Read Kpelle M̀ɛni-lɛɛi 4 Bible Online

M̀ɛni-lɛɛi 4 - Kpelle bible

M̀ɛni-lɛɛi 4

¹Nyíŋi pôlu ma ŋá nàa kàa, ǹyaŋ ka gáa, ŋá kpôŋ kàa ǹá ƃoɔ Ɣâla-taa! Ŋ̀óoi maa-ŋuŋ ŋá m̀ɛni gɛ lono ḿbɔ yɛ̂ɛ túru, è mò, nyɛɛi, “Tɛ́ ḿbɔ naa ƃɛ. Mɛnii pâi kɛ̀i nyíŋi pôlu mai, ŋa pâi ǹɛ̂i yâ.”

²Ŋá kɛ̀ Mɔ̂leŋ su a naa maa félaa, ǹyaŋ ka gáa, kâloŋ-see-sɛŋ tɔnɔ è kɛ̀ Ɣâla-taa, núu tɔnɔ kɛ́ ƃo see ni ŋ̀á!

³Ǹúui kɛ̀ see ni gâloŋ-see-sɛŋ ŋái è kɛ̀ yɛ̂ɛ damáŋ-kɔni da kɔni kpɔ̂lu, ǹyaŋ gâloŋ-see-sɛŋ maa tinaŋɔɔ a gbeimɛlɛ, nyíi bɔ̃yɛɛ è kɛ̀ yɛ̂ɛ láa ŋunui.

⁴Kâloŋ-see-sɛŋ buu feerɛ kao náaŋ è kɛ̀ a dínaŋɔɔ gâloŋ-see-sɛŋ ŋí ma. Núu-pɔlɔ buu feerɛ kao náaŋ seɛɛ díŋa, dímaa ɣiriɛ a yokpo kole-ŋa, gôo-ƃɔrɔ-ŋa seɛɛ díŋûa.

⁵Ŋele-gbana ŋɔmãla-mãla è kùla gâloŋ-see-sɛŋ zamai ŋɔi ma, ŋele-gbana é tóo. Ǹyaŋ kpáleŋ-ŋíri lɔ́ɔlu mɛi feerɛ è kɛ̀ sonîi gâloŋ-see-sɛŋ ŋí ŋɛi-tuɛ, nyíi-ŋai díkaa a Ɣâla ŋɔmɔ̂leŋ lɔ́ɔlu mɛi féerɛi.

⁶Gâloŋ-see-sɛŋ ŋɛ́i-tuɛ, sɛŋ da è kɛ̀ naa gɛ́ɛ yɛ̂ɛ mɛ̃lɛ-mɛ̃lɛ-yuo gɛ́ ƃò yɛ̂ɛ kɔni-sii nyíi da dòli a kɔlesetɔi. Ǹyaŋ gâloŋ-see-sɛŋ ŋí è kɛ̀ a maa tinaŋɔɔ m̀éla kélee ma. Fúlu-sãa náaŋ dí kɛ̀ tɔɔ ni naa, díŋɛi támaa dîa, díŋɛi da è kɛ́ dítuɛ-pere da díkɛ ƃo dípôlu-pere.

⁷Vúlu-sãai maa-ŋuŋ è kɛ̀ yɛ̂ɛ yala-sulu, veerɛi kɛ́ ƃo yɛ̂ɛ niŋa-sirɛ, zaaƃai ŋɛ́i kɛ́ɛ yɛ̂ɛ núu, náaŋ kɛ́ ƃo yɛ̂ɛ kuɛ ƃe koônii.

⁸Ǹyaŋ vúlu-sãa náaŋ ŋí, nyíi-ŋai díkoôŋ káa dîa lɔ́ɔlu mɛi a tɛ̀ɛ-ŋai, díŋɛi támaa dîa, díkwaa kélee mai, dífa kpera a wule toɔɔ a ɣele-ƃɔ́ɔ da kpini, díyɛɛi, “Kúnuu-namui Ŋ̀wála-wâla kelee-Ɣalai, maa waai, maa waai, maa waai, ǹúui nyíi kɛ̀ naai, nyíi gáa naai, da nyíi pâi pâi!”

⁹Tãi vúlu-sãai ŋí da kɛ̂ folo-laa, ƃaa-kɛ-maa, da sɛɣɛi-féi tɛɛ̂i la ǹúui pɔ́ gáa see ni gâloŋ-see-sɛŋ ŋái, nyíi gáa nɔ́ naa wɔlɔ-wɔlɔ da wɔlɔ-wɔlɔi,

¹⁰ǹúu-pɔlɔ buu feerɛ kao náaŋ da tôo ǹúui kɔ́ɔ mu gáa see ni gâloŋ-see-sɛŋ ŋái, dí ǹúui fɛli gáa nɔ́ naa wɔlɔ-wɔlɔ da wɔlɔ-wɔlɔi. Da díƃɔrɔ-ŋai pu gâloŋ-see-sɛŋ ŋɛ́i-tuɛ, díkɛ wule too, díyɛɛi,

¹¹“Ímaa nɛɛ̂i, Kúnuu-namui da Kúɣâlai, a gɛɛ í folo-laa, ƃaa-kɛ-maa, da wala-wala sɔlɔ ƃo, kpɛni fêi, í sɛŋ kélee kpɛ̀tɛ, ǹyaŋ í díkpɛ̀tɛ, dí ƃo ɣele ma a ínîa-mɛnii.”