Read Kpelle M̀ɛni-lɛɛi 3 Bible Online

M̀ɛni-lɛɛi 3 - Kpelle bible

M̀ɛni-lɛɛi 3

¹“Ŋ̀óo-ŋai pɔ̃yɛ Kôrai-toli-kpɔŋ gáa Saadii ŋɔkélai pɔ naa: ‘Núui Ɣâla ŋɔmɔ̂leŋ lɔ́ɔlu mɛi féerɛi káa ǹyêei da bɛmɛlɛŋ-kao lɔ́ɔlu mɛi féerɛi ŋɔwóo-ŋai ká ŋí. “ ‘Ŋá ítii-ŋai kɔ́lɔŋ; íkɛɛ-ɣele-ma maa-laa káa nɔ yâ, ǹyaŋ í saa.

²Íŋɛi lá ƃó mɛni-ŋai lɛ̀ɛi da nyíi-ŋai da kɛ́ pâi saâi í díkpanaŋ, kpɛ́ni fêi, ítii-ŋai ŋa díkâai, dímaa fé waa ni Ŋáɣâlai ŋɛi.

³Mɛnii í zɔlɔ ƃô da m̀ɛnii í mɛnii, dí lɛ́ɛ íkili ŋá; í dímɛi káa í ílii pene. Yà wàla íŋɛi lá ƃo, ŋa pâi pâi yɛ̂ɛ ŋuma-nuu, ǹyaŋ ífe pâi aƃai kɔ́lɔnîi ŋa pâi pâi la ímɛi.

⁴É máŋ kɛ́ ti núu da-ni díkaa Saadi, nyíi-ŋai dífe niî díyokpo-ŋai liƃi níi; ǹyaŋ kwa dîa-ni kwa pâi siâi yokpo kole su, kpɛ́ni fêi, dímaa nɛɛ̂i.

⁵Ǹúui a yee-tɛɛ-maa kɛ̂i, a pâi maa ɣirîi yokpo kole su a bere-sii ti, ǹyaŋ fé pâi ǹáa kulâi vulu-laa-kɔlɔi su; ŋa pâi ǹáa tólîi Ńâŋ ŋɛi tuɛ da ŋɔkéla-ŋai.

⁶Ǹúui wóli káa ma a gɛɛ e mɛni mɛnii, tɔɔ e mɛnii mɛni Mɔ̂leŋ a m̀ôi Kôrai-toli-kpɔŋ-ŋai dîai.’

⁷“Ŋ̀óo-ŋai ŋí pɔ̃yɛ Kôrai-toli-kpɔŋ gáa Feledɛfiai ŋɔkélai pɔ naa: ‘Dɔ̃yâ-nuu maa waai, nyíi Deeƃé ŋɔkîi káa ǹyêei, nyíi a gbôŋ lá ƃò núu fé naa é ǹá tɛ́i, nyíi a gbôŋ lá tɛ̀ núu fé naa é ǹá ƃói, ŋɔwóo-ŋai ká ŋí.

⁸“ ‘Ŋá ítii-ŋai kɔ́lɔŋ. Gáa, ŋa kpôŋ lá ƃo ítûɛ nyíi núu fa pɔ̂ri ǹá tɛ̂i; ŋa gɔlɔŋ a gɛɛ wala-wala-loŋ nɔ ƃe íyeêi, ǹyaŋ é máŋ kɛ́ ti ya ŋáwooi mɛi káa ífe niî ńaâi maa-sia too ni.

⁹Diai da kûla Sêtɔŋ ŋɔnúu-kpului su nyíi-ŋai da mò a gɛɛ díkaa a Zûu-ŋa, kɛ́lɛ, dífe lai, kɛ́lɛ díkɛ lɛ́ɛ kɛi, gáa, ŋa pâi díkɛ̂i dí pá dí pɛ́lɛ íkɔɔ mu dí gɔ́lɔŋ a gɛɛ ŋá íwɛli ní.

¹⁰Ŋa pâi íkulâi zu-kɔɔŋ-tãi su, nyíi pâi ǹɔii kélee mɛi, a gɛɛ diai díkaa ǹɔii sui, su-kɔɔŋ é pá dípɔ, kpɛ́ni fêi, ǹii-kpêlei gáa ńyêei, ya maa-wooi mɛi kâa.

