Read Kpelle M̀ɛni-lɛɛi 16 Bible Online

M̀ɛni-lɛɛi 16 - Kpelle bible

M̀ɛni-lɛɛi 16

¹Ǹaa pôlu mà, ŋá wóo su kɛ́tɛ mɛ̀ni é kúla gwaa maa waai ma Ŋ̀âla-pɛrɛ Kɛ́tɛi mu gɛ m̀o Ŋ̀âla-taa-kela lɔ́ɔlu mɛi féerɛi ma, nyɛɛi, “Zɛŋ gáa Ɣâla ŋɔlii-ŋwâna sɛŋ-folo lɔ́ɔlu mɛi féerɛi sui, ka lí ka bu ǹɔii ma.”

²Nya ƃe Ŋ̀âla-taa-kelai maa-ŋuŋ è lì é ŋɔsɛŋ-foloi su-sɛŋ pu ǹɔii ma. Pala nyɔ́mɔɔ-ŋa dí ǹûai soŋ nyíi-ŋai zuai pɔ́ɔ è kɛ̀ diai da diai zua-pɔɔkɔ̂ŋ fɛlii.

³Ŋ̀âla-taa-kelai veerɛ-ɣelei è ŋɔsɛŋ-foloi su-sɛŋ pu ǹyúoi sú, ǹyái é kɛ́ yɛ̂ɛ saa-nuu ŋãa, ǹyaŋ vulu-sãai kélee kɛ̀ ǹyúoi sui, dí sàa.

⁴Ŋ̀âla-taa-kelai zaaƃa-ɣelei è ŋɔsɛŋ-foloi su-sɛŋ pû ǹya-lee-ŋai sú da ǹyá-ɣɛli-ŋai, dí pene a ŋãa.

⁵Ŋá maa-Ɣâla-taa-kelai wóo mɛ̀ni, nyɛɛi, “Ísãâi ímɛni-ŋa-teɛɛ-ŋai ŋí su, Óo Núu Maa Waai, ƃiai íkaa naa da ƃiai í kɛ̀ naai.

⁶Kpɛ́ni fêi, núu-kpune a ŋ̀âla-ƃelai ŋãa pú da Ɣâla ŋɔlóno-kɛ-ƃelai. Ya ŋãa tɛ́ɛ dípɔ a gɛɛ dí gbèle. Dífela-féi ká ti!”

⁷Nya ƃe ŋa Ŋ̀âla-teƃelei wóo mɛni a zu kɛ́tɛ, nyɛɛi, “Tɔ̃yâ ma, Kúnuu-namui, Ŋ̀wála-wâla kelee-Ɣalai, ímɛni-ŋa-teɛɛ-ŋai díkaa a tɔ̃yâ, dísãa!”

⁸Ŋ̀âla-taa-kelai nàaŋ-ɣelei è ŋɔsɛŋ-foloi su-sɛŋ pû voloi ma, ǹyaŋ dí nɛ̀ɛ naa a gɛɛ è núu-kpune kéreŋ a ŋɔŋ.

⁹Ŋɔŋ ŋɔzi-zii è núu-kpune kèreŋ, ǹyaŋ dí Ɣâla láai naɣâŋ làa, nyíi wala-wala è kɛ̀ ǹyêei m̀ɛni-kpɔ̂lu sii-ŋai ŋí mɛi. Dífe dílii pene ni. Dífe ǹaa-maa tɛ́ ní.

¹⁰Ŋ̀âla-taa-kelai nɔɔlu-ɣelei è ŋɔsɛŋ-foloi su-sɛŋ pû zuai ŋɔkâloŋ-see-sɛŋ ma, ǹyaŋ ŋɔkâloŋ-laai sú è kpìni. Núu-kpune è ǹɛ́ŋ nyíŋ sɛŋ-soli-maa su.

¹¹Dí Ŋ̀âla-taa-Ɣalai naɣâŋ làa dímɛni-solii mɛ̂ni mà da dípala-ŋai. Dífe dílii pene ni dítûa-pere-nyɔŋ ŋai mɛni ma.

