Read Kpelle M̀ɛni-lɛɛi 6 Bible Online

M̀ɛni-lɛɛi 6 - Kpelle bible

M̀ɛni-lɛɛi 6

¹È kɛ̀ tí, ŋá M̀ála-loŋ kàa é gɔlɔ lá tɛ-sãa lɔ́ɔlu mɛi féerɛi dɔnɔ lá ƃo. Ŋá vúlu-sãa náaŋ dɔnɔ wóo mɛni yɛ̂ɛ ŋele-gbana tíŋ, nyɛɛi, “Pá!”

²Ǹya ƃe, ŋá soo kole tɔnɔ kàa. Ǹúui kɛ̀ see ni mɛi kerâŋ è kɛ̀ ǹyêei. Dí kâloŋ ƃɔrɔ tɛ̂ɛ bɔ, gɛ li yɛ̂ɛ yee-tɛɛ maa-nuu a gɛɛ é yee-tɛɛ-maa kɛ́.

³Tãi è gɔlɔ lá tɛ-sãai veerɛ-ɣelei lá ƃò lai, ŋá vúlu-sãai veerɛ-ɣelei wóo mɛ̀ni, nyɛɛi, “Pá!”

⁴Nya ƃe soo da kpɛni è kùla gɛ fólo kpɔ́ mu kpɔ̂luɔ. Ǹúui kɛ̀ see ni mɛi, dí nɛ̀ɛ naa a gɛɛ é lii-sêe kula ǹɔii su a gɛɛ núu-kpune é gîe-ni paa. Ǹya ƃe dí ƃóa-sɔkpɔ kɛ́tɛ tɛ̀ɛ bɔ́.

⁵M̀ála-loŋ è ŋɔnɔ gɔlɔ lá tɛ́-sãai zaaƃa-ɣelei lá ƃò. Ǹya ƃe ŋá vúlu-sãai zaaƃa-ɣelei wóo mɛ̀ni, ǹyɛɛi, “Pá!” Ŋá soo tɛi tɔnɔ kàa. Ǹúui kɛ̀ see ni mɛi, sɛŋ-kɔɔŋ-sɛŋ è kɛ̀ ǹyêei.

⁶Ŋá sɛŋ da wóo mɛ̀ni yɛ̂ɛ nyíi kùla vúlu-sãa náaŋ samai, nyɛɛi, “Wîi pãi tɔnɔ káa a sêleŋ feerɛ. Bâle pãi saaƃa kɛ́ ƃo a sêleŋ feerɛ, kɛ́lɛ, káfe wulɔ kara da ŋwã̂ai!”

⁷Tãi è gɔlɔ lá tɛ-sãai náaŋ-ɣelei lá ƃò lai, ŋá vúlu-sãai náaŋ-ɣelei wóo mɛ̀ni, nyɛɛi, “Pá!”

⁸Nya ƃe, ŋá soo kpálaa tɔnɔ kàa. Ǹúui kɛ̀ see ni mɛi, ǹáa è kɛ̀ a Saa, Saa-taa kɛ́ ƃò bôlu. Ǹyaŋ dí wála-wâla tɛ̀ɛ dípɔ ǹɔii gbua-loŋ mɛi a gɛɛ dí núu páa a ƃóa-sɔkpɔ, puru, kɔlɔ-fela, da lɔɔ-fɛnɛ-sãai.

⁹Tãi è gɔlɔ lá tɛ-sãai nɔɔlu-ɣelei lá ƃo lai, diai dí wɔ́lɔ dípàa Ɣâla wòo ƃô mɛni ma da zere-faai dí gɛ̀i, ŋá dímɔ̂leŋ-ŋai kâa Ŋ̀âla-teƃelei mu.

¹⁰Dí làɣi a díwoo su kɛ́tɛ, díyɛɛi, “Zɛŋ kélee Mɛi-nuui, nyíi maa waai, gɛ ƃo a tɔ̃yâ-nuui, a pâi kɛ̂i a tãi ɣɛɛlu í lɛ́ɛ pâi mɛni ŋá têei í kúŋãai maa-tɔŋ kpɛ́ diai dîa díkaa ǹɔii sui?”

¹¹È kɛ̀ tí, dí yokpo kole tɛ̀ɛ dípɔ tɛi-tɛi, dí m̀ó dîa a gɛɛ dí dífii tɔɔ niî a da-loŋ, é lɛ́ɛ la zu díƃarâa-tii kɛ-ƃelai dí kɔni láa é fɛ́ɛ, nyíi-ŋai da pâi dípaâi nɔ́ yɛ̂ɛ berei dí dia máŋ dípàa lai.

¹²Ǹaa kɛ́ɛ tíi, M̀ála-loŋ è gɔlɔ lá tɛ-sãai mɛi da-ɣelei lá ƃò. Ŋá ǹɔii kâa é kpɛ̃lîŋ a zu kɛ́tɛ. Vóloi è kɛ̀ a dɛi-ɣɛɛ yɛ̂ɛ seɣe nyíi dí gbɛ̀tɛ a ƃɔrɔ-saa tɛi, ŋ̀áloŋ lá fɛ́ɛi è kɛ̀ yɛ̂ɛ ŋãa.

¹³Bɛmɛlɛŋ-kao-ŋai kɛ̀ ŋelei sui, dí tòo ǹɔii ma yɛ̂ɛ fii-wuru ƃá à pù a sama-tãi, tãi fãa kɛ́tɛ a dùmo lai.

¹⁴Ŋ̀ele-kɔlɔŋ è tɛ̀ɛ yɛ̂ɛ da kɔlɔ kpîniŋ, ǹyée-ŋai kélee da dîŋ-ŋai kélee dí siɣe dítɔɔ̂i.

¹⁵È kɛ̀ tí ǹɔii su-kaloŋ-ŋai, ǹúu kpaya-kpayai, gɔkuluƃa-ŋai tuɛ-ƃelai, dɔɔ-ƃelai da ŋwála-wala-ƃelai, ǹûai kélee, luɛ, ǹúui vé a luɛi, dí díkpîŋ lòo loa-ŋa su da ǹyée-ŋai su gɔni-ŋai sama.

¹⁶Díkɛ ǹyée-ŋai tòli da gɔni-ŋai, díyɛɛi, “Ka too kûa ká kúloo kú siɣe ǹúui ŋɛ́i gáa see ni gâloŋ-see-sɛŋ ŋái, da M̀ála-loŋ ŋɔlii-ŋwanai.

¹⁷Kpɛ́ni fêi, dílii-ŋwâna-ɣele kɛ́tɛi a pá, ǹyaŋ gbɛ̂ɛ ƃa pɔ̂ri tɔɔ̂i nàa tuɛi?”