Read Kpelle M̀ɛni-lɛɛi 17 Bible Online

M̀ɛni-lɛɛi 17 - Kpelle bible

M̀ɛni-lɛɛi 17

¹Ǹaa kɛɛ tíi, Ŋ̀âla-taa-kela lɔ́ɔlu mɛi féerɛi nyíi-ŋai zɛŋ-folo lɔ́ɔlu mɛi féerɛi è kɛ̀ díyêei, dɔnɔ è pà é m̀ó mâ, nyɛɛi, “Pá, ŋwulu-wulu-nɛni kɛ́tɛi nyíi gáa see ni yá támaa ŋái, ŋa pâi ŋɔtɔŋ kpɛ́-maai lɛ̂i yâ.

²Da ǹɔii su-kaloŋ ŋai da wulu-wulu kɛ́i, nyíi ŋɔwulu-wulu-kɛɛi maa-ŋwã̂aii a ǹɔii su-ƃelai kɛ́i.”

³Ŋ̀âla-taa-kelai è lì a ńyãa vɛ̃ɛ-kpâlaŋ su M̀ɔlêŋ su. Ŋá nɛnî tɔnɔ kàa see ni sua kpɔ̂lu mɛi, nyíi tɛ-ŋɛi-laa támaa è kɛ̀ mài. Zuai ŋí ŋuŋ è kɛ̀ ŋûa lɔ́ɔlu mɛi feerɛ, míla kɛ́ ƃô puu.

⁴Nɛnîi è kɛ̀ a maa ɣiriɛ a seɣe kpɔ̂lu mu tɛɣiɛ da seɣe kpɔ̂lu, maa ɣiriɛ a gôo da kɔni sɔ̃ɔ kpanaŋɔɔ-ŋa da kɔyɛ̂ŋ mɛni kpanaŋɔɔ. Gôo-kɔpu è kɛ̀ ǹyêei ǹá fɛ́ɛ a ŋwana-lɔ̂ɔ da ŋɔwulu-wulu-kɛɛ maa-mɛni nyɔ́mɔɔ-ŋai.

⁵Kili-ŋa-tɛi-laa è kɛ̀ a bɔ̃yɛɛ dôŋ lá. Nyíi zu-kulâi ƃa, “Babelɔŋ kɛ́tɛi, nyíi gáa a ŋwulu-wulu-nɛyaai da ǹɔii su ŋwana-lɔ̂ɔi díleei.”

⁶Ŋá nɛnîi kâa Ŋ̀âla-ƃelai ŋãa a gɛ́, da diai dí dílɛ̂wo sèe a sɛ́ɣɛ Zîsɛ mɛni mai díŋãa. Tãi ŋá nɛnîi kâa lai, ńa è kpàla mâ a ŋánaa.

⁷Kɛ́lɛ, Ŋ̀âla-taa-kelai è mò mâ, nyɛɛi, “Íla kpálaâi yâ, le-mɛni ma? Ŋa pâi nɛnîi ŋɔloo-mɛnii ƃôi yâ, da zuai gáa see ni mɛi, zuai nyíi ŋuŋ káa ŋûa lɔ́ɔlu mɛi feerɛ, míla kɛ́ ƃo ŋ̀ûa puui.

⁸Zuai í gàai, è kɛ̀ naa, kɛ́lɛ, vé ŋɔ́nɔ naa, ǹyaŋ a pâi kulâi ǹóai sú nyíi gbóŋ koyaŋ fé mài, é lí su-kara su. Diai díkaa ǹɔii sui, nyíi-ŋai dílaa fé niî pɔ̃yɛ ni vúlu-laa-kɔlɔi su é síɣe ǹɔii kɔ́ɔ pîlaŋ tãi mai, díla a pâi kpálâi dîa a gɛɛ dí zuai káa, kpɛ́ni fêi, è kɛ̀ naa, ǹyaŋ vé ŋɔ́nɔ naa, kɛ́lɛ, a pâi pâi.

⁹Táre-kili-ŋa-sia ƃa nyíŋi kɛ̀. Ŋ̀uŋ lɔ́ɔlu mɛi féerɛi gáa zuai ŋûai, dia ƃa ǹyée lɔ́ɔlu mɛi féerɛi nɛnîi káa see ni díŋûai.

¹⁰Díkaa máŋ a kâloŋ lɔ́ɔlu mɛi feerɛ, nyíi-ŋai nɔɔlu a wóloi. Dɔnɔ káa naa, gbelii fé niî pa ni. Ǹyaŋ à pà a pâi kɛ̂i nɔ́ naa a tãi kpua-loŋ.

¹¹À kɛ̀ a zuai nyíi kɛ̀ naa, kɛ́lɛ, vé ŋɔ́nɔ naai, gáa a gâloŋ nɔɔlu mɛi saaƃai. Kɛ́lɛ, gáa a gâloŋ lɔ́ɔlu mɛi féerɛi dɔnɔ, ǹyaŋ da pâi zu-karâi.

¹²Míla puui í díkàai, díkaa a kâloŋ puu nyíi-ŋai dífe niî gâloŋ-laai sɔlɔ ƃo nii. Kɛ́lɛ, da pâi wála-wâla-laa sɔlɔ ƃôi nɔ́ yɛ̂ɛ kâloŋ-ŋa aƃa tɔnɔ yée mu, da zuai.

¹³Kili-ŋa-sîa tɔnɔ káa gâloŋ-ŋai ŋí yêei, ǹyaŋ ŋá díwala-wâla-laai tɛ̂ɛ zuai pɔ́.

¹⁴Da pâi kɔ́ pɛlɛ̂i M̀ála-loŋ mâ. M̀ála-loŋ a pâi díyee mɛi ɣálêi, kpɛ́ni fêi, gáa a nuu-namu kélee Mɛi-nuu-namu, gɛ ƃo a kâloŋ-ŋa kélee Mɛi-kaloŋ. Diai díkaa gɔlɛi, dítoliɛ̂i, dílɛɛ, dísã́a.”

¹⁵Nya ƃe è mò mâ, nyɛɛi, “Ǹyá-ŋai í díkàai, nyíi-ŋai ŋwulu-wulu-nɛnii káa see ni díŋai, díkaa a nûa, gbɔŋ-ŋa, lɔii-ŋuŋ-ŋa, da sii-woo da kpɛ́ni ƃo-ƃela.

¹⁶Míla puui í díkàai da zuai da pâi ŋwulu-wulu-nɛnii kpɔarâi. Da pâi ǹɛɛ̂i a ǹyée-folo, dí mà kpôloŋ, dí ǹúu mii, dí géreŋ a ŋɔŋ.

¹⁷Kpɛ́ni fêi, Ɣâla ƃé bù dílii su a gɛɛ dí ŋɔnîa-mɛnii kɛ́ a díkili-ŋa-sîa tɔnɔi dí díkâloŋ-laa wala-walai tɛ́ɛ zuai pɔ́ é lɛ́ɛ la zu Ɣâla wóo ŋa-see é kɛ́.

¹⁸Ǹɛnîi í gàai, ǹyaa ƃa daa-lee kɛ́tɛi nyíi wala-wala-laa káa ǹyêei ǹɔii su-kaloŋ-ŋai mɛi.”