Read Kpelle M̀ɛni-lɛɛi 9 Bible Online

M̀ɛni-lɛɛi 9 - Kpelle bible

M̀ɛni-lɛɛi 9

¹Ŋ̀âla-taa-kela-ŋai ǹɔ́ɔlu-ɣelei è ŋɔtúrii fɛ̂ɛ, ǹyaŋ ŋá pɛmɛlɛŋ-kao kàa é tóo ǹɔii ma nyíi kùla Ɣâla-taai. Ǹóa kɛ́tɛi nyíi gbóŋ koyaŋ fé mai dí ǹá-kîi tɛ̂ɛ bɔ.

²Ǹóa kɛ́tɛi nyíi gbóŋ koyaŋ fé mai, è ǹá ƃò, ǹyaŋ luru è kùla naa yɛ̂ɛ kpaa-tuluŋ kɛ́tɛ, voloi da vãa-laɣii dímaa è kpìni a ǹurii kùla ǹóai tí sui.

³Goto-ŋa dí kùla ŋurii sú dí pá ǹɔii su. Dí wala-wala tɛ̀ɛ dípɔ yɛ̂ɛ ŋwála-walai gáa zɛŋkpɛ̂ yêei ǹɔii mai.

⁴Dí mò dîa a gɛɛ dífe lɛɣɛ ǹɔii su-kala kélee da ma, kpaa máŋ tuma-laa-sii kélee, kpaa máŋ wúru da kélee, kɛ́lɛ, fɛ̂ɛ nɔ́ diai Ɣâla ŋɔkɔlɔ lá tɛ-sɛŋ da fé kɛ́ ní dítôŋ lái.

⁵Dí dílɛ̀ɛ naa a gɛɛ dí díŋɛi maa pene ɣáloŋ lɔ́ɔlu yée mu, kɛ́lɛ, dífe dípàa, ǹyaŋ díŋɛi-maa-penêi è kɛ̀ nɔ́ yɛ̂ɛ berei zɛŋkpɛ̂ a núu ƃòŋ a sôli lai.

⁶Maa-ɣele-ŋai tí, núu-kpune a pâi saa kɔ̂rii, kɛ́lɛ, vé pâi gaâi. Da pâi ŋ̀wɛ̂lii dí saa, kɛ́lɛ, saa kɛ́ pû dîa.

⁷Goto-ŋai díkɛ yɛ̂ɛ soo-ŋa ƃe díkpîŋ kpɛtɛɛ̂i kɔ́-mɛni ma. Sɛŋ da è kɛ̀ díŋuŋ mâ gbɛ̀tɛɛ yɛ̂ɛ gôo-ƃɔrɔ. Díŋɛi kɛ́ɛ yɛ̂ɛ núu-kpune ŋ́ɛi.

⁸Díŋuŋ-leɣa è kɛ̀ yɛ̂ɛ nɛnî ŋuŋ-leɣa. Dínyiŋ kɛ́ ƃo yɛ̂ɛ yala-sulu ńyiŋ.

⁹Díkala è kɛ̀ dîa yɛ̂ɛ kɔli-kalaŋ. Díkoôŋ su-tìŋ kɛ́ɛ yɛ̂ɛ soo-sia-keleŋ támaa tãi zoo-ŋai da kɛ̂ liî la kɔ́ ma a kîrɛi.

¹⁰Díwoŋ káa dîa yɛ̂ɛ zɛŋkpɛ̂-ŋa díkɛ núu ƃòŋ, ǹyaŋ dí núu ŋɛ́i maa-pene wala-walai gáa díyêei ɣáloŋ lɔ́ɔlu yée mui, gáa díwoŋ su.

¹¹Ǹóa kɛ́tɛi nyíi gbóŋ koyaŋ fé mài ŋɔkélai káa dímɛi a díkâloŋ. Ǹáa ƃa Abadɔŋ Ibulu-wooi su. Kɛ́lɛ, à kɛ̀ a Gurii-wooi su, ǹáa ƃa Apoyɔŋ.

