Read Kpelle M̀ɛni-lɛɛi 22 Bible Online

M̀ɛni-lɛɛi 22 - Kpelle bible

M̀ɛni-lɛɛi 22

¹Ǹaa kɛ́ɛ tíi, Ŋ̀âla-taa-kelai è vulu-laa ya-leei lɛ̀ mâ, gɛ̀ fólo yɛ̂ɛ gɔnii da kɛ̂ ma kɔlesetɔi, gɛ̀ kùla Ɣâla da M̀ála-loŋ díkâloŋ-see-sɛŋ ma.

²Ǹya-leei ŋí è kɛ̀ laa daa-leei su-pere-leei sama. Ǹya-leei ŋí ŋɔsîŋ-wolii veerɛ ma máŋ vulu-laa-wurii è kɛ̀ tɔɔ ni naa, m̀á kɛ́ ƃô a zii puu kao feerɛ, gɛ ƃa a ɣáloŋ kélee. Ŋ̀urii láa è kɛ̀ ǹɔii-ŋûŋ-ŋai ƃalo-mɛni ma.

³Sɛŋ da kélee fé pâi ŋɔ́nɔ kɛ̂i daa-leei ŋí su nyíi naɣâŋ káa mai. Ɣâla da M̀ála-loŋ díkâloŋ-see-sɛŋ a pâi kɛ̂i zu. Ǹyée-mu-ƃelai da pâi vɛlîi.

⁴Da pâi ŋ̀ɛi kâai. Ǹáa a pâi kɛ̂i a bɔ̃yɛɛ dítôŋ lá.

⁵Kpíni fé pâi ŋɔ́nɔ kɛ̂i naa. Dífe pâi ŋɔ́nɔ laŋpo da fólo díkwaa-ponoɔ wɛ̂lii, kpɛ́ni fêi, Kúnuu-namui Ɣâla a pâi kɛ̂i a díkwaa-ponoɔi, ǹyaŋ da pâi kɛ-mɛi-laa kɛ̂i wɔlɔ-wɔlɔ da wɔlɔ-wɔlɔ.

⁶È m̀o mâ, nyɛɛi, “Ŋ̀óo-ŋai ŋí sã́âi, díkɛ ƃò a tɔ̃yâ-woo-ŋa. Ǹyaŋ Kúnuu-namui, nyíi gáa a Ɣâla ŋɔlóno-kɛ-ƃelai dímɔ̂leŋ Ŋɔɣâlai, a Ŋɔɣâla-taa-kelai tɛ́ɛ a gɛɛ é m̀ɛnii lɛ́ yée-mu-ƃelai dîa nyíi pâi kɛ̂i a maa félaai.”

⁷Zîsɛ è mò ǹyɛɛi, “Gáa, ŋa pâi a maa félaa.” Lûwa káa ǹúui ḿâ a ŋ̀óo-ŋai díkaa gɔlɔi ŋí sui dímɛni-lɛɛi lâai kɛ̀i.

⁸Ńyãa Zɔ̂ŋ, ńyãa ƃe mɛni-ŋai ŋí mɛ̀ni ŋa díkaa. Ǹyaŋ tãi ŋa dímɛni la ŋa díkâai, Ŋ̀âla-taa-kelai nyíi dí lɛ̀ ḿâi, ŋá tòo gɔ́ɔ mu ŋá vɛ̀li.

⁹Kɛ́lɛ, è m̀o mâ, nyɛɛi, “Ífe nyíti kɛ̀! Kwa káa-ni kúkaa nɔ́ a yée-mu-ƃela kwa íƃarâai, nyíi-ŋai díkaa a Ɣâla ŋɔlóno-kɛ-ƃelai, da diai da gɔlɔi ŋí wóo-ŋai lâai kɛ̀i. Ɣâla fɛ̀li.”

¹⁰È mò mâ, nyɛɛi, “Ŋ̀óo-ŋai díkaa gɔlɔi ŋí sui, ífe dímɛni-lɛɛi lòo, kpɛ́ni fêi, tãi a lɛɣɛ.

