Read Kpelle Samia Maa-ŋuŋ 10 Bible Online

Samia Maa-ŋuŋ 10 - Kpelle bible

Samia Maa-ŋuŋ 10

¹Gɛ́ɛ díi kɛ́-nuui a líi, Samia è ɔle wulɔ sane loŋ sìɣe é ŋ̀úlɔ pú Sɔ̂ɔ ŋûa é ǹá-gbɔ see ma ǹyɛɛ m̀ai, “Yâwɛɛ a ísiɣe zu a ŋɔnûai láa túɛ-nuu da dímɛi nuu.

²Yà lì sâa, ya pâi sinaa feerɛ kâai Leesa ƃolôŋ lá Zeeza kɔlɛ Bɛŋsima lɔii kpiniŋ su. Da pâi môi ya dîyɛɛi, ‘Zoo-faleŋ-ŋai í kɛ̀ díkɔ̂rii daâ díkaa. Kɛ́lɛ ínâŋ aâ nia dímaa mɛni ma. Gáa gíli ŋá-siâi ímaa mɛni ma a ŋ̀ánaa. Gáa gíli ŋá-siâi berei a pɔri gɛ̂i la é íkâai.’

³Ye tɛɛ dîa í lí é lɛ́ɛ la zu í seri ŋ̀úru ƃɔlɔ maa waai ma nyíi gáa Tabɔ. Ya pâi kpakolo saaƃa kâai berei ma díkɛ lì sâla kulâi Ɣâla ma Bɛtɛ. Ǹúui dɔnɔ a pâi kɛ̂i liî a ƃoli-lônii saaƃa, dɔnɔ kɛ́ lì a kpólo kane saaƃa. Sua-kɔlɔ sane láa fɛ́ɛ a ŋwã̂ai a zaaƃa ɣelei yêei.

⁴Dà pà da dílaa tì yâ, da pâi gbólo kanei veerɛ tɛɛ̂i ípɔ.

⁵Ǹaa pôlu ma, lí Gii-baa ƃɛ́i Felesia-ŋai da kɔ́ kɔ́-ƃelai díƃûui káa naai. Yà kɛ̀ pâi serîi daai su, yâ pâi Ɣâla ŋɔlóno kɛ́-ƃelai kpulu kâai naa díkɛ yèŋ da kûla ŋ̀âla fɛli kwaai ma. Dà kɛ̀ siâi, da pâi kɛ̂i tuɛ-mɛni ƃôi. Díƃarâai da pâi kɛ̂i dítuɛ pere díkɛ gɔnîŋ ɣàle, díkɛ gbuŋ-gbuŋ tua, díkɛ ŋɔ́nɔ ƃɔ̀ɔ fɛ̂ɛ.

⁶À kɛ̀ tí, Ǹuu-namui ŋɔmɔlêŋ a pâi pâi kpɔ́ ímɛi a m̀aa félaa. Ǹyaŋ a pâi íkɛ̂i kpɔ́ a núu da kpɛ́ni. Nyíŋi à kɛ̀, yâ pâi nâa kɛ̂i tuɛ-mɛni ƃôi ka dîa-ni.

⁷M̀ɛni-ŋai ŋí da kɛ̀ a yá, ye m̀ɛnii kélee kɛ́ nyíi pâi kɛ̂i a ǹɛ́lɛɛ ímɛni mai. Ɣâla a pâi kpɔŋ ḿâa tɛɛ̂i ípɔ.

⁸À kɛ̀ tí, gɛ̀ ní lí tuɛ Geega. Ŋa pâi pâi naa. Ḿaa kpɛ́ŋ é lɛ́ɛ la zu ŋá pá naa. Ye lɛɛ naa é lɛ́ɛ la zu ǹɔ́ɔ kûui é kpɛ́ɛ. Ŋa pâi pâi naa ŋá sama-sɛŋ tɛɛ, ŋá sâla kula Ǹuu-namui ma. À kɛ̀ tí, ŋa pâi m̀ɛnii ƃôi yâ m̀aa nɛ̃ɛ̂i í gɛ̂i.”

⁹Sɔ̂ɔ kɛ́ɛ a Samia lɛ̀e naa gɛ́ lii, Ɣâla è Sɔ̂ɔ maa fàleŋ. Sɔ̂ɔ ŋɔkili ŋa-siâi è nâa kɛ̀ a da kpɛ́ni M̀ɛni-ŋai Samia è mò m̀ai ŋàa-see è kɛ̀ a maa ɣele tɔnɔi tí.

¹⁰Sɔ̂ɔ seriɛ́ɛ Giibai, Ɣâla ŋɔlóno kɛ́-nuu kpului è pà bɔ́-naa. Nya ƃe Ɣâla ŋɔmɔlêŋ è pà gbonôi kpɔ́ a m̀aa félaa é pɛ́lɛ tíi kɛ̂i la. È lɛ̀ɛ tɔɔni naa gɛ́ tuɛ-mɛni ƃò dísama.

¹¹Diai kɛ̀ a gɔ́lɔŋɔɔ a bɔlɔi dí gàa la gɛ́ m̀ɛnii ŋí kɛ̀. Dí díkîe-ni marê kɛ̀ dîyɛɛi, “Lé ƃé Keesi ǹóŋ kɛ̂i ŋí? A kɛ́ a Ɣâla ŋɔlóno kɛ́-nuu ƃe ŋí?”

¹²Ǹúui dɔnɔ è dímarê kɛ̀ ǹyɛɛi, “Va pɔri kɛ̂i tí? Sɔ̂ɔ tɔɔ̂i kɛ̂tɛi máŋ é tɛ́ɛ Ɣâla ŋɔlóno kɛ́-ƃelai nyíŋi-ŋai dîa.” Nyíŋi ƃé gɛ̀ ǹûai díkɛ mò dîyɛɛi, “Sɔ̂ɔ kɛ́ pere è kɛ̀ léŋ gɛ́ kɛ̀ a Ɣâla ŋɔlóno kɛ́-nuu?”

