Read Kpelle M̀ɛni-lɛɛi 19 Bible Online

M̀ɛni-lɛɛi 19 - Kpelle bible

M̀ɛni-lɛɛi 19

¹Nyíŋi pôlu ma, ŋá wóo su kpanaŋɔɔ mɛ̀ni é kúla Ɣâla-taa, gɛ́ɛ yɛ̂ɛ kpɔŋ kɛ́tɛ, díkɛ lâɣi, díyɛɛi, “Aleeluya! Ƃálo-laa, fólo-laa, da wála-wala-laa díkaa a Kúɣâlai pɔ́ɔ.

²Kpɛ́ni fêi, ŋɔmɛni-ŋa-teɛɛi káa a tɔ̃yâ, zã́a. A ŋwulu-wulu-nɛni kɛ́tɛi ŋɔmɛnii ŋá tée, nyíi ǹɔii su kàra a ŋɔwulu-wulu-kɛɛi. È tɔ̂ŋ kpɛ̀ ma ǹyaa Ɣâla yée-mu-ƃelai ŋãa mɛ̂ni ma.”

³Dí ŋɔ́nɔ làɣi, díyɛɛi, “Aleeluya! Ǹɛnîi kéreŋ-luru a tɛ̂ ŋ̀elei su wɔlɔ-wɔlɔ da wɔlɔ-wɔlɔ.”

⁴Nya ƃe ǹúu-pɔlɔ buu feerɛ kao náaŋ da vúlu-sãa náaŋ dí tòo ǹɔii ma dí Ɣâla fɛli nyíi gáa see ni gâloŋ-see-sɛŋ ŋái, díyɛɛi, “É kɛ́ tí. Aleeluya!”

⁵Nya ƃe wóo è kùla gâloŋ-see-sɛŋ ŋá, gɛ lâɣi, nyɛɛi, “Ka Kúɣâlai láa maa tɛ́, káai kélee kákaa a yée-mu-ƃelai, káai ka yao mai, nîa-pɛlɛɛ da núu kpaya-kpaya.”

⁶È kɛ̀ tí, ŋá wóo mɛ̀ni gɛɛ yɛ̂ɛ kpɔŋ kɛ́tɛ wóo, gɛɛ yɛ̂ɛ yá támaa súluŋ-tiŋ, gɛ̀ ƃò yɛ̂ɛ ŋele-gbana-tiŋ kɛ́tɛ gɛ̀ lâɣi, nyɛɛi, “Aleeluya! Kpɛ́ni fêi, Kúnuu-namui Ŋ̀wála-wâla kelee-Ɣalai káa sɛŋ kélee mɛi.

⁷Kwaa lii-nɛ̃ɛ kùla kú kúkpîŋ maa tɛ́ kú fólo-laa tɛ̀ɛ bɔ̀, kpɛ́ni fêi, M̀ála-loŋ ŋɔnɛnî-kula-tãi a pá. Ǹyaŋ Ŋɔnɛnîi a gbîŋ kpɛtɛ.

⁸Dí nɛ̀ɛ naa a gɛɛ é maa ɣiri a seɣe kole lɛ́lɛɛ, gɛ́ fòlo, ŋwaa” kpɛ́ni fêi, seɣe kole lɛ́lɛɛ ƃa Ŋ̀âla-ƃelai dítɔ̃yâ-tua-perei.

⁹Nya ƃe Ŋ̀âla-taa-kelai è mò ḿâ, ǹyɛɛi, “Nyíŋi pɔ̃yɛ. Lûwa káa diai dîa da ƃɛlɛ-toli ƃò a dîa M̀ála-loŋ ŋɔnɛnî-kula-kuui maa-mii-sɛŋ mii-mɛni mai.” È mò mâ, nyɛɛi, “Ŋ̀óo-ŋai ŋí díkaa a Ɣâla ŋɔtɔ̃yâ-woo-ŋa.”

¹⁰Ǹaa pôlu mà, ŋá tòo gɔ́ɔ mu a gɛɛ ŋa vɛ̀li, kɛ́lɛ, è mò mâ, nyɛɛi, “Ífe nyíti kɛ̀! Kwa káa-ni kúkaa nɔ́ a yée-mu-ƃela kwa íƃarâai, nyíi-ŋai da Zîsɛ ŋɔsêre-faai maa-mɛni sòŋ a gbanaŋɔɔ̂i. Ɣâla fɛli.” Kpɛ́ni fêi, Zîsɛ ŋɔsêre-faa-kɛɛi ƃa núu-kpune kɛ̀ é Ɣâla-woo ƃó.

¹¹È kɛ̀ tí, ŋá Ɣâla-taa káa ǹá ƃóɔ. Ka gáa, soo kole è kɛ̀ naa! Ǹúui kɛ̀ see ni bôlui ǹáa ƃa Sã́a-laa da Tɔ̃yâ-laa. A mɛni ŋá tèe gɛ́ kɔ́ kpɛ̀ tɔ̃yâ-laa su.

¹²Ŋ̀ɛ́i káa yɛ̂ɛ ŋɔŋ-soŋ, kâloŋ-ƃɔrɔ támaa kɛ́ ƃo ŋûa. Láa è kɛ̀ a bɔ̃yɛɛ ma nyíi núu da fé gɔ́lɔŋɔɔ, fɛ̂ɛ nɔ́ ǹyaa kpîŋ.

¹³Maa ɣiriɛi a ǹyokpoi nyíi da wɔ́lɔ ǹɔ́ ŋãa sui. Ǹáai da dòli lai gáa a Ɣâla Ŋɔwóoi.

¹⁴Ŋ̀âla-taa kɔ-kuluƃa-ŋai nyíi-ŋai kɛ̀ a dímaa-ɣiriɛ a seɣe kole wâa lɛ́lɛɛi, dí pìlaŋ bôlu soo kole-ŋa mɛi.

¹⁵Ƃóa-sɔ̂kpɔ ŋá liɛɛ a kûla ǹá a gɛɛ é ǹɔii-ŋûŋ-ŋai yée-mɛi ɣale la. Ǹyaŋ a pâi dímɛi kâai a kɔli-tuaŋ. A pâi gbɔmɔ-ƃai tánîi Ŋ̀wála-wâla kélee-Ɣalai ŋɔlii-ŋwâna kpɔmɔ-ƃa táŋ-loai su.

¹⁶Láa è kɛ̀ a pɔ̃yɛɛ ŋɔyokpoi ma da ŋ̀wɛ́rɛ ma, nyíi kɛ̀ a kâloŋ-ŋa kélee Díkâloŋ da nuu-namela kélee Dínuu-namui.

¹⁷Ǹaa kɛ́ɛ tíi, ŋá Ɣâla-kela tɔnɔ kàa tɔɔ ni voloi su, gɛ ŋɔni-ŋai kélee toli a ŋ̀óo su kɛ́tɛ, nyíi-ŋai kɛ̀ koônii Ɣâla-taa samai, nyɛɛ diai, “Ka pá, ká káŋa tɛ́ kákîe ma Ɣâla ŋɔkúu kɛ́tɛi mɛni ma,

¹⁸a gɛɛ ká kâloŋ-ŋai-luu mii, ká gɔkuluƃa mɛi-ƃelai-luu mii, ká wala-wala ƃelai-luu mii, ká soo-ŋai-luu mii da zoo-sia-ƃelai. Ka núu kelee-luu mii, ŋuŋ-ma-ƃo-ƃela da luɛ-ŋa, nîa-pɛlɛɛ da núu kpaya-kpaya.”

¹⁹Nya ƃe ŋá zuai kàa da ǹɔii sú kaloŋ-ŋai é pɛ́lɛ díkɔ-kuluƃa-ŋai dîa. Dí díŋa tɛ́ díkîe mà a gɛɛ dí kɔ́ pɛ́lɛ ǹúui ma gáa see ni zooi mɛi da ŋɔkɔ-kuluƃa-ŋai.

²⁰Dí zuai sòŋ da Ɣâla-maa-wôya lono-kɛ-nuui nyíi ŋɛ̀i-kɛ-maa-ŋa kɛ̀ zuai ŋ́ɛi-tuɛi. Diai zuai pɔ́ɔ è kɛ̀ dítôŋ lá da diai zua-pɔɔkɔ̂ŋ fɛlii, Ɣâla-maa-wôya lono-kɛ-nuui, é dípɛlɛ a ŋɛ̀i-kɛ-maa-ŋai ŋí. Dí zuai da nalôŋ ŋí pìli a dífulu ŋɔŋ kɛ́tɛ su nyíi kɛ̀ yɛ̂ɛ póa kɛ́tɛi, nyíi a sɔɔfɔ kèreŋ.

²¹Móa-sɔkpɔ̂i kûla ǹúui lá kɛ̀ see ni zooi mɛi, è ǹúui gbéli-ŋai pâa. Ŋɔni-ŋai kélee dí péla a díluu.