¹²Gbaloi maa-ŋuŋ a tɛɛ. Ka gáa, kpâlo feerɛ káa niî pôlu, díkaa pâi.

¹³È kɛ̀ tí, Ŋ̀âla-taa-kela-ŋai mɛi da-ɣelei è ŋɔturii fɛ̂ɛ. Ŋá wóo mɛ̀ni é kúla zua-míla náaŋ su, nyíi-ŋai kɛ̀ gôo-Ɣala-teƃelei ma Ɣâla ŋ́ɛi-tuɛi.

¹⁴Ŋ̀óoi è m̀o Ŋ̀âla-taa-kela-ŋai mɛi da-ɣelei mâ nyíi durii è kɛ̀ ǹyêei, nyɛɛi, “Ŋ̀âla-taa-kela náaŋ nyíi-ŋai díɣiriɛi ǹyá kɛ́tɛi lá da kɛ̂ ma Yufeletii, í tée dîa dí li.”

¹⁵Nya ƃe dí ƃò Ŋ̀âla-taa-kela náaŋ dîa dí lí, nyíi-ŋai kɛ̀ naa a díkpɛtɛɛ aƃai su, ŋele-kuui su, ŋ̀áloŋ su, da góraŋ su a gɛɛ dí núu-kpune kpulu-loŋ paai.

¹⁶Ŋá mɛ̀ni a gɛɛ gɔ-kuluƃa-ŋai kɛ̀ zoo-ŋai mɛi díkɛ lí gɔ́i mai, dí kɛ̀ a núu wála puu seêi wála puu gîei feerɛ.

¹⁷Ǹyaŋ bere-sii ŋí su ƃe ŋá zoo-ŋai kâa la ŋázĩ̂ai su. Diai kɛ̀ dísiâi, gɔli-kalaŋ kɛ̀ díkeŋe lái, è kɛ̀ kpɔlûi yɛ̂ɛ ŋɔŋ, gɔlɔ kɛ́ɛ yɛ̂ɛ gɔnii da kɛ̂ ma safayai, gɛ́ɛ yɛ̂ɛ sɔɔfɔ, zoo-ŋai kpîŋ ŋuŋ è kɛ̀ yɛ̂ɛ yala-sulu ŋuŋ, ŋɔŋ, luru, da sɔɔfɔ, díkɛ kùla díla.

¹⁸Mɛni-kpɔlu-sii saaƃai ŋí ƃe dí núu-kpune gbulu-loŋ pàa la, ǹyaa ƃa ŋɔŋ, luru, da sɔɔfɔ kɛ́ɛ kulâi díla.

¹⁹Kpɛ́ni fêi, zoo-ŋai díwala-wâlai káa díla da díwoŋ su. Díwoŋ káa yɛ̂ɛ kali-ŋa, díŋuŋ kɛ́ ƃò dîa. Díwoŋ ƃé da núu ŋwàna la.

²⁰Núu-kpune kpeli-ŋai, nyíi-ŋai dífe dípaa ni a mɛni-kpɔlu-sii saaƃai ŋí, dífe dílii pene ni dítii-ŋai dí gɛ̀i mɛ̂ni mà, kpaa máŋ dífe kpera ni nyînaŋ nyɔ́mɔɔ-ŋa fɛliɛ ma da ŋ̀âla-pɔɔkɔ̂ŋ-ŋai nyíi-ŋai díkpɛtɛ a gôo, káne, ƃara, kɔni, da wurii, nyíi-ŋai dífa kwaa kâa, kpaa máŋ dífa mɛni mɛ̂ni, kpaa máŋ dífa siai.

²¹Ǹûai ŋí dífe dílii pene ní núu-paa mɛni ma, kpaa máŋ wulu mɛni ma, kpaa máŋ wulu-wulu kɛ-mɛni ma, kpaa máŋ ŋuma-kɛ-mɛni ma.