Read Kpelle Samia Maa-ŋuŋ 12 Bible Online

Samia Maa-ŋuŋ 12 - Kpelle bible

Samia Maa-ŋuŋ 12

¹Samia è mò Eezuɛ-ŋai dîa ǹyɛɛi, “Ŋaâ nâa kâloŋ tɛ̀ɛ kápɔ yɛ̂ɛ berei ká ŋ̀wɛli lai.

²Ká gɔ́lɔŋ berei ŋá kɛ̀ la kálaa túɛ é síɣe tãi ma ŋá kɛ̀ la a ǹyaŋkpai. Ǹyaŋ ŋa gbâa pɔlɔ, ŋ́uŋ poa, ńônii-sinaai da nâa ƃɔlɔ da kɛ́ díkpɔɔi yee ma. Ka gáa berei kákâloŋ a pâi kámɛi kâai lai.

³Ŋa kámarê kɛ̂i. Ŋa tá niŋa sîrɛ, kpaa máŋ wɛlɛ-sôo kula káta yêei a wála-wala laa? Ŋa tá mɛni ŋánaa kɛ́ a núu da kpaa máŋ ŋá yee-pɛlɛ ǹá-sɛŋ da soŋ núu da yêei a gɛ́ɛ ŋá mɛni ŋá-tee a wôya pere? Ká ŋ́oo su too a gɛ́ɛ Ǹuu-namui da gâloŋ nyíi aâ zìɣe zui da pɔri káwoo mɛnii. À kɛ̀ ŋa tá m̀ɛnii sîi-ŋai ŋí da kɛ́ ní a káa, ŋa pâi bɔɔ tɔ̂ɔ fêi.”

⁴Dí ŋ̀óo su tòo dîyɛɛ m̀ai, “Kpao, ífe tá kúfili ní pere sîi da kélee da su!”

⁵Samia ǹyɛɛ dîai, “Ǹuu-namui da ŋɔkâloŋ aâ ziɣei díkaa a káwooi ŋí maa sêre-ŋa.” Dîyɛɛ m̀ai, “Tɔ̃yâ ká tí.”

⁶Samia è mò dîa ǹyɛɛi, “Ǹuu-namui é kánûa pɔlɔ-ŋai kùla Ize lɔii su é Mose da Eelɔŋ siɣe a dílaa túɛ-ƃela.

⁷Ǹuu-namui a pâi kɛ̂i a kámɛni-saa ƃó-nuu. M̀ɛni ma, kà tɔɔ ƃɛ́ ŋí ma ká káwoli tɔ́ɔ ŋá mɛnii-ŋai tóo kákili ŋá berei Ǹuu-namui a pâi káŋuŋ ma ƃôi ka kákpɔara-ƃelai yêei ka kánuu pɔlɔ-ŋai.

⁸Zeeka kɛ́ɛ a lí Izei, kánûa pɔlɔ-ŋai dí wɔ̀lɔ ma a gɛ́ɛ é kpɔŋ ḿâa tɛɛ dípɔ. È Mose da Eelɔŋ tɛ̀ɛ. Dí kánûa pɔlɔ-ŋai kùla Ize lɔii su dí pá a dia dí sée ǹɔii ŋí su.

⁹Kɛ́lɛ dí nìa ma. Nya ƃe gɛ̀ gɛ́ fàa ma a gɛ́ɛ Felesia-ŋai dí díyee mɛi ɣále. Môa kaloŋ da Sisara, nyíi kɛ̂ a Azɔ taa-lêei ŋɔkɔ́ kɔ́-ƃelai mɛi nuui dí kánûa pɔlɔ-ŋai yée mɛi ɣále.

¹⁰Naa pôlu ma, kánûa pɔlɔ-ŋai dí ŋɔ́nɔ Ǹuu-namui marê kɛ̀ a gɛ́ɛ é kpɔŋ ḿâa tɛɛ dípɔ. Dí mò ma dîyɛɛi, ‘Kwa sɔnyɔ̂ŋ kɛ́! Kwa kpera ífɛlîi, ƃíai a Kúnuu-namui kwa pɛ̀lɛ Bêe da Asitɔlɔ ɣala-ŋa fɛlîi. Kɛ́lɛ à kɛ̀ ƃa kúkùla kúkpɔara-ƃelai yêei, kwa pâi kɛ̂i ífɛlîi.’

¹¹Nya ƃe Ǹuu-namui è Giidíɔŋ tɛ̀ɛ da Bala, é pɛ́lɛ Samia ma a gɛ́ɛ dí káŋuŋ ma ƃó. Ǹyaŋ maa tãi tí yée mu, káfe kɛ́ ní yaôi a gɛ́ɛ núu da a pâi kɔ́ pɛlɛ̂i kâa.

¹²Gɛ́ɛ ká gàa a gɛ́ɛ Nãai nyíi kɛ̀ a kâloŋ Amɔŋ è kɛ̀ pâi kɔ́ pɛlɛ̂i kâai, berei máŋ Ǹuu-namui Káɣâlai è kɛ̀ la a kákâloŋ, ká mò ḿâ kâai, ‘Tãi da kpɛ́ni ká ŋí. Kwa kúkpɔɔi kaloŋ wɛ̂lii é kɛ́ kúmɛi kâai.’

¹³“Ká kâloŋ maa mare kɛ́ɛ kɛ̀, ǹyaŋ ká da sɔlɔ ƃó. Gáa tɔɔ nuu kásama lônii ma ƃɛ́ nyíi kákelee ka pɔri gâai. Kɛ́lɛ, tɔ̃yâ ma Ǹuu-namui ǹyaa kpîŋ ƃé gɛ̀ a kâloŋ kámɛni ma.

¹⁴À kɛ̀ ka kákâloŋ ni ka ŋ̀wɛ̂lii ká kɛ́ a Ǹuu-namui pôlu-ƃela, fɛ̂ɛ nɔ́ kákɛ vɛli, kákɛ m̀ɛnii kélee kɛ̀ a m̀o kâai. Káfe kɛ̀ a káwôlii kpɔ́lɔɔ!

¹⁵À kɛ̀ kà kɛ̀ a káwôlii kpɔ́lɔɔ, káfa Ǹuu-namui wóo mɛni, a pâi tɔɔ̂i kâa ka kákâloŋ ni máŋ.

¹⁶Ka tɔɔ nɔ́ ƃɛ́ ŋí ma, ka pâi Ǹuu-namui ŋɔwála-wala laai kâai.

¹⁷Kɛrɛe fólo láa ƃó ɣele ƃe ŋí? Ŋa pâi Ǹuu-namui marê kɛ̂i a gɛ́ɛ é ɣele-gbana too da tuna. Ǹyaŋ ka naa kàa, ka pâi gɔ̂lɔnii a gɛ́ɛ mɛni nyɔ́mɔɔ ká tí ká gɛi, a kákɛɛ Ǹuu-namui marê kɛ̂i kâloŋ mɛni ma kákpîŋ mɛni mai.”

¹⁸M̀aa ɣele tɔnɔi tí, Samia è Ɣâla fɛ̀li. Ǹuu-namui è gɛ̀ ɣele-gbâna é tóo da tuna. Díkelee kpɔ́ dí yào Ǹuu-namui ma da Samia.

¹⁹Dí mò Samia ma dîyɛɛi, “Ye kpera yɛ̂. Ye Ǹuu-namui Íɣâlai fɛ́li kúmaa mɛni ma! Kúfe wɛ̂lii kú sáa. Kwa sɔnyɔ̂ŋ támaa kɛ́ a bɔlɔ. Ǹyaŋ kú mɛni nyɔ́mɔɔ kɛ̀ a marê kɛ̂ɛ kɛ́ɛ kûɛ kpɔ́ɔi kaloŋ mɛni ma.”

²⁰Samia è díwoo su tòo ǹyɛɛ dîai, “Berei máŋ ká mɛni nyɔ́mɔɔ kɛ̀ lai, káfe yao. Kɛ́lɛ ka kɛ́ nɔ́ Ǹuu-namui pôlu a ɣele kélee. Ka kɛ́ nɔ́ tíi kɛ̂i mì a kálii kélee.

²¹Káfe Ɣâla pɔkɔɔŋ-ŋa fɛ̀li! Wála-wala-laa kélee kpɔ́ da fé díyêei. Dífe pâi kpɔŋ ḿâa kélee da tɛɛ̂i kápɔ, kpaa máŋ dí káŋuŋ maa ƃó kà tòo mɛni kpɔ̂lu da su.

²²Ǹuu-namui a kásiɣe zu a ŋɔnûa. A pâi kámɛi kâai a tãi kélee a gɛ́ɛ ǹûai dí ŋɔkɛ́tɛ-laai kâai.

²³À kɛ̀ ŋà kpèra Ɣâla fɛlîi kámaa mɛni ma, gɛ̀ ní ŋá Ǹuu-namui wóo píli! Ŋa pâi berei lɛ̂i kâa a ɣele kélee nyíi a pɔri gɛ̂i kátûa a ǹɛ́lɛɛ.

²⁴Kɛ́lɛ fɛ̂ɛ nɔ́ káa máŋ ká Ǹuu-namui wóo mɛni, ká kɛ́ vɛ̀li a kálii kélee. Fɛ̂ɛ nɔ́ mɛni kɛ́tɛi a gɛ́ kásamai gíli é lɛ́ɛ káŋa.

²⁵Kɛ́lɛ à kɛ̀ káa, kpaa máŋ kákâloŋ a mɛni nyɔ́mɔɔ kɛ̀, gɛ̀ ní Ǹuu-namui a pâi kákpɛ̂i kpɔ́ tɛi-tɛ́i.”