́ɛ a luru nyii kɛ̀ kulâi Ɣâla ŋɔfólo-laai da ŋɔwála-wâla-laai sui. Núu da fé kɛ́ ní pɔ̂rii lɔ̂i Ŋ̀âla-pɛrɛ Kɛ́tɛi mu é lɛ́ɛ la zu Ŋ̀âla-taa-kela lɔ́ɔlu mɛi féerɛi dímɛni-kpɔ̂lu-sii lɔ́ɔlu mɛi féerɛi é kpɛ́ɛ.