¹³Sɔ̂ɔ kpɛɛ duɛ-mɛni ƃóɔɔi, è lì ŋ̀âla fɛli kwaai ma.

¹⁴Naa kɛ́ɛ tíi, Sɔ̂ɔ gêra è pà é m̀arê kɛ́ ǹyɛɛ m̀ai, “Mí ƃé íkɛ naai?” Sɔ̂ɔ ǹyɛɛ m̀ai, “Kúkɛ̀ zoo-faleŋ-ŋai kɔ̂rii. Gɛ́ɛ kúfe kɛ́ ní díkâai, kú lì a gɛ́ɛ kú lóno Samia pɔ́.”

¹⁵Sɔ̂ɔ ǹyɛɛ gêra mai, “È kɛ̀ kâa lé?”

¹⁶Sɔ̂ɔ ǹyɛɛ m̀ai, “È kɛ̀ kûa daâ zoo-faleŋ-ŋai káa.” Kɛ́lɛ vé m̀ó ní ma a gɛ́ɛ Samia aâ ǹɛ́ a kâloŋ.

¹⁷Nya ƃe Samia è Eezuɛ-ƃela kélee tòli Mêepa a gɛ́ɛ da Ǹuu-namui ni dí kɔyâŋ naa.

¹⁸Ǹûai kélee dí pà, ǹyɛɛ dîai, “Ǹuu-namui nyíi gáa a Eezuɛ Ŋɔɣâlai è mò ḿâ a gɛ́ɛ ŋá doo kákili ŋá a gɛ́ɛ ǹyaa ƃé kákùla Ize-ŋai da ǹɔii ŋuŋ-ŋai da kpɛ́ni-ŋai yêei kɛ̀ a dítɔɔ kâai.

¹⁹Ɣâla ƃé kákula m̀ɛni kpɔ̂lu-ŋai su da m̀aa mɔ̃lɛ-laai. Kɛ́lɛ ká káyee kùla mù ká kɛ́ kâloŋ da kpɛ́ni mare kɛ̂ɛ kɛ̂i. M̀ɛni ma ka pá ka kákaa laai su-ƃelai kélee ŋ̀âla fɛli kwaai ma a gɛ́ɛ Ǹuu-namui é kákâloŋ lɛ́.”

²⁰Samia è ǹûai tòli dísuu ma tɛi-tɛi díkɛ pà ŋ̀âla teƃelei ma. Nya ƃe Ǹuu-namui è Bɛŋsima ŋɔsuui siɣe.

²¹Ǹaa pôlu ma, Samia è pà a Bɛŋsima ŋɔsuui-ƃela yɛ̂ɛ berei díkaa-laai káa lai. Nya ƃe Ǹuu-namui è Maaturi ŋɔkáa-laai siɣe. È kɛ̀ tí, dí Keesi ǹóŋ-surɔŋ Sɔ̂ɔ siɣe zu. Ǹaa káa ǹûai dîɛi, dífe Sɔ̂ɔ káa ní. Vé kɛ́ ní naa.

²²Ǹûai dí Ɣâla fɛ̀li dîyɛɛ m̀ai, “Kúnuu-namui, Sɔ̂ɔ kɔɔ?” Ǹyɛɛ dîai, “Sɔ̂ɔ káa gbóŋ-toloŋ-ŋai pôlu.”

²³Dí kîrɛ sìɣe dí lí dí pá a Sɔ̂ɔ dí dɔɔ gbɔŋ sáma. Ǹyaŋ dí gàa a gɛ́ɛ dôŋ è kɛ̀ a dɛɛ ǹûai kélee dîa.

²⁴Nya ƃe Samia è mò ǹûai dîa ǹyɛɛi, “Ka naloŋ káa nyíi Ǹuu-namui a ziɣe, m̀óloŋ maa fê ká sáma!” Nya ƃe ǹûai kélee kpɔ́ dí làɣi dîyɛɛi, “Gâloŋ é kɛ́ ɣele ma wɔ́lɔ-wɔlɔ!”

²⁵Nya ƃe Samia è gâloŋ maa mɛni da dûa pere lɛ̀ ǹûai dîa é gélee pɔ̃yɛ kɔlɔ ma é lɔ́ la Ŋ̀âla fɛli pɛrɛi dɔnɔ mu é ǹâai kɛ́ Ǹuu-namui fɛli kwaa-ŋai dɔnɔ ma. Nya ƃe Samia è mò ǹûai dîa a gɛ́ɛ dí lí dí pɔ́ taai tɛi-tɛi.

²⁶Ɣâla è ǹyaŋkpai da-ni líi kùla a gɛ́ɛ díkɛ Sɔ̂ɔ pôlu. Dí lɛ́ɛ bôlu da dia-ni dí lí pôlu bɔ́-taai Giiba.

²⁷Kɛ́lɛ ƃoo-ƃela da-ni nyíi-ŋai kɛ̂i fé ní dîai dí mò dîyɛɛi, “Núu kɛ́ɛ yɛ̂ɛ Sɔ̂ɔ a pɔri kúkulâi léŋ kúkpɔara-ƃela yêei?” Ǹûai ŋí dífe kɛ́ ní ŋ̀wɛ̂lii a gɛ́ɛ Sɔ̂ɔ é kɛ́ a díkâloŋ. Mɛni ma dífe pá ní mì a sama-sɛŋ. Kɛ́lɛ Sɔ̂ɔ è lɛ̀ɛ a mɛi saa.