¹²Ŋ̀âla-taa-kelai mɛi da-ɣelei è ŋɔsɛŋ-foloi su-sɛŋ pû ǹya-lee kɛ́tɛi ŋá nyíi da kɛ̂ ma Yufeletii sú. Ǹyái é kpála a gɛɛ gâloŋ-ŋai nyíi-ŋai kùla voloi-kulâi perei, perêi é kpɛtɛ.

¹³Ŋá nyînaŋ nyɔ́mɔɔ saaƃa kâa kulâi ǹyao-maa-suai lá da zuai, é pɛ́lɛ Ɣâla-maa-wôya lono-kɛ-nuui ma. Nyînaŋ nyɔ́mɔɔ saaƃai ŋí dí kɛ̀ yɛ̂ɛ lofo-ŋa.

¹⁴Kpɛ́ni fêi, díkaa a nyînaŋ nyɔ́mɔɔ-ŋai, da ŋ́ɛi-kɛ-maa-ŋa kɛ̀. Da lî ǹɔii kélee su-kaloŋ-ŋai pɔ naa a gɛɛ dí díŋa tɛ́ díkîe-ni dîa kɔ́-kɔ́ mɛni ma a Ŋ̀wála-wâla kelee-Ɣalai ŋɔɣele kɛ́tɛi ŋ̀ele.

¹⁵Gili é lɛ́ɛ íkili-ŋa Kôrai è mò ǹyɛɛi, “Gáa, ŋa pâi yɛ̂ɛ ŋuma-nuu! Lûwa kâa ǹúui ma gáa a ŋ̀ɛ́i, ŋɔseɣei kɛ́ ƃo ǹyêei a gɛɛ vé kɛ́ a gaŋ dí gbono káai!”

¹⁶Nya ƃe dí gâloŋ-ŋai ŋá tɛ̀ díkîe mà kwaa da mâ da nàa tòli Ibulu-wooi su a Amagidɔŋ.

¹⁷Ŋ̀âla-taa-kelai mɛi feerɛ-ɣelei è ŋɔsɛŋ-foloi su-sɛŋ pû vãa laɣii sú, ǹyaŋ wóo kɛ́tɛ é kúla gâloŋ-see-sɛŋ ma gwaa maa waai ma Ŋ̀âla-pɛrɛ Kɛ́tɛi mû, nyɛɛi, “Aâ kpɛɛ!”

¹⁸Ŋele-gbana ŋɔmãla-mãla è kɛ̀ naa, sóoŋ-woo kɛ́tɛ-ŋa, ŋele-gbana-tiŋ, da lɔii-kpɛ̃liŋ-ŋɔɔ kɛ́tɛ. Ǹɔii-kpɛ̃liŋ-ŋɔɔi ŋí è kɛ̀ kpɔ́ a gɛ́tɛ a nyíi da fé niî wɔ́lɔ kɛ́ ni tãi núu-kpune è kɛ̀ la ǹɔii sui.

¹⁹Nya ƃe daa-lee kɛ́tɛi sú è ƃèla gîei saaƃa, ǹɔii-ŋûŋ-ŋai su-taa-lee-ŋai dí wólo. Babelɔŋ kɛ́tɛi kíli è tòo Ɣâla kili-ŋá a gɛɛ è ŋɔlii-ŋwânai maa-ŋwã̂ai kpele-kɔ̂pui tɛ̀ɛ bɔ̀ é gbele.

²⁰Dîŋ-ŋai kélee dí pu, núu fa ǹyée-ŋai kélee da kàa.

²¹São-kɔni kpaya-kpaya, nyíi-ŋai díwiɛ è kɛ̀ yɛ̂ɛ pãi ŋuŋ tɔnɔi (100), dí kùla Ɣâla-taa dí too núu-kpune ma é lɛ́ɛ la zu dí Ɣâla naɣâŋ láa m̀ɛni-kpɔ̂lui ŋí mɛni ma. Kpɛ́ni fêi, mɛni-kpɔ̂lui kpîŋ è kɛ̀ kpɔ́ a mɛni-kpɔ̂lu maa yikiɛɛ.