Read Kpelle Lûfi 3 Bible Online

Lûfi 3 - Kpelle bible

Lûfi 3

¹Lûfi ǹyura Neomi è mò mà ǹyɛɛi, “Ńoŋ-nɛnii, gáa a sɛŋ ŋá íkɛ̂i kɔ́ri íkɛ ƃò naa.

²Kúkaayɔɔi Bôa ŋɔtíi-nɛyãai ká tí ka dia-ni ká kɛ̀ naai. A pâi ŋɔmɔlɔŋ fɛ̂ɛi sâa a gbínii mɔlɔŋ táŋ kerei mu.

³M̀ɛni ma, íwaa í wúlɔ sía yâ í seɣe lɛ́lɛɛ tóo yâ í lí m̀ɔlɔŋ táŋ kerei mu. Yà lì naa, ífe niî íkpîŋ lɛ̀ m̀a é lɛ́ɛ la zu é kpɛ́ɛ a ǹáa miɛ́ɛ é gbele.

⁴Ƃɛ́i a pâi lâai naai, ǹaa káa, à làa í lí í zeɣei síɣe gɔ́ɔ mɛi í láa gɔlɛ. A pâi m̀ɛnii ƃôi yâ a gɛ́ɛ í gɛ́i.”

⁵Lûfi è ǹyûara wóo su tòo ǹyɛɛ m̀ai, “M̀ɛnii kélee yâ mò ḿâi ŋa pâi gɛ̂i.”

⁶Nya ƃe è lì m̀ɔlɔŋ táŋ kerei mu é gɛ́ nɔ́ yɛ̂ɛ berei ǹyûara è mò la mai.

⁷Bôa kɛ́ɛ ǹáa míi a gbele ǹíi láai, è lì é láa mɔlɔŋ kɔlɔŋ kɔlɛ gɛ́ nyìi. Nya ƃe Lûfi è sìa kpɔ́ sĩi-sĩi é pá é gɔ́ɔ mɛi síɣe é láa gɔlɛ.

⁸Gbínii sáma seriɛi, Bôa è ŋ̀ɛ́i la ƃò é tínaŋ é ǹɛnîi káa lâani gɔ́ɔ kɔlɛ,

⁹ǹyɛɛ ḿâi, “Gbɛ̂ɛ ƃa yá?” Ǹyɛɛ m̀ai, “Lûfi ƃa ńyãa, ńyãai a íyee mu-nɛnii. Gáa a sɛŋ í ḿɛi káa, kpɛni fêi, íkaa a ŋ́gaayɔɔ kpîŋ. M̀ɛni ma ŋ́gula a nɛnî.”

¹⁰Bôa ǹyɛɛ m̀ai, “Kúnuu-namui é lûwa láa yâ, ńoŋ-nɛnii. M̀ɛni lɛ́lɛɛ gbɛɛ ŋái ŋí ƃa gɛ́ ḿîi ǹuu-laai sui gɛ̂tɛi é tɛ́ɛ nyíi ma í gɛ̀ a maa-ŋuŋ. Nyaa ƃa ífe lí ní ǹyaŋkpa da pɔ́-naa nyíi-ŋai dɔɔ̂i kpaa máŋ gôloɔɔi.

¹¹Mɛni ma, ńoŋ-nɛnii, ífe yào. M̀ɛnii kélee ƃa ḿarê kɛ̀ m̀ɛni mai, ŋa pâi gɛ̂i yɛ̂, kpɛ́ni fêi, ḿarâa taa-ƃelai kélee dí gɔ́lɔŋ a gɛ́ɛ íkaa a nɛní lɛ́lɛɛ.

¹²Gáa a tɔ̃yâ a gɛ́ɛ ŋ́gaa a íkaayɔɔ kpîŋ. Kɛ́lɛ núu da káa naa gáa a íkaayɔɔ kpîŋ é tɛ́ɛ ḿâ.

¹³Nyii ƃɛ́ sâa. Tínaa ɣele-wala kwa pâi gâai à kɛ̀ a pâi ímaa mɛ̂ni siɣêi a ŋ̀ûa-kpiri. Kɛ́lɛ à wàla gɛ́, gɛ̀ ní ŋa pâi ímaa mɛ̂ni siɣêi a ŋ́ûa-kpiri tãi nɔ́ Kúnuu-namui káa la naai. Láa é lɛ́ɛ la zu ɣele é ƃɔ́.”

¹⁴Nya ƃe Lûfi è làa Bôa kɔlɛ é lɛ́ɛ la zu ɣele é ƃɔ́. Kɛ́lɛ è m̀u sìɣe a ɣele ƃɔi kpini é lí, kpɛ́ni fêi, Bôa fé kɛ́ ní ŋ̀wɛ̂lii ǹûa dí gɔ́lɔŋ a gɛ́ɛ nɛnî da è lì bɔ́-naa m̀ɔlɔŋ táŋ kwaai ma.

¹⁵Bôa è mò ǹyɛɛi, “Pá a íseɣei í bɛ̀lɛ.” È zeɣei pɛ̀lɛ, Bôa è mɔlɔŋ pãŋ buu lɔ́ɔlu kɔ̀ɔŋ é bú zu é lí la.

¹⁶Zariɛɛ ǹyûara ma ǹyɛɛ m̀ai, “Nàa mɛni káa léŋ ńoŋ-nɛnii?” M̀ɛnii kélee ǹalôŋ è gɛ̀ Lûfi mii è zu kùla m̀a.

¹⁷È mò m̀a ǹyɛɛi, “Ǹyaa ƃé m̀ɔlɔŋ pãŋ buu lɔ́ɔlui ŋí tɛ̀ɛ ḿbɔ, ǹyɛɛ fé pà a ńyee folo ípɔ-naa.”

¹⁸Nya ƃe Neomi è ŋ̀óo su tòo ǹyɛɛi, “Ńoŋ-nɛnii, ílii kpéle lɛ́ɛ la zu í gáa berei m̀ɛnii ŋí a pâi kɛ̂i lai, kpɛni fêi, ǹalôŋ fé pâi víi tɔɔ̂i a zu kôyaa gɛ́ ítòli ŋɔ́nɔ.”