¹¹Ŋa pâi a maa félaa. Zɛŋ gáa íyeêi, zoŋ a gbanaŋɔɔ a gɛɛ núu da fé íƃɔrɔi sôŋ íyeêi.

¹²Ǹúui a yee-tɛɛ-maa kɛ̂i, ŋa pâi gɛ̂i a Ŋáɣâlai ŋɔkwaa maa waai soŋ-kɔni. Va wɔ́lɔ ŋɔ́nɔ kùla mu, ǹyaŋ ŋa pâi Ŋáɣâlai láa pɔ̃yɛ̂i maa-nuui ma da Ŋáɣâlai ŋɔtaai nyíi da dòli a Zerusâlɛŋ ninai, nyíi kùla Ŋáɣâlai yêei Ɣâla-taai, da ńyãa kpîŋ ńaa ninai.

¹³Ǹúui wóli káa ma a gɛɛ e mɛni mɛnii, tɔɔ é m̀ɛnii mɛ́ni Mɔ̂leŋ a m̀ôi Kôrai-toli-kpɔŋ-ŋai dîai.’

¹⁴“Ŋ̀óo-ŋai ŋí pɔ̃yɛ Kôrai-toli-kpɔŋ gáa Leodisiɛi ŋɔkélai pɔ naa: ‘É kɛ́ tí, nyíi gáa a dɔ̃yâ-sere-faa kɛ-nuu sã́ai, nyíi gáa a Ɣâla ŋɔsɛŋ-kpɛtɛɛi kɔ́ɔ-pîlanii ŋɔwóo-ŋai ká ni.

¹⁵“ ‘Ŋá ítii-ŋai kɔ́lɔŋ; ífe laɣi ni, ǹyaŋ ífe fãa ni. Eêi kɛ̀ a ílaɣîɛi, kpaa máŋ ífãâi!

¹⁶Mɛni ma ŋa pâi íkulâi ǹá ŋa ípu, kpɛ́ni fêi, íkaa nɔ dɔi-dɔi ífe laɣi ni, ǹyaŋ ífe fãa ni.

¹⁷Kpɛ́ni fêi, ya mò, yɛ̂ɛ, ńdɔɔ̂i, ŋ́gbîŋ kpɛtɛɛ, fé sɛŋ da wɛ̂lii; ǹyaŋ ífe gɔlɔŋ a gɛɛ ítoɔɔ̂i, mu, ímalôŋɔɔ, íkôloɔ, íŋɛi puɔɔ, í ƃo a íkaŋ.

¹⁸Mɛni ma ŋa ilia-woo ƃôi a gɛɛ í gôo yá ńyêei, nyíi ŋɔŋ a maa kpɛtɛ̂i, a gɛɛ íkɛ a tɔɔ-nuu, í yokpo kole ya ńyêei doo yâ, a gɛɛ í íkaŋ loo ŋumɛ fé íkɛ̀, í wulɔ ya ńyêei í zia íŋɛi a gɛɛ í kwaa káa.

¹⁹Diai ŋa díwɛli níi, ŋa lôno dîa ŋá tɔ̂ŋ kpɛ́ dîa; mɛni ma kpanaŋ í ílii pene.

²⁰Gáa, ŋ́gaa tɔɔ ni gbôŋ lá ŋ́gɛ dua; à kɛ̀ núu da kélee à ŋ́oo mɛ̀ni é gbôŋ lá ƃó, ŋa pâi pâi bɔ kwa ǹyaa ku sée ku kúlaa mii gîe ma.

²¹Ǹúui a yee-tɛɛ-maa kɛ̂i, ŋa pâi ǹɛɛ̂i naa kwa ǹyaa ku sée ŋákâloŋ-see-sɛŋ ŋá, yɛ̂ɛ berei ǹyaa kpîŋ ŋá yee-tɛɛ-maa kɛ̀ la kwa Ńâŋ ku sée ŋɔkâloŋ-see-sɛŋ ŋái.

²²Ǹúui wóli káa ma a gɛɛ e mɛni mɛnii, tɔɔ e mɛnii mɛni Mɔ̂leŋ a m̀ôi Kôrai-toli-kpɔŋ-ŋai dîai.’ ”