Read Kpelle M̀ɛni-lɛɛi 21 Bible Online

M̀ɛni-lɛɛi 21 - Kpelle bible

M̀ɛni-lɛɛi 21

¹È kɛ̀ tí, ŋá Ɣâla-taa nina kàa da lɔii nina. Kpɛ́ni fêi, Ŋâla-taa pɔlɔi da ǹɔii pɔlɔi da tɛ̂ɛ, ǹyaŋ ǹyúoi fé ŋɔ́nɔ naa.

²Ǹyaŋ ŋá daa-lee maa waai kâa, nyíi gáa a Zerusâlɛŋ ninai gɛ́ kúla Ɣâla yêei Ɣâla-taa, gbɛ́tɛɛ yɛ̂ɛ nɛnî ƃe maa-ɣiriɛ gɛ́ ŋɔsurɔ̂ŋ maa kpɛ̂ŋ a gɛɛ é gùla a nɛnî.

³Nya ƃe ŋá wóo su kɛ́tɛ mɛ̀ni é kúla gâloŋ see-sɛŋ ma, nyɛɛi, “Gáa, Ɣâla-kɛi káa núu-kpune sama. A pâi kɛ̂i dísama, dí kɛ́ a ŋɔnûa, ǹyaŋ Ɣâla ǹyaa kpîŋ a pâi kɛ̂i dísama é kɛ́ a Díɣâla.

⁴A pâi díŋɛi-ya kélee kɔ́ɔ̂i díŋɛi. Saa-mɛni fé ŋɔ́nɔ pâi kɛ̂i naa. Maloŋ-see-ƃoɔ fé ŋɔ́nɔ pâi kɛ̂i naa. Kpaa máŋ wɔ́lɔ, kpaa máŋ mɛni-soli. Kpɛ́ni fêi, mɛni pɔlɔ-ŋai da nâa tɛ̀ɛ.”

⁵Ǹúui kɛ̀ see ni gâloŋ-see-sɛŋ ŋái, è mò, nyɛɛi, “Gáa, ŋa sɛŋ kélee kɛ́ a nina.” È ŋɔ́nɔ mò, nyɛɛi, “Nyíŋi pɔ̃yɛ, kpɛ́ni fêi, ŋ̀óo-ŋai ŋí sã́âi, dí ƃo a tɔ̃yâ-woo-ŋa.”

⁶Nya ƃe è mò ḿâ, nyɛɛi, “Díŋa-see a kɛ́! Ŋ́gaa a Afa da Omiga, zu-kulâi ƃa gɔ́ɔ-pîlanii da gberâi. Diai kpele-wɛli káa diai, ŋa pâi vúlu-laa ya-loŋ da tɛɛ̂i dípɔ kpɛ́ni-kpɛni.

⁷Ǹúui a yee-tɛɛ-maa kɛ̂i, a pâi nyíŋi sɔlɔ ƃôi, ǹyaŋ ŋa pâi kɛ̂i a Ŋɔɣâla, ǹyaŋ gɛ̀ ƃò a ńoŋ.

⁸Kɛ́lɛ, à kɛ̀ a ǹyao-ƃelai, da diai laa-la fé díyêei, diai díliƃiɛ̂i, à kɛ̀ a ǹúu-paa-ƃelai, da ŋwulu-wulu kɛ́-ƃelai, da ŋwulu-ƃelai, da ŋâla-pɔɔkɔ̂ŋ fɛli-ƃelai, da nɛ̃ɛ-ƃelai kélee, díwɔ̂i a pâi kɛ̂i a ŋɔŋ kɛ́tɛi su, nyíi sɔɔfɔ káa zui, nyíi gáa yɛ̂ɛ pôa kɛ́tɛi, ǹyaŋ zaai veerɛ-ɣelei ká ŋí.”

⁹È kɛ̀ tí, ŋá Ŋ̀âla-taa-kela lɔ́ɔlu mɛi féerɛi dɔnɔ kàa, nyíi-ŋai zɛŋ-folo lɔ́ɔlu mɛi féerɛi è kɛ̀ díyêei ǹáa fɛ́ɛ a mɛni-kpɔlu-sii lɔ́ɔlu mɛi féerɛi gbɛɛ ŋái, é m̀ó mâ, nyɛɛi, “Pá, ŋa pâi ǹɛnîi lɛ̀i yâ nyíi gáa a M̀ála-loŋ Ŋɔnɛnîi.”

¹⁰Nya ƃe è lì a ńyãa yée tɔɔ kɛ́tɛ tɔnɔ ma M̀ɔlêŋ sú é Zerusâlɛŋ taa-lee maa waai lɛ́ ḿâ nyíi kɛ̀ kulâi Ɣâla-taa Ɣâla yêei.

¹¹Ɣâla ŋɔfólo-laai è kɛ̀ daa-leei ŋí ḿâ, gɛ́ fólo yɛ̂ɛ kɔni kole pe-peɛɛ sɔ̃ɔ kpanaŋɔɔ. È kɛ̀ ƃò yɛ̂ɛ damáŋ kɔni nyíi zu ponoɔ̂i yɛ̂ɛ gɔnii da kɛ̂ ma kɔlesetɔi.

¹²Siɣãŋ kɛ́tɛ kôya è kɛ̀ a dínaŋɔɔ daa-leei ŋí ma, ǹá-kulâi kɛ́ ƃò puu kao feerɛ, Ɣâla-taa-kela puu kao feerɛ tɔɔ ǹá tɛi-tɛi. Ziɣãŋ lá-ŋai ŋí ma nuu-suu puu kao féerɛi láa-ŋai dí kɛ̀ a bɔ̃yɛɛ naa tɛi-tɛi, nyíi-ŋai kɛ̀ a Eezuɛ ǹônii.

¹³Ziɣãŋ ŋí lá-kulâi káa saaƃa yá-ŋûa-pere, ǹá-kulâi kɛ́ ƃo saaƃa séɣai-pere, ǹá-kulâi kɛ́ ƃo saaƃa voloi-kulâi-pere, ǹá-kulâi kɛ́ ƃo saaƃa folo-liî-pere.

¹⁴Daa-leei ŋɔsiɣaŋ kɔ́ɔ pîlanii è kɛ̀ puu kao feerɛ, M̀ála-loŋ ŋɔsia-ƃela puu kao féerɛi láa pɔ̃yɛɛ dîa tɛi-tɛi.

¹⁵Ǹúui lòno ḿbɔi, sɛŋ-kɔɔŋ-wuru è kɛ̀ ǹyêei, nyíi kɛ̀ a gbɛ́tɛɛ a gôoi, a gɛɛ é daa-leei kɔɔŋ, da ziɣãŋ-ŋai lá, é pɛ́lɛ ziɣãŋ kpîŋ ma.

¹⁶Daa-leei è kɛ̀ a m̀éla náaŋ, m̀éla ǹaaŋɔɔ pɔ̂riɛ. Ǹya ƃe è daa-leei kɔ̂ɔŋ a ŋɔsɛŋ-kɔ̂ɔŋ-wurii, gɛ́ ƃò a mâai ŋuŋ puu kao lɔ́ɔlu. M̀éla ǹaaŋɔɔ da dɔɔ-mɛi dípɔrîɛi.

¹⁷È ziɣãŋ kɔ̂ɔŋ máŋ, gɛ ƃo a waaŋ buu saaƃa kao lɔ́ɔlu mɛi da, à kɛ̀ a núu-kpune ŋɔsɛŋ-kɔɔŋ ma, zu-kulai ƃa Ŋ̀âla-taa-kelai ŋɔsɛŋ-kɔɔŋ ma.

¹⁸Dí ziɣãŋ tɔ̂ɔ a damáŋ-kɔni, dí daa-leei tɔɔ a gôo kpîŋ, zu ponoɔ yɛ̂ɛ gilasi.

¹⁹Daa-leei ŋɔsiɣaŋ-kɔɔ pîlanii-ŋai dí kɛ̀ a dípɔ̃yɛɛ a kɔni sɔ̃ɔ kpanaŋɔɔ-sii támaa-ŋa. Maa-ŋuŋ è kɛ̀ a bɔ̃yɛɛ a damáŋ-kɔni, veerɛ-ɣelei pɔ̃yɛɛ a gɔnii da kɛ̂ ma kɔni sɔ̃ɔ kpanaŋɔɔ, zaaƃa-ɣelei pɔ̃yɛɛ a gɔnii da kɛ̂ ma agate, náaŋ-ɣelei pɔ̃yɛɛ a gɔnii da kɛ̂ ma ɛmɛrai

²⁰nɔɔlu-ɣelei pɔ̃yɛɛ a gɔnii da kɛ̂ ma ɔnɛii, mɛi da-ɣelei pɔ̃yɛɛ a kɔni kpɔlu, mɛi feerɛ-ɣelei pɔ̃yɛɛ a gɔnii da kɛ̂ ma keleselai, mɛi saaƃa-ɣelei pɔ̃yɛɛ a gɔnii da kɛ̀ ma bɛraɛ, mɛi náaŋ-ɣelei pɔ̃yɛɛ a gɔnii da kɛ̂ ma topɛɛ, buu-ɣelei pɔ̃yɛɛ a gɔnii da kɛ̀ ma kelesepei, buu kao tɔnɔ-ɣelei pɔ̃yɛɛ a gɔnii da kɛ̂ ma tɔkwisei, buu kao feerɛ-ɣelei pɔ̃yɛɛ a gɔnii da kɛ̂ ma ametei.

²¹Ziɣãŋ lá puu kao féerɛi dí kɛ̀ a díkpɛtɛɛ a kɔyɛ̂ŋ mɛni kpanaŋɔɔ puu kao feerɛ, ǹá tɛi-tɛi kélee kpɛtɛɛ a gɔ̃yɛŋ tɛi-tɛi. Daa-leei su pere-leei kpɛtɛɛ a gôo kpîŋ, zu ponoɔ yɛ̂ɛ gilasi.

²²Ǹyaŋ fé kwaa maa waa káa ní daa-leei ŋí su, kpɛ́ni fêi, zu-kwaa maa waai ƃa Kúnuu-namui Ŋ̀wála-wala kélee Ɣalai da M̀ála-loŋ.

²³Ǹyaŋ daa-leei ŋí fé kpaaŋ ni fólo mɛni ma da ɣáloŋ a gɛɛ é fólo mɛi, kpɛ́ni fêi, Ɣâla ŋɔfólo-laai ƃa ŋɔkwaa-ponoɔi, ŋɔlaŋpoi ƃa M̀ála-loŋ.

²⁴Ǹyaŋ ǹɔii-ŋûŋ-ŋai da pâi siâi ŋɔkwaa-ponoɔi su. Ǹɔii su-kaloŋ-ŋai da pâi pâi zu a dífolo-laai.

²⁵Ŋɔsiɣaŋ lá fé pâi wɔ́lɔ tɛ̂i a ɣele-ƃɔ́ɔ ǹyaŋ kpini fé pâi wɔ́lɔ kɛ̂i naa.

²⁶Da pâi pâi zu a ǹɔii-ŋûŋ-ŋai dífolo-laai da díƃâa kɛ́-maai.

²⁷Kɛ́lɛ, sɛŋ nyíi kélee maa fé waa níi, vé pâi lîi zu, kpaa máŋ núu kélee a ŋwana-lɔ̂ɔ maa kɔ̂rii, kpaa máŋ wôya-mɛnii, kɛ́lɛ, fɛ̂ɛ nɔ́ diai dílaa pɔ̃yɛɛ̂i M̀ála-loŋ ŋɔfúlu-laa-kɔlɔi sui.