Read Kpelle M̀ɛni-lɛɛi 5 Bible Online

M̀ɛni-lɛɛi 5 - Kpelle bible

M̀ɛni-lɛɛi 5

¹Ǹúui kɛ̀ see ni gâloŋ-see-sɛŋ ŋái, ŋá kɔlɔ kàa ǹáa-mii-yee ŋá, bɔ̃yɛɛ m̀éla veerɛ ma, ǹá tɛ́ɛ a kɔlɔ lá tɛ-sãa lɔ́ɔlu mɛi feerɛ.

²Ŋá Ɣâla-taa-kela wála-walaa kàa gɛ̀ mò a ŋ̀óo su kɛ́tɛ, nyɛɛi, “Gbɛ̂ɛ ƃe maa nɛɛ̂i é gɔlɔi ŋí lá ƃó é gɔlɔ la-tɛ-sãai kúla ǹái?”

³Ǹyaŋ núu da kélee fé kɛ́ ni Ɣâla-taa, kpaa máŋ ǹɔii mâ, kpaa máŋ ǹɔii mû a gɛɛ é pɔ̂ri gɔlɔi tí lá ƃôi, kpaa máŋ é zu káa.

⁴Nya ƃe, ŋá wɔ̀lɔ kpɔ́ a ŋánaa. Kpɛ́ni fêi, núu kélee da maa fé kɛ́ ní a nɛ̃ɛ a gɛɛ é gɔlɔi tí lá ƃó, kpaa máŋ é zu káa.

⁵Ǹúu-pɔlɔi dɔnɔ è mò mâ, nyɛɛi, “Ífe ŋɔ́nɔ wɔ̀lɔ. Tɔɔ kpɔ́, Zudasi-nuu-suu su-Yala-sului, Deeƃé Ŋɔsame, ǹyée a tɛɛ mɛni kélee ma a gɛɛ a pɔ̂ri gɔlɔi lá ƃôi é gɔlɔ lá tɛ-sãa lɔ́ɔlu mɛi feerɛi kula naa.”

⁶Ŋá ƃála-loŋ tɔnɔ kàa tɔɔ ni gâloŋ see-sɛŋ da vúlu-sãa náaŋ é pɛlɛ ǹúu-pɔlɔ-ŋai dîa díloai. È kɛ̀ tɔɔ ni naa yɛ̂ɛ ǹyaa ƃe dí bàa, míla kɛ́ ƃo ŋ̀ûa lɔ́ɔlu mɛi feerɛ, ŋɛi-kao kɛ́ ƃo lɔ́ɔlu mɛi feerɛ, nyíi-ŋai díkaa a mɔ̂leŋ lɔ́ɔlu mɛi féerɛi Ɣâla è dítɛ̀ɛ ǹɔii kélee sui.

⁷Nya ƃe è li é gɔlɔi kúla ǹúui láa-mii-yee ŋá nyíi kɛ̀ see ni gâloŋ-see-sɛŋ ŋái.

⁸Tãi è gɔlɔi kûla la ǹyêei, vúlu-sãa náaŋ da ǹúu-pɔlɔ buu feerɛ kao náaŋ dí tòo M̀ála-loŋ kɔ́ɔ mu, ǹúui kélee kɔnîŋ kɛ́ ƃo díyêei da gôo-pane-ŋa, kereŋ-sɛŋ kúŋ nɛ̃ɛ kɛ́ ƃo dísu, nyíi gáa a Ɣâla-ƃela Díɣâla-fɛliɛɛi.

⁹Ǹya ƃe dí kɛ̀ wule nina toôi, díyɛɛi, “Ímaa nɛɛ̂i a gɛɛ í gɔlɔi siɣe, í gɔlɔ lá-tɛ-sãai kúla ńâ. Kpɛ́ni fêi, dí ípàa, ya núu-kpune ŋuŋ ma ƃó a íŋãai Ɣâla mɛni ma, da kûla nuu-suu kélee su, sii-woo kélee su, da núu kélee, é pɛ́lɛ lɔii-ŋûŋ kélee ma.

¹⁰Ya díkɛ a Kúɣâlai ŋɔkâloŋ-laai su-ƃela da ŋɔsâla láa soŋ-ƃela kpaya-kpaya, ǹyaŋ da pâi kɛ̂i ǹɔii mɛi.”

¹¹Ŋá nàa kàa, ŋa ɣâla-taa-kela támaa wóo mɛni dítinaŋɔɔ gâloŋ-see-sɛŋ kɔlɛ ma da vúlu-sãai é pɛlɛ ǹúu-pɔlɔ-ŋai dîa. Díkelee dí kɛ̀ a wála puu támaa seêi wála puu támaa da wála támaa seêi wála támaa.

¹²Dí kɛ̀ m̀ôi a díwoo su kɛ́tɛ, díyɛɛi, “M̀ála-loŋ dí bàai, maa nɛɛ̂i a gɛɛ é wala-wala sɔlɔ ƃó, tɔɔ-laa, táre, wála-wala, ƃaa-kɛ-maa, fólo-laa, é pɛlɛ lûwa ma!”

¹³Ǹyaŋ fúlu-sɛŋ kélee gáa Ɣâla-taai, da diai díkaa ǹɔii mai, kpaa máŋ mu-perei, da diai kélee díkaa yúo sui, é pɛlɛ dísu-sãa kélee dîa, ŋá díwoo mɛ̀ni díkɛ mò, díyɛɛi, “Lûwa da ƃaa-kɛ-maa, da fólo-laa, é pɛlɛ wála-wala ma dí kɛ́ ǹúui ma gáa see ni gâloŋ see-sɛŋ ŋái, da M̀ála-loŋ wɔlɔ-wɔlɔ da wɔlɔ-wɔlɔ!”

¹⁴Nya ƃe vúlu-sãa náaŋ dí mò, díyɛɛi. “É kɛ́ ti!” Ǹyaŋ ǹúu-pɔlɔ-ŋai dí too ǹɔii ma dí vɛli.