¹¹Tɔɔ zɔnyɔ̂ŋ-ƃelai dí kɛ́ niî sɔnyɔ̂ŋ kɛ̂i, maa-liƃi-ƃelai maa é kɛ́ niî a ǹiƃiɛ, dɔ̃yâ-ƃelai dí kɛ́ niî tɔ̃yâ-tua kɛ̂, diai dímaa waâi, dí kɛ́ niî a dímaa waa.”

¹²“Gáa, ŋa pâi a maa félaa. Ŋa pâi a fela-fé a gɛɛ ŋa núu kélee fela fé dua-pere ma.

¹³Ŋ́gaa a Afa da Omiga, zu-kulâi ƃa maa-ŋuŋ da gbɛɛ ŋái, gɔ́ɔ-pîlanii da gberâi.”

¹⁴Lûwa káa diai dîa da díyokpo-ŋai wâa, a gɛɛ é kɛ́ a sɛŋ dí vulu-laa-wurii m̀á da sɔlɔ ƃó a gɛɛ dí tɛɛ ziɣãŋ lá-ƃerei dí tɛ́ daa-leei sui.

¹⁵Diai da mɛni maa faleŋ, tɛli-kpɛ́-ƃela, wulu-wulu kɛ́-ƃela, núu-paa-ƃela, ɣâla-pɔɔkɔ̂ŋ fɛli-ƃela, da diai kélee dí wôya-mɛni wɛ́li ni, díkɛ maa kɔ̂rii díkaa daa-leei ŋɔsiɣaŋ pôlu pere.

¹⁶“Ńyãa Zîsɛ, ŋá ŋákelai tɛ̀ɛ ípɔ naa a zere-faai ŋí Kôrai-toli-kpɔŋ-ŋai mɛni ma. Ŋ́gaa a Deeƃé ŋɔsame, ŋ́gɛ ƃo a ŋɔsuui-su-nuu, ńyãa ƃe ŋ́gaa a ŋele-wala pɛmɛlɛŋ-kao-foloɔi.”

¹⁷Mɔ̂leŋ da Nɛnîi dí mò, díyɛɛi, “Pá.” Tɔɔ ǹúui a mɛni mɛnii, é m̀ó, nyɛɛi, “Pá.” Tɔɔ ǹúui kpele-wɛli káa mài, é pá, tɔɔ ǹúui ŋ̀wɛ̂lii, é vulu-laa-yai siɣe kpɛni-kpɛni zɔ̃ɔ fé ma.

¹⁸Diai kélee da ŋ̀óo-ŋai díkaa gɔlɔi ŋí sui dímɛni-lɛɛi maa-wooi mɛnii, ŋa dília-woo ƃôi, à kɛ̀ núu da à ŋ̀óo-ŋai ŋí da pɛ̀lɛ ma, gɛ̀ ní mɛni-kpɔlu-ŋai díkaa gɔlɔi ŋí sui, Ɣâla a pâi ǹaâi maa-nuui tí ḿâ.

¹⁹À kɛ̀ núu da kélee à ŋ̀óo-ŋai dímɛni-lɛɛi da kùla mà, gɛ̀ ní Ɣâla a pâi vulu-laa-wurii m̀á ŋɔi kulâi ǹyêei é gula daa-lee maa waai su, nyíi-ŋai dímɛni ƃóɔi gɔlɔi ŋí sui.

²⁰Ǹúui a m̀ɛni-ŋai ŋí maa-sere-faa kɛ̀i, a mò, nyɛɛi, “Tɔ̃yâ ma ŋa pâi a maa félaa.” É kɛ́ tí. Pá, Kúnuu-namui Zîsɛ!

²¹Kúnuu-namui Zîsɛ ŋɔƃɛlɛ-sêei é kɛ́ Ŋ̀âla-ƃelai kélee dîa. É kɛ